Leksion 15

Pananulong ed Arum a Manggawa ed Linawa na Dios

Akin ya ibaga ed arum so naaaralan mo? (1)

Diad siopa so panginabangan mo na maong a balita? (2)

Antoy epekto na konduktam ed arum? (2)

Kapigan kan makapiulop a manpulong a kaiba so kongregasyon? (3)

1. Naaaralan mo la natan so dakel a maabig iran bengatla manlapud Biblia. Sayan pikakabat so nepeg a mangitonton ed pamayubom na Kristianon personalidad. (Efeso 4:22-24) Say ontan a pikakabat so makana ta pian nagamoran mo so magnayon a bilay. (Juan 17:3) Anggaman ontan, arum met so nakaukolan a makarengel ed maong a balita ta pian sikara met so nisalba. Amin a tuan Kristianos so nepeg a mantasi ed arum. Satan so ganggan na Dios.​—Roma 10:10; 1 Corinto 9:16; 1 Timoteo 4:16.

2. Nayarian mon igapo diad panginabang mo na maong iran bengatlan naaaralan mo diad saraman so asingger ed sika. Ibaga iratan ed pamilyam, kakaaro, kaeskuela, tan katrabahoan. Magmaliw a mapangasi tan maanos legan mon gagawaen itan. (2 Timoteo 2:24, 25) Tandaan a saray totoo so mabetbet a mas onnenengneng ed kondukta na sakey nen say italineng da ed ibabaga to. Kanian say maong a konduktam so managyat ed arum pian ontalineng ed mensahen ibagam ed sikara.​—Mateo 5:16; 1 Pedro 3:1, 2, 16.

3. Nasabi panaon, sika so onkualipikan onggapon manpulong a kaiba so lokal a kongregasyon na Tastasi nen Jehova. Saya so sakey ya importantin kundang ed iyaaligwas mo. (Mateo 24:14) Agaylan gayaga itan no sika so makayarin ontulong ed sakey a magmaliw ya aripen nen Jehova tan nagamoran so magnayon a bilay!​—1 Tesalonica 2:19, 20.