Sulat na Lima ed Padir

ANTOY nagagawa dia? Manpipiesta iray totoo. Inimbitaan na ari na Babilonia so nilibon importantin bisita. Uusaren da ray balitok tan pilak a lusor tan yaong ya inalad templo nen Jehova diad Jerusalem. Kabebekta, walay pinmaway ya lima na too, insan nansulat ed padir. Pinmuti busaleg na amin.

Say ari ed saman et si Belsazar ya apo nen Nabucodonosor. Tampol ton impatawag iray matatalinon lalaki. Imbaga to: ‘Siopaman a makabasa na sayan sulat tan nibaga toy kabaliksan to et naikdan na dakel a regalo tan magmaliw ya mikatlon sankatagyan a manuley.’ Balet anggapoy anggan sakey a makabasa odino makapangibagad kabaliksan na satan.

Arengel na nanay na ari so gulo tan linmoob ed baleg ya kuarton papangakanan da. Imbaga tod ari: ‘Agka natatakot ta walay laki ed panarian mo ya kabat to ray masanton dirios. Sanen si lakim Nabucodonosor ni so ari, sikatoy ginawa ton lider na amin a matatalinon lalaki. Say ngaran to et Daniel. Patawag mo pian ibaga tod sikay kabaliksan na saya.’

Kanian impatawag ton tampol si Daniel. Ag-angawat si Daniel na regalo. Imbaga tod si Belsazar ya inekal nen Jehova ya ari si Nabucodonosor ta malastog.

‘Et sika,’ so kuan nen Daniel ed si Belsazar, ‘antam no antoy agawad si lakim, pero siansia nin malastog ka a singa sikato. Inuusar mo ray lusor tan yaong a nanlapud templo nen Jehova. Indadayew mo ray dios ya gawad kiew tan bato, tan agmo inggalang so Amalsa ed sikatayo. Kanian imbaki na Dios iyan lima a mangisulat na sarayan salita.’

‘Onyay akasulat,’ kuan nen Daniel: ‘MENE, MENE, TEKEL tan PARSIN.’

‘Say kabaliksan na MENE et binilang la na Dios iray agew na panarian mo tan sinampotan to la iya. Say kabaliksan na TEKEL et asimbang ka la ed saray simbangan tan nalmoan a kulang ka. Say kabaliksan na PARSIN et niiter ed Medo tan Persia so panarian mo.’

Legan ya mansasalita si Daniel, inmataki lad Babilonia so Medo tan Persia. Sinamsam day syudad tan pinatey day Belsazar. Diad sanlabi labat et tinmua imay sulat ed padir! Pero anto lay nagawad saray Israelita? Naamtaan tayo lanlamang itan, balet nengnengen tayo ni no antoy agawad si Daniel.