Leksion 7
Iyaapit ed Dios Diad Pikakasi
Akin ya importanti so manpikasi a regular? (1)
Siopa so nepeg mon panpikasian, tan panon? (2, 3)
Antoray manepeg a tema parad pikakasi? (4)
Kapigan so nepeg mon panpikasi? (5, 6)
Kasin tatalinengen na Dios so amin a pikakasi?(7)
1. Say pikakasi so sipapaabeban pitotongtong ed Dios. Nepeg mo so manpikasi ed Dios a regular. Diad ontan et naliknam a sika so maapit ed sikato a singa pinablin kaaro. Si Jehova so abalbaleg tan makapanyari, ingen tatalinengen toray pikakasi tayo! Kasin regular kan manpipikasi ed Dios?—Salmo 65:2; 1 Tesalonica 5:17.
2. Say pikakasi so kabiangan na panagdayew tayo. Sirin, nepeg tayo so manpikasi labat ed Dios, si Jehova. Sanen wadiad dalin si Jesus, sikatoy lawas nanpikasi ed Ama to, aliwan ed siopaman. Nepeg tayo met a gawaen so ontan. (Mateo 4:10; 6:9) Anggaman ontan, amin a pikakasi tayo so nepeg a nibaga diad ngaran nen Jesus. Ipapanengneng na saya a rerespetoen tayo so posisyon nen Jesus tan walaan itayo na pananisia ed dondon bagat to.—Juan 14:6; 1 Juan 2:1, 2.
3. Sano manpikasi itayo nakaukolan a mitongtong itayo ed Dios manlapud puso. Nepeg ya agtayo ibaga iray pikakasi tayo ya impatlep odino binasa manlapud libron-dasalan. (Mateo 6:7, 8) Nayari itayon manpikasi ed dinanman a mapagalang a posisyon, diad anggan anton panaon, tan diad anggan iner a pasen. Narengel na Dios so anggan makalnan pikakasi manlapud puso tayo. (1 Samuel 1:12, 13) Maabig so pananap na mareen a pasen ya arawi manlapud arum a totoo pian ibaga so personal a pikakasi tayo.—Marcos 1:35.
4. Antoran tema so ipikasim? Antokaman a nayarin mangapekta na pikakaarom ed sikato. (Filipos 4:6, 7) Say modelon pikakasi so mangipapanengneng a nepeg tayon ipikasi so ngaran tan gagala nen Jehova. Makapikerew itayo met parad kitarya na materyal iran pankaukolan tayo, parad kaperdona na saray kasalanan tayo, tan parad tulong pian resistian so tukso. (Mateo 6:9-13) Saray pikakasi tayo so nepeg ya agsinisiblet. Nepeg tayo labat ya ipikasi iray bengatla a mitunosan ed linawa na Dios.—1 Juan 5:14.
5. Makapanpikasi ka kapiganman a pakiwasen ka na pusom a misalamat odino mangidayew ed Dios. (1 Awaran 29:10-13) Nepeg mo so manpikasi sano walaan ka na saray problema tan sano nasusubok so pananisiam. (Salmo 55:22; 120:1) Matukoy so panpikasi sakbay kan mangan. (Mateo 14:19) Iimbitaan itayo nen Jehova a manpikasi “ed kada pankanawnawa.”—Efeso 6:18.
6. Nagkalalo lan nakaukolan tayo so manpikasi no akapanggawa itayo na seryoson kasalanan. Diad ontan iran panaon nepeg tayon kerewen so panangasi nen Jehova tan panamerdona to. No ipatua tayo iray kasalanan tayo ed sikato tan gawaen tayoy anggaay nayarian tayon agla uliten iratan, say Dios so “akaparaan a mamerdona.”—Salmo 86:5; Uliran 28:13.
7. Tatalinengen labat nen Jehova iray pikakasi na matunong a totoo. Pian dengelen na Dios iray pikakasim, nepeg mon gawaen so anggaay nayarian mo a manbilay unong ed saray ganggan to. (Uliran 15:29; 28:9) Nepeg mo so manpaabeba sano manpipikasi ka. (Lucas 18:9-14) Nakaukolan mon pankimeyan so ipipikasim. Diad ontan et napaneknekan mon sika so walaan na pananisia tan talagan papaneknekan mo so ibabagam. Diad ontan labat ya ebatan nen Jehova iray pikakasim.—Hebreos 11:6.