Linma si Moises tan Aaron ed si Faraon

SANEN pinmawil si Moises ed Ehipto, inistorya tod kuya ton si Aaron so amin ya agawan milagro. Tan nen ginawa di Moises tan Aaron irayan milagro ed arap na saray Israelita, anisia ran amin ya tutulongan ira nen Jehova.

Insan linma si Moises tan Aaron ed si Faraon. Imbaga dad sikato: ‘Inkuan nen Jehova a Dios na Israel, “Abuloyan mo ray totook ya mandayew ed siak ed kalawakan diad loob na taloran agew.”’ Balet inmebat si Faraon: ‘Agak manisia ed si Jehova. Tan agko paalisen iray Israelita.’

Nampasnok si Faraon ta labay na saray Israelita so ontundan mantrabaho pian mandayew ed si Jehova. Kanian mas pinabelat toy trabaho da. Lapud saya, tinetel da si Moises kanian maermen. Balet imbaga nen Jehova ed sikato ya agmapaga. ‘Pasooten koy Faraon ya ibulos iray totook,’ so kuan nen Jehova.

Linma lamet si Moises tan Aaron ed si Faraon. Diad saya et nanggawa ra na milagro. Imbantak nen Aaron so baston to, tan nagmaliw itan ya baleg ya uleg. Imbantak met na saray managmahiko nen Faraon iray baston da tan nagmaliw iratan ya uleg. Pero nengneng mo! Inakmon na uleg nen Aaron iray arum ya uleg. Balet agnin siansia paalisen nen Faraon iray Israelita.

Kanian magano lan ikdan nen Jehova si Faraon na leksion. Antam no panon? Sikatoy mangidapo na 10 ya salot ed Ehipto.

Kayari na dakel ya salot, impatawag nen Faraon si Moises tan imbaga to: ‘Patundam lay salot ta paalisen ko la ray Israelita.’ Balet sanen tinmunda lay salot, anguman lamet so nonot nen Faraon. Agto paalisen iray Israelita. Pero, kayari na koma-10 ya salot, imbulos to la ra.

Antam no anto iramay 10 ya salot? Ibukay mo ed onsublay ya pahina tan amtaen tayo.