Parte 9
No Panon Tayon Amta A Wala Itayo ed “Kaunoran Iran Agew”
1, 2. Panon tayon naamtaan no kasin sikatayo so wala la ed kaunoran iran agew?
PANON tayon naseguro a sikatayo so manbibilay ed panaon sano say Panarian na Dios so onkiwas sumpad sayan peles a sistema na uley na too? Panon tayon naamtaan a sikatayo so asingger lan tuloy ed panaon sano panganggaen na Dios so amin a karelmengan tan kairapan?
2 Labay na saray babangatan nen Jesu-Kristo ya amtaen iraman a bengatla. Sikara so tinmepet ed sikato no anto so “tanda” na kiwawala to ed pakayari na Panarian tan “ed konklusyon na sistema na bengabengatla.” (Mateo 24:3) Inmebat si Jesus diad impangidalatdat ed manmayegmeg-mundo iran ebento tan kipapasen a nantekep pian ipanengneng a say katooan so linmoob la ed “panaon na anggaan,” “kaunoran iran agew” na sayan sistema na bengabengatla. (Daniel 11:40; 2 Timoteo 3:1) Kasin sikatayo a wala ed sayan siglo so akanengneng ed atan ya atibkel a tanda? On, anengneng tayon tuloy so ontan!
Saray Guerra Mundial
3, 4. Panon a saray bakal ed sayan siglo so mitukoyan ed propesiya nen Jesus?
3 Impasakbay nen Jesus a ‘say nasyon so ontalindeg a sumpad nasyon tan panarian sumpad panarian.’ (Mateo 24:7) Nen 1914 say mundo so alanor ed bakal ya akanengneng ed panangipakurang na nasyones tan panpanarian ed dalan a duma manlapud dinanman a bakal sakbay na atan. Diad pangaksobi ed atan a katuaan, saray manag-awaran ed saman a panaon so anawag ed atan a say Baleg a Bakal. Saman so inmunan bakal ed nidumaduman nengneng to ed awaran, say inmunan guerra mundial. Ngalngalin 20,000,000 iran sundalo tan sibilyan so akabalang na bilay da, a dakdakel a tuloy nen dinanman ya akaunan bakal.
4 Tinandaan na Guerra Mundial I so gapowan na kaunoran iran agew. Inkuan nen Jesus a saya tan arum nin ebento so “gapowan na kairapan.” (Mateo 24:8) Apaneknekan itan a tua, unong a say Guerra Mundial II so lalon makapatey, ta ngalngalin 50,000,000 iran sundalo tan sibilyan so akabalang na bilay da. Diad sayan koma-20 siglo, ngalngali 100,000,000 totoo so inatey ed saray bakal, a masulok ya apatiran danay a mas dakel nen say apalabas a nankakasakey ya 400 iran taon! Agaylan baleg a panangondena ed uley na too!
Arum Niran Ebedinsya
5-7. Antoray arum ya ebedinsya a sikatayo so wala la ed kaunoran iran agew?
5 Inlaktip nen Jesus iray arum a nengneng a mangulop ed kaunoran iran agew: “Wala so baleg a yegyegyeg ed nambabangil a pasen, tan diad nanduruman pasen saray salot [epidemyan sakit] tan kakisiran na tagano.” (Lucas 21:11) Mitukoyan itan ed saray ebento nanlapulad 1914, unong a wala so baleg ya indaak ed saray gonigion manlapud saratan a kalamidad.
6 Saray manunan yegyeg so maparanay a nagagawa, a mangegetel ed dakel iran bilay. Say trankaso Espanyol lambengat so anigway na ngalngali 20,000,000 totoo kayari na Guerra Mundial I—diad arum iran kalkulasyon et 30,000,000 odino masulok ni. Say AIDS so angala na nilasus nilibon bilabilay tan nayarin mangetel na nilaksa ni ed asingger ya arapen. Kada taon nilaksalaksan totoo so ompapatey ed saray sakit ed puso, kanser, tan arum iran sakit. Nilaksa ni so ompatey ed kalkalnan ipapatey nisesengeg ed eras. Anggapoy panduaruwa a ‘saray managkabayo ed Apocalipsis’ tekep na saray bakal, kakisiran na tagano, tan epidemya na sakisakit da so mamapatey na dakerakel ed atooan a pamilya nanlapulad 1914.—Apocalipsis 6:3-8.
7 Impasakbay met nen Jesus so idaak na krimen a naeksperiensia ed amin a daldalin. Inkuanto: “Lapud idaak na kaugsan say aro na amayamay so ombetel.”—Mateo 24:12.
8. Panon a say propesiya ed 2 Timoteo kapitulo 3 et mitukoyan ed panaon tayo?
8 Niarum ni, impasakbay na propesiya na Biblia so igeba na moral ya ontanlan mapatnag ed sankamundoan natan: “Diad kaunoran iran agew et onsabi dia so panaon a maatap a mairap a pilimogan. Ta saray totoo et maaro ed inkasikara, maaro ed kuarta, mapasirayew, atagey a linawa, maayew, matunganga ed atateng, malamang, aliwan masimpit, andian na panangaro ed nianakan, anggapo so panangasi ra, managpauges, andian na dangka, maruksa, andian na aro ed kaabigan, managlipot, mayuuges, mapasang, maaro ed likeliket nen say dia ed Dios, a walaan na nengneng na maridios a debosyon ingen itapat da so pakayari to . . . Saray tototo a mauges tan saray managsaol so onuges lan onuges.” (2 Timoteo 3:1-13) Amin na atan so tinmua a mismo ed saray imaton tayo.
Sananey Nin Bengatla
9. Anto so agawa ed tawen a kabansag na gapowan na kaunoran iran agew ed dalin?
9 Wala ni so sananey a bengatlan sengegan na baleg ya indaak na kairapan ed sayan siglo. Mibabansag ed gapowan na kaunoran iran agew nen 1914, agawa so bengatlan angipasen ed katooan ed lalon babaleg a peligro. Diad atan a panaon, unong ya isalaysay na propesiya ed kaunoran a libro na Biblia: “Tinmerak so bakal ed tawen: Si Miguel [si Kristo ed mangatatawen a pakayari] tan saray angheles to so akibakal ed dragon [si Satanas], tan say dragon tan saray angheles to [dedemonyos] so akibakal ingen ta ag-ira analo, nisay aromog ni so pasen da ed tawen. Sirin nibantak so baleg a dragon, say daan ya uleg, samay sakey ya atawag a Diablo tan Satanas, a mamapalikdo ed interon panaayaman a dalin; sikato so nibantak ed dalin, tan saray angheles to so nibantak a kaiba to.”—Apocalipsis 12:7-9.
10, 11. Panon ya alanor so katooan sanen si Satanas tan saray demonyos to so nibasileng ed dalin?
10 Antoray nansumpalan parad atooan a pamilya? Ituloy na propesiya: “Kasi la so dalin tan say dayat, lapud say Diablo so inmakseb ed sikayo, a walaan na baleg a sanok, ta amta ton antiktikey la so panaon to.” On, kabat nen Satanas a say sistema to et manasingger la ed anggaan to, kanian sikato so mangugunaet a mangipabeneg ed saray totoo sumpad Dios sakbay a sikato tan say mundo to et napagit. (Apocalipsis 12:12; 20:1-3) Agaylan nipaabeba iraman ya espiritun pinalsa lapud agsuston panangusar da na kawayangan a manpili! Agaylan makapasinagem iray kipapasen ed dalin diad silong na impluensya ra, nagkalautla nanlapulad 1914!
11 Agpankelawan ya impasakbay nen Jesus so panaon tayo: “Diad dalin irap na nasyones, ya agda amta so pawayan da . . . Napunaw so totoo nisesengeg ed takot tan egagel da ed saray bengatlan onsabi ed panaayaman a dalin.”—Lucas 21:25, 26.
Asingger La So Anggaan na Uley na Too tan Demonyo
12. Anto so sakey ed kaunoran a natitilak iran propesiya a nasumpal sakbay na anggaan na sayan sistema?
12 Pigara nin propesiya na Biblia so natitilak a nasumpal sakbay a deralen na Dios iyan peles a sistema? Dagdaiset! Sakey ed kaunoran et say 1 Tesalonica 5:3, a salitaen to: “Legan a pantotongtongan da so kareenan tan kaligenan, maminpinsan ya onsabi so kadederal ed sikara.” (The New English Bible) Ipanengneng na saya a say anggaan na sayan sistema so onggapo “legan a pantotongtongan da.” Agnamamamtaan na mundo, ya onterak so kadederal sano agda iilaloan, sano say imano na totoo so wala ed iilaloan dan kareenan tan kaligenan.
13, 14. Anton panaon na gonigon so impasakbay nen Jesus, tan panon a manampot itan?
13 Antiktikey la so panaon parad sayan mundon walad leksab na impluensya nen Satanas. Atan so asingger lan mangangga diad panaon na gonigon ya inkuan nen Jesus so nipaakar ed atan: “Ta wala naani baleg ya irap ya agni agawa nanlapulad gapo na mundo ya angga ed natan, anggapo, nisay nagawa lamet.”—Mateo 24:21.
14 Say pantok na “baleg a kairapan” et say bakal na Dios ya Armagedon. Atan so panaon a sinalita nen propeta Daniel sano say Dios et “mekmeken tan panganggaen [to] irayan amin a panarian.” Kabaliksan na saya so anggaan na amin a kaplesan iran uley na toon independente ed Dios. Say uley na Panarian to ed tawen so kumpleton mamanlong ed amin iran kurang na too. Impasakbay nen Daniel, a say manguuley a pakayari so agbalot niiter “ed siopaman a baley.”—Daniel 2:44; Apocalipsis 16:14-16
15. Anto so nagawa ed impluensya nen Satanas tan saray demonyos to?
15 Diad saman a panaon amin ya impluensyan sataniko tan demonyo so mangangga met. Saraman a rebelyoson espiritun pinalsa so naekal pian agda “napalikdon balot iray nasyones.” (Apocalipsis 12:9; 20:1-3) Sikara so asentensyaan ed ipapatey tan manaalagar na kadederal. Agaylan pakainawaan itan parad katooan a nibulos manlapud nipaabeban impluensya ra!
Siopara so Niliktar? Siopara so Ag-niliktar?
16-18. Siopara so makaliktar ed anggaan na sayan sistema, tan siopara so agmakaliktar?
16 Sano saray panangukom na Dios so nidapo sumpad sayan mundo, siopa so niliktar? Siopa so agniliktar? Ipanengneng na Biblia a saraman so malabay ed uley na Dios so nasalimbengan tan makaliktar. Saraman so agmalabay ed uley na Dios so agnasalimbengan noagta naderal a kaiba na mundo nen Satanas.
17 Ikuan na Uliran 2:21, 22: “Ta saray maptek [saraman so manpasakup ed uley na Dios] so manayam naani dia ed dalin, tan saray ayadyari so mansiansia naani ed sikato. Balet saray marelmeng [saraman so agmanpasakup ed uley na Dios], so napegpeg a manlapu ed dalin; tan no nipaakar ed saray managliput, nabagot ira ed sikato.”
18 Ikuan met na Salmo 37:10, 11: “Ta wala ni so daiset, tan say bagel onandi . . . Ingen ta saray mauyamo tawiren da naani dalin, tan manliket ira a dili ed inkadaakan na kareenan.” Iyarum na bersikulo 29: “Saray matunong a mismo so mangayarian na dalin, tan sikara so manayam ed tapew to diad ando lan ando.”
19. Anton simbawa so nepeg tayon ipapuso?
19 Nepeg tayon ipapuso so simbawa na Salmo 37:34, a salitaen to: “Manilalo ed si Jehova tan onuren so dalan to, et itandoro toka a mangayarian ed dalin. Sano napater iray bagel, nanengneng mo.” Ikuan na bersikulo 37 tan 38: “Imatonan mo so nagnap a too tan nengneng mo so maptek, ta wala so mareen ya arapen na atan a too. Bangbalet saray managgawa na mauges a mismo so nabagbag a mankakasakey; say kasumpalan na bagel a totoo et say kapegpeg.”
20. Akin a nibaga tayon saraya so makapaliket a panaon a panbilayan?
20 Agaylan makapaligliwa, on, agaylan makapasagyat a naamtaan a say Dios so peteg a manatalima tan asingger to lan panganggaen so amin a karelmengan tan kairapan! Agaylan makapaliket a namoria a say kasumpalan na saraman a maglorian propesiya so asingsingger la!
[Litrato ed pahina 20]
Impasakbay na Biblia iray ebenton manibukel ed “tanda” na kaunoran iran agew
[Litrato ed pahina 22]
Asingger la, diad Armagedon, saraman so agmanpasakup ed uley na Dios so napater. Saraman so manpasakup so makaliktar ed sakey a matunong a balon mundo