Tinmaynan Irad Babilonia

NGALNGALI duay taon lay apalabas manlapu nen sinakop na Medo tan Persia so Babilonia. Tan nengneng mo no antoy nagagawa! On, tataynanan la na saray Israelita so Babilonia. Akin balet ey? Siopay angibulos ed sikara?

Si Ciro, say ari na Persia. Antis ya niyanak si Ciro, impaisulat nen Jehova ed si Isaias so nipaakar ed sikato: ‘Gawaen moy pagagawak ed sika. Napaulyanan ya lukas iray puerta pian nasamsam moy syudad.’ Tan si Ciro ya tua so lider ya nansamsam ed Babilonia. Akaloob iray sundalo na Medo tan Persia ed saray puertan lukas.

Balet imbaga met nen propeta Isaias a mangiter na ganggan si Ciro ya ipaalagey lamet so Jerusalem tan say templo. Tinmua kasi itan? On. Imbaga nen Ciro ed saray Israelita: ‘Sempet ki lad Jerusalem tan ipaalagey yo so templo nen Jehova a Dios yo.’ Kanian paonla la ra natan diman.

Balet wala ray Israelita ed Babilonia ya agda nasarag so manakar pasempet ed Jerusalem. Arawdawin maong so byahe, manga 800 kilometro, tan dakel so maedad la tan makapuy. Pero imbaga nen Ciro ed saray agmakasempet: ‘Mangiter kayo na pilak, balitok tan arum ni ran regalo ed saray onsempet pian nipaalagey so Jerusalem tan say templo.’

Dakdakel so regalon inter ed saray pasempet ed Jerusalem. Inter met nen Ciro iramay yaong tan lusor ya inala nen Arin Nabucodonosor ed templo nen Jehova sanen dineral toy Jerusalem. Kanian dakel so awit na saray totoon pasempet.

Kayari na apat bulan, akasabi iray Israelita ed Jerusalem. Eksakton 70 a taon so linmabas sanen aderal so syudad, tan anggapoy anggan sakey a manaayam ditan. Anggano akapawil la ray Israelita ed bansa ra, dakel so dalanen dan irap, ya singa naaralan tayod ontumbok.