No Panon Mon Naaralan so Nipaakar ed Dios

Naaralan moy nipaakar ed si Jehova diad pambasa na Biblia. Nensaman et amili so Dios na pigaran totoo a mangisulat ed saray walad kanonotan to. Saratan a sulsulat so atawag a Biblia. Natan et naaralan tayo so nipaakar ed Dios diad pambasa ed Biblia. Lapud lugan na Biblia so salita odino mensahe nen Jehova, satan met so atawag a Salitay Dios. Napanisiaan tayo so ibabaga na Biblia lapud agbalot mantila si Jehova. ‘Agnayarin mantila so Dios.’ (Hebreos 6:18) Lugan na Salitay Dios so katuaan.​—Juan 17:17.

Say Biblia so sakey ed sankablian iran regalo na Dios ed sikatayo. Aliling toy sakey a sulat na maaron ama ed ananak to. Ibabaga na satan ed sikatayo so nipaakar ed sipan na Dios a pagmaliwen to so dalin a marakdakep a panayaman​—sakey a paraiso. Ibabaga na satan ed sikatayo so agawaan to la ed apalabas, say gagawaen to natan, tan say gawaen to ni ed arapen parad matoor ya ananak to. Ontutulong met itan ed sikatayo pian nasolbar tayoray problema tayo tan naromog so liket.​—2 Timoteo 3:​16, 17.

Kakaaro na Dios iray Tastasi nen Jehova; tulongan da kan natalosan iray ibabangat na Biblia. Ibagam labat ed sikara a labay moy manaral na Biblia. Ag-ira pababayaran ed saya. (Mateo 10:8) Niarum ni, nayarian moy onatendi ed saray Kristianon miting. Saraya so gagawaen ed saray pasen na panagdayewan a tatawagen a Kingdom Hall. No onatendi ka ed saray Kristianon miting, maples so iyaligwas mo ed pikakabat nipaakar ed Dios.

Naaralan moy nipaakar ed Dios manlapud saray bengatlan ginawa to. Alimbawa, ibabaga na Biblia: “Say Dios pinalsa to so saray tawen tan say dalin.” (Genesis 1:1) Sanen pinalsa nen Jehova so “saray tawen,” ginawa to so agew. Natan anto so natalosan tayo ed satan nipaakar ed Dios? Natalosan tayon si Jehova et walaan na baleg a pakapanyari. Sikato labat so makagawa na bengatlan mabiskeg a singa say agew. Ibabaga met na satan ed sikatayo a si Jehova et makabat, lapud kakaukolanen so kakabatan diad pamalsa ed agew, a mangiiter na petang tan liwawa ingen ta agbalot makaatong.

Napatnagan ed palsa nen Jehova ya inaro to itayo. Isipen pa so nipaakar ed amin a nanduruman klase na prutas a wadiad tapew na dalin. Angitarya labat komon si Jehova na sakey a klase na prutas parad sikatayo​—odino anggapon balot. Imbes, inikdan itayo nen Jehova na dakel a klase na prutas a walaan na nanduruman uhas, kabaleg, kolor, tan taway. Ipapanengneng na saya a si Jehova et sakey a Dios ya aliwa labat lan maaro noagta mabunbunlok, manonot, tan mapangpangasi met.​—Salmo 104:24.