Leksion 4
Siopa So Diablo?
Satanas a Diablo—iner so nanlapuan to? (1, 2)
Panon ya ibabalang nen Satanas so totoo? (3-7)
Akin a nepeg mon resistian so Diablo (7)
1.Say salitan “diablo” et kabaliksan toy sakey a mangibabaga na marelmeng a katilaan nipaakar ed sananey a too. Say “satanas” et kabaliksan toy kabusol odino sumusumpa. Sarayan termino so niiter ed manunan kabusol na Dios. Diad inmuna, sikato so ayadyarin anghel ed tawen a kaiba na Dios. Balet, diad saginonor et alablabas so impannonot to’d sarili to tan kinaliktan to so dayew a makanepegan a kien na Dios.—Mateo 4:8-10.
2. Sayan anghel, si Satanas, so akisalita ed si Eva diad panamegley na uleg. Diad panitila to ed si Eva, sikatoy apasunggay to ed Dios. Diad ontan et inataki nen Satanas so natatawag ya “inkasoberano” na Dios, odino posisyon bilang Sankatageyan. Sinuppiat nen Satanas no kasin manguuley so Dios ed makanepegan a dalan tan ed pankaabigan na uuleyan To. Pinalesa met nen Satanas so panduaruwa no kasin wala so too a mansiansian matoor ed Dios. Diad impanggawa ed saya, ginawa nen Satanas so inkasikato a kabusol na Dios. Satan no akin ya asabin atawag a Satanas a Diablo.—Genesis 3:1-5; Job 1:8-11; Apocalipsis 12:9.
3. Sasalien nen Satanas a palikdoen so totoo a mandayew ed sikato. (2 Corinto 11:3, 14) Say sakey a paraan ya ibabalang to so totoo et diad panamegley na palson relihyon. No say sakey a relihyon ed mangibabangat na katilaan nipaakar ed Dios, satan so peteg a walaay kakanaan ed gagala nen Satanas. (Juan 8:44) Saray totoo a membro na saray palson relihyon so nayarin sisisimoon a manisia a dadayewen da so tuan Dios. Balet ta sikaray peteg a manlilingkor ed si Satanas. Sikato so ‘dios na sayan mundo.’—2 Corinto 4:4.
4. Say espiritismo so sananey nin paraan a nisisilong nen Satanas so totoo diad pakapanyari to. Nayarin sikaray patulongan ed saray espiritu pian paprotektaan, pian pasakitan so arum, pian nipasakbay so arapen, odino pian manggawa na saray milagro. Si Satanas so marelmeng a puersa a walad benegan na amin na sarayan agamil. Pian napaliket so Dios, nepeg ya agtayo mibabali ed antokaman a paraan ed espiritismo.—Deuteronomio 18:10-12; Gawa 19:18, 19.
5. Ibabalang met nen Satanas so totoo diad panamegley na pirmin pangikinon ed rasa tan ed panagdayew ed mapulitika iran organisasyon. Liknaen na arum a say nasyon odino rasa ra so magmaong nen say arum. Balet saya so aliwan tua. (Gawa 10:34, 35) Arum a totoo so manmamatalek ed mapulitika iran organisasyon a manresolbi ed saray problema na too. Diad panggawa ed saya, sikaray mangipupulisay ed Panarian na Dios. Satan labat so mogmon solusyon parad saray problema tayo.—Daniel 2:44.
6. Say sananey nin paraan ya ibabalang nen Satanas iray totoo et diad panutukso to ed sikara ed makasalanan iran pilalek. Ibabaga nen Jehova ed sikatayo a paliisan so makasalanan ya agagamil lapud amta ton saratan so mamasakit ed sikatayo. (Galacia 6:7, 8) Kaliktan na arum a totoo a sika so miulop ed sikara ed ontan iran agamil. Balet, tandaan a si Satanas so peteg a malabay a gawaen mo irayan bengatla.—1 Corinto 6:9, 10; 15:33.
7. Nayarin usaren nen Satanas so panamasegsegang odino isusumpa pian natangguyor to kan taynan si Jehova. Arum ed inadarom so nayarin onsanok a tuloy lapud sika so manaaral na Biblia. Arum so nayarin manlurey ed sika. Balet siopa so akaotangan moy bilay mo? Labay nen Satanas a pagyawen ka ta pian ontunda kan manaral nipaakar ed si Jehova. Agmo aabuloyan si Satanas a manalo! (Mateo 10:34-39; 1 Pedro 5:8, 9) Diad panresiste ed Diablo, napaliket mo si Jehova tan nipanengneng mo a sika so manusuporta ed inkasoberano To.—Uliran 27:11.
[Saray litrato ed pahina 9]
Say palson relihyon, espiritismo, tan nasyonalismo so mangibabalang ed totoo
[Litrato ed pahina 9]
Resistian si Satanas diad pantultuloy a panaral nipaakar ed si Jehova