Sinmadsar ed Isla

NENGNENG mo! Ngalngali nagaygay so barko! Tan tinmataboy ed dayat iray pasahero. Saray arum et akasakbit la. Si Pablo ey? Nengnengen tayo no antoy agawad sikato.

Duaran taon ya apriso si Pablo diad Cesarea. Insan kaiba to ray arum a priso ya inlugan ed barko pian mamaarap ed Roma. Sanen dinmalan irad isla na Creta, walay maksil a bagyo. Agaylay kasil na dagem kanian agmakasuba so barko. Tan agda nanengneng so agew odino saray bitewen. Kayari dakel ya agew, naandian lay ilalo iray pasahero.

Et imbaga nen Pablo: ‘Anggapoy anggan sakey ed sikayo ya ompatey; sayay barko labat so naderal. Ta nen kalabian et nila ak na anghel na Dios tan inkuan to, “Agka natatakot Pablo! Nepeg ya onarap kad si Cesar. Tan iliktar na Dios so amin a kaibam a manbiabiahe.”’

Koma-14 agew la ya ombabagyo, tan sanen pegley-labi, naimano dan wala la rad atapew! Lapud natatakot iran ombasig so barko ed angkakabaleg a bato, impelag da ray angkla. Kaimbuasan, anengneng day baybay. Kanian, nandesisyon iran ipaarap so barko ditan.

Balet, sinmadsar so barko tan agla makaalis. Insan binmabasig ed satan iray daluyon tan ngalngali la nagaygay. Imbaga na opisyal na saray sundalo: ‘Saray makalangoy unona lan ontaboy tan onlad isla. Insan ontumbok iray arum tan ompeket ed tabla.’ Tan ontan so ginawa ra. Kanian akasabid baybay so amin ya 276 a pasahero tan akaliktar ira, ya singa impormisa na anghel.

Say isla et tatawagen ya Malta. Maomaong iray totoo ditan tan inasikaso da ray pasahero na barko. Sanen marakep lay panaon, pinalugan si Pablo ed sananey ya barko tan inawit ed Roma.