Say Matibay ya Ubak na Lukban

Say lukban et sakey ya baleg tan malamis ya prutas ya citrus. Anggano satan ya bunga na kiew et napelag manlapud 10 metro so kaatagey to, ag-itan nabuyak. Akin et ontan la katibay itan ya prutas?

Nonot mo pa: Adiskobre na saray researcher ya say amputi ya walad dalem na ubak na lukban et singa foam ya nankokonektaan iran selula tan wala ray espasyo to. Mas maawang iray espasyo diad baetan na saray selula ya asingger ed laman na prutas ya no iner et napno iratan na dagem odino likido. No napelag itan ya prutas ed dalin, say likido et magmaliw ya pinagka-foam to. Napitpit so ubak na lukban, insan onawet no ontama ed dalin kanian agnabuyak.

Sasalien na saray scientist no antoy resulta na inimbento dan foam ya gawad metal ya inalig da ed inkadesinyo na ubak na lukban. Panisiaan da ya sarag dan usaren itan ed panggawa na saray helmet parad saray motorista, proteksion na saray luluganan no nabangga, tan proteksion na sakey ya space station manlapud saray ombanggan meteoroid.

Antoy nibagam? Kasin say matibay ya ubak na lukban et resulta na ebolusyon? Odino walay nandesinyo?