No Panon a Naromog so Tuan Relihyon

No labay moy magmaliw a kaaro na Dios, nepeg mon agamilen so tuan relihyon ya aabobonan na Dios. Inkuan nen Jesus a saray ‘tuan managdayew’ so mandayew ed Dios a mitunosan ed “katuaan.” (Juan 4:​23, 24) Wala labat so saksakey a dugan paraan na panagdayew ed Dios. (Efeso 4:​4-6) Say tuan relihyon so mamaarap ed andi-anggaan a bilay, tan say palson relihyon so mamaarap ed kadederal.​—Mateo 7:​13, 14.

Nabidbir moy tuan relihyon diad pangimano ed totoo a mangaagamil ed satan. Lapud si Jehova et maong, saramay tuan managdayew to so nepeg a maong a totoo. Singa say maong a kiew a kahil et manbunga na maong iran kahil, say tuan relihyon so mamawala na maabig a totoo.​—Mateo 7:​15-20.

Saray kakaaro nen Jehova so walaan na aralem a respeto ed Biblia. Amta ran say Biblia et nanlapud Dios. Aabuloyan day ibabaga na satan a mangigiya ed bilay da, manolbar ed saray problema ra, tan ontulong ed sikaran makaaral nipaakar ed Dios. (2 Timoteo 3:16) Panggugunaetan dan agamilen so ipupulong da.

Manaaroan iray kakaaro nen Jehova. Impanengneng nen Jesus so panangaro ed totoo diad impangibangat to’d sikara nipaakar ed Dios, diad impamaabig to’d saramay mansasakit. Saramay mangaagamil na tuan relihyon so mangipanengneng met na panangaro ed arum. Singa si Jesus, agda memelmelagen iraman so mairap-bilay odino dumay etnikon grupo ra. Inkuan nen Jesus a nakabatan na totoo iray babangatan to diad panamegley na aro ya ipapanengneng da ed sakey tan sakey.​—Juan 13:35.

Igagalang na kakaaro na Dios so ngaran na Dios, a Jehova. No aglabay a bitlaen na sakey so ngaran mo, kasin satan a too et magmaliw a maapit a kaarom? Andi! No walay kaaro tayo, bitlaen tayoy ngaran to tan saglawien tayo’d arum iray maong a bengatla nipaakar ed satan a kaaro. Kanian saramay manpirawat a magmaliw a kakaaro na Dios so nepeg a mangusar ed ngaran to tan mangitongtong nipaakar ed sikato ed arum. Labay nen Jehova a gawaen tayo itan.​—Mateo 6:9; Roma 10:​13, 14.

Singa si Jesus, ibabangat na saray kaaro na Dios so totoo nipaakar ed Panarian na Dios. Say Panarian na Dios so mangatatawen a gobierno a pagmaliwen ton paraiso so dalin. Saray kakaaro na Dios so manginabang ed sayan maong a balita nipaakar ed Panariay Dios ed arum.​—Mateo 24:14.

Panggugunaetan na Tastasi nen Jehova so pagmaliw a kakaaro na Dios. Rerespetoen da so Biblia tan walay aroan ed limog da. Uusaren tan igagalang da met so ngaran na Dios tan ibabangat da so arum nipaakar ed Panarian na Dios. Aagamilen na saray Tastasi nen Jehova so tuan relihyon ed dalin natan.