Antoy Epekto na Gadyet ed Panagnonot Mo?

Dakel so kaukolan ya aralen na totoo—parad eskuelaan, trabaho, odino arum ni. Makatulong ed satan iray gadyet tan teknolohiya. Anggano akayurong tayo labat ed abung, maples tayo la natan ya makala na dakel ya impormasyon.

Dakel balet ed saramay sobray panguusar da ed gadyet so . . .

nanairapan ya man-concentrate ed babasaen da.
nabo-boring no bukbukor da.
agmakapampokus ed gagawaen da.

NO ANTOY DAPAT MON NAAMTAAN

Kabataan ya biin pambabansagen to ray gagawaen to. Mante-text ed cellphone to, ka-video call to ray kakaaro to, tan bansag ton uusaren so computer tan libro tod eskuelaan.

PAMBASA

Mas labay na arum ya basaen labat ya magano iray artikulo ta agda naanosan ya basaen iray andurukey ya artikulo.

Ayos labat so maples ya pambasa no kaukolan mo lan tampol so ebat ed sakey a tepet. Balet agnayarin ontan no talagan kaukolan mon talosan so babasaen mo.

ISIPEN PA: Kasin sarag mon sumpalen ya basaen iray andurukey ya artikulo? Akin ya mas dakel so naaralan mo no man-concentrate kad babasaen mo?—PROVERBIO 18:15.

PAMPOKUS

Iisipen na arum ya lapud teknolohiya et napambansag dan gawaen so duaran kimey. Alimbawa, sarag dan i-text iray kakaaro da legan iran manaaral. Pero no naapag so atension da, ompan agda laingen nagawaan ya duga iratan, lalo la no kaukolan day manpokus.

Kaukolan moy disiplina ed sarili pian makapampokus ka, pero makaaral ka no ontan so gawaen mo. “Mas daiset so lingom tan agka tanton na-stress,” so imbaga na kabataan ya si Grace. “Naaralan ko ya mas maong no man-concentrate ka ed sakey a gagawaen mo tan agmo pambabansagen iray gagawaen mo.”

ISIPEN PA: Kasin agmo natalosan tan natandaan iray aaralen mo ta walay arum ya gagawaen mod gadyet mo legan kan manaaral?—PROVERBIO 17:24.

PAMBUKBUKOR

Aglabay na arum ya totoo so manbukbukor kanian pian ag-ira na-boring, uusaren day gadyet da. “Agko kaya tay akayurong labat ya agnengnengen so cellphone o tablet ko, odino aga man-TV anggano 15 minuto labat,” so imbaga nen Olivia.

Balet diad tua, no bukbukor mo et pankanawnawam itan ya manisip na aralem—atan so kaukolan mon gawaen pian mas dakel so naaralan mo.

ISIPEN PA: No bukbukor mo, kasin uusaren mo itan ya pankanawnawa pian makapan-isip kan maong?—1 TIMOTEO 4:15.

NO ANTOY NAGAWAAN MO

ISIP MOY PANGUUSAR MOD GADYET MO

Panon mon usaren iray gadyet mo pian mas makaaral ka? Akin ya nayarin nadisturbo ka na satan no manaaral ka?

PRINSIPYOD BIBLIA: “Alwaran mo so makanan karunongan tan say abilidad a mannonot.”—PROVERBIO 3:21.

TEPETAY SARILIM . . .

Kasin nanairapan ak ya man-concentrate no andukey so babasaen ko diad gadyet ko? Anto ray mabetbet ya makakadisturbo ed siak?
Anto ray sarag kon gawaen pian nabawasan o naekal iratan ya pakadisturboan?

Tip: Diad gapo, salim ya basaen so sakey ni labat ya parapo, insan mo la kalkalnan aruman. Basam ya maksil tan aliwan maples pian makapampokus ka ed babasaen mo.

Anto ray kaukolan kon umanen pian napan-isipan kon maong iray binasak?

Tip: Usaren so 10 minuto ed panaaral mo pian rebyuen iray naaralan mo.

Kapigan ko kaslakan ya pambabansagen iray gagawaen ko?
Anto ray kaukolan kon umanen pian mas mainomay koy manpokus ed gagawaen ko?

Tip: No manaral ka, iyarawim iray nayarin makadisturbo ed sika pian makapampokus ka.

PRINSIPYOD BIBLIA: “Onggamor kay karunongan, onggamor kay pakatalos.”—PROVERBIO 4:5.