Epektibon Pangusar ed Saray Nanengneng a Katulongan

AKIN a mangusar na nanengneng iran katulongan diad panagbangat mo? Lapud say panggawa ed satan et pagmaliwen ton lalon epektibo so panagbangat mo. Si Jehova a Dios tan si Jesu-Kristo so angusar na nanengneng iran katulongan, tan makaaral itayo ed sikara. No saray nanengneng a katulongan so tekepan na insalitan salita, naawat so impormasyon ed panamegley na duaran pantalos. Nayarin makatulong iya pian naalam so imano na saray dumerengel mo tan pabiskegen to so panangipaslep. Panon mon ilaktip so nanengneng iran katulongan diad saray presentasyon mo ed maong a balita? Panoy pakasegurom a saratan so uusaren mon epektibo?

No Panoy Impangusar na Saray Sankatalonggaringan a Managbangat ed Nanengneng Iran Katulongan. Inusar nen Jehova so sankatandaan iran nanengneng a katulongan diad pangibangat ed makana iran leksion. Aminsan a labi et inyakar to’d paway si Abraham tan kuanto: “Nengneng mo so saray tawen, tan bilang mo so bibitewen, no nayarian mo ra a bilangen. . . . Ontan so ilalak mo naani.” (Gen. 15:5) Anggaman singa imposible unong ed panmoria na too so insipan, atenyeg a tuloy si Abraham tan inteen toy pananisia to ed si Jehova. Diad sananey ya inkagawa, imbaki nen Jehova si Jeremias ed abung na sakey a domadamili tan pinaloob to ed gawaan na domadamili pian bantayan so panguuhas na too ed pitek. Agaylan makatantandan leksion ed pakauley na Amalsa ed saray totoo! (Jer. 18:1-6) Tan panon a nalingwanan nen Jonas so leksion ed panangasin imbangat nen Jehova ed sikato diad panamegley na tanaman a gebey? (Jonas 4:6-11) Imbaga ni ingen nen Jehova ed saray propeta to ya iyakto daray mapropetikon mensahe legan ya uusaren iray matukoy a bengatla. (1 Ara. 11:29-32; Jer. 27:1-8; Eze. 4:1-17) Saray kabiangan a mismo ed tabernakulo tan templo so representasyon ya ontulong ed sikatayon mantalos ed mangatatawen iran kapetegan. (Heb. 9:9, 23, 24) Dakel met so inusar na Dios ed saray pasingawey diad pangipasabi ed importantin impormasyon.​—Eze. 1:4-28; 8:2-18; Gawa 10:9-16; 16:9, 10; Apoc. 1:1.

Panoy impangusar nen Jesus ed saray nanengneng a katulongan? Sanen sinali na saray Fariseo tan saray kapartidoan nen Herodes a patitan si Jesus ed panagsalita to, kinerew to so sakey a denario tan impaimano to so lupa nen Cesar ed kuarta. Insan impaliwawa ton nepeg a bayaran ed Cesar iray bengatlan kayarian nen Cesar balet ta bayaran ed Dios iray bengatlan kayarian na Dios. (Mat. 22:19-21) Pian nibangat so leksion ed panangidayew ed Dios diad amin a wala ed sikatayo, impaimano nen Jesus so sakey a pobrin balo diad templo a say tukdol to​—duaran melag a sinsilyo​—so alenleneg kalamor a pambilay to. (Luc. 21:1-4) Diad sananey ya inkagawa inusar to so melag ya ugaw bilang ehemplo na pagmaliw a mapaabeba tan aliwan maambisyon. (Mat. 18:2-6) Personal to met ya impanengneng so kabaliksan na kapaabebaan diad impanguras ed kasalian na saray babangatan to.​—Juan 13:14.

Saray Paraan Diad Pangusar ed Nanengneng Iran Katulongan. Aliwan singa si Jehova, ag-itayo makapitalosan ed panamegley na saray pasingawey. Ingen, dakel iran makatenyeg-kanonotan a retrato so wala ed saray publikasyon na Tastasi nen Jehova. Usaren iratan diad panulong ed saray interesadon totoo a mangilitrato’d isip da ed mangaraldalin a Paraiso, a nisipan ed Salitay Dios. Diad panangiyaral ed Biblia, nayarin ipaimanom ed iyaaralan so sakey a retraton misiglaotan ed aaralen yo tan paipaliwawa ed sikato so nanenengneng to. Makatantanda itan sanen niiter ed si propeta Amos iray pasingawey, intepet nen Jehova: “Anto so nanengneng mo, Amos?” (Amos 7:7, 8; 8:1, 2) Nayarian mo met ya itepet so miulibay iran tepet kapag ipapaimanom ed totoo iray retraton nigana bilang nanengneng iran katulongan ed panagbangat.

No isulat moray kalkulasyon ed matematika odino mangusar na tsart ed kronolohiya a mangipapanengneng ed panggegendanan na saray makatantandan ebento, saya so ontulong ed totoo pian lalon natalosan dan tampol iray propesiyan singa say “pitoran panaon” ed Daniel 4:16 tan say “pitomplo a simba” ed Daniel 9:24. Saray ontan a nanengneng a katulongan so wala ed pigaran aaralen a publikasyon tayo.

Diad panagaral na pamilya yo ed Biblia, say pangisingbat ed saray bengatlan singa say tabernakulo, say templo ed Jerusalem, tan pasingawey ed si Ezequiel nipaakar ed templo so napainomay a talosan no mangusar ka na retrato odino dayagram. Saraya so naromog ed Insight on the Scriptures, diad apendise na New World Translation of the Holy Scriptures​—With References, tan diad nanduruman paway na Say Panag-Bantayan.

Sano babasaen so Biblia a kaiba so pamilyam, usaren a maabig iray mapa. Tontonen so impanbaroy nen Abraham manlapud Ur ya anggad Haran tan angga ed Bethel. Usisaen so rota na Israel sanen tinaynanan na nasyon so Ehipto tan nambaroy ya amaarap ed Insipan a Dalin. Anapen so pasen a niiter ed kada tribu na Israel bilang tawir. Imanoen so kalaknab na inuleyan nen Solomon. Tontonen so rota nen Elias sanen tinmaynan ed Jezreel ya anggad kalawakan ed lampas na Beer-seba nen sikato so inggagaem nen Jezebel. (1 Ara. 18:46–​​19:4) Anapen iray syudad tan baley a nampulongan nen Jesus. Tontonen iray impanbaroy nen Pablo, unong ya adeskribe ed libro na Saray Gawa.

Mausar iray nanengneng a katulongan sano tutulongan iray iyaaralan na Biblia a nikabisado da iray kurang na kongregasyon. Nayarin ipanengneng mo ed iyaaralan mo so sakey ya inimprintan programa tan ipaliwawa so klase na impormasyon a sisingbaten tayo ed saray asamblea tan kombension. Dakel so mandinayew ed personal ya impanpasyar ed Kingdom Hall odino diad sangan opisina na Tastasi nen Jehova. Nayarin saya so epektibon paraan diad kaekal na lingon-panmoria nipaakar ed kimey tayo tan say gagala na satan. Sano mangipapasyar ed Kingdom Hall, ipanengneng no panon so piduma to ed arum a pasen na panagdayewan. Idanet a say Kingdom Hall so simplin paalagey a marakep a panaralan. Ipaimano iray punto a nagkalalo lan nigana a para ed mapublikon ministeryo tayo​—pasen a panangibunogan ed literatura, saray mapa na teritorya, tan saray kahon na kontribusyon (a miduma ed nibubunog a parad koleksion).

No walaray imparaan a video ed panangidirehi na Mananguley ya Ulop, saraya so usaren a pamabiskeg ed talek da ed Biblia, a mangipaamta ed saray iyaaralan ed kimey na Tastasi nen Jehova, tan pamaseseg ed saray manbabantay ya itukoy so bilay da ed saray prinsipyo na Biblia.

Pangusar ed Nanengneng Iran Katulongan Parad Babaleg Iran Grupo. Sano niparaan a maong tan maabig a nipresenta, saray nanengneng a katulongan so magmaliw ya epektibon katulongan ed panagbangat a para ed babaleg iran grupo. Saray ontan a nanduruman porma na nanengneng a katulongan so intarya na matoor tan makabat ya aripen a klase.

Say aaralen a materyal ed Say Panag-Bantayan so kaslakan a mangilalaktip na nanengneng iran katulongan ed porma na krokis (artwork) a nausar na konduktor diad pangidanet ed saray importantin punto. Saya met so tua ed saray publikasyon ya uusaren ed Panagaral na Kongregasyon ed Libro.

Arum ya outline parad paliwawa ed publiko so nayarin manggawan matukoy ed pangusar ed nanengneng iran katulongan pian iyilustra iray punto. Balet, kaslakan a babaleg so gunggona diad pangiyapasakey na imano ed no anto so wala ed Biblia, a sankaegnaan na maslak a dumerengel. No diad kipapasen a kaukolan so sakey a retrato odino antikey ya outline na saray manunan punto diad pangipasabi na sakey odino pigaran manunan punto na sakey a paliwawa, seguroen lan masakbay a say nanengneng a katulongan so mabitar a nanengneng (odino nabasa) na saray walad bandad beneg ed pasen na panmimitingan. Italag so pangusar ed ontan iran kagawaan.

Say gagala tayo ed pangusar na nanengneng iran katulongan sano manpapaliwawa tan manbabangat et aliwan manpaelek. Sano usaren so magalang a nanengneng a katulongan, nepeg a satan so mangiter na nanengneng a pamabiskeg ed saray ideyan nikaduman idanet. Saratan a katulongan so mausa-usar no palinewen na saratan so salita, a gawaen ton mainomay a natalosan, odino no mangiter na mabiskeg ya ebidensya ed inkamatua na nibabaga. No nausar a manepeg, say matukoy a nanengneng a katulongan so nayarin mangipaslep a maong a say nanengneng a katulongan tan say punton ibabangat so natandaan ed loob na dakel a taon.

Say pakadngel tan say pakanengneng so walaan na importantin betang ed panagaral. Tandaan no panon a sarayan sentido so inusar na saray Sankatalonggaringan a Managbangat, tan pambanikelan ira ya aligen diad saray sagpot mon manabi ed arum.