Diad Palandey Olibo

SI Jesus iya diad Palandey Olibo. Sarayay apatiran lalaki et apostol to. Say sanagin Andres tan Pedro, tan sanagin Santiago tan Juan. Nanenengneng mo tay walad benegan nen Jesus ya templo na Dios diad Jerusalem?

Martes lad saman, duaran agew kayari inloob nen Jesus diad Jerusalem ya akalugan ed asno. Diad kabuasan na saman ya agew, linmay Jesus ed templo. Tan sinali na saray saserdote ya erelen si Jesus pian pateyen. Balet natatakot irad saray totoo ta labalabay day Jesus.

‘Sikayo ran uleg tan anak na uleg!’ so intawag nen Jesus ed saray lider na relihyon. Insan to imbaga ya dusaen ira na Dios lapud saray mauges ya ginawa da. Kayari na satan, linmay Jesus ed Palandey Olibo tan ditan et nantepet iray apatiran apostol to. Antam no antoy intepet dad sikato?

Nantepet ira nipaakar ed arapen. Amta ran ekalen nen Jesus so amin ya mauges diad dalin. Balet labay dan naamtaan no kapigan itan nagawa. Kapigan kasi man-ari si Jesus?

Amta nen Jesus ya no onggapo lay pan-ari to, sikatoy agnanengneng na saray papatumbok to diad dalin ta sikatoy walad tawen. Kanian imbaga to no anto ray arum a nagawa diad dalin sano man-ari la ed tawen. Anto iratan?

Imbaga to ya wala ray baleg a guerra, dakel so mansakit tan naerasan, onggrabe so krimen, tan wala ray maksil ya yegyeg. Imbaga to met ya say maong a balita na panarian na Dios et nipulong ed interon dalin. Kasin nagagawa la iraya? On! Kanian segurado tayo ya manaari lay Jesus diad tawen. Tan magano to lan ekalen so amin a mauges diad dalin.