Say Mensahen Nepeg Tayon Iyabawag

‘TAKOTAN SO TUAN DIOS TAN UNOREN IRAY GANGGAN TO’

SAKBAY nin tuloy na Kristianon panaon, imbaga nen Jehova ed si matoor ya Abraham so nipaakar ed sakey ya uksoyan a kabendisyonan na “amin a nasyones na dalin.” (Gen. 22:18) Pinuyanan to met si Solomon a mangisulat nipaakar ed manunan kakaukolanen a nepeg a sumpalen na amin a totoo: “Takotan mo so [tuan] Dios tan unoren mo so saray ganggan to. Ta saya sikato so katiponan na kanepegan na too.” (Ecl. 12:13) Balet panon a naamtaan na totoon manaayam ed amin a nasyon irayan bengatla?

Anggaman walan naynay so totoon manisia ed salita na Dios, ipapanengneng na Biblia a say malaknab a panagtasi ed sankamundoan a peteg a sabien na maong a balita so amin a nasyon et nigana ed “agew na Katawan.” Saya so ginmapo nen 1914. (Apoc. 1:10) Nipaakar ed sayan panaon, impasakbay na Apocalipsis 14:6, 7 a diad silong na panangiwanwan na anghel et nagawa so makanan panangiyabawag “diad balang nasyon tan poli tan salita tan baley.” Sikaray napakiwas a: ‘Takotan so Dios, tan iter ed sikato so gloria: ta say oras na panangukom to sinmabi la; tan igalang so nanggawa ed tawen tan dalin tan say dayat tan saray subol na saray danum.’ Linawa na Dios a sayan mensahe so niyabawag. Walaan itayo na pribilehyon mibiang ed satan a kimey.

“Say Tuan Dios.” Sanen inyabawag nen Jehova a, “Sikayo so saray tasik,” saman so agawa sanen pansasangsangan so isyu na inka-Dios. (Isa. 43:10) Say mensahen nepeg ya iyabawag so aliwa labat lan kaukolan a nawalaan na relihyon so totoo odino manisia ed sakey a dios. Imbes, kaukolan a naikdan ira na pankanawnawan nakabatan a say Amalsa na tawen tan dalin so alenleneg a tuan Dios. (Isa. 45:5, 18, 21, 22; Juan 17:3) Say tuan Dios so alenleneg a napanmatalkan a makapangipasakbay na arapen. Pribilehyo tayon ipabitar a say kasumpalan na salita nen Jehova ed apalabas so mangiter na mabiskeg a kompiyansa ya amin a bengatlan insipan to ed arapen so ontua.​—Jos. 23:14; Isa. 55:10, 11.

Siempre, dakel a pupulongan tayo so mandadayew ed arum a dirios odino ibabaga ran anggapo so dios a dadayewen da. Ta pian walay natangguyor ya ondengel, nayarin kaukolan tayon igapo ed bengatlan paninteresan yon dua. Nagunggonaan itayo ed ehemplon nikurit ed Gawa 17:22-31. Imanoen ya anggaman mataktika si apostol Pablo, malinlinew ton imbaga so eebatan na amin a totoo ed Dios ya Amalsa na tawen tan dalin.

Ipaamta so Ngaran na Dios. Ag-onsasaew a mangipaamta ed ngaran na tuan Dios. Papablien nen Jehova so ngaran to. (Exo. 3:15; Isa. 42:8) Labay ton satan a ngaran so naamtaan na totoo. Ginawa ton napilaktip ed Biblia so maglorian ngaran to diad masulok a 7,000 danay. Responsabilidad tayon ipakabat itan ed totoo.​—Deut. 4:35.

Say arapen ya ilalo ed bilay na amin a katooan so mandepende diad pikabat da ed si Jehova tan diad itawag ed sikato ed pananisia. (Joel 2:32; Mal. 3:16; 2 Tes. 1:8) Ingen, maslak a totoo so agmikabat ed si Jehova. Laktipen na satan so baleg a bilang na saraman so mangibabagan mandadayew ed Dios na Biblia. Anggaman walaan ira na Biblia tan babasaen da, siansian nayarin agda kabat so personal a ngaran na Dios lapud satan so inekal ed dakel iran modernon patalos. Say mogmon impikabat na arum a totoo ed ngaran nen Jehova et diad samay imbaga na papangulo na relihyon da ya agda itan uusaren.

Panon so nayarin pangipakabat tayo ed totoo ed ngaran na Dios? Anggapo lay tanton epektibo nen say pangipanengneng ed satan ed sikara diad Biblia​—say mismon kopya ra no nayari. Diad arum iran patalos, a wala ed pigaran lenguahe, satan a ngaran so pinmatnag ed nilibu-libon danay. Diad arum, nayarin ompatnag labat ed Salmo 83:18 odino Exodo 6:3-6, odino nayarin naromog ed paimano’d-leksab diad Exodo 3:14, 15 odino Ex 6:3. Diad pigaran patalos, saray kasandin balikas, a singa say “Katawan” tan “Dios,” so nisulat ed nikaduman nengneng sano say orihinal-lenguahen teksto et lugan toy ngaran na Dios. Bangta saray modernon managpatalos so interamentin angekal ed personal a ngaran na Dios, nayarin kaukolan mon usaren so mas daan a patalos na Biblia pian ipanengneng ed totoo no antoy ginawa. Diad arum a daldalin et nayarin naromogan mo so ngaran na Dios ed saray relihyoson himno odino ed sakey ya inskripsyon ed publikon paalagey.

Anggan saramay mandadayew ed arum a dirios, nayarin nausar ya epektibo so Jeremias 10:10-13 ed New World Translation. Agto labat sinalambit so ngaran na Dios noagta malinlinew ya ipapaliwawa to met no siopa.

Ag-iyaamot odino agsasandian so ngaran nen Jehova na saray pananawag bilang “Dios” tan “Katawan,” a singa gagawaen na Kakristianoan. Agkabaliksan na saya a say ngaran so nepeg ya usaren diad gapo na kada pantotongtong. Lapud panangidumaduma, pultoten la na arum a totoo so tongtongan. Balet no niletneg la so basiyan na pantotongtong, agpapaliisan so pangusar ed ngaran na Dios.

Makatantanda a mas dakel ni so inusar na Biblia a personal a ngaran na Dios nen say nantekep a bilang na impangusar na satan ed “Katawan” tan “Dios.” Anggaman ontan, saray managsulat na Biblia so ag-analin mangilaktip ed ngaran na Dios ed kada estansa. Basta ginawa ra itan ed paraan a natural, bulobulos, tan mapagalang. Maabig itan a pangaligan.

Say Personan Akabatan ed Ngaran. Anggaman ed punton say Dios so walaan na personal a ngaran et importante lan katuaan, satan so unonan kundang labat.

Ta pian naaro si Jehova tan ontawag ed sikato diad pananisia, kaukolan na totoo a kabaten so klase to a Dios. Sanen impakabat nen Jehova so ngaran to ed si Moises diad Palandey Sinai, nagkalalo ni so ginawa To nen say basta inulit so salitan “Jehova.” Impaimano to so arum ed saray matalonggaring a kalidad To. (Exo. 34:6, 7) Sakey itan ya ehemplon aligen tayo.

Balanglan mantatasi ka ed balobalon interesado a totoo odino manpapaliwawa ka ed kongregasyon, sano salitaen mo so nipaakar ed saray bendisyon na Panarian, ipabitar no antoy ipapanengneng na saraya nipaakar ed Dios ya angisipan ed saratan. Sano tukoyen iray ganggan to, idanet so kakabatan tan say aro ya ipapatnag na saratan. Ipalinew a saray kakaukolanen na Dios so agmangipasakbat na kairapan ed sikatayo noagta, imbes, nigana iratan a pakagunggonaan tayo. (Isa. 48:17, 18; Miq. 6:8) Ipanengneng no panon ya ipaparungtal na kada panangipatnag na pakayari nen Jehova so bengatlan nipaakar ed personalidad to, saray estandarte to, say gagala to. Ipaimano so inkasimbang a nipanengneng ed paraan na impangipatnag nen Jehova ed saray kalidad to. Ipadngel ed totoo so pangibalikas mo ed saray dilin liknaan mo nipaakar ed si Jehova. Say panangarom ed si Jehova so makatulong pian nisagyat ed arum so ontan a panangaro.

Say maganat a mensahe ed panaon tayo so mamapaseseg ed amin a totoo a takotan so Dios. Diad ibaga tayo, nepeg ya isagyat tayo so ontan a maridios a takot. Sayan takot so mabunigas a takot, aralem a panangigalang ed si Jehova. (Sal. 89:7) Laktipen na satan so pikakabat a si Jehova so supremon Ukom tan saray ilalo tayo ed arapen a bilay so mandepende ed pakagamor tayo na abobon to. (Luc.12:5; Roma 14:12) Kanian, say ontan a takot so nitekep ed aralem a panangaro ed sikato tan, sirin, say mabiskeg a pilalek a pamaliket ed sikato. (Deut. 10:12, 13) Sikatayo met so pakiwasen na maridios a takot a gulaen so mauges, tuloken iray ganggan na Dios, tan dayewen tekep na kompleton puso. (Deut. 5:29; 1 Awa. 28:9; Uli. 8:13) Satan so manalimbeng ed sikatayo sumpad panalin lingkoran so Dios legan ya aaroen tayoy bengabengatla na mundo.​—1 Juan 2:15-17.

Ngaran na Dios​—“Mabiskeg ya Ilang.” Saray totoon peteg a mikabat ed si Jehova so manggagayaga ed baleg a proteksion to. Saya so aliwa lambengat a lapud uusaren da so personal a ngaran to odino nasarag dan ibinsabinsa so pigara ed saray kalidad to. Satan so lapud manmamatalek ira ed si Jehova a mismo. Nipaakar ed sikara, ibabaga na Uliran 18:10: “Say ngaran nen Jehova sikato so mabiskeg ya ilang; say maptek ombatik ya onloob ed sikato, tan nilaban.”

Usaren a maabig iray pankanawnawa pian pasesegen so arum a manmatalek ed si Jehova. (Sal. 37:3; Uli. 3:5, 6) Say ontan a talek so pakapatnagan na pananisia ed si Jehova tan ed saray sipan to. (Heb. 11:6) Sano saray totoo so ‘ontatawag ed ngaran nen Jehova’ lapud kabat dan sikato so Sankatalbaan a Soberano, mangaaro ed saray dalan to, tan sigpot a manisian say tuan kilalaban so manlapu labat ed sikato, diad ontan​—ipapaseguro na Salita na Dios ed sikatayo​—sikara so nilaban. (Roma 10:13, 14) Legan a babangatan mo so arum, tulongan iran mamayubo ed ontan a nengneng na pananisia a nisiglaot ed amin ya aspekto na bilay.

Nidudunget so dakel a totoo ed abalbaleg iran personal a problema. Nayarin agda nanengneng so solusyon. Pasesegen iran mangamta ed saray dalan nen Jehova, manmatalek ed sikato, tan mangiyaplika ed naaralan da. (Sal. 25:5) Pasesegen iran mangipikasin masimoon ed tulong na Dios tan misalamat ed sikato lapud saray bendisyon to. (Fil. 4:6, 7) Sano nakabat da la si Jehova, aliwan diad basta pakabasa ed pigaran balikas ed Biblia noagta diad pakaeksperiensya ra met ed kasumpalan na saray sipan to ed mismon bilay da, sikaray makapanggayaga ed kaligenan ya onsabi diad tuan pakatalos ed no anto so irerepresenta na ngaran nen Jehova.​—Sal. 34:8; Jer. 17:7, 8.

Usaren a maong so kada pankanawnawa pian tulongan so totoon makatebek tan mangapresya ed kakabatan na itakot ed tuan Dios, si Jehova, tan say panangunor ed saray ganggan to.

“PANTASI ED SI JESUS”

KAYARI na inkioli to tan sakbay na impawil to ed tawen, binilin nen Jesu-Kristo iray babangatan to, a kuanto: “Sikayo so tasik ed Jerusalem . . . angga ed kasampotan na dalin.” (Gawa 1:8) Saray matoor a lingkor na Dios ed agew tayo so adeskribin singa saraman so “walaan na kimey na pantasi ed si Jesus.” (Apoc. 12:17, NW) Panoy inkaseseg mo ed ontan a panagtasi?

Dakel a totoon masimoon a mangibabagan manisia ra ed si Jesus et anggapoy amta ra nipaakar ed kiwawala to sakbay a nagmaliw a too. Agda amta a sikato so peteg a too sanen wadiad dalin. Agda natebek no antoy kabaliksan na impagmaliw ton Anak na Dios. Samsamet so amta ra nipaakar ed betang to diad kasumpalan na gagala na Dios. Agda kabat no anto so gagawaen to natan, tan agda amta no panon a naapektaan so bilay da diad gawaen to ed arapen. Nayarin sililingon isipen da ni ingen a saray Tastasi nen Jehova so agmanisia ed si Jesus. Pribilehyo tayon pambanikelan ya ipakabat so katuaan nipaakar ed sarayan bengatla.

Wala nin siansia iray totoon agmanisia a samay Jesus ya adeskribe ed Biblia so tuan nambilay. Momoriaen na arum si Jesus bilang matalonggaring a too lambengat. Dakel so mangipupulisay ed ideya a sikato so Anak na Dios. Say “pantasi ed si Jesus” ed ontan iran totoo so mankaukolan na baleg a sagpot, anos, tan inkamataktika.

Anggan anto so punto-de-bista na saray dumerengel mo, kaukolan da so mangala na pikakabat ed si Jesu-Kristo no labay dan nagamoran so probisyon na Dios a maandon bilay. (Juan 17:3) Say malinew a nibalikas a linawa na Dios et amin a manbilay so nepeg a ‘mamidbir a si Jesu-Kristo so Katawan’ tan manpasakop ed pakauley to. (Fil. 2:9-11) Sirin, agtayo basta napaliisan so isyu sano naabet tayoray totoon walaan na mabiskeg balet lingo iran opinyon odino mabitabitar a panangidumaduma. Bangta diad arum a kipapasen et makapansalita itayon bulos nipaakar ed si Jesu-Kristo​—anggan diad unonan indalaw tayo—​ed arum, nayarin kaukolan tayoy mangiter na makabat a komento ya ontulong ed saray dumerengel tayo ya onggapon manisip na duga nipaakar ed sikato. Nayarin kaukolan tayo met ya isipen iray dalan na pangiparungtal ed kaaruman iran aspekto na suheto diad arapen iran idalaw. Anggaman ontan, nayarin aliwan posible a singbaten so amin a nasasaglawi ya anggad ikondukta tayo so panangiyaral na Biblia ed sakey a too.​—1 Tim. 2:3-7.

Makanan Betang nen Jesus ed Gagala na Dios. Kaukolan tayon tulongan so totoon mantalos a lapud si Jesus so “dalan” tan ‘anggapo so makasabi ed Ama nilikud ed panamegley to,’ imposible so pakawalaan na naabobonan a relasyon ed Dios no anggapo so pananisia ed si Jesu-Kristo. (Juan 14:6) Likud no namoria na sakey a too so makanan betang ya impabtang nen Jehova ed panguloan ya Anak to, imposiblin natalosan so Biblia. Akin? Lapud ginawa nen Jehova iyan Anak to a manunan persona diad panumpal ed amin a gagala To. (Col. 1:17-20) Saray propesiya na Biblia so akasentro ed sayan katuaan. (Apoc. 19:10) Si Jesu-Kristo so sakey a diad panamegley to et nitarya so solusyon ed amin a probleman pinawala na impanrebelde nen Satanas tan say kasalanan nen Adan.​—Heb. 2:5-9, 14, 15.

Pian natalosan so betang nen Kristo, nepeg a bidbiren na sakey a too a saray katooan so wala ed pakaskasin kipapasen ya ag-ira makalukpos. Amin tayo so nianak ed kasalanan. Nayarin saya so mangapekta ed sikatayo ed nanduruman dalan legan na bilay tayo. Balet, agmabayag odino diad saginonor et mansumpal ed ipapatey. (Roma 3:23; 5:12) Mankatunongan ed satan a katuaan diad saraman so pulongan mo. Insan ipabitar a diad panamegley na dondon bagat nen Jesu-Kristo, simamaaron intarya nen Jehova so kililiktar ed kasalanan tan patey diad saraman so mangagamil na pananisia ed langkap na dondon. (Mar. 10:45; Heb. 2:9) Saya so mangilukas na dalan ed sikara pian panggayagaan so andi-anggaan a bilay ed inkayadyari. (Juan 3:16, 36) Aliwan posible itan ed anggan dinan ya arum a paraan. (Gawa 4:12) Bilang managbangat, balanglan pribado odino diad kongregasyon, aglabat la basta saglawien irayan katuaan. Siuuyamo tan siaanos a pabayuboan ed saray dumerengel mo so liknaan na pisasalamat ed betang nen Kristo bilang Mananondon tayo. Say apresasyon ed sayan probisyon so nawalaan na mabiskeg ya epekto ed awawey, kondukta, tan saray kalat ed bilay na sakey a too.​—2 Cor. 5:14, 15.

Siempre, aminsan labat ya imbagat nen Jesus so bilay to. (Heb. 9:28) Balet, sikato so aktibon manlilingkor natan bilang Atagey a Saserdote. Tulongan so arum a mantalos ed kabaliksan na satan. Kasin manasagmak ira na gonigon, inkadismaya, kairapan, odino saray problema lapud inkaruksa na totoon walad kaliberliber da? Sanen si Jesus so sakey a too, sinagmak to irayan amin. Amta to so nalilikna tayo. Lapud ag-inkayadyari, kasin nalikna tayo so pankaukolan ed panangasi na Dios? No ipikasi tayo ed Dios so kaperdona diad letnegan na bagat nen Jesus, onkiwas si Jesus bilang ‘mananulong ed Ama.’ Tekep na panangabagey, sikato so “manangiyesel ed sikatayo.” (1 Juan 2:1, 2; Roma 8:34) Diad letnegan na bagat nen Jesus tan diad panamegley na panlilingkor to bilang Atagey a Saserdote, nayarian tayo so makaasingger ed “trono na agkanepegan a panangasi” nen Jehova pian awaten so tulong ed dugan panaon. (Heb. 4:15, 16, NW) Anggaman ag-itayo ayadyari, say tulong nen Jesus bilang Atagey a Saserdote so mamasarag ed sikatayo a manlingkor ed Dios a walaan na malinis a konsiensia.​—Heb. 9:13, 14.

Niarum ni, aagamilen nen Jesus so baleg ya autoridad to bilang samay impasen na Dios ya Ulo na Kristianon kongregasyon. (Mat. 28:18; Efe. 1:22, 23) Bilang ontan, itatarya to so nakaukolan a panangiwanwan a mitunosan ed linawa na Dios. Sano bangatan mo so arum, tulongan iran natalosan da a si Jesu-Kristo, tan aliwan siopaman a too, so Ulo na kongregasyon. (Mat. 23:10) Diad primeron pitongtong ed interesadon totoo, imbitaan la ra ed lokal a kongregasyon, a ditan so panaaralan tayo ed Biblia diad tulong na palapagan a nitatarya panamegley “na matoor tan makabat ya aripen.” Aglabat la ipaliwawa ed sikara no siopa so “aripen” noagta ontan met no siopa so Katawan ta pian naamtaan da so inkaulo nen Jesus. (Mat. 24:45-47) Ikabat ira ed saray mamatatken, tan ipaliwawa so Makasulatan iran kualipikasyon a nepeg a dampoten na saraya. ( 1 Tim. 3:1-7; Tito 1:5-9) Ipaliwawa a say kongregasyon so agkayarian na mamatatken noagta sikara so ontutulong ed sikatayon mankurang ed saray bakat nen Jesu-Kristo. (Gawa 20:28; Efe. 4:16; 1 Ped. 5:2, 3) Tulongan irayan interesado a makaamtan wala so sakey ya organisado, sankamundoan a sosyedad ya onkukurang diad silong na inkaulo nen Kristo.

Manlapud saray Ebanghelyo, naaralan tayo a sanen linmoob si Jesus ed Jerusalem sakbay a tuloy na impatey to, sikato so intandoro na saray babangatan to bilang “say Sakey ya onsasabi ya Ari ed ngaran nen Jehova!” (Luc. 19:38, NW) Legan a nagkalalon aaralen na totoo so Biblia, naaralan da a pinabtangan la nen Jehova si Jesus na autoridad a panuley a mangaapekta ed amin a totoo na nasyones. (Dan. 7:13, 14) Sano manpaliwawa ka ed kongregasyon odino mangiyaral, tulongan so totoon mantalos tan misalamat ed kabaliksan na pananguley nen Jesus ed sikatayon amin.

Idanet a say dalan na bilay tayo so mangipapanengneng no kasin peteg a manisia tayo a si Jesu-Kristo so Ari tan no kasin mabulos itayon manpasakop ed pananguley to. Ipaimano so kimey ya ingganggan nen Jesus, kayari inkalanaan to bilang Ari, a gawaen na saray patumbok to. (Mat. 24:14; 28:18-20) Isingbat so imbaga nen Jesus, say Makapakelaw a Mananimbawa, nipaakar ed saray prayuridad ed bilay. (Isa. 9:6, 7; Mat. 6:19-34) Ipaarap so imano ed espiritu ya imbaga na Prinsipe na Kareenan ya ipatnag na saray patumbok to. (Mat. 20:25-27; Juan 13:35) Manalwar ya agka manguukom no kasin arum so manggagawa na malaem a singa nepeg dan gawaen, noagta pasesegen iran mangonsidera no anto so ipatnag na saray kiwas da nipaakar ed panagpasakop da ed inkaulo nen Kristo. Legan a gawaen mo so ontan, bidbir moy pankaukolan mon manggawa met na ontan.

Pangiletneg ed Kristo Bilang Pundasyon. Inyaliling na Biblia so kimey a panaggawa na Kristianon babangatan ed panangiletneg diad si Jesu-Kristo bilang pundasyon. (1 Cor. 3:10-15) Pian nagawaan iya, tulongan so totoo a nakabatan da si Jesus unong na inkadeskribe to ed Biblia. Manalwar ya aliwan sikay panilaloan da bilang say sakey a tutumboken da. (1 Cor. 3:4-7) Ipaarap so imano ra ed si Jesu-Kristo.

No maong so inkiletneg na pundasyon, natalosan na saray iyaaralan a sikatayo so intilakan nen Kristo na modelo pian “tumboken so bakat to.” (1 Ped. 2:21) Pian nipaalagey ed ontan, pasesegen iray iyaaralan a basaen da iray Ebanghelyo bilang padron a tumboken ya aliwa lambengat a matuan awaran. Tulongan iran mangipapuso ed saray awawey tan kalidad ya impanengneng nen Jesus. Pasesegen iran mangimano ed no panon so liknaan nen Jesus ed si Ama to, no panon ton sinungdoan iray tukso tan subsubok, no panon ton impanengneng so panagpasakop ed Dios, tan no panon so impantrato to ed saray totoo diad silong na nanduruman sirkumstansya. Idanet so kimey ya amenek ed bilay nen Jesus. Insan, sano nipaarap ed saray pandesisyon tan subsubok ed bilay, tepetan na iyaaralan so inkasikato: ‘Anto so gawaen nen Jesus ed onian kipapasen? Kasin say kurang ko so mangipanengneng na manepeg ya apresasyon ed saman so agawaan to la ed siak?’

Sano manpaliwawa ed imaton na kongregasyon, agmo ipapasen a lapud saray agagim so walaan la na pananisia ed si Jesus, et agla nakaukolan ya ipaarap so nikaduman imano ed sikato. Lalon makabaliksan so ibagam no ipaalagey mo ed satan a pananisia. Sano salitaen mo so nipaakar ed saray miting, saya so ikonektam ed betang nen Jesus bilang Ulo na kongregasyon. Sano singbaten mo so lawak na ministeryo, ipaimanom so espiritun impanengneng nen Jesus sanen sinumpal to so ministeryo to, tan ipresenta so ministeryo diad pantalos ed gagawaen nen Kristo bilang Ari diad panitipon ed totoo pian naliktar ya onloob ed balon mundo.

Mapatnag a nagkalalo ni so kaukolan nen say basta pakaaral ed saray manunan katuaan nipaakar ed si Jesus. Pian magmaliw a peteg a Kristianos, nepeg ya agamilen na totoo so pananisia ed sikato tan sikatoy aroen a peteg. Say ontan ya aro so mamakiwas na matoor a katutulok. (Juan 14:15, 21) Ontulong itan pian makatalindeg a malet ed pananisia iray totoo diad silong na kairapan, pian mantultuloy a mankurang ed saray bakat nen Kristo legay bilay da, pian paneknekan day inkasikaran matatken a Kristianos a malet a “nilamut tan niletneg ed pundasyon.” (Efe. 3:17, NW) Say ontan a kurang so mangitarok na dayew ed si Jehova, say Dios tan Ama nen Jesu-Kristo.

“SAYAN MAONG A BALITA NA PANARIAN”

SANEN idedetalye nen Jesus so nipaakar ed tanda na kiwawala to tan say konklusyon na sistema na bengabengatla, impasakbay to: “Sayan maong a balita na panarian so nipulong ed amin a panaayaman a dalin ya onkanan pantasi ed amin a nasyones, tan insan onsabi so anggaan.”​—Mat. 24:14, NW.

Anton talaga iyan mensahe ya iyabawag ed ontan lan kalaknab? Satan so nipaakar ed Panarian ya imbangat nen Jesus ed sikatayo ya ipikasi ed Dios, a kuanto: “Onsabi komon so panarian mo.” (Mat. 6:10) Dedeskribien itan na Apocalipsis 11:15 bilang “say panarian na Katawan [Jehova] tayo, tan ed Kristo to” lapud say autoridad na panuley so nanlapud si Jehova tan nipabtang ed si Kristo bilang Ari. Anggaman ontan, imanoen a say mensahen imbaga nen Jesus ya iyabawag ed panaon tayo so mas malaknab nen say impulong na saray patumbok to nen inmunan siglo. Imbaga ra ed totoo: “Inmasingger ed sikayo so panariay Dios.” (Luc. 10:9) Si Jesus, say alanaan a magmaliw ya Ari, so wala ed pegley da ed saman. Balet unong a nikurit diad Mateo 24:14, impasakbay nen Jesus so sankamundoan a panangiyanunsio ed sananey ya importantin nagawa diad kasumpalan na gagala na Dios.

Naikdan si propeta Daniel na sakey a pasingawey na sayan nagawa. Anengneng to so “sakey a singa sakey ya anak na too,” si Jesu-Kristo, a mangaawat ed “Kadaanan na saray Agew,” si Jehova a Dios, “na panuley tan karlangan tan panarian, pian saray totoo, nasyonal iran grupo tan pansasalita so manlingkor iran amin ed sikato.” (Dan. 7:13, 14, NW) Agawa itan ya ebenton walaan na sankatalbaan a kabaliksan diad tawen nen taon 1914. Kayari na satan, say Diablo tan saray demonyo to so nibantak diad dalin. (Apoc. 12:7-10) Say daan a sistema na bengabengatla so linmoob la ed kaunoran iran agew to. Balet sakbay na kapalis ton sigpot, nagawa so sankagloboan a panangiyabawag a say Mesianikon Ari nen Jehova so manuuley la manlapud mangatatawen a trono to. Saray totoo ed amin a pasen so napapakabatan la. Say ikiwas da so mangipatnag ed awawey da ed Sankatageyan bilang Manuley ed “panarian na saray totoo.”​—Dan. 4:32.

Tua, nagkalalo ni so onsabi​—dakel ni! Siansia nin ipipikasi tayo, “Onsabi komon so panarian mo,” balet aliwan diad pantalos a say kiletneg na Panarian na Dios so diad arapen ni. Noag ingen, diad pantalos a say mangatatawen a Panarian so onkiwas ed determinadon paraan a manumpal ed saray propesiya a singa say Daniel 2:44 tan Apocalipsis 21:2-4. Pagmaliwen to so dalin a paraiso a napano na totoon mangaaro ed Dios tan ed kapara ran too. Legan ya ipupulong tayo so “sayan maong a balita na panarian,” saratan ya ilalo ed arapen so ipapabitar tayo. Balet sikatayo so mataletalek a mangipapaamtan impabtang la nen Jehova ed Anak to so sigpot ya autoridad na panuley. Kasin ipupurek mo iyan maong a balita sano ipupulong mo so Panarian na Dios?

Panangipaliwawa ed Panarian. Panon tayon nasumpal so kimey tayon iyabawag so Panarian na Dios? Nayarin nasagyat tayo so interes diad pangigapo na saray tongtongan ed nanduruman suheto, balet ta ipalinew a say mensahe tayo et nipaakar ed Panarian na Dios.

Sakey ya importantin aspekto na sayan kimey et lalanoren to so pangibasa odino pangaon na saray teksto a manutukoy ed Panarian. Sano tukoyen mo so Panarian, seguroen a natalosan na saray pitongtongan mo no anto itan. Nayarin nagkalalo ni so nakaukolan nen say basta pangibaga a say Panarian na Dios so sakey a gobierno. Nayarin mairap ya isipen na arum a totoo so bengatlan agnanengneng bilang sakey a gobierno. Nayarin mikatunongan ka ed sikara diad nanduruman paraan. Alimbawa, say grabidad so agnanengneng, balet walaan na mabiskeg ya epekto ed bilay tayo. Agtayo nanengneng so Sakey a nanggawa ed ley na grabidad, balet mapatnag a sikato so walaan na baleg a pakayari. Sikato so tutukoyen na Biblia bilang “say Ari ya andi-angga.” (1 Tim. 1:17) Odino nayarin ikatunongan a diad sakey a baleg a bansa, dakel a totoo so agnin balot akakar ed kabisera odino anengneng a personal so manuley da. Sarayan bengatla so nakakabatan da diad panamegley na saray report na balita. Ontan met, say Biblia, a nipapalapag ed masulok lan 2,200 iran lenguahe, so mangibabaga ed sikatayo nipaakar ed Panarian na Dios; impaamta to ed sikatayo no siopa so angimatalkan na autoridad tan no anto so gagawaen na Panarian. Say Panag-Bantayan, a nipapalapag ed mas dakel a lenguahe nen say anggan dinan nin arum a peryodiko, so nideboton “Mangipapalapag ed Panarian nen Jehova,” a singa nibaga ed arap ya apis.

Pian natulongan so totoon mantalos ed no anto so Panarian, nayarin bitlaen moray pigaran bengatla a kaliktan dan itarya na saray gobierno: kaligenan ed ekonomya, deen, kaandi na krimen, anggapoy nilabin panagtrato ed amin ya etnikon grupo, edukasyon, tan kaasikaso na bunigas. Ipanengneng a diad panamegley labat na Panarian na Dios et saraya tan amin nin arum a maabig iran pilalek na katooan so sigpot a napenek.​—Sal. 145:16.

Panggunaetan ya isagyat ed totoo so pampilalek a magmaliw ya uuleyan na Panarian, a si Jesu-Kristo so manuuley bilang Ari. Ipabitar iray milagron ginawa to bilang panangipanengneng ed gawaen to bilang mangatatawen ya Ari. Mabetbet ya itongtong so makapasagyat iran kalidad ya impatnag to. (Mat. 8:2, 3; 11:28-30) Ipaliwawa ya inyapay toy bilay to a para ed sikatayo tan kayari na satan et sikato so pinaoli na Dios ed imortal a bilay ed katawenan. Manlapu diman et sikato so manuuley la bilang Ari.​—Gawa 2:29-35.

Idanet a say Panarian na Dios so manuuley la ed katawenan. Bidbiren, anggaman ontan, a maslak a totoo so agmakakaimaton ed saray kipapasen ya iisipen dan ebidensya na satan. Aksobien itan, tan itepet no kasin amta ra so imbaga nen Jesu-Kristo ya ebidensya na satan. Ipabitar so arum ed saray kabiangan na atugyop a tanda ed Mateo kapitulo 24, Marcos kapitulo 13, odino Lucas kapitulo 21. Insan itepet no akin a say inkitrono nen Kristo ed tawen so mangitonton ed ontan iran kipapasen ed dalin. Ipaimano so Apocalipsis 12:7-10, 12.

Bilang aktual ya ebidensya ed gagawaen la natan na Panarian na Dios, basaen so Mateo 24:14, tan deskribien so sankagloboan a programa na edukasyon ed Biblia a nagagawa natan. (Isa. 54:13) Ibaga ed totoo so nipaakar ed pigapigaran eskuelaan a pakagugunggonaan na saray Tastasi nen Jehova​—amin so nibase ed Biblia, amin so nagagawa a libre. Ipaliwawa a nilikud ed panagkabkaabungan a ministeryo tayo, iyoopresi tayo so libren panangibangat ed Biblia ed saray sinansakey tan diad pamilya ed masulok a 230 daldalin. Anton gobierno na too so makayarin mangitarya na ontanlan kalaknab a programa ed edukasyon ya aliwan para lambengat ed saray uuleyan to noagta para ed totoo ed sankadalinan? Imbitaan iray totoon onla ed Kingdom Hall, onatendi ed saray asamblea tan kombension na saray Tastasi nen Jehova, pian nanengneng da so ebidensya no panon a say ontan ya edukasyon so mangaapekta ed bilay na totoo.​—Isa. 2:2-4; 32:1, 17; Juan 13:35.

Balet kasin namoria na unabung no panon a say mismon bilay to so apektado? Nayarin mataktikan ipaliwawam a say gagala na indalaw mo et say pangisingbat ed pankanawnawan lukas ed amin a pilien so bilay bilang uuleyan na Panarian na Dios. Panon? Diad panamegley na panaral ed no anto so kakaukolanen na Dios tan say pambilay natan a mitunosan ed satan.​—Deut. 30:19, 20; Apoc. 22:17.

Tulongan so Arum a Mangiyuna ed Panarian. Anggan sano inawat la na sakey a too so mensahe na Panarian, walaray desisyon a kaukolan ton gawaen. Panon kaimportante ed mismon bilay to so Panarian na Dios? Pinaseseg nen Jesus iray babangatan to ya “itultuloy . . . dan anapen ya unona so panarian.” (Mat. 6:33, NW) Panon tayon natulongan iray kaparan Kristiano a manggawa na ontan? Diad pangipanengneng tayo na maabig ya ehemplo tan diad pangisingbat ed saray walan pankanawnawan. No maminsan, diad pangitepet no kasin kinonsidera la na sakey a too iray posibilidad tan diad panginabang na saray eksperiensya pian ipanengneng no anto so gagawaen na arum. Diad pangisingbat ed saray salaysay na Biblia ed paraan a saraya so mamaaralem na panangaro na sakey ed si Jehova. Diad pangipurek ed inkapeteg na Panarian. Diad pangidanet ed no panon kaimportante a talaga so kimey a panangiyabawag ed Panarian. Mabetbet a nagawa so sankaabigan, aliwan diad pangibaga ed totoo ed no anto so kaukolan a nagawa, noagta diad pangisagyat ed sikara na pilalek a manggawa ed satan.

Andi-duaruwa, say makanan mensahen nepeg tayon amin ya iyabawag so mangiyaapasakey a manuna ed si Jehova a Dios, si Jesu-Kristo, tan ed Panarian. Saray makanakanan katuaan nipaakar ed saraya so nepeg ya idanet diad panagpulong tayo ed publiko, diad saray kongregasyon tayo, tan diad personal a bilay tayo. Sano satan so gawaen tayo, ipapanengneng tayon sikatayo so tuan minanabang ed edukasyon na Teokratikon Eskuelaan Parad Ministeryo.