Balon Paraiso Diad Dalin

NENGNENG mo irayay ataragey ya kakiewan, balibali iran rosas, tan kapalandeyan. Marakdakep awa? Sayay usa et mamangan ed lima na ugaw. Niman met iray leon tan kabayo diad karikaan. Labay moy manayam ed onyan lugar?

Labay na Dios ya manbilay ka ya tuloytuloy diad paraison dalin. Agto labay ya mansakit tan manirap ka, ya singa nagagawad saray totoo natan. Onyay impormisa na Biblia ed saray manbilay ed balon paraiso: ‘Walad sikara so Dios. Anggapo lay patey, akis, odino sakit. Say datin bengatla et linmabas la.’

Seguroen nen Jesus ya nagawa irayan marakdakep a bengatla. Antam no kapigan? Duga, kayari ton ekalen so amin ya mauges diad dalin. Nen wadiad dalin si Jesus, pinaabig toy amin ya sakit na totoo, tan binilay to ni ingen iray inaatey. Ginawa to iya pian ipanengneng ya gawaen to lamet iraya diad dalin sano man-ari la ed panarian na Dios.

Agaylay dakep na balon paraison dalin awa? Si Jesus tan saray pinili ton kaiba et man-ari ed tawen. Asikasoen da so amin a wadiad dalin tan seguroen dan maliket ira. Nengnengen tayo no antoy kaukolan a gawaen pian ikdan itayo na Dios na bilay ya andi-angga diad paraison dalin.