Parte 7
Anto So Nansumpalan Na Rebelyon?
1-3. Panon a pinaneknekan na panaon a duga si Jehova?
NIPAAKAR ed salisalan ed kanepegan na Dios a manguley, anto so resulta na uley na too ya independenti ed Dios ed sarayan apalabas lan siglos? Kasin apaneknekan na totoo a magmaong iran manuley nen say Dios? No mangukom itayo unong ed awaran na inkaruksa na too ed too, maseguron andi.
2 Sanen impulisay na inmunan atateng tayo so uley na Dios, tinmumbok so desyang. Intarok da so irap ed inkasikara tan ed amin ya atooan a pamilyan nanlapud sikara. Tan anggapo so natetel da noagta sikaran mismo. Ikuan na Salita na Dios: “Kinmiwas iran siuuges ed biang dan dili; agto ra anak, say pakabalawan so kien da.”—Deuteronomio 32:5.
3 Ipanengneng na awaran so inkasusto na pasakbay na Dios ed si Adan tan si Eva a no onkasipa ira ed silong na saray probisyon na Dios, sikara so onletey tan agmanbayag et ompatey. (Genesis 2:17; 3:19) Kinmasipa ira ed leksab na uley na Dios, tan agnambayag et sikara so linmetey tan inatey.
4. Akin ya amin tayo so niyanak ya ag-ayadyari, mansakit tan ompatey?
4 No anto so agawa ed amin ya ananak da so unong ed isalaysay na Roma 5:12: “Kanian unong a say kasalanan so linmoob ed mundo lapu ed sakey a too [si Adan, say ulo na pamilya na katooan] tan say patey lapu ed kasalanan, kanian linmaknab so patey ed amin a too.” Kanian sanen nanrebelde so inmunan atateng tayo sumpad panangasikaso na Dios, nagmaliw iran madepekton managkasalanan. Mitunosan ed saray ganggan na genetiko (genetics), nipasa ra lambengat so ag-inkayadyari ed saray anak da. Atan no akin ya amin tayo so niyanak a walaan na deperensya, a mansakit tan insan ompatey.
5, 6. Anto so impanengneng na awaran nipaakar ed saray sagpot na too ed pangitarok na tuan kareenan tan aligwas?
5 Dakel iran siglo so linmabas. Nansusublayan iray imperyo. Balang nanonotan a nengneng na gobierno so sinali. Ingen, naoli-olit, a nagagawa iray makapataktakot a bengatla ed atooan a pamilya. Kayari na anemiran libon taon, nayarin isipen na sakey a saray totoo so inmaligwas ed punton pangiletneg na kareenan, inkahustisya, tan aligwas ed sankadalinan tan natan et onsiano la ra ed positibon prinsipyo na kaabigan, panangabagey, tan pikokoopera.
6 Anggaman ontan, say katuaan et say kasuniyan. Anggapon balot so nengneng na gobierno na toon agawan angitarok na tuan kareenan tan aligwas parad amin. Diad sayan koma-20 siglo lambengat, anengneng tayo so sistematikon panagpatey na saray nilaksa legan na Panagpuol tan say impamatey na ngalngalin 100 laksa ed saray bakal. Diad panaon tayo agnabilang iran totoo so pinairap, pinatey, tan impangaw lapud agpanangiyabuloy tan pandurumaan ed pulitika.
Say Situasyon Natan
7. Panon so paneskribe ed kipapasen na atooan a pamilya natan?
7 Niarum ni, kunsideraen so interamentin kipapasen na atooan a pamilya natan. Laganap so krimen tan karawalan. Say panangabuso ed druga so epedimya. Saray makaalis a sakit ed sekso so onkakasmak. Say makapataktakot a sakit ya AIDS so mangaapekta ed nilaksan totoo. Samplon nilaksan totoo so ompapatey ed eras odino sakit ed kada taon, bangta melag a bilang so walaan na baleg iran kayamanan. Dudutakan tan tatakewan na too so dalin. Say bilay na pamilya tan saray kalidad ed moral so nagegeba ed inerman. Peteg, ya isisindag na bilay natan so aliwliwan panuley na ‘dios na sayan mundo,’ si Satanas. Say mundon uuleyan to so ambetel, maruksa, tan sigpot ya abulok.—2 Corinto 4:4.
8. Akin ya agtayo natawag a tuan aligwas iray agawaan na too?
8 Inabuloyan na Dios so magenap a panaon parad totoo ya onsabi ra ed say pantok na sientipiko tan nanengneng ya aligwas da. Balet kasin peteg ya aligwas sano say bekang tan pana so sinalatan na saray paltog, tanke, managbomba iran eroplano, tan nuklear misayl (nuclear missiles)? Kasin aligwas sano saray totoo so makapanbiahe ed liwang balet agmakapanbilay a mankakasakey ed kareenan diad dalin? Kasin aligwas sano saray totoo so antakot a manakar ed saray lansangan no labi, odino anggan diad agew ed arum iran pasen?
No Anto So Impanengneng Na Panaon
9, 10. Anto so malinlinew ya impanengneng na panaon ed apalabas iran siglo? (b) Akin ya agbabawien na Dios so kawayangan a manpili?
9 Impanengneng na subok ed saray siglo na panaon ya agposibli ed saray totoo so matalonan pangiwanwan ed dilin kurang da a nisian ed uley na Dios. Namparan imposible parad sikaran gawaen itan nen say sikara so manbilay ya agmangan, ag-uninum, tan ag-oningas. Say ebedinsya so malinew: Sikatayo so adisenyon mandependi ed panangiwanwan na Manamalsa tayo unong a sikatayo so peteg a pinalsan mandepende ed tagano, danum, tan dagem.
10 Diad impangiyabuloy ed karelmengan, aminpinsan ya indemostra na Dios so maermen iran resulta ed agsuston panangusar na kawayangan a manpili. Tan say kawayangan a manplili so mablin tuloy a regalo ya imbes a babawien itan manlapud totoo, walan inabuloyan ira na Dios pian nengnengen no anto so kabaliksan na agsuston panangusar ed atan. Sasalitaen na Salita na Dios so katuaan sanen ikuanton: “Anggapo ed too so panakar a mangimaton ed kurang to.” Atan so matua met sanen ikuanto: “Inuleyan na too so too ed kasakitan to.”—Jeremias 10:23; Eclesiastes 8:9.
11. Kasin wala so antokaman a nengneng na uley na toon makapangekal ed kairapan?
11 Say impangiyabuloy na Dios ed uley na too ed loob na anemiran libon taon so masekder a tuloy a mangiyilustra ya agnayarian na too ya ekalen so kairapan. Anggapo so panaon ya agawaan to itan. Alimbawa, diad agew to si Arin Solomon na Israel, tekep na amin a kakabatan, kayamanan, tan pakayari to, so agmakapangiburi ed sinagem a nansumpalan na uley na too. (Eclesiastes 4:1-3) Mipadpara, ed agew tayo saray papangulo na mundo, anggaman walaan na sankabaloan a teknikal iran iyaabante, so agmakapangekal ed panirap. Lalon mauges, impanengneng na awaran a saray totoon independenti ed uley na Dios so amadaak ed irap imbes ya ekalen itan.
Say Malaknab a Panmoria na Dios
12-14. Anton malaknab iran gungguna so onsabi bilang pansumpalan ed impangiyabuloy na Dios ed panirap?
12 Say impangiyabuloy na Dios ed kairapan so makapaot-ot parad sikatayo. Balet sikato so angala na malaknab a panmoria, a kabat iray maong a pansumpalan ya onsabi ed kasampotan. Say panmoria na Dios so mangungguna ed saray pinalsa, ya aliwa lambengat ed pigaran taotaon odino ed pigaran libo, noagta nilaksalaksan taotaon, on, diad ando lan ando.
13 No bilang ta atan a situasyon et onlesa kapiganman ed arapen a panaon so agsuston pangusar na sakey ed kawayangan ton manpili diad panuppiat ed paraan na Dios ed panggagawa na bengabengatla, agla nakakaukolan a sikato so pagamoran na panaon pian paneknekan iray panmoria to. Diad impangyabuloy ed saray rebelde ed nilibon taon, inletneg la na Dios so legal a pangiparengan a niyaplika ed ando lan ando inerman diad talba.
14 Lapud inabuloyan nen Jehova so karelmengan tan panirap ed sayan panaon, atan so magenap lan apaneknekan ya anggapoy bengatlan agmitunosan ed sikato ya onaligwas. Andi-duaruwan nipanengneng ya anggapo so independentin panamalikdo na totoo odino espiritun pinalsa a makapangitarok na andi-anggaan iran gungguna. Kanian, sigpot a makanepegan ed Dios a maples a manmekmek ed siopaman a rebelde. “Saray marelmeng so deralen to.”—Salmo 145:20; Roma 3:4.
[Litrato ed pahina 15]
Kayarin pinili na inmunan atateng tayo so isian ed Dios, agnambayag et sikara so tinmatken tan inatey
[Saray litrato ed pahina 16]
Say uley na toon nisian ed Dios so apaneknekan a makadesyang
[Credit Line]
U. S. Coast Guard Photo