Makapabiskeg tan Makapaseseg

MAONG a balita so mensahen nipabtang ed sikatayon ipulong. Inkuan nen Jesus: “Say ebanghelyo kaukolan a nipulong ya unona ed saray amin a nasyones.” (Mar. 13:10) Inletneg nen Jesus a mismo so ehemplo diad impangipulong to “ed ebanghelyo na panarian na Dios.” (Luc. 4:43) Say impulong na saray apostol so adeskribe met bilang “say maong a balita na Dios” tan “say maong a balita nipaakar ed Kristo.” (1 Tes. 2:2; 2 Cor. 2:12, NW) Say ontan a mensahe so makapabiskeg tan makapaseseg.

Mitukoyan ed panangiyabawag na “andi-angga a maabig a balita” na “anghel a mantektekkiab dia ed pegley na tawen,” papasesegen tayo so totoon: “Takotan yo so Dios tan iter yo ed sikato so gloria.” (Apoc. 14:6, 7) Ibabaga tayo ed totoo ed amin a pasen so nipaakar ed tuan Dios, say ngaran to, saray sankarakpan a kalidad to, saray makapakelaw a gawa to, say maaron gagala to, say eebatan tayo ed sikato, tan saray kakaukolanen to ed sikatayo. Laktipen na maong a balita so katuaan a deralen nen Jehova a Dios so marelmeng, a manmumudmora ed sikato tan manederal na bilay na arum a totoo. Balet agtayo responsabilidad so mangukom ed sinansakey a pulongan tayo. Say masimoon a pilalek tayo et dakerakel komon no nayari so onkiwas ed mensahe na Biblia ta pian tuan napaneknekan a maong a balita itan ed sikara.​—Uli. 2:20-22; Juan 5:22.

Limitaan so Negatibon Materyal. Siempre, walaray negatibon aspekto ed bilay. Agtayo iraya ipupulisay. Diad pangigapo na tongtongan, nayarin mamalesa ka na problema a walad kanonotan na totoo ed teritorya yo tan satan so antikey a singbaten. Balet mabetbet ya agtanto makana no mabayag so pangitongtong ed satan. Mabetbet a narerengel na totoo iray makagonigon a balita, kanian no tongtongen tayo so nipaakar ed makapaalipanes iran bengatla et nayarin ikapotan da itayo odino agda itayo la dengelen. Diad kagapo na tongtongan yo, pambanikelan ya ipaimano iray makarepreskon katuaan ed Salita na Dios. (Apoc. 22:17) Insan, anggano aglabay na too ya itultuloy so tongtongan, natilakan mo la na bengatlan makapabiskeg a morekdeken to. Nayarin saya so manggawa ed sikaton mabulos lan ondengel ed arum a panaon.

Ontan met, no naimbitaan kan manpaliwawa, agmo lulusboan iray dumerengel na negatibon impormasyon lapu labat ta dakel itan. No parukeyen na managpaliwawa so nipaakar ed insaew na saray totoon manuley, balbalita ed krimen tan karawalan, tan say makapakebbiew ya ikakasmak na imoralidad, say epekto so nayarin makapadismaya. Iparungtal lambengat iray negatibon aspekto na sakey a suheto no makanan usaren iratan. No limitadoy karakel na ontan a materyal et nayarin mangidanet a nipanpanaon so paliwawam. Nayarin ipabidbir met na satan iray manunan sengegan ya ontulong ed sakey a kipapasen tan sirin nausar a mangipanengneng no akin a praktikal so solusyon a nidatak ed Biblia. No nayari, espesipiko balet agparurukeyen ed saray problema.

Mabetbet ya aliwan posible nisay kalkaliktan so pangekal ed amin a negatibon materyal ed sakey a paliwawa. Say angat et say pangipresenta ed impanlaok na positibo tan negatibo diad paraan a say interamentin epekto so makapaseseg. Pian nagawaan iya, nepeg mon determinaen no anto so ilaktip, no anto so ekalen, tan no iner so pangidanetan. Diad samay Sermon ed Palandey, binilin nen Jesus iray dumerengel ton paliisan daray pansimpisimpitan na eskribas tan Fariseos, tan sinaglawi to so pigaran ehemplo a mangiyilustra ed punto. (Mat. 6:1, 2, 5, 16) Anggaman ontan, imbes ya iyapasakey ed saray negatibon ehemplo na saraman a relihyoson papangulo, indanet nen Jesus so pakatalos ed saray tuan dalan na Dios tan manbilay unong ed saratan. (Mat. 6:3, 4, 6-15, 17-34) Say epekto so makagunggonan tuloy.

Pansiansiaen a Makapaseseg so Paraan na Panangibalikas. No napabtangan kan manpaliwawa ed kongregasyon yo nipaakar ed arum ya aspekto na Kristianon kimey, pambanikelan so pagmaliw a makapabiskeg imbes a makritiko. Seguroen a gagawaen mo so ipapaseseg mon gawaen na arum. (Roma 2:21, 22; Heb. 13:7) Abuloyan so aro, aliwan unganget, a mamakiwas ed no anto so ibagam. (2 Cor. 2:4) No matalek ka a labay na kapananisiaan mo a paliketen si Jehova, say ibagam so mangipatnag ed satan a talek, tan saya so nawalaan na makagunggonan epekto. Imanoen no panon so impangibalikas nen apostol Pablo ed ontan a talek, singa nikurit ed 1 Tesalonica 4:1-12; 2 Tesalonica 3:4, 5; tan Filemon 4, 8-14, 21.

No maminsan et nakaukolan a mamasakbay iray mamatatken nipaakar ed agmakabat a kondukta. Balet lapud kapaabebaan et natulongan ira a mideneng ed agagi ra diad espiritu na kaumildian. (Gal. 6:1) Say paraan a kibaga na saray bengatla so nepeg a mangipanengneng a saramay walad kongregasyon so rerespetoen. (1 Ped. 5:2, 3) Sisimbawaen na Biblia iray tobonbalon lalaki a nagkalalo lan sikakabat ed saya. (1 Tim. 4:12; 5:1, 2; 1 Ped. 5:5) No nakaukolan so pamaat, panisiplina, pametek ed saray bengatla, saya so nepeg a gawaen unong ed ibabagan mismo na Biblia. (2 Tim. 3:16) Agkomon lablabasen odino yesyesen so panangiyaplika ed Kasulatan diad panuporta ed arum ya ideya a nayarin agla tanto asimbang so panmoria ed satan na managpaliwawa. Anggan sano kaukolan so manametek a simbawa, say tono na paliwawa so napansiansian makapaseseg no nagkalalon nidanet ed no panon a paliisan so pakapibali ed gawan-mauges, no panon a solbaren iray problema, no panon a talonaan iray kairapan, no panon a peteken so lingon kurang, tan no panon itayon nasalimbengan na saray kakaukolanen nen Jehova.​—Sal. 119:1, 9-16.

Sano ipaparaan mo so paliwawam, nonoten a maong no panon mon sampotan so kada manunan punto tan say interon paliwawa. Mabetbet a natandaan a mabayag so sampot ya imbagam. Kasin makapaseseg itan?

Sano Mitotongtong ed Saray Kapananisiaan. Apresyaen na saray lingkor nen Jehova iray pankanawnawa na panlilimog diad saray Kristianon pantitipon. Saraya so panaon na espiritual a pakarepreskoan. Papasesegen itayo na Biblia a nonoten so ‘pampapasesegan ed balang sinansakey’ sano mandaragup itayo ed saray pasen na panagdayewan tayo. (Heb. 10:25) Aliwa labat lan dia ed saray paliwawa tan komento ed miting so pakagawaan ed satan noagta ontan met ed pantotongtong sakbay tan kayari na saray miting.

Anggaman normal labat so panongtong nipaakar ed agew-agew a panagbilay, say makapaseseg a tuloy et say panongtong nipaakar ed espiritual iran bengatla. Ilaktip na saraya iray eksperiensyan panliliketan tayo ed sagradon serbisyo. Makapabiskeg met so pangipanengneng na maabig ya interes ed balang sinansakey.

Kaukolan itayon manalwar pian ag-itayo naimpluensyaan na mundo ed kaliberliber tayo. Sanen nansulat ed saray Kristiano ed Efeso, inkuan nen Pablo: “Kanian ipaliis yo so katilaan, salitaen yo so tua, balang sakey ed kapara ton too.” (Efe. 4:25) Say pansalita na katuaan imbes a katilaan so mangilaktip ed agpangirayew ed saray bengatla tan totoo ya iidoloen na mundo. Ontan met, amasakbay si Jesus nipaakar “ed panamalingo na saray kayamanan.” (Mat. 13:22) Kanian diad pantotongtong, manalwar itayon ag-iyaalibansa so ontan a panamalingo diad iyibeg ed materyal iran bengatla.​—1 Tim. 6:9, 10.

Sanen manisimbawa ed pankaukolan na pagmaliw a makapabiskeg, papasesegen itayo nen apostol Pablo ya ag-uukomen odino melmelagen so sakey ya agin nayarin agto labay a gawaen so arum a bengatla lapud “kaleteyan na pananisia to,” salanti, lapud agto natebek so sigpot a kalaknab na Kristianon kawayangan. On, ta pian makapabiskeg ed arum so pantotongtong tayo, nepeg tayon konsideraen so panagbilay da tan say kalaknab na espiritual ya ibubulaslas da. Agaylan makapasinagem so “pangiyan na katiroran o pansengegan na kapelagan ed dalan na agi to”!​—Roma 14:1-4, 13, 19.

Saramay mipupuligesgesan ed seryoson personal iran problema​—alimbawa, say pawil-pawil a sakit—​so mangapresya ed makapabiskeg a pantotongtong. Nayarin panggunaetan na satan a too so iyatendi ed saray miting. Nayarin itepet na saramay mikabat ed kipapasen to: “Komusta so liknaan mo?” Andi-duaruwan apresyaen to so pililikna ra. Anggaman ontan, nayarin agtanto makapaseseg ed sikato no pantongtongan so nipaakar ed kipapasen na bunigas to. Saray balikas na apresasyon tan komendasyon so nayarin lalon mamaligsa ed puso to. Kasin nanengneng mo so ebidensya na mantutultuloy a panangaro to ed si Jehova tan say panagsungdo to ed mairap a kipapasen? Kasin napapaseseg ka sano sikato so mankokomento? Agta lalon makapabiskeg so pangimano ed kamaongan to tan say nitutulong to ed kongregasyon imbes a diad saray limitasyon to?​—1 Tes. 5:11.

Ta pian makapabiskeg so pantotongtong tayo, nagkalalo lan importante so pangonsidera ed panmoria nen Jehova ed no anto so pantotongtongan. Diad Israel nensaman, saray nanlabir sumpad saray manangilaman nen Jehova tan nanreklamo nipaakar ed mana so anagmak na sanok na Dios. (Num. 12:1-16; 21:5, 6) Nipanengneng tayon sikatayo so agunggonaan ed saraman ya alimbawa sano respetoen tayo iray mamatatken tan apresyaen so espiritual a taganon nitatarya ed panamegley na matoor tan makabat ya aripen a klase.​—1 Tim. 5:17.

Agtanton problema so pakaromog na saray makagunggonan bengatla a pantongtongan sano kaiba iray Kristianon agagi tayo. Anggaman ontan, no alabas a makritiko so imbalikas na sakey, ipaarap a tampol so tongtongan ed samay makapabiskeg.

Balanglan manpupulong itayo ed arum, mansasalita diad plataporma, odino mitotongtong ed saray kapananisiaan, makatebek itayo komon ta pian ompaway so kayamanan na puso tayo ed “antokaman a balikas a maabig ed pakapabiskegan unong ed pankaukolan, pian nipanabang na satan so makapaliket ed saray onderengel.”​—Efe. 4:29, NW.