Modulasyon

SAY pangusar mo na simplin panangidanet ed punto so ontulong ed dumerengel pian natalosan so ibabagam. Balet no maabig so pangusar mo ed panduruma ed kakasil na boses, peles, tan tono, lalon makapasagyat a dengelen so paliwawam. Nagkalalo ni nen say satan, nipasabi na satan ed saray dumerengel no antoy liknaan mo ed ibabagam. Say awawey mo ed materyal so maka-impluensya ed no antoy liknaan da nipaakar ed satan. Saya so tua balanglan mansasalita ka ed plataporma odino ed sakey a too diad lawak na ministeryo.

Say boses na too so makapakelkelaw ya instrumento, makayari ed dakerakel a panduruma. No suston nausar, pabilayen to so paliwawa, tenyegen to so puso, liingen to so emosyon, tan makapakiwas. Anggaman ontan, saya so agnagawaan diad basta panmarkam ed saray balikas no iner ya itukoy so kakasil na boses, umanen so peles, odino idumaduma so tono. Say modulasyon ed ontan iran balikas so aliwan natural. Imbes a napabilay tan napabitar so paliwawam, satan so mamaalipanes ed saray dumerengel mo. Manlalapud puso so suston panangusar ed modulasyon.

Sano nausar a makabat, say modulasyon so agla mangipaarap na agmanepeg ya imano ed manpapaliwawa. Imbes, tulongan na satan iray dumerengel a natebek so kabaliksan na teman nasisingbat.

Itukoy so Kakasil na Boses. Say sakey a paraan pian onduma so panangibalikas mo et say pangitukoy ed kakasil na boses. Balet saya so aliwa labat lan basta pamakasil odino pamakalna na boses ed paraan ya apasakey. Satan so mamikewet ed talos na ibabagam. No mabetbet so pangikasil mo ed boses mo, magmaliw itan a makapaalipanes.

Say kakasil na boses mo so nepeg a matukoy ed materyal. Balanglan babasaen mo so maganat a ganggan, singa samay naromog ed Apocalipsis 14:6, 7 odino ed Apocalipsis 18:4, odino balikas na mabiskeg a panagmatalek, a singa say nikurit ed Exodo 14:13, 14, maabig so matukoy a pangikasil na boses. Anggano say babasaen mo so andukdukey a salaysay ed Biblia, a singa say Jeremias 25:27-38, say panguman-uman ed kakasil na boses mo so mangipabitar ed pigaran balikas nen say ed arum.

Imanoen met so gagalam. Kasin labay mon pakiwasen iray dumerengel mo? Kasin labay mon napabitar iray manunan punto na iprepresentam? Say mamaksil a boses, a nausar ed suston paraan, so ontulong diad pakadampot ed sarayan gagala. Anggaman ontan, say bengatbengat a pamakasil mo ed boses mo so nayarin maneral ed gagalam. Panon ya ontan? Say ibabagam so nayarin mankaukolan na ligsa tan petang na liknaan imbes a say maksil a boses. Saya so singbaten tayo ed Aralen 11.

Sano nausar tekep na pakatebek, say pangikalna ed boses so managyat na pantalaran. Balet mabetbet a kakaukolanen na satan so mabibiskeg a tonada kayarin tuloy na satan. Say makakalnan boses ya atekepan na biskeg so nayarin usaren diad pangipasabi na kapagaan odino takot. Say pinakalnan boses so nayarin usaren met pian nipatnag a say nibabaga so segundaryon kaimportantian no ikompara ed saray kabiangan a balikas. Balet, no say kakasil na boses mo so naynay ya abeba, saya so nayarin mangipasabi na panduaruwa odino kaandian na talek ed biang mo odino kaandian na peteg ya interes ed suhetom. Mapatnag, say makalkalnan tonada so nepeg a nausar a susto.

Umanen so Peles Mo. Diad inagew-agew a panagsalita, marmarlas ya ompaway iray salita kapag no ibabalikas tayo so walad kanonotan tayo. Sano sikatayo so nabigla, makapansalita itayon mapmaples. Sano labay tayon eksakton natandaan na arum so ibabaga tayo, tantanan so pansalita tayo.

Anggaman ontan, pigpigaran managpaliwawa a balo ni ed publikon plataporma so makapangiduma-duma ed peles da. Akin? Iparaan dan maong so ibabaga ra. Nayarin amin et insulat. Anggano say paliwawa so aliwan manuskrito, saray salita so nipatlep lawarin amin. Bilang resulta, amin so nibalikas ed apasakey a peles. Say panaral a mansalita manlapud outline so ontulong a mametek ed sayan kakapuyan.

Agmo biglan papepelesen a singano sakey a pusan manpapasyar a biglan kinmulamyat sanen apasikmatan to so sakey ya aso. Tan agbalot mansasalita a mapmaples a naapektaan lay panangibekas mo.

Ta pian nagawaan so panduruma na peles, agbasta panbalbalesen so pamapeles tan pamatayam. Imbes a palaknaben so materyal ya ipaparungtal mo, satan ya estilo na panagpaliwawa so mangisuawi ed materyal. Say pananguman na peles so nepeg ya itukoy ed saman so ibabagam, ed emosyon a labay mon ipasabi, tan ed gagalam. Ibinsabinsa so paliwawam ed kabkaabigan a peles. Pian magmaliw a makapasagyat, mansalitan mamaples, a singa ed pansalitam ed inagew-agew a bilay. Saya met so matukoy sano mangibabaga na punton agtanton importante odino sano mangisasalaysay ed saray agawa a saray detalye so aliwan makana. Saya so mangarum na panduruma tan pagmaliwen toy paliwawam ya agmasyadon seryoso. Diad biek a dapag, saray mas seryoson argumento, saray manunan punto, tan saray pantok ed paliwawa so kaslakan a mankakaukolay pangitantan na daiset.

Idumadumam so Tonadam. Isipen a walay manutugtog ed instrumento na musika ed loob na sakey oras odino onsulok ni. Kaleganan to, paknolen to so sakey labat a nota​—unona et maksil, insan makalna, no maminsan et maples, insan matantan. Wala so panduruma ed kasil tan kapeles, balet anggapo so impanguman ed tonada, say “musika” so aliwan makapasagyat. Mipadpara, no anggapo so panduruma ed tonada, say boses tayo so agmakapaliket a dengelen.

Nepeg ya imanoen a say pananguman ed tonada so agnampaparay epekto ed amin a lenguahe. Diad lenguahen walaan na tono, a singa say Intsik, say panguman ed tonada so nayarin manguman ed kabaliksan na sakey a salita. Anggaman kuan, anggan diad satan a lenguahe et walaray bengatlan nagawaan na sakey a too pian lalon naaruman so panduruma ed panangibalikas to. Napaaligwas to so tuibot na boses to legan ya imanoen ton pareho so relatibon kinaatagey odino kinaabeba na nanduruman tono. Sirin nayarian ton itagey so atagey a tono tan iyabeba so abeban tono.

Anggan diad saray lenguahen aliwan matono, say panguman ed tonada so mangipasabi na nanduruman ideya. Alimbawa, say samet a pangitagey ed tonada ya ulopen na miparan kakasil na boses so nausar lapud panangidanet. Odino say panguman ed tonada so nausar diad pangipatnag na kabaleg odino kinarukey. Say pangitagey na tono ed sampot na estansa so pakapatnagan na tepet. Diad arum a lenguahe balet et mankaukolan na pangiyabeba na tono.

Say inkabigla tan entusiasmo so nayarin nibalikas diad atagtagey a tono. (Diad lenguahen matono, satan so nayarin mankaukolan na malalaknab a tuibot na boses.) Say ermen tan kapagaan so nayarin mankaukolan na abebbeban tono. (Odino diad lenguahen matono, memelag a tuibot na boses.) Saray emosyon ya abitla dia so makatulong ed managpaliwawa a manenyeg ed puso. No labay mon ibalikas iratan, aglabat basta ibaga iray salita. Usar mo so boses mo diad paraan a mangipanengneng ya ontan met so naliliknam.

Pangiletneg na Pundasyon. Iner, sirin, so gapoan na modulasyon? Diad pampili na materyal a para ed paliwawam. No puro argumento odino puro panamilin so ilaktip mo, daiset so pankanawnawam parad panduruma na paliwawam. Sirin analisaen so outline mo, tan seguroen a walaray nilaktip mon pamarakep para ed mabitar tan pakaaralan ya impormasyon.

No bilang diad pampapaliwawam et naliknam so pankaukolay mas malaknab a panduruma lapud ta makapakesaw lan dengelen so presentasyon mo. Anto sirin so gawaen? Uman mo so paraan na panangipresentam ed materyal. Panon? Say sakey a paraan et say pangibukay ed Biblia, ya imbitaan iray dumerengel ya ibukay da so Biblia ra, tan basaen so teksto imbes a basta mansalita. Odino pagmaliwen mon tepet so arum a balikas, ontundan magano para ed pangidanet. Isalet so simplin ilustrasyon. Saraya so paraan ya uusaren na saray atali-talin managpaliwawa. Balet anggaman atali-tali ka la, nayarian mon usaren so parehon ideya sano ipaparaan moy materyal mo.

Nibaga a say modulasyon so mamarakep ed sakey a paliwawa. No nausar so dugan klase tan karakel, papawayen na satan so santing na materyal mo tan satan so makapaliket ed saray dumerengel mo.