David tan Goliat

MILALABAN lamet iray Filisteo ed Israel. Talorad saray kuya nen David so kaiba lad saray sundalo nen Saul. Kanian aminsan, imbaga nen Jesse ed si David: ‘Iyakaran mo ray kuyam na trigo tan tinapay. Tan komustam met ira.’

Kasabi nen David ed kampo, inanap to ray kuya to. Et pinmaway so sakey ya higanten Filisteo tan kakantiawan to ray Israelita. 40 ya agew tan labi to la yan gagawaen. Iyeeyag to: ‘Mamili kayoy sakey a milaban ed siak. No manalo tan napatey to ak, aripen yo kami. Balet no manalo ak tan napatey ko, aripen mi kayo.’

Tinepetan nen David so arum a sundalo: ‘Antoy premyo na makapatey ed sayan Filisteo pian agla nabalaw so Israel?’

‘Ikdan nen Saul na kayamanan tan ipaasawa toy mismon marikit to,’ so ebat na sakey a sundalo.

Balet antakot so amin ya Israelita ed si Goliat ta higante. Ngalngali 3 metros so katagey to, wala ni ingey sundalon taga-awit toy samper.

Imbaga na pigaran sundalo ed si Arin Saul ya labay nen David a labanan si Goliat. Balet inkuan nen Saul ed si David: ‘Agmo sarag ya labanan iyan Filisteo ta ugaw ka ni, sikato balet et abayag lan sundalo.’ Inmebat si David: ‘Akapatey ak la na oso tan leon ya nandegkem ed karnero nen amak. Tan sayan Filisteo et singa sakey ed sikara. Tulongan ak nen Jehova.’ Kanian inkuan nen Saul: ‘Sige, la ka, tan tulongan ka komon nen Jehova.’

Anokdok si David na limaran pinon bato diad ilog, tan inkarga tod bag to. Insan to inalay palsot to pian onabet ed higante. Nen anengneng nen Goliat si David, agmakapanisia. Say amta to, main-inomay ya napatey si David.

Imbaga nen Goliat: ‘Gala dia ta ipakan kod saray manok tan ayayep so bangkay mo.’ Balet imbaga nen David: ‘Milaban kad siak ya de-espada tan duyok, balet milaban ak ed sika diad ngaran nen Jehova. Diad sayan agew et iter ka nen Jehova ed siak tan taloen ta ka.’

Insan nilusob nen David si Goliat. Binalaan toy bato so palsot to, tan inyupo-upot ton impasasweng itan. Naknad moling si Goliat, tan inatey! Nen anengneng na saray Filisteo ya abaktar so panlaban da, kibatiktik iran amin. Kanian inuusilan ira na saray Israelita tan analo ra.