Ligliwa Parad Nagogonigon

“Amin a pinalsa so mantutultuloy a nankakasakey a maningel tan maniirap ya anggad natan.” (Roma 8:22) Say kairapan na too so baleg sanen atan so insulat ed apalabas lan 1,900 taon. Dakel so agonigon. Kanian, asimbawa iray Kristianos: “Mansalitan sililigliwa ed nagogonigon a kakamarerwa.”​—1 Tesalonica 5:14.

Natan, say kairapan na too so lalon babaleg, tan nagkalalon dakel a totoo so nagogonigon. Balet kasin manurpresa itan ed sikatayo? Andin peteg, ta saraya so ituturo na Biblia a bilang “kaunoran iran agew” tan tatawagen ton “panaon a maatap a mairap a pilimogan.” (2 Timoteo 3:​1-5) Impasakbay nen Jesu-Kristo a legan na kaunoran iran agew et wala “iray makapataktakot a nanengneng.”​—Lucas 21:​7-11; Mateo 24:​3-14.

Sano naeksperiensia na totoo so mabayag a kapagaan, takot, ermen, odino arum niran negatibon emosyon, sikara so mabetbet a nagonigon. Say sengegan na gonigon odino alablabas ya ermen et nayarin say impatey na inadaro, sakey a diborsyo, inkaandi na trabaho, odino mantutultuloy a sakit. Saray totoo so nagonigon met sano natalos ira na liknaan na inkaandi-kakanaan, sano liknaen dan sikara so sinmaew tan apaermen daray arum. Siopaman so nayarin onkapuy nisesengeg ed makapaaburidon situasyon, balet sano bayuboan na sakey a too so inkaandi-ilalo tan agmakanengneng na solusyon ed mauges a situasyon, nayarin mansumpal iya ed alablabas a gonigon.

Saray totoo ed kadaanan a panaon so akaeksperiensia na mipadparan liknaan. Si Job so nanirap ed sakit tan personal ya inkaperdi. Liknaen to a sikato so inkaindan na Dios, kanian imbalikas to so panamusol ed bilay. (Job 10:1; 29:​2, 4, 5) Si Jacob so agonigon lapud mabitar ya impatey na ilalak to, ya impulisay so kaligliwa tan mankaliktan ya ompatey. (Genesis 37:​33-35) Walaan na liknaan na impankasalanan ed seryoson lingo, si Arin David so nannangis: “Amin ya agew nanakar ak ed ermen. Makapkapuy ak.”​—Salmo 38:​6, 8; 2 Corinto 7:​5, 6.

Natan, dakel so agonigon lapud pamapairap da ed inkasikaran-dili, panggugunaetan a tumboken so inagew-agew a rutina a labas ed mental, emosyonal, tan pisikal iran kayarian da. Mapatnag a say kaaburidon, tekep na negatibon kanonotan tan emosyon, so mangapekta ed laman tan sengegan na ag-inkasimbang na kemikal ed utek, a mamapawala na gonigon.​—Ipareng so Uliran 14:30.

Tulong a Kaukolan Da

Si Epaprodito, sakey ya inmunan-siglon Kristiano a taga-Filipos, so “agonigon lapud nadngelan [na kakaaro to] a sikato so naninagem.” Si Epaprodito ya akainagem kayari impangibaki na kakaaro to ed Roma dingan na saray probisyon parad si apostol Pablo, so nayarin nanliknan sikato so amaermen ed kakaaro to tan sikato so impasen dan sinmaew. (Filipos 2:​25-27; 4:18) Panon so intulong nen apostol Pablo?

Pinasempet to si Epaprodito tekep na sakey a sulat ed kakaaron taga-Filipos a nankuan: “Ikdan [si Epaprodito] na inyugalin pabano ed ngaran na Katawan tekep na amin a gayaga; tan pablien so ontan a nengneng a lalaki.” (Filipos 2:​28-30) Say ontanlan impansalita nen Pablo ed sikato tan ed impangabrasa na saray taga-Filipos ed sikato tekep na petang tan panangaro, so seguradon nanligliwa ed si Epaprodito tan tinmulong diad impamakepa ed gonigon to.

Anggapo so duaruwa, say simbawa na Biblia a “mansalitan sililigliwa ed nagogonigon a kakamarerwa” so sankaabigan. “Nakaukolan yon amtaen a saray arum et sinononot ed sikayo bilang sakey a too,” so inkuan na sakey a biin akasagmak na gonigon. “Kaukolan yon narengel so sakey, ‘Natalosan ko; agka mapaga.’”

Say toon nagogonigon so mabetbet a kaukolan ya ununan mananap na sakey a mililiknan too a pangibagaan. Saya so nepeg a maong a tumatalineng tan maanos a tuloy. Sikato so nepeg ya ompaliis ed panbilin ed nagogonigon odino manggawa na manangukom iran balikas, a singa, ‘Aliwan ontan so nepeg a liknaan mo’ odino, ‘Atan so aliwan awawey.’ Saray emosyon na nagogonigon a too so sensitibo, tan saratan a mamabalaw a komento so manggawa ed sikaton manliknan mauguges ed inkasikaton dili.

Say sakey a nagogonigon so nayarin manliknan andi-kana. (Jonas 4:3) Ingen, nepeg a nonoten na sakey a too a say peteg a makana et no panon so kablian to ed Dios. Ibabaga na totoon si Jesu-Kristo so “andian na kuenta,” balet saya so ag-anguman ed peteg a kablian to ed Dios. (Isaias 53:3) Napaseguroan, ya unong ya inaro na Dios so pinablin Anak to, inaro to kayo met.​—Juan 3:16.

Inabagey nen Jesus iramay adismaya tan nanggunaet a tinmulong ed sikaran onnengneng ed indibidual a kakanaan da. (Mateo 9:36; 11:​28-30; 14:14) Insalaysay to a pablien na Dios so anggan melag, ya ag-importanten anuyaw. “Anggapo so anggan sakey ed sikaran nalingwanan na Dios,” inkuanto. Agaylan nagkalalon pablien toray totoon manggunaet a manggawa ed linawa to! Diad saraya inkuan nen Jesus: “Anggan saray buek ed kauloan yo so abilang ya amin.”​—Lucas 12:​6, 7.

Tua, nayarin mairap parad sakey a toon nagogonigon a tuloy, ya atalonaan na saray kakapuyan tan kakulangan to, a manisia a sikato so ontanlan pinabli na Dios. Nayarin liknaen ton segurado a sikato so agmanepeg ed panangaro tan panatalima na Dios. Bibidbiren na Salita na Dios a “nayarin mangondena ed sikatayo iray puso tayo”. Balet kasin atan so maneterminan bengatla? Andi aliwan atan. Namoria na Dios a saray makasalanan a totoo so nayarin manisip a negatibo tan kondenaen da ni ingen so inkasikara. Kanian say Salita to so manligliwa ed sikara: “Say Dios so babaleg nen saray kapusoan tayo tan kabat to so amin a bengabengatla.”​—1 Juan 3:​19, 20.

On, say maaron mangatatawen ya Ama tayo so ag-onnenengneng lambengat ed saray kasalanan tan lingolingo tayo. Kabat toray agnapaliisan a kipapasen, say interon kurso na bilay tayo, saray motibo tan getma tayo. Kabat ton atawir tayo so kasalanan, sakit, tan ipapatey tan sirin walaan na baleg iran limitasyon. Say katuaan a sikatayo so manermen tan onsanok ed inkasikatayo so mismon prueba ya agtayo labay so mankasalanan tan agtayo ni ontan kauges. Ikuan na Biblia a sikatayo so “inuleyan na kaapaan” a sumpad dilin linawa tayo. Kanian mililikna so Dios ed miserablen kurang tayo, tan sikato so siaabagey a mangukunsidera ed saray kaleteyan tayo.​—Roma 5:12; 8:20.

Sikatayo so apaseguroan a “si Jehova so mapangasi tan maabagey.” “Unong na kaarawi letakan a manlapud selekan, ontan so kaarawi angibantakan to ed saray impakasumpa tayo. Lapud kabat ton tuloy so inkagawa tayo, a nodnonoten ton dabok itayo.” (Salmo 103:8, 12, 14) On, si Jehova so “Dios na amin a ligliwa, a manliligliwa ed sikatayo diad amin a kairapan tayo.”​—2 Corinto 1:​3, 4.

Say tulong a kaukolan a tuloy na saray nagogonigon et manlapud iyaasingger ed mapangasin Dios da tan awaten so imbitasyon to ya ‘ipasakbat ed sikato so awit da.’ Sikato so peteg a “mamilay lamet ed kapusoan na saray nansibkel.” (Salmo 55:22; Isaias 57:15) Kanian ipapaseseg na Salita na Dios so panagpikasi, a mangikuan: “Imatalek ya amin ed sikato [si Jehova] so kapagaan yo, lapud talimaen to kayo.” (1 Pedro 5:7) On, diad panamegley na panagpikasi tan pankerew saray totoo so makaasingger ed Dios tan mangayaga ed “kareenan na Dios a talonaan ton amin so kanonotan.”​—Filipos 4:​6, 7; Salmo 16:​8, 9.

Saray praktikal a pananguman ed estiloy-bilay so makatulong met ed sakey a manalona ed magonigon a kipapasen. Say pisikal ya ehersisyo, pangan na masustansyan tagano, pangala na tariwan dagem tan supisienten painawa, tan ipaliis ed alablabas a panagbantay ed TV so amin et makana. Sakey a bii so akatulong ed saray nagogonigon diad aktibon impangitagar to ed sikaran manakar. Sanen inkuan na nagogonigon a biin: “Agko labay so manakar,” say bii so matamoy ingen mapekder ya inmebat: “On, manakar ka.” Inreport na bii: ‘Sikami so nanakar na apatiran milyas [6 kilometro]. Sanen akapawil kami, sikato so naksawan, balet magmaong so liknaan to. Agkayo manisia a makatulong so aktibon ehersisyo anggad salien yo itan.’

Anggaman ontan, no maminsan imposiblen kumpleton natalonaan so gonigon, anggaman amin et sinali la, a pati ed saray medikal a panagtambal. “Sinalik lan amin,” so inkuan na matatken a bii, “balet siansian wala so gonigon.” Mipadpara, mabetbet natan ya imposiblin natambal so bulag, say telek, odino say lupoy. Ingen, saray nagogonigon so makaromog na ligliwa tan ilalo diad regular a panagbasa na Salita na Dios, a mangitatarok na seguradon ilalo a permanentin pakainawaan ed amin iran beblay na too.​—Roma 12:12; 15:4.

Sano Anggapo La so Nagonigon Lamet

Sanen deniskribe nen Jesus iray makapataktakot a bengatlan onsabi ed dalin diad kaunoran iran agew, inyarum to: “Legan a sarayan bengatla so onggapon nagawa, tangay kayo tan itangwa iray kauloan yo, lapud say kililiktar yo so asingger la.” (Lucas 21:28) Sasalitaen nen Jesus so nipaakar ed kililiktar a mamaarap ed matunong a balon mundo na Dios, a ditan et “say pinalsa a dili met so nibulos manlapud inkaaripen ed inkabulok tan nawalaan na maglorian kawayangan na ananak na Dios.”​—Roma 8:21.

Agaylan ligliwa itan parad katooan a nibulos ed saray pakabelatan diad apalabas tan ombangon a kinabuasan tekep na malinew-kristal iran kanonotan, a maligsan mankimey ed atan ya agew! Anggapo la so naamper ed sinagem na gonigon. Say seguradon sipan ed katooan et “punasen [na Dios] so amin a lua ed kamataan da, tan anggapo la so patey, nisay panermen nisay pannangis nisay ot-ot. Saray gendat a bengatla so naandi la.”​—Apocalipsis 21:3, 4.

Likud no nipanengneng, saray amin ya inaon ed Biblia so nanlapu ed New World Translation of the Holy Scriptures.