Pinili na Dios si David

NENGNENG mo yay litrato. Kanen la lawari na oso iyay melag ya karnero, balet insalba na sayan ugaw. Et nen onlaban may oso, siningkat tod beklew tan pinatey to! Aminsan et insalba to met so sakey ya karnero manlapud leon. Masibeg yan ugaw awa? Antam no siopa ya?

Si David iya. Sikatoy manaayam ed Betlehem. Say laki to et si Obed, ya anak di Rut tan Boaz. Nanonotan mo ni ra? Tan say tatay nen David et si Jesse. Aasikasoen nen David iray karnero nen tatay to. Sikatoy inyanak kayari na 10 taon sanen pinili nen Jehova si Saul a man-ari.

Asabi panaon, imbaga nen Jehova ed si Samuel: ‘Mangala kay espisyal a larak tan la kad abung nen Jesse diad Betlehem. Pinilik a magmaliw ya ari so sakey ed saray anak to.’ Sanen anengneng nen Samuel so panguloan ya anak nen Jesse a si Eliab, imbaga tod sarili to: ‘Seguradon aya so pinili nen Jehova.’ Balet imbaga nen Jehova ed sikato: ‘Agka onnenengneng ed inkatagey tan inkaguapo to. Aliwan sikato so pinilik ya ari.’

Kanian tinawag nen Jesse so anak ton si Abinadab. Balet imbaga nen Samuel: ‘Andi, aliwa met ya saya so pinili nen Jehova.’ Insublay toy anak ton si Samma. ‘Andi, aliwa met ya saya,’ kuan nen Samuel. Pitora lan anak nen Jesse so inyarap ed si Samuel, balet anggapod sikaray pinili nen Jehova. Tinepet nen Samuel: ‘Wala ni ray anak mon lalaki?’

‘Wala ni bolirek ko, balet anggapo dia ta aasikasoen to ray karnero,’ so kuan nen Jesse. Sanen tinawag day David, anengneng nen Samuel ya sikatoy guapon ugaw. ‘Sikato ya. Kalboan moy larak so ulo to,’ kuan nen Jehova. Tan ontan so ginawa nen Samuel. Nasabi panaon et magmaliw ya ari na Israel si David.