Kapitulo 14

Siopa So Onla ed Tawen, tan Akin?

1. Panoy pangebat na dakel a totoo ed tepet ya, Siopa so onla ed tawen, tan akin?

IKUAN na dakel a totoo, ‘Amin a totoon maong so onla ed tawen.’ Anggaman kuan, sano natepetan no akin a sikara so onla ed tawen, nayarin ikuan da: ‘Pian mikasakey ed Dios,’ odino, ‘Sikato so tumang ed impagmaliw a maong.’ Anto so ibabaga na Biblia nipaakar ed saya?

2, 3. (a) Akin a maseguro itayon arum a totoo so onla ed tawen? (b) Anton tepet so nakaukolan a naebatan?

² Impalinew na Biblia a si Jesus so apaoli a nanlapud saray inaatey tan sikato so linma ed tawen. Ontan met, ibabaga to ya arum a totoo so naawit diman. Diad samay labi sakbay na impatey to, imbaga nen Jesus ed saray matoor ya apostoles to: “Diad abung nen Amak walaray dakel a panayaman. Tano andi, imbagak komon ed sikayo, lapud onlaak a mangiparaan na pasen ed sikayo. Ontan met, no siak so onla tan mangiparaan na pasen ed sikayo, siak so ompawil lamet tan awaten takayo ed inkasiak, pian no iner so kawalaan ko et wadman kayo met.”​—Juan 14:1-3.

³ Malinlinew, ibabaga nen Jesus ed saray apostoles to a sikara so naala ed tawen a mikasakey ed sikato. Mabetbet ya imbaga nen apostol Pablo ed saray inmunan Kristianos so nipaakar ed satan ya ilalon makapakelaw. Alimbawa, insulat to: “No nipaakar ed sikami, say pibabaley mi so wala ed katawenan, a satan met a pasen et sikami so magunaet a manaalagar ed sakey a manangilaban, say Katawan a Jesu-Kristo.” (Filipos 3:20, 21; Roma 6:5; 2 Corinto 5:1, 2) Nibase ed ontan iran sipan, nilaksa iran totoo so angiteen na puso ra ed mangatatawen a bilay. Ingen kasin amin a totoon maong so onla ed tawen?

KASIN AMIN A TOTOON MAONG SO ONLA ED TAWEN?

4, 5. Anto so prueba a si David tan si Job so aglinma ed tawen?

⁴ Kayarin tuloy na inkapaoli nen Jesus, imbaga nen apostol Pedro ed sakey ya ulop na Judios: “Say ulo na pamilyan si David . . . namparan inatey tan inkutkot tan say lubok to so walad sikatayo ya anggad sayan agew. Diad tua si David so agsinmegep ed katawenan.” (Gawa 2:29, 34) Kanian say maong a toon si David so aglinma ed tawen. Kumusta so matunong a toon si Job?

⁵ Legan na paniirap to, impikasi nen Job ed Dios: “O komon ta siak so iyamot mo ed Sheol [say lubok] pian siak so pansiansiaen mon maamot ya anggad onlabas so sanok mo, pian sika so mangigeter na sakey a panaon ed siak tan nonoten moak!” Inilaloan nen Job a no sikato so ompatey et magmaliw ya andian na pakalikna ed lubok. Kabat to a sikato so ag-onla ed tawen. Balet walaan na ilalo, a singa impaliwawa to: “No say sakey a makayarin too so ompatey kasin sikato so manbilay lamet? Amin na saray agew na kapilitan a kimey ko [aturon panaon ed lubok] siak so manalagar, ya anggad onsabi so pakainawaan ko. Sika so ontawag, tan siak so onebat ed sika.”​—Job 14:13-15.

6, 7. (a) Antoy mangipanengneng ya anggapo ed saray inaatey sakbay nen Kristo so linma ed tawen? (b) Anto so nagawa ed amin na saray matoor ya inatey sakbay nen Kristo?

⁶ Si Juan, ya amautismo ed si Jesus, so maong met a too. Ingen inkuan nen Jesus: “Say sakey a toon memelag ed panarian na katawenan so babaleg nen say sikato.” (Mateo 11:11) Saya so tua lapud si Juan a Managbautismo so ag-onla ed tawen. Sanen wadia ed dalin si Jesus, a saman so masulok a 4,000 taon kayari na impanrebelde nen Adan tan Eva, inkuanto: “Anggapo so toon sinmegep ed tawen noagta saman so inmakseb a nanlapud tawen, say Anak na too.”​—Juan 3:13.

⁷ Sirin, unong ed saray dilin salita nen Jesus, anggapo so toon linma ed tawen diad saraman ya amin a 4,000 taon ed awaran na too ya angga ed samay agew to. Si David, Job tan si Juan a Managbautismo so mangawat na kioli ed bilay diad dalin. Diad tua, amin na saray matoor a lalaki tan bibii ya inatey sakbay na impatey nen Jesus so walaan na ilalo diad pambilay lamet ed dalin, ya aliwan diad tawen. Sikara so napaoli pian magmaliw a mangaraldalin ya uuleyan na panarian na Dios. ​—Salmo 72:7, 8; Gawa 17:31.

NO AKIN YA ARUM A MATOOR SO ONLA ED TAWEN

8. Saray ebat ed anto ran tepet so importante, tan akin?

⁸ Akin a si Jesus so linma ed tawen? Anton kimey so gawaen tod’man? Saray ebat ed sarayan tepet so importante. Saya so lapud saramay onla ed tawen so mibiang ed si Jesus diad kimey to. Sikara so onla ed tawen nisesengeg ed satan a mismon gagala.

9, 10. Unong ed si Daniel, siopa ni likud ed si Kristo so manuley ed gobierno na Dios?

⁹ Naaralan tayo la ed saray akaunan kapitulo a si Jesus so manuley ed paraison balon dalin bilang ari ed mangatatawen a gobierno na Dios. Abayag ni sakbay na inyakar nen Jesus ed dalin, impasakbay na libro na Biblia a Daniel a say “anak na too” so “naikdan na pananguley.” Say “Anak na too” et si Jesu-Kristo. (Marcos 14:41, 62) Tan intuloy nen Daniel ya ibaga: “Say pananguley to so andi-anggaan a pananguley ya agnapaso, tan say panarian to so agnaderal.”​—Daniel 7:13, 14.

¹⁰ Anggaman kuan, importantin imanoen dia ed libro nen Daniel a say “anak na too” so agmanuley a bukor. Ibabaga na Biblia: “Tan say panarian tan say pananguley . . . so niiter ed totoo a sikara so sasantos na Sankatageyan. Say panarian da so andi-anggaan a panarian.” (Daniel 7:27) Sarayan balikas a “totoo” tan “panarian da” so mangipaamta ed sikatayo a saray arum so miuley ed si Kristo ed gobierno na Dios.

11. Antoy mangipanengneng a saray inmunan patumbok nen Kristo so miuley ed sikato?

¹¹ Diad samay ultimon labi na impilimog to ed saray matoor a 11 ya apostoles to et impanengneng ton sikara so manuley a kaiba to ed panarian na Dios. Inkuanto ed sikara: “Sikayo so nansiansia ed siak diad saray subsubok ko; tan uanggawa ak na sakey a sipanan ed sikayo, a singa si Amak so nanggawa na sakey a sipanan ed siak, nipaakar ed panarian.” (Lucas 22:28, 29) Diad saginonor, si apostol Pablo tan si Timoteo so nikasakey ed sayan sipanan, odino paknaan, nipaakar ed sakey a panarian. Nisengeg ed satan insulat nen Pablo ed si Timoteo: “No mansungdo itayo, sikatayo met so manuley a bilang arari.” (2 Timoteo 2:12) Ontan met, insulat nen apostol Juan so nipaakar ed saramay “manuley a bilang arari ed dalin” a kaiba nen Jesu-Kristo.​—Apocalipsis 5:9, 10; 20:6.

12. Anton katuaan nipaakar ed “bini” nen Abraham so mangiparungtal a si Kristo so walaan na kaiban manuley?

¹² Kanian saramay onla ed tawen et sikara so onlad’man pian manserbin kaiba nen Kristo a manuley diad mangatatawen a gobierno na Dios. Manwarin si Jesus so manunan “bini” na sipan, say Dios so amili na arum a nanlapud limog na totoo pian manuley a kaiba nen Jesus ed panarian. Sikara sirin so magmaliw a kabiangan na “bini,” a singa ibabaga na Biblia: “No sikayo so kayarian nen Kristo, sikayo so peteg a bini nen Abraham, mananawir na sipan.”​—Galacia 3:16, 29; Santiago 2:5.

PANON KARAKEL SO ONLA ED TAWEN?

13. (a) Akin a saray ugugaw so ag-onla ed tawen? (b) Panoy impaneskribe nen Jesus ed bilang na mangawat ed Panarian?

¹³ Lapud sikara so manuley ed dalin, malinew a saramay onla ed tawen et saraman so asubok tan apairap a patumbok nen Kristo. Kabaliksan na saya a saray ugugaw odino angkekelag ya ananak, ya agni sigpot ya asubok kaleganan na saray taon na Kristianon serbisyo, so agnaawit ed tawen. (Mateo 16:24) Anggaman kuan, saray ugugaw ya ompatey so walaan na ilalo diad kapaoli ed bilay diad dalin. (Juan 5:28, 29) Kanian say dagup a bilang na onla ed tawen so melag no ikumpara ed saray dakerakel a makaawat na bilay ed dalin diad leksab na uley na Panarian. Imbaga nen Jesus ed saray babangatan to: “Agkayo antakot, melag a pulok, lapud inabobonan na Ama yo so pangiter ed sikayo na panarian.”​—Lucas 12:32.

14. Panon karakel so manibukel na “melag a pulok” ya onla ed tawen?

¹⁴ Kaunongan kamelag so bilang na satan a klasen manuley ed Panarian? Kasin isakup to lambengat iray apostoles tan arum iran akaunan patumbok nen Jesus? Andi, ipapanengneng na Biblia a say “melag a pulok” so mangisakup ni ed arum. Diad Apocalipsis 14:1, 3 ibabaga na Biblia: “Tan anengneng ko, tan, nia! say Kordero [Jesu-Kristo] so manalalagey ed [mangatatawen] Palandey Sion, tan kaiba to so sanlasus tan apataplo-tan-apat a libo . . . a sinaliw [odino, inala] a nanlapud dalin.” Imanoen a 144,000 personas lambengat so anengneng a kaiba na Kordero, si Jesu-Kristo, ed mangatatawen a Palandey Sion. (Hebreos 12:22) Kanian imbes ya onlad tawen so amin a totoon maong, ipaparungtal na Biblia a saray 144,000 lambengat ya asubok tan matoor a totoo so naawit diman pian miuley ed si Kristo.

NO AKIN A SIKARA SO PINILI ED DALIN

15. Akin a say Dios so nampili na manuley ed Panarian a nanlapud limog na katooan?

¹⁵ Balet akin a sarayan manuley so pinili na Dios a nanlapud limog na totoo? Akin ya agla nampili ed saray angheles a miuley ed si Kristo? Bueno, diad dalin so akaangatan ed kanepegan nen Jehova a manuley. Dia so akasubokan na inkamatoor na totoo ed Dios diad leksab na isusumpa na Diablo. Dia so amaneknekan nen Jesus na nagnap a katooran to ed Dios diad silong na subok tan inter to so bilay to a bilang dondon ed katooan. Kanian dia ed dalin so angiyuksoyan nen Jehova a pangalaan na “melag a pulok” na totoon mikasakey ed Anak to diad mangatatawen a panarian. Sikara, diad panamegley na katooran da ed Dios, so amaneknek ed katilaan na panamakasalanan na Diablo a saray totoo so manlingkor labat ed Dios nisesengeg ed sinisiblet iran rason. Matukotukoy, sirin, ya usaren nen Jehova irayan totoo ed kigloriaan to.​—Efeso 1:9-12.

16. Akin a misalsalamat itayo a saray manuley ed Panarian so nambilay ed dalin?

¹⁶ Ontan met, isipen pa ya agaylan makapakelaw so pakawalaan na saray manuley a totoon pinaneknekan da so inkasikaran matoor ed Dios diad dalin, dakel ed sikara so angisakripisyo na bilay da a nisesengeg ed Panarian. (Apocalipsis 12:10, 11; 20:4) Saray angheles so agnipaarap ed ontan a nengneng na subsubok. Nisay asagmak daray probleman kaslakan ed katooan. Kanian agda natalosan a nagnap no anto so nengneng na pagmaliw a toon makasalanan tan nawalaan na saray probleman singa sikatayon totoo. Balet natalosan na saray 144,000 lapud sikara so awalaan na sarayan mismon problema. Arum ed sikara so analona ed saray mismon makasalanan ya agagamil, tan kabat da ya agaylan irap so panggawa na ontan. (1 Corinto 6:9-11) Kanian, sikara so mideneng ed saray mangaraldalin ya uuleyan da diad makatalos a dalan.​—Hebreos 2:17, 18.

SAY KONGREGASYON NA DIOS

17. Diad anto so tutukoyen na salitan “kongregasyon”?

¹⁷ Ibabaga na Biblia ed sikatayo a si Kristo so ulo na kongregasyon na Dios, tan saray membro to so pauleyan ed si Jesus. (Efeso 5:23, 24) Kanian say salitan “iglesia,” odino “kongregasyon na Dios,” et agto tutukoyen so abung. Noag ingen, tutukoyen to so grupo na Kristiano. (1 Corinto 15:9) Natan et nayarin salitaen tayo so kongregasyon na saray Kristianos a pililimogan tayo. Diad parehon dalan, nabasa tayo ed Biblia so nipaakar “ed kongregasyon na saray taga Laodicia,” tan, diad sulat nen apostol Pablo ed si Filemon, “nipaakar ed kongregasyon [a wala ed] abung [to].”​—Colosas 4:16; Filemon 2.

18. (a) Siopa so manibukel “na kongregasyon na mabilay a Dios”? (b) Diad anto ran termino so akatukoyan met na sayan kongregasyon ed Biblia?

¹⁸ Anggaman kuan, sano sasalitaen na Biblia “so kongregasyon na mabilay a Dios,” tutukoyen to so partikular a grupo na saray patumbok nen Kristo. (1 Timoteo 3:15) Sikara met so atawag “na kongregasyon na panguloan a nilista ed katawenan.” (Hebreos 12:23) Kanian sayan “kongregasyon na Dios” so tinibukel na amin na saray Kristiano ed dalin a walaan na ilalo ed mangatatawen a bilay. Ami-amin, 144,000 lambengat a personas so manibukel na “kongregasyon na Dios.” Natan pigpigara lambengat ed saraya, sakey a nakdaan, so wala ni ed dalin. Saray Kristianon manilalo a manbilay ed ando lan ando diad dalin so onnengneng ed espiritual a panangiwanwan a manlapud saray membro na sayan “kongregasyon na mabilay a Dios.” Tutukoyen met na Biblia iyan kongregasyon na 144,000 a membro diad saray terminon singa “say nobya, say asawa na Kordero,” “say laman nen Kristo,” “say templo na Dios,” “say Israel na Dios,” tan say “Balon Jerusalem.”​—Apocalipsis 21:9; Efeso 4:12; 1 Corinto 3:17; Galacia 6:16; Apocalipsis 21:2.

SAY BALON BENGATLA ED GAGALA NA DIOS

19. Anton balon bengatla so imparungtal na Dios diad pangisumpal to ed orihinal a gagala to a para ed dalin?

¹⁹ Ag-inuman nen Jehova a Dios so gagala to nipaakar ed dalin tan say katooan kayari na impangigapo nen Adan ed rasa na too diad basbas na kasalanan tan patey. Tano ginawa na Dios so ontan, kabaliksan ton agto nayarian a sumpalen so orihinal a gagala to. Say gagala to a nanlapud gapo et say pagmaliw a paraiso na interon dalin a napano na maliket, mabunigas a totoo, tan satan a gagala so siansia nin nasumpal. Say alenleneg a balon bengatlan imparungtal na Dios et say oksuyan to nipaakar ed sakey a balon gobiernon mangisumpal ed gagala to. A singa anengneng tayo la, say Anak to, si Jesu-Kristo, so manunan manuley ed sayan gobierno, tan saray 144,000 a totoo so naala a manlapud limog na katooan pian miuley ed sikato diad tawen.​—Apocalipsis 7:4.

20. (a) Siopa so manibukel na “balon katawenan” tan say “balon dalin”? (b) Anto so nepeg mon gawaen pian magmaliw a kabiangan na “balon dalin”?

²⁰ Sarayan manuley ed tawen so manibukel na “balon katawenan” ed balon sistema na Dios. Ingen malinlinew a no wala so ontan iran matunong a manuley ed dalin, sirin nepeg a wala ra met iraman so uleyan da. Tutukoyen na Biblia irayan totoo a bilang say “balon dalin.” (2 Pedro 3:13; Apocalipsis 21:1-4) Isakup da si Job, David tan si Juan a Managbautismo​—on, amin na saray matoor a nambilay sakbay na inyakar nen Kristo ed dalin. Balet walaray dakel ni a manibukel ed “balon dalin,” a pati saray totoon makaliktar ed anggaan na sayan marelmeng a sistema na bengabengatla. Kasin sakey ka ed sarayan niliktar? Kasin labay mo so magmaliw ya uuleyan na gobierno na Dios? No ontan, walaray nakaukolan a nepeg mon sumpalen.

[Saray litrato ed pahina 121]

Kasin sarayan maong a lalaki so linma ed tawen?

Arin David

Job

Juan a Managbautismo

[Litrato ed pahina 122]

Diad samay unor a labin kaiba toray apostoles to, imbaga nen Jesus a sikara so magmaliw a manuley a kaiba to diad panarian nen Ama to