No Antoy Naaralan Tayod Biblia

Kasin anggapoy gapo na uniberso?

Oniay ibabaga na Genesis 1:1: “Diad gapo et pinalsa na Dios so tawen tan say dalin.”

Antis na manga 1950, panisiaan na dakel ya sikat a scientist ya say uniberso et anggapoy gapo to. Balet lapud saray mas agano nin adiskobre da, panisiaan la natan na mas dakel a scientist ya walan talagay gapoan na uniberso.

Antoy itsura na dalin diad gapo?

Adeskribe ed Genesis 1:2, 9 ya diad gapo say dalin et anggapoy itsura to tan agnapanayaman, tan asakbongan na danudanum.

Onabobon ed satan iray scientist. Imbaga na biologist ya si Patrick Shih ya diad gapo et anggapoy oxygen ed planeta tayo tan anggapon balot so karga to. Inreport na magasin ya Astronomy: “Ibabaga na saray balon impan-research ya diad gapo say Dalin et asakbongan na saray danudanum, tan ngalngali anggapoy amagan dalin.”

Panon ya anguman so atmosphere tayo diad inlabas na panaon?

Ipapanengneng na Genesis 1:3-5 ya diad gapo et makapakapal so atmosphere, kanian agni napatnagan ed dalin so panlalapuan na liwawa. Linmabas ni panaon antis ya anengneng ed dalin so agew tan bulan.—Genesis 1:14-18.

Imbaga na Smithsonian Environmental Research Center ya diad gapo et melmelag labat ya liwawa so makakalusot ed atmosphere. Imbaga to: “Walay singa makapal ya lurem na methane droplets ya akabalkot ed interon planetan Dalin.” Ag-abayag, “satan ya methane et nakal tan nagmaliw ya blue so tawen.”

Anto ran mabilay a bengatla so akaunan wadia ed dalin?

Ibabaga na Genesis 1:20-27 ya apalsa iray sira, manok, ayayep, insan saray totoo. Panisiaan na saray scientist ya manlapud samay sankaunaan ya sira et linmabas ni panaon antis ya niwala iray mammals tan linmabas lamet so panaon antis ya wala ray totoo.

Anto ray Ag-ibabaga na Biblia?

Wala ray mangibabaga ya mankontraan so ibabaga na Biblia tan saray adiskobre na saray scientist. Pero diad tua, aliwa labat so pakatalos da ed ibabaga na Biblia.

Ag-ibabaga na Biblia ya say uniberso odino say planetan Dalin et 6,000 taon ni labat. Imbes, ibabaga na satan ya say dalin tan say uniberso et pinalsa “diad gapo.” (Genesis 1:1) Anggapoy eksakton ibabaga na Biblia no panon lan kabayag itan.

Ag-ibabaga na Biblia ya apalsa so amin ya mabilay diad anemiran 24-oras ya agew. Say salitan “agew” ya inusar ed Biblia et ontutukoy ed karukey na panaon. Singa bilang, nabasa ditan ya say panaon na inkapalsa na interon uniberso—kaiba lay anemiran “agew” et agawa “diad agew ya ginawa nen Jehovaa a Dios so dalin tan say tawen.” (Genesis 2:4) Kanian kada sakey “agew” ed samay anemiran agew ya impamalsa na Dios ed dalin tan saray mabilay a bengatla et nayarin ontutukoy ed andukdukey a panaon.

Ag-ibabaga na Biblia ya saray mabilay a bengatla et agbalot manguman diad ilabas na saray panaon. Ibabaga na Genesis ya saray ayayep et “pinalsa unong ed klase ra.” (Genesis 1:24, 25) Samay abitla ed Biblia ya salitan “klase” et ontutukoy ed dakdakel ya nanduruman mabilay a pinalsa. Kanian say sakey a klase na pinalsa et nayarin nandurumay species odino variety to. Kanian posibli ya say sakey a klase na pinalsa et mamawala na nanduruman variety odino species no wala rad sakey a lugar diad ilabas na panaon.

Antoy nibagam?

Singa abasam la, simpli tan duga so eksplinasyon na Biblia no panon ya ginmapo so uniberso, no antoy itsura na planetan Dalin diad gapo, tan no panon ya ginmapo so bilay. Kanian duga kasi so ibabaga na Biblia no siopa so Amalsa ed amin a mabilay a bengatla? Imbaga na Encyclopædia Britannica ya samay ideyan ginawa na sakey a makapanyari so bilay et aliwan kontra ed saray agano nin adiskobre na saray scientist.b