Tinulongan na Dios si Arin Hezekias

AKIN et manpipikasi yay laki ed si Jehova? Tan anto irayay sulat ya inggaton to ed arap na altar nen Jehova? Sayay laki et si Hezekias. Sikato so ari na duaran tribu na Israel. Tan dakel so problema to. Akin ey?

Ta nilusob la na saray sundalo na Asirya so 10 tribu ed amianen. Inabuloyan nen Jehova ya natalo ira ta mauge-uges ira. Tan natan et onlusob met la ray sundalo na Asirya ed duaran tribu.

Nansulat so ari na Asirya ed si Arin Hezekias. Sikato yay ipapanengneng nen Hezekias ed Dios. Diad sulat et kakantiawan toy Jehova tan ingganggan toy Hezekias ya onsuko la. Kanian nampikasi si Hezekias: ‘O Jehova, iliktar mo kami pad ari na Asirya. Pian naamtaan na amin a bansa ya sika labat so Dios.’ Dengelen kasi nen Jehova si Hezekias?

Maong ya ari si Hezekias. Agto kapara iray mauges ya ari na 10 tribu na Israel, odino say ama ton si Arin Ahaz. Inunor to so amin a ganggan nen Jehova. Kanian kayari ton nampikasi, imbaga nen propeta Isaias so mensahe nen Jehova: ‘Agmakaloob ed Jerusalem so ari na Asirya. Agmakaasingger so anggan sakey a sundalo to. Tan agda anggan napana so syudad.’

Nengneng moy litrato ed sayan pahina. Antam no siopa irayay inaatey ya sundalo? Saray Asiryano. Imbaki nen Jehova so sakey ya anghel to, tan diad sanlabi et pinatey na anghel so 185,000 ya sundalon Asiryano. Kanian batik lay ari na Asirya.

Aliktar so duaran tribu, tan walay kareenan na totoo. Balet nen inatey lay Hezekias, nan-ari so anak ton si Manases. Parehon mauges si Manases tan say anak ton si Amon ya sinmublay ya ari. Kanian dakel lamet so gulo ed bansa ra. Sanen pinatey si Arin Amon na saray mismon aripen to, si Josias so nan-ari ed duaran tribu.