Kapitulo 16
No Panon Kayon Makaapit ed Dios
1. Antoran panpapara so mapatnag ed dakel a relihyon?
SAKEY a turista ya ombibisita ed sakey a bansa ed Bukig so nikelawan ed saray relihyoson ritual a naimatonan to ed sakey a templo na saray Budista. Anggaman saray imahen so aliwan saramay ed kinen Maria odino nen Kristo, dakel ed ritual so mipara ed saramay wala ed simbaan ed bansan panaayaman to. Singa bilang, naimano to so panguusar ed saray rosaryo tan ed inkanta iran dasal. Saratan a panpara so naimatonan met na arum. Diad Bukig odino ed Sagur, saray paraan ya uusaren na saray debotado ed iyaapit ed Dios odino ed saray bengatlan dadayewen so mapatpatnag a manpapara.
2. Panon ya adeskribe so pikakasi, tan akin a manpipikasi so dakel a totoo?
2 Dakel so nagkalautlan manggugunaet a makaapit ed Dios diad panpikasi ed sikato. Say pikakasi so nadedeskribe bilang “say pitatalosan na too ed sakey a sagrado odino masanto—ed Dios, ed dirios, ed biek a mundo, odino ed labas nen natural iran pakayari.” (The New Encyclopœdia Britannica) Anggaman ontan, sano manpipikasi ed Dios, say iisipen lambengat na arum et say pakagunggunaan da ed satan. Alimbawa, onia so kerew na sakey a laki ed sakey ed Tastasi nen Jehova: “No ipikasi yo ak, kasin nasolbar iray problemak ed pamilya, diad trabaho, tan ed bunigas ko?” Mapatnag ya ontan so abaloan na laki, balet dakel so manpipikasi tan naiimanon siansian wadtan niray problema ra. Kanian nitepet tayo, ‘Akin a kaukolan tayoy onapit ed Dios?’
NO AKIN YA ONAPIT ED DIOS
3. Diad siopa so nepeg a kipaarapan na saray pikakasi tayo, tan akin?
3 Say pikakasi so aliwan maapan ritual, nisay satan so basta labat paraan pian makagamor na bengatla. Say manunan rason ed iyaasingger ed Dios et say pakawalaan na maapit a siglaotan ed sikato. Sirin nepeg tayon ipaarap iray pikakasi tayo ed si Jehova a Dios. “Si Jehova asinger ed amin ya ontawag ed sikato,” kuan nen salmistan David. (Salmo 145:18) Iimbitaan itayo nen Jehova a nawalaan na mareen a pisisiglaotan ed sikato. (Isaias 1:18) Saramay onkikiwas ed sayan imbitasyon so mipakna ed salmistan angikuan: “Bangbalet ta maong ed siak so ondere ed abay na Dios.” Akin? Lapud saraman so onaasingger ed si Jehova a Dios so manggayaga ed tuan liket tan kareenan na nonot.—Salmo 73:28.
4, 5. (a) Akin ya importanti so panpikasi ed Dios? (b) Anton klase na siglaotan ed Dios so nipaalagey tayo diad panamegley na pikakasi?
4 Akin a manpikasi ni ed Dios pian patulongan anta ‘kabat to la so kaukolan tayo sakbay a kerewen tayo’? (Mateo 6:8; Salmo 139:4) Ipapanengneng na pikakasi a walaan itayo na pananisia ed Dios tan sikatoy momoriaen tayo bilang say Lapuan na “amin a maong a palankap tan amin ya ayadarin palankap.” (Santiago 1:17; Hebreos 11:6) Naliliketan si Jehova ed saray pikakasi tayo. (Uliran 15:8) Sikatoy maliket ya ondengel ed makabaliksan iran balikas na panangapresya tan panangigalang tayo, no panon a say sakey ya ama so manliket ed idengel ed malangwer ya anak ton masimoon a misasalamat. (Salmo 119:108) No iner a wala so maabig a siglaotan na ama tan anak, wala so maligsan pitatalosan. Say anak ya aaroen et labalabay toy mitongtong ed ama to. Tua met iya ed siglaotan tayo ed Dios. No talagan aapresyaen tayo so nanaaralan tayo nipaakar ed si Jehova tan say aro ya impanengneng to la’d sikatayo, nawalaan itayo na mabiskeg a pilalek a nibalikas so walan liknaan tayo diad pikakasi.—1 Juan 4:16-18.
5 Sano onaasingger ed Sankatageyan a Dios, kaukolan a sikatayoy magmaliw a marespeto, anggaman agnakaukolan a masyadon mapaga nipaakar ed eksakto iran salita ya uusaren tayo. (Hebreos 4:16) Sikatayoy lawas makatupleg ed si Jehova. Tan agaylan pribilihyo a nayarian tayon ‘ipaway so puso tayo’ ed Dios diad pikakasi! (Salmo 62:8) Say apresasyon parad si Jehova so mangitonton ed maligsan pisisiglaotan ed sikato, a singa say nanggayagaan na matoor a toon si Abraham bilang kaaro na Dios. (Santiago 2:23) Balet sano manpipikasi ed Soberanon Katawan ed talba, nepeg tayon tuloken iray kakaukolanen to ed iyaasingger ed sikato.
SARAY KAKAUKOLANEN PARAD IYAAPIT ED DIOS
6, 7. Anggaman ag-onkekerew so Dios na bayar pian dengelen iray pikakasi tayo, antoy kakaukolanen to ed sikatayo sano manpikasi tayo?
6 Kasin nakakaukolan so kuarta pian makaasingger ed Dios? Dakel so manbabayar ed saray klero pian ipikasian ira. Panisiaan ni ingen na arum a saray pikakasi ra so narengel unong ed kabaleg na donasyon da. Balet, ag-ibabaga na Salitay Dios a say panangiyapay na kuarta so kakaukolanen ed sikatayo pian makaasingger ed si Jehova diad pikakasi. Saray espiritual a probisyon to tan saray bendisyon na pisisiglaotan ed sikato ed pikakasi so naala ya anggapoy bayar.—Isaias 55:1, 2.
7 Anto, sirin, so kakaukolanen? Say suston awawey na puso so sakey a kakaukolanen. (2 Awaran 6:29, 30; Uliran 15:11) Diad puso tayo et nepeg tayon mangagamil na pananisia ed si Jehova a Dios bilang say “Dumerengel na pikakasi” tan “mananumang ed saray mananap ed sikato.” (Salmo 65:2, NW; Hebreos 11:6) Nepeg a nawalaan itayo met na mapaabeban puso. (2 Arari 22:19; Salmo 51:17) Diad sakey ed saray ilustrasyon to, impanengneng nen Jesu-Kristo ya apaneknekan a lalon matunong so sakey a mapaabeban managsingil na buis tekep na mapaabeban awawey na puso nen say mapasirayew a Pariseo diad iyaasingger ed Dios. (Lucas 18:10-14) Diad iyaasingger tayo ed Dios diad pikakasi, tandaan tayo a “balang sakey a mapangta ed puso sikato so makapadimla ed Jehova.”—Uliran 16:5.
8. No kaliktan tayon ebatan na Dios iray pikakasi tayo, diad anto so nepeg tayon linisan ed inkasikatayo?
8 No pilalek tayon ebatan na Dios iray pikakasi tayo, kaukolan tayon linisan so inkasikatayo manlapud makasalanan a kondukta. Sanen pinaseseg nen babangatan a Santiago so arum pian onasingger ed Dios, inyarum to: “Linisan yo so limalima yo, sikayo a managkasalanan; tan gogolan yo so puspuso yo, sikayo a nankadua so linawa.” (Santiago 4:8) Anggan saray managgaway-mauges so nawalaan na mareen a pisisiglaotan ed si Jehova no sikaray magbabawi tan iwaklit day datin dalan na kabibilay da. (Uliran 28:13) Ag-itayo dengelen nen Jehova no sikatayoy mankuankuanan lambengat a nilinisan tayoy dalan tayo. Kuan na Salitay Dios: “Saray mata [nen Jehova, NW] wala ed saray matunong tan saray layag to imatleken to so pikakasi ra; say lupa balet [nen Jehova, NW] wala ed saray mangawa na mauges.”—1 Pedro 3:12.
9. Nepeg a diad panamegley na siopa no onasingger tayo ed si Jehova, tan akin?
9 Kuan na Biblia: “Angapo so maptek a too ed tapew na dalin a mangawa na maong, tan ag mankasalanan.” (Eclesiastes 7:20) Sirin nayarin itepet yo: ‘Panon, sirin, so pakaasingger tayo ed si Jehova a Dios?’ Oneebat so Biblia: “No wala so toon mankasalanan, wala so apireng tayo ya onarap ed Ama, si Jesu-Cristo a matunong.” (1 Juan 2:1) Anggaman makasalanan itayo, sikatayoy makaasingger ed Dios tekep na kawayangan ed panagsalita diad panamegley nen Jesu-Kristo, ya inatey bilang dondon parad sikatayo. (Mateo 20:28) Sikato so mogmon paralanan a diad panamegley to et makaasingger tayo’d si Jehova a Dios. (Juan 14:6) Agtayo nepeg ya ipasen ya automatikon sakbongan na balor na dondon bagat nen Jesus iray kasalanan tayo anggan sigagagala tayon mankasalanan. (Hebreos 10:26) Anggaman ontan, no sikatayoy mankakasalanan ni a tunggal paminsan anggaman ed gunaet tayon paliisan so mauges, nayarian tayoy manpataoli tan onkerew na panamerdona na Dios. Sano onaasingger itayo ed sikato tekep na mapaabeban puso, dengelen to itayo.—Lucas 11:4.
SARAY PANKANAWNAWAN MAKAPITONGTONG ED DIOS
10. No nipaakar ed pikakasi, panon tayon naalig si Jesus, tan antoray pigaran okasyon parad pribadan pikakasi?
10 Pinablin tuloy nen Jesu-Kristo so siglaotan to ed si Jehova. Sirin, angipanaon si Jesus pian mitongtong ed Dios diad pribadan pikakasi. (Marcos 1:35; Lucas 22:40-46) Maabig no aligen tayo so alimbawa nen Jesus tan maparanay a manpikasi ed Dios. (Roma 12:12) Matukoy lambengat ya igapo so agew tekep na panangibalikas na pikakasi, tan sakbay ya onugip, manepeg lambengat a pisalamatan si Jehova lapud saray agawaan tayo ed sanagew. Diad loob na sakey ya agew, seguroen a makaasingger ed Dios “ed amin a panaon.” (Efeso 6:18) Mareen a makapanpikasi tayo ni ingen ed puso tayo, diad pakaamtan narengel itayo nen Jehova. Say pribadan pitongtong ed Dios so ontutulong ed sikatayo pian napaelet so siglaotan tayo ed sikato, tan say inagew-agew a pikakasi ed si Jehova so ontutulong ed sikatayo pian lalon napaapit tayo ed sikato.
11. (a) Akin a nepeg a mankakasakey a manpikasi iray pamilya? (b) Antoy kabaliksan to sano ibaga yoy “Amen” diad sampot na pikakasi?
11 Ontatalineng met si Jehova ed saray pikakasin niyaapay ed biang na saray grupoy totoo. (1 Arari 8:22-53) Makaasingger tayo ed Dios bilang sakey a pamilya, diad pangidauloy ulo na sankaabungan. Saya so mamapaelet ed bedber na pamilya, tan si Jehova so magmamaliw a peteg ed saray kalangweran legan a narerengel day atateng da a mapaabeban manpipikasi ed Dios. Panon no irerepresentay sakey a grupo diad pikakasi, anganko et diad sakey a miting na Tastasi nen Jehova? No kabiangan itayo na saray dumerengel, ontalineng tayon mapetepet ta pian diad sampot na pikakasi, sikatayo so sigpot-puson makapangibagay “Amen,” a kabaliksan toy “Ontan pa komon.”—1 Corinto 14:16.
SARAY PIKAKASIN DEDENGELEN NEN JEHOVA
12. (a) Akin ya ag-eebatan na Dios so arum a pikakasi? (b) Akin ya agtayo nepeg ya iyapasakey lambengat ed personal iran pankaukolan sano manpipikasi?
12 Liknaen na arum a saray pikakasi ra so ag-eebatan na Dios anggaman sikaray manpipikasi ed sikato ed panamegley nen Kristo. Anggaman ontan, inkuan nen apostol Juan: “No mankerew itayo na bengatla unong ed linawa [na Dios], sikato dengelen to itayo.” (1 Juan 5:14) Kanian, sirin, nakaukolan tayon onkerew unong ed linawa na Dios. Lapud sikatoy interesado ed espiritual a pankaabigan tayo, antokaman a mangapekta’d espiritualidad tayo so matukoy a tema parad pikakasi. Nepeg tayon resistian so tukso a naynay a pisikal iran pankaukolan lambengat so pangiyapasakeyay imano. Singa bilang, bangta manepeg labat so pangipikasi parad aralem a pakatalos tan biskeg diad pideneng ed sakit, saray kapagaan nipaakar ed bunigas so agnepeg a sengegay pakabaliwalaay espiritual iran interes. (Salmo 41:1-3) Diad pakakaimanon napapagaan a tuloy ed bunigas to, sakey a Kristianon bii so kinmerew na tulong ed si Jehova a sikatoy nawalaan na suston panmoria ed sakit to. Bilang resulta, agto la tanton panpapagaay problema to ed bunigas, tan alikna ton sikatoy naikdan na “biskeg ed labas nen normal.” (2 Corinto 4:7, NW) Say pilalek ton makatulong ed arum diad espiritual a paraan so apabiskeg, tan sikatoy nagmaliw a sigpot-panaon a manangiyabawag na Panarian.
13. A singa nibaga ed Mateo 6:9-13, antoray pigaran matukoy a tema ya ilaktip tayo ed saray pikakasi tayo?
13 Anto so ilaktip tayo ed saray pikakasi tayo ta pian napaliket si Jehova ya ondengel ed saratan? Imbangat nen Jesu-Kristo iray babangatan to no panon so panpikasi. Diad modelon pikakasin nikurit ed Mateo 6:9-13, angiletneg na sakey a padron na saray tema nipaakar ed nayarin ipikasi tayo. Anto so manunan nonoten ed saray pikakasi tayo. Say ngaran nen Jehova a Dios tan say Panarian so nepeg a say manunaan. Say ikerew na materyal iran pankaukolan tayo so matukoy met. Importanti met ya onkerew na kaperdona na saray kasalanan tayo tan kipaliis ed saray pakatuksoan tan ed marelmeng a sakey, si Satanas a Diablo. Aglabay nen Jesus ya ikankansion tayo iyan pikakasi odino ulit-uliten itan, ya ibabalikas ya agnononotey kabaliksan to. (Mateo 6:7) Anto kasin klase na siglaotan so pagmaliwan to no say sakey ya anak so manguusar ed parepareho iran balikas kada mitongtong ed ama to?
14. Nilikud ed saray pikekerew, antoran pikakasi so nepeg tayon iyapay?
14 Nilikud ed saray pikekerew tan impapuso iran ey-ey, nepeg tayo so mangiyapay na saray pikakasi na panangidayew tan pisasalamat. (Salmo 34:1; 92:1; 1 Tesalonica 5:18) Makapangipikasi tayo met parad arum. Saray pikakasi nipaakar ed agagi tayo ed espiritual a napapairap odino napapasegsegang so mangipapanengneng na interes tayo ed sikara, tan napapaliket si Jehova ya ondengel ed pangibalikas tayo na ontan a paga. (Lucas 22:32; Juan 17:20; 1 Tesalonica 5:25) Diad tua, insulat nen Apostol Pablo: “Ag kayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan to’n amin a pakatalos, bantayan to so kapusoan yo tan saray nonot yo ed Cristo Jesus.”—Filipos 4:6, 7.
MANTULTULOY ED PIKAKASI
15. Anto so nepeg tayon tandaan no saray pikakasi tayo so ompatnag ya agnaeebatan?
15 Anggaman makakagamor kayo na pikakabat nipaakar ed Dios, nayarin liknaen yo ni no maminsan ya agnaeebatan iray pikakasi yo. Posiblin ontan lapud nayarin aliwa nin panaon pian ebatan na Dios so sakey ya ispisipikon pikakasi. (Eclesiastes 3:1-9) Nayarin abuloyan nen Jehova a mantultuloy so sakey a kipapasen, balet talagan eebatan toray pikakasi tan kabat toy sankaabigan a panaon a panggawa ed satan.—2 Corinto 12:7-9.
16. Akin a nepeg a mantultuloy tayo ed panpikasi, tan panon a say panggawa tayo ed saya so mangapekta ed siglaotan tayo ed Dios?
16 Say pantultuloy tayon panpikasi so mangipaparungtal na impapuson interes ed ibabaga tayo ed Dios. (Lucas 18:1-8) Alimbawa, nakerew tayo ed si Jehova a tulongan to itayon natalonaan so pigaran kakapuyan. Diad pantultuloy a panpikasi tan onkiwas a mitunosan ed saray kerew tayo, nipapanengneng tayoy inkasimoon tayo. Kaukolan tayoy magmaliw ya ispisipiko tan matua ed saray kerew tayo. Nagkalautlan importanti masimoon a panpikasi sano nipapaarap ed tukso. (Mateo 6:13) Diad pantutultuloy tayon panpikasi legan a panggugunaetan tayon kontrolen iray makasalanan a pilalek tayo, nanengneng tayo no panon itayon tulongan nen Jehova. Saya so mamabiskeg ed pananisia tayo tan mamaelet na siglaotan tayo ed sikato.—1 Corinto 10:13; Filipos 4:13.
17. Panon tayon nagunggunaan manlapud mapikasin awawey diad panaglingkor ed Dios?
17 Diad pamayubo ed mapikasin awawey legan a mangisasaklang na sagradon serbisyo ed si Jehova a Dios, namoria tayo ya agtayo manlilingkor ed sikato lapud dilin biskeg tayo. Si Jehova so mangiiter ed sikatayo na biskeg ed pangisaklang na serbisyo ed sikato. (1 Corinto 4:7) Say pamidbir ed saya so ontulong ed sikatayo a magmaliw a mapaabeba tan napaelet so siglaotan tayo ed sikato. (1 Pedro 5:5, 6) On, walaan tayo na mabiskeg iran rason pian mantultuloy ed pikakasi. Saray masimoon a pikakasi tayo tan mabli iran pikakabat ed no panon itayon makaapit ed maaron Ama tayo ed tawen so manggawa ed bilay tayon peteg a maliket.
SAY PITATALOSAN ED SI JEHOVA SO ALIWAN SAKSAKEY-DAPAG
18. Panon tayon ontalineng ed Dios?
18 No labay tayon dengelen na Dios iray pikakasi tayo, nepeg tayon talinengey ibabaga to. (Zacarias 7:13) Agto la ipapasabi iray mensahe to ed panamegley na madibinon apuyanan iran propeta tan maseguron agmanguusar na espiritistiko iran paraan. (Deuteronomio 18:10-12) Balet natalineng tayo so Dios diad panaral ed Salita to, say Biblia. (Roma 15:4; 2 Timoteo 3:16, 17) No panon a nayarin kaukolan ya ipasal ni pakataway tayo ed pisikal iran taganon makapabunigas ed sikatayo, sikatayoy papasesegen a ‘panpilalekan a singa saray kapangyanak ya ugugaw, so gatas a maespiritu ya andian na saol to a mamabaleg ed sikayo ed kilalaban.’ Bayuboan so pakataway yo parad espiritual a tagano diad panbasa ed Salitay Dios ya inagew-agew.—1 Pedro 2:2, 3; Gawa 17:11.
19. Antoy nagungguna ed pandalepdep ed nababasa yo ed Biblia?
19 Dalepdepen so babasaen yo ed Biblia. (Salmo 1:1-3; 77:11, 12) Kabaliksan na satan so panumameng ed materyal. Nipareng yo iya ed pangiling na tagano. Nagiling yo so espiritual a tagano diad panamegley na pangisiglaot ed babasaen yo ed saray bengatlan amta yo la. Konsideraen no panon a say materyal so mangaapekta ed bilay yo, odino isipen a maong so ipaparungtal na satan nipaakar ed saray kualidad nen Jehova tan saray pidedeneng to. Kanian diad panamegley na personal a panagaral, makagamor kayo na espiritual a taganon itatarya nen Jehova. Saya so lalon mangiyapit ed sikayo ed Dios tan ontulong ed sikayon mideneng ed inagew-agew iran problema.
20. Panon a say iyaatendi ed Kristiano iran miting so ontulong ed sikatayo a makaapit ed Dios?
20 Sikayo met so makaapit ed Dios diad italineng ed Salita to a nasisingbat diad Kristiano iran miting, no panon a saray Israelita so atentibon tinmalineng sanen nandaragup ira pian ondengel ed mapublikon panagbasa ed Ganggan na Dios, diad ontan et tutulongan iray dumerengel da pian talosan tan napakiwas a mangiyaplika ed no anto so narerengel da. Saya so nansumpal ed baleg a gayaga. (Nehemias 8:8, 12) Kanian iyugali iyatendi ed saray miting na Tastasi nen Jehova. (Hebreos 10:24, 25) Saya so ontulong ed sikayon natalosan tan niyaplika so pikakabat na Dios ed bilay yo tan mamaliket ed sikayo. Say pagmaliw a kabiangan na sankamundoan a Kristianon impanaagi so ontulong ed sikayo a mansiansian maapit ed si Jehova. Tan singa naimano tayo, makaromog kayo na tuan kaligenan ed limog na totoo na Dios.
SUBOKEN SO PIKAKABAT YO
Akin a nepeg kayon onapit ed si Jehova?
Antoray pigaran kakaukolanen parad iyaapit ed Dios?
Antoy nilaktip yo ed saray pikakasi yo?
Akin a nepeg yoy mantultuloy ed pikakasi?
Panon kayon makatalineng ed si Jehova natan?
[Interon-pahina a litrato ed pahina 157]