Seguradon Ilalo

“Manlapud bektan kianak wadtan so tuloytuloy a posibilidad a say too et nayarin ompatey antokaman ya oras; tan agnapaliisan, sayan posibilidad et nagawan bengatla.”—ARNOLD TOYNBEE, MANAG-AWARAN NA BRITANYA.

1. Anton inkapeteg so kaukolan ya awaten na katooan, a mamapalesa na antoran tepet?

SIOPAY makasuppiat ed asalambit ed tagey a maawaran a katuaan? Lawas a kaukolan ya awaten na katooan so teriblin inkapeteg na ipapatey. Tan agaylan anggapoy-nagawaan a liknaan so naeksperiensia tayo sano ompatey so inad-aro tayo! Say ipapatey sirin so ompapatnag a sigpot ya agnasuni. Posibli kasi pakapikasakey lamet ed saray inad-aro tayon inaatey? Anton ilalo so itatarya na Biblia parad inaatey? Konsideraen so onggendan a salaysay.

‘Inatey so Kaaro Tayo’

2-5. (a) Sanen inatey si kaaro ton Lazaro, panon ya impanengneng nen Jesus so inkamabulos tan abilidad ton mamaoli ed sikato? (b) Likud ed impamilay lamet ed si Lazaro, antoy agawaan na milagron kikioli?

² Say taon et 32 K.P. Diad melag a baley na Betania, taloran kilometro ed paway na Jerusalem, so panaayaman nen Lazaro a kaibay agagi ton Marta tan Maria. Sikaray maapit a kakaaro nen Jesus. Sakey ya agew, graben nansakit si Lazaro. Tampol, saray mapagan agagi to so angibalita ed si Jesus, a walad basil ed saman na Ilog na Jordan. Walaan na lugor si Jesus ed si Lazaro tan ed agagi to, kanian ag-abayag et amaarap ed Betania. Diad dalan et inkuan nen Jesus ed saray babangatan to: “Si kaaro tayon Lazaro naugip; ingen onla ak, pian sikato so liingen ko ed ugip.” Lapud agtampol atebek na saray babangatan so kabaliksan na sayan balikas, malinew ya inkuan nen Jesus: “Si Lazaro inatey.”​—Juan 11:​1-15.

³ Diad impakadngel ton onsasabi lay Jesus ed Betania, batik si Marta a mangabet ed sikato. Atenyeg ed kaermenan to, sikatoy pinaseguroan nen Jesus: “Si agim onoli ed bilay.” Inmebat si Marta: “Amtak ya onoli ed bilay sano kioli ed kaunoran ya agew.” Diad ontan inkuan nen Jesus ed sikato: “Siak so kiolian, tan say bilay. Say manisia ed siak, anggan inatey la nabilay ni.”​—Juan 11:​20-25.

⁴ Insan linma si Jesus ed lubok tan indirehi ton ekalen so baton akasara ed lolooban. Kayari maksil ya impanpikasi, ingganggan to: “Lazaro, paway ka!” Tan leleg ya amin a mata so akaapasakey ed lubok, talagan pinmaway si Lazaro. Pinaoli nen Jesus si Lazaro​—pinapawil toy bilay na laki ya apat agew lan inatey!​—Juan 11:​38-44.

⁵ Walaan la na pananisia si Marta ed sipan a kioli. (Juan 5:​28, 29; 11:​23, 24) Say milagron imbilay lamet nen Lazaro so amabiskeg ed pananisia to tan angipaslep na pananisia ed arum. (Juan 11:45) Balet antoy eksakton kabaliksan na terminon “kioli”?

“Sikatoy Onoli”

6. Antoy kabaliksan na terminon “kioli”?

⁶ Say salitan “kioli” so nipatalos manlapud Griegon salitan a·naʹsta·sis, a literal a kabaliksan toy “onalagey lamet.” Saray Hebreon managpatalos ed Griego so angipatalos ed a·naʹsta·sis ed Hebreo iran salitan techi·yathʹ ham·me·thimʹ, kabaliksan toy “ibilay na inaatey.”a Kanian, say kioli et sasaglawien toy ibangon na too manlapud andiay bilay a kipapasen na patey​—pamaaktibo lamet ed padron na bilay na indibidual.

7. Akin a say kioli na saray indibidual et agpanproblemaan nen Jehova a Dios tan ed si Jesu-Kristo?

⁷ Bilang andiay-anggaan ed kakabatan tan naspot ed memorya, magmainomay a paolien nen Jehova a Dios so sakey a too. Say pannonot ed padron na bilay na inaatey​—saray kualidad da, say personal ya awaran da, tan amin a pakabidbiran ed sikara​—et aliwan problema ed sikato. (Job 12:​13; ikompara so Isaias 40:26.) Si Jehova so Manangigapo met na bilay. Kanian, magmainomay ton pabilayen so parehon too, a sikatoy naikdan na parehon personalidad diad balon aporman laman. Sakey ni, unong ya ipapatnag na eksperiensia nen Lazaro, mabulos tan sarag nen Jesu-Kristo a paolien so inaatey.​—Ikompara so Lucas 7:​11-17; 8:​40-56.

8, 9. (a) Akin ya agmantunosan so kioli tan say ideyan ag-ipatey na kamarerwa? (b) Antoy remedyo ed ipapatey?

⁸ Balet, say Makasulatan a bangat ed kioli so agmitunosan ed doktrinan ag-ipatey na kamarerwa. No makaliktar so imortal a kamarerwa ed patey, anggapolay nakaukolan a paolien, odino pabilayen. On, anggapoy imbaga nen Marta nipaakar ed imortal a kamarerwa a manbibilay ed arum a pasen kayari patey. Agto sinisian linma la si Lazaro ed espiritun ayaman pian ituloy toy kiwala to diman. Diad kasunian, impanengneng toy pananisia to ed gagala na Dios a sunien iray epekto na patey. Inkuanto: “Amtak ya onoli ed bilay sano kioli ed kaunoran ya agew.” (Juan 11:​23, 24) Ontan met, anggapoy insalaysay nen Lazaro iran eksperiensia nipaakar ed biek a bilay. Anggapoy naibaga to.

⁹ Malinew, unong ed Biblia, say kamarerwa et ompatey tan say remedyo ed ipapatey et say kioli. Balet binilyon a totoo so inaatey la nanlapulad impanbilay na inmunan too, si Adan. Kanian sioparay napaoli, tan iner?

‘Amin a Walad Pakanodnonotan a Lubok’

10. Antoy insipan nen Jesus nipaakar ed saramay wala ed saray pakanodnonotan a lubok?

¹⁰ Inkuan nen Jesu-Kristo: “Onsabi oras, ya amin so saray wala ed saray [“pakanodnonotan a,” NW] lubok narengel da so bosis to [Jesus], et ompaway ira.” (Juan 5:​28, 29) On, insipan nen Jesu-Kristo ya amin na saramay walad pakanodnonotan nen Jehova et napaoli. Binilyon a totoo so nambilay la tan inaatey. Siopa ed sikara so walad pakanodnonotan na Dios, a manaalagar na kioli?

11. Sioparay napaoli?

¹¹ Saramay angegemtan na matunong a kurang bilang ariripen nen Jehova so napaoli. Balet walaray minilyon ya arum a totoon inaatey la ya agda nipanengneng no kasin ontulok ira ed saray matunong ya estandarte na Dios. Sikaray balanglan ignoranti ed saray kakaukolanen nen Jehova odino andian na magenap a panaon pian manggawa na nakakaukolan a pananguman. Saraya met so walad pakanodnonotan na Dios tan sirin et napaoli, ta isisipan na Biblia: “Wala naani kioli ed bilay na saray matunong tan agmatunong.”​—Gawa 24:15.

12. (a) Anton pasingawey so naawat nen apostol Juan nipaakar ed kikioli? (b) Antoy ‘nibantak ed dayat ya apuy,’ tan antoy kabaliksan na satan a balikas?

¹² Walaan si apostol Juan na makapalikliket a pasingawey na saray apaoli a manalalagey ed arap na trono na Dios. Diad panideskribe ed satan, onia so insulat to: “Say dayat initer to so inaatey a wala ed sikato; tan say patey tan say Hades initer da so inaatey a wala ed sikara; tan agawa so impangukom ed balang sakey unong ed saray gawa to. Tan say patey tan say Hades nibantak ira ed dayat ya apuy. Saya sikato so ipapatey a komadua, a salanti dayat ya apuy.” (Apocalipsis 20:​12-14) Isipen pay kabaliksan na satan! Amin ya inaatey a walad pakanodnonotan na Dios et nibulos manlapud Hades, odino Sheol, say kaslakan a lubok na katooan. (Salmo 16:​10; Gawa 2:31) Insan “say patey tan say Hades” so nibasileng ed tatawagen a “dayat ya apuy,” a mangisisimbolo na kompleton kadederal. Say kaslakan a lubok na katooan so naandi la.

Napaoli ed Iner?

13. Akin ya inyareglo na Dios para pigara a napaoli ed tawen, tan anton klase na laman so iter nen Jehova ed sikara?

¹³ Daiset a bilang na lalaki tan bibii so napaoli ed bilay diad tawen. Saraya so manuley a kaiba nen Kristo bilang arari tan saserdote tan mibiang ed pangekal ed amin ya epekto na ipapatey ya atawir na katooan manlapud inmunan too, si Adan. (Roma 5:​12; Apocalipsis 5:​9, 10) Unong ed Biblia, sikaray manbilang labat na 144,000 tan apili ed limog na papatumbok nen Kristo, a ginmapo ed matoor ya apostoles. (Lucas 22:​28-30; Juan 14:​2, 3; Apocalipsis 7:​4; 14:​1, 3) Ikdan nen Jehova so balang sakey ed sarayan apaoli na espiritun laman ta pian sikaray makapambilay ed tawen.​—1 Corinto 15:​35, 38, 42-45; 1 Pedro 3:18.

14, 15. (a) Diad anton klase na bilay so kiolian na baleg a karaklan na saramay inaatey la? (b) Antoran bendision so naeksperiensia na saray matulok a katooan?

¹⁴ Balet, say baleg a karaklan na saramay inaatey la et napaoli ed bilay diad dalin. (Salmo 37:​29; Mateo 6:10) Anton klase na dalin? Say dalin natan et napno na kolkolan, panagpaagos na dala, polusyon, tan karawalan. No ombilay laray inaatey ed ontan a dalin, seguradon maganggano labat so dinanman a liket. Balet insipan la na Manamalsa a magano to lan panganggaen so kaplesan a sosyedad na mundo a walad panangontrol nen Satanas. (Uliran 2:​21, 22; Daniel 2:44) Sakey a matunong a balon sosyedad na too​—“dalin a balo”​—so niwala ed satan. (2 Pedro 3:13) Diad satan a panaon “say manaayam agto naani ikuan: ‘Mabeblay ak.’” (Isaias 33:24) Anggan say ot-ot na patey so naandi la, ta “punasen [na Dios] so amin a lua ed kamataan da; tan andi gapo la naani ipatey; tan anggapo la naani onangis o dageyem, o ot-ot. Ta saray ona a bengatla sikara so linmabas la.”​—Apocalipsis 21:4.

¹⁵ Diad insipan na Dios a balon mundo, saray mauyamo so “manliket a dili ed inkadaakan na kareenan.” (Salmo 37:11) Say mangatatawen a gobierno nen Kristo Jesus tan say 144,000 a kakaiba to so kalkalnan mangipawil ed matulok a katooan ed inkayadyari ya abalang na inmunan atateng tayo, di Adan tan Eva. Kaiba ed saray manayam ed dalin et saray napaoli.​—Lucas 23:​42, 43.

16-18. Anton gayaga so itarok na kikioli ed saray pamilya?

¹⁶ Mangiiter so Biblia na pasimar ed gayagan itarok na kikioli ed saray pamilya. Isipen pay liket ya alikna na balon bii a taga-Nain sanen pinatunda nen Jesus so tulor tan pinaoli toy alenleneg ya anak ton laki! (Lucas 7:​11-17) Saginonor, diad asingger a Dayat na Galilea, sanen pinabilay nen Jesus so ugaw a biin mantaon na 12, saray atateng to so “atalagnaw ira ed baleg ya inkatalagnaw.”​—Marcos 5:​21-24, 35-42; nengnengen met so 1 Arari 17:​17-24; 2 Arari 4:​32-37.

¹⁷ Parad minilyon a nauugip natan ed patey, say kikioli et kabaliksan toy bilay ed mareen a balon mundo. Isipen pay makapaliket ya ilalon iyoopresi na saya ed si Tommy tan ed negosyanti, ya asalambit ed panangilukas a seksion na sayan brosyur! Sano onliing ed bilay si Tommy diad Paraiso ed dalin, sikato ni lanlamang imay Tommy a kabat na ina to​—balet ta andian la na sakisakit. Sikatoy sarag na ina ton diwiten, lakapen, tan aroen. Mipadpara, imbes a paigalet ed ngalngali agmanampot a sikulo na kianak lamet, say negosyantin taga-India so walaan na makapakelkelaw ya ilalon nimurikat toy mata to ed balon mundo na Dios tan nanengneng iray anak to.

¹⁸ Diad impakaamta ed katuaan nipaakar ed kamarerwa, nipaakar ed no antoy nagagawa ed sikatayo sano inatey itayo, tan nipaakar ed ilalon kikioli et nawalaan met na aralem ya epekto ed saramay manbibilay natan. Nengnengen tayo no panon.

[Saray paimano ed leksab]

[Litrato ed pahina 26]

Say kikioli so mangitarok na magnayon a gayaga