Ag-ira Dinmakmomo

NANONOTAN mo ni irayay taloran balolaki? On, sikara may kakaaro nen Daniel ya ag-angan ed saray mananam ya kakanen na ari. Tinawag ira na taga-Babilonia ya Sadrac, Mesac, tan Abednego. Pero nengneng mo ra natan. Akin et ag-ira ondadakmomo ed sayay baleg ya imahen? Nengnengen tayo.

Natandaan mo ni may Samploran Ganggan ya insulat a mismo nen Jehova? Say unaan ed saraman et: ‘Agka mandadayew ed arum a dirios, siak labat so igalang mo.’ Uunoren na sarayan balolaki itan ya ganggan anggano aliwan mainomay ya gawaen.

Impatawag nen Nabucodonosor ya ari na Babilonia iray importantin totoo pian idayew iyan imahen ya impagawa to. Imbaga tod amin a totoo: ‘Sano narengel yo so tanol na saray trumpeta, arpa tan arum ni ran instrumento, ondakmomo kayo tan mandayew ed sayan balitok ya imahen. Siopaman ya ag-ondakmomo tan agmandayew et ibuntok ed mandarlang ya hurno.’

Sanen naamtaan nen Nabucodonosor ya agdinmakmomo si Sadrac, Mesac, tan Abednego, agaylay pasnok to. Impatawag to ra. Inikdan to ray sakey nin tsansa. Balet nanmatalek irayan balolaki ed si Jehova. Imbaga dad si Nabucodonosor: ‘Sarag kamin iliktar na Dios mi. Balet anggano agto kami iliktar, agkami nin siansia ondakmomo ed balitok ya imahen yo.’

Kadngel nen Nabucodonosor ed saya, lalon pinmetang so ulo to. Kanian ingganggan to: ‘Papetang yon maminpito so hurno!’ Insan to imbagad saray mabibiskeg a lalaki ya singeren day Sadrac, Mesac, tan Abednego tan ibuntok da rad hurno. Sobray petang na hurno kanian inatey ed apoy iramay mabibiskeg a lalakin angibuntok ed sikara. Kumusta balet iramay balolakin imbuntok da?

Ninengneng na ari so hurno, tan ataktakot. Intepet to: ‘Agta taloray lalakin sininger tan imbuntok tayod mandarlang ya hurno?’

‘On,’ so ebat na saray lingkor to.

Et inkuan to: ‘Balet apatiray nanenengneng kon manaakar ed apoy. Ag-ira asinger tan agnapopoolan. Tan singa dios imay komapat.’ Inmasingger ed puerta na hurno so ari tan imbando to: ‘Sadrac! Mesac! Abednego! Paway kayo, sikayo ran lingkor na Sankatagyan a Dios!’

Kapaway da, anengneng na amin ya ag-ira asakitan. Imbaga na ari: ‘Nagalang so Dios di Sadrac, Mesac, tan Abednego! Imbaki toy anghel to tan inliktar to ra ta ag-ira dinmakmomo tan nandayew ed arum a dios.’

Maabig ya aligen so katooran dad si Jehova awa?