Kapitulo Kuatro

Say Sakey a Tinasian na Amin a Propeta

1. Anto so ipanengneng na saray katuaan nipaakar ed sakbay-toon kiwawala nen Jesus no nipaakar ed relasyon to ed si Jehova?

“SAY Ama aroen to so Anak, tan ipanengneng to ed sikato so saray amin a bengatlan gawaen to lanlamang.” (Juan 5:20) Agaylan maligsan relasyon so panggagayagaan na Anak ed Ama to, si Jehova! Sayan maapit a relasyon so ginmapo ed panaon na inkapalsa to, agnabilang iran milenyo sakbay na inkianak to bilang too. Sikato so bogbogtong ya Anak na Dios, say mogmon direkta a pinalsa nen Jehova a mismo. Amin a bengatla ed tawen tan ed dalin so apalsa diad panamegley na sayan inad-aron panguloan ya Anak. (Colosas 1:15, 16) Sikato met so nanserbi bilang Salita na Dios, odino Sangiyan, say Sakey a diad panamegley to et nipaamta ed arum so linawa na Dios. Sayan sakey, say Anak a nikadkaduman nanliketan na Dios, so nagmaliw a toon Jesu-Kristo.​—Uliran 8:22-30; Juan 1:14, 18; 12:49, 50.

2. Diad anton kalaknab so impanukoy na saray propesiya ed Biblia nipaakar ed si Jesus?

² Sakbay na mamilagron inkinginew na panguloan ya Anak na Dios bilang sakey a too, dakel so nikurit ya apuyanan a propesiya nipaakar ed sikato. Oniay pinaneknekan nen apostol Pedro ed si Cornelio: “Sikato so patuaen na saray amin a propetas.” (Gawa 10:43) Say betang nen Jesus so nidatak ed Biblia ed ontanlan kalaknab a sakey ya anghel so angibaga ed si apostol Juan: “Say pantasi ed si Jesus so mamuyan na panagpropesiya.” (Apocalipsis 19:10, NW) Saratan a propesiya so malinew ya amaneknek a sikato so Mesias. Impaimano ra so nanduruman betang a gawaen to diad panumpal ed saray gagala na Dios. Amin na saya so nepeg a makapainteres a tuloy ed sikatayo natan.

No Anto so Imparungtal na Saray Propesiya

3. (a) Diad propesiya ed Genesis 3:15, siopa so inrepresenta na uleg, “say bii,” tan say ‘bini na uleg’? (b) Akin a say ‘panugat ed ulo na uleg’ so makapainteres a tuloy ed saray ariripen nen Jehova?

³ Say unona ed saratan a propesiya so nibaga kayari impanrebelde ed Eden. Inkuan nen Jehova ed uleg: “Mangiyan ak na gulaan ed sika tan say bii, tan gulaan ed saray ilalak mo [“binim,” NW] tan ilalak to; sikato sugaten to so ulom, et sika sugaten mo so mukor to.” (Genesis 3:15) Saman a propesiya so peteg a nipaarap ed si Satanas, say sakey ya inrepresenta na uleg. “Say bii” et say mismon matoor a mangatatawen ya organisasyon nen Jehova, a singa sakey ya asawan bii a matoor ed sikato. Say ‘bini na uleg’ so mangisasakop ed amin ya angheles tan totoon mangipapatnag na espiritu nen Satanas, saraman so onsusumpa ed si Jehova tan ed totoo To. Say ‘panugat ed ulo na uleg’ et mankabaliksan na kaderal ed kaunoran na rebeldin Satanas, a nanderal ed kagalangan nen Jehova tan angitarok na baleg a kaermenan ed katooan. Balet anto so pakabidbiran ed manunan betang na “bini” a manggawa ed pananugat? Diad dakel a siglo, satan so nansiansian “sagradon sekreto.”​—Roma 16:20, 25, 26, NW.

4. Panon so pakatulong na linya na kapolian a nanlapuan nen Jesus diad pakabidbir ed sikato bilang say insipan a Bini?

⁴ Kayari na manga 2,000 taon ed awaran na too, angiter si Jehova na kaaruman iran detalye. Imparungtal to a say Bini so nianak ed kapolian nen Abraham. (Genesis 22:15-18) Anggaman ontan, say linyan panlapuan na Bini so mandependi, aliwan diad silalaman a linya na kapolian, noagta diad saman so pilien na Dios. Anggaman ed panangaro nen Abraham ed ilalak ton Ismael, ya inyanak nen Hagar, imbaga nen Jehova: “Say sipan ko ipasen ko naani ed Isaac, a sikato so yanak nen Sara ed sika.” (Genesis 17:18-21) Diad saginonor et saman a sipan so apamintuan, aliwan diad panguloan ya ilalak nen Isaac, a si Esau, noagta diad si Jacob, a nanlapuan na 12 tribu na Israel. (Genesis 28:10-14) Asabi panaon et nipanengneng a say Bini so nianak ed tribu nen Juda, ed linya nen David.​—Genesis 49:10; 1 Awaran 17:3, 4, 11-14.

5. Sanen inggapo nen Jesus so mangaraldalin a ministeryo to, anto so angipabitar a sikato so Mesias?

⁵ Antoray arum a pakaamtaan no nipaakar ed pakabidbiran ed Bini? Masulok a 700 taon ed akauna, binitla la na Biblia so Betlehem bilang pasen a kianakan na insipan a Bini bilang sakey a too. Imparungtal met na satan a say Bini so wala la “nanlapu nen inmuna, nanlapu ed ando lan ando,” manlapud panaon sanen sikato so apalsa ed tawen. (Miqueas 5:2) Say eksakton panaon na kiwala to ed dalin bilang Mesias so nipasakbay met, diad panamegley nen propeta Daniel. (Daniel 9:24-26) Tan sanen alanaan si Jesus na masanton espiritu, a peteg a nagmaliw ya Alanaan a Sakey nen Jehova, say mismon boses na Dios ed tawen so mabitabitar ya angipabidbir ed sikato bilang Anak To. (Mateo 3:16, 17) Say Bini so niparungtal! Sirin, nayarian nen Felipe a nibaga tekep na talek: “Aromog mi imay insulat nen Moises ed Ganggan, tan saray Propeta, si Jesus.”​—Juan 1:45, NW.

6. (a) Unong ed Lucas 24:27, anto so amoria na saray patumbok to? (b) Siopa so manunan kabiangan na ‘bini na bii,’ tan anto so kabaliksan na panugat ed ulo na uleg?

⁶ Kayari na satan, amoria na saray patumbok nen Jesus a say dakerakel a mapropetikon impanukoy ed sikato so nagmaliw a kabiangan na impuyan a Kasulatan. (Lucas 24:27) Lalo ni ingen a linminew a si Jesus so manunan kabiangan na ‘bini na bii,’ say sakey a manugat ed ulo na uleg, a galpongen to si Satanas. Diad panamegley nen Jesus, amin a sipan na Dios ed katooan, amin na saray bengatlan pampirpirawatan tayo, so nasumpal.​—2 Corinto 1:20.

7. Niarum ed pakabidbiran ed samay Sakey ya atukoy ed saray propesiya, anto ni so makagunggonan gawaen?

⁷ Panon itayon naapektaan ed pakaamta ed saya? Ibabaga na Biblia so nipaakar ed sakey ya Etiopen eunuko ya akabasa la ed arum ed saratan a propesiya nipaakar ed onsabin Mananondon tan Mesias. Lapud agto natalosan, intepet to ed si ebanghelisador a Felipe: “Siopa so pansalitaan na propeta na onia?” Balet ta ag-impasen na eunoko a kasampotan la na bengatla sanen naawat to so ebat. Kayari ton tinalineng a maong so salaysay nen Felipe, atalosan na laki a say apresasyon ed sayan asumpal a propesiya so mankaukolan na kiwas ed biang ton dili. Amoria ton nakaukolan to so manpabautismo. (Gawa 8:32-38; Isaias 53:3-9) Kasin ontan met so ikiwas tayo?

8. (a) Anto so inyanino na samay getma nen Abraham ya iyapay si Isaac? (b) Akin ya imbaga nen Jehova ed si Abraham ya amin a nasyones so nabendisyonan diad panamegley na Bini, tan panon iyan onaplika ed sikatayo natan?

⁸ Imanoen met so makatenyeg a salaysay nipaakar ed samay getman pangiyapay nen Abraham ed si Isaac, say alenleneg ya ilalak to ed si Sara. (Genesis 22:1-18) Saman so angiyanino ed gawaen nen Jehova​—iyapay to so bogbogtong ya Anak to: “Ontan lay impangaro na Dios ed mundo ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Saya so mangiter ed sikatayo na talek a no panon ya inter nen Jehova so bogbogtong ya Anak to pian sumpalen so gagala To, Sikato met so ‘[sipapangasin] mangiter ed sikatayo na ami ganagana.’ (Roma 8:32) Anto so nakakaukolan ed biang tayo? Singa nikurit ed Genesis 22:18, imbaga nen Jehova ed si Abraham ya amin a nasyones so nabendisyonan diad panamegley na Bini, ‘lapud ta tinumbok [nen Abraham] so boses na [Dios].’ Nakaukolan tayo met so ontalineng ed si Jehova tan diad Anak to: “Say manisia ed Anak walay bilay ton andi-anggaan; balet say agmangunor ed Anak agto nanengneng so bilay, say sanok ingen na Dios so manayam ed sikato.”​—Juan 3:36.

9. No pablien tayo so ilalo ed andi-anggaan a bilay a ginawan posible na bagat nen Jesus, anto so gawaen tayo?

⁹ No pablien tayo so ilalo ed andi-anggaan a bilay ya agawan posible lapud bagat nen Jesus, labay tayon gawaen iray bengatlan sinalita nen Jehova ed sikatayo diad panamegley nen Jesus. Sarayan ganggan so maapit a nisiglaot diad panangaro tayo ed Dios tan diad kakaabay tayo. (Mateo 22:37-39) Impanengneng nen Jesus a say aro tayo ed si Jehova so mamakiwas ed sikatayon mangibangat ed arum ‘a mangunor ed amin a bengabengatlan ingganggan [nen Jesus ed sikatayo].’ (Mateo 28:19, 20) Tan labay tayon inabang itan ya aro ed saray kapara tayon lingkor nen Jehova diad panamegley na maparanay a “panmumuyong tayo” a kaiba ira. (Hebreos 10:25; Galacia 6:10) Ontan met, diad italineng ed Dios tan ed Anak to, agtayo nepeg ya isipen a kakaukolan da ed sikatayo so inkayadyari. Ibabaga na Hebreos 4:15 a si Jesus, bilang Atagey a Saserdote tayo, so makayarin “mangasi ed saray kakapuyan tayo.” Agaylan makaligliwa itan, nagkalautla sano manpikasi itayo ed Dios diad panamegley nen Kristo ya onkerew itayo na tulong to pian natalonaan iray kakapuyan tayo!​—Mateo 6:12.

Ipatnag so Pananisia ed Kristo

10. Akin ya anggapo so kilalaban no anggapo si Jesu-Kristo?

¹⁰ Kayari na impanpaliwawa to ed atagey a korte na Judio ed Jerusalem a say propesiya na Biblia so asumpal ed si Jesus, oniay maranet ya impanampot nen apostol Pedro: “Anggapo so arum a kilabanan, ta anggapo so arum a ngaran ed leksab na tawen, a niiter ed saray totoo, a nayarin kilabanan tayo.” (Gawa 4:12) Lapud amin ya ilalak nen Adan et makasalanan, say ipapatey da so andian na kablian a nayarin nausar bilang sakey a dondon para ed siopaman. Balet ayadyari si Jesus, tan say bilay to so walaan na kablian bilang bagat. (Salmo 49:6-9; Hebreos 2:9) Inyapay to ed Dios so sakey a dondon ya eksakton mipetekan ed bili na samay ayadyarin bilay ya abalang nen Adan. (1 Timoteo 2:5, 6) Saya so angiter ed sikatayo na pankanawnawan nagamoran so andi-anggaan a bilay diad balon mundo na Dios.

11. Ipaliwawa no panon itayon nagunggonaan a maong ed bagat nen Jesus.

¹¹ Say dondon so angilukas met na dalan pian naawat tayo so arum iran gunggona, anggan natan. Alimbawa, anggaman makasalanan itayo, ginawan posible na bagat nen Jesus so pakawalaan tayo na malinis a konsiensia lapud kaperdona na kasalanan. Saya so makagunggonan tuloy nen samay agamoran na saray Israelita diad panamegley na bagat iran ayep a kinaukolan na Mosaikon Ganggan. (Gawa 13:38, 39; Hebreos 9:13, 14; 10:22) Anggaman ontan, say pakaperdona so mankakaukolan na simamatuan pamidbir tayo a kaukolan tayon tuloy so bagat nen Kristo: “No ikuan tayo ya anggapo so kasalanan tayo, papalingoen tayoy inkasikatayon dili, et anggapo so katuaan ed sikatayo. No ikompesar tayo so saray kasalanan tayo, sikato so matoor tan matunong a mamerdona na saray kasalanan tayo, tan linisan to itayo ed ganagana ya agnikatunongan.”​—1 Juan 1:8, 9.

12. Akin a say kipalgep ed danum so importantin sengegan diad pakagamor na maabig a konsiensia ed arap na Dios?

¹² Panon a nibalikas na saray makasalanan so pananisia ra ed si Kristo tan diad bagat to? Sanen nagmaliw a mananisia so totoo nen inmunan siglo, satan so impanengneng da ed publiko. Panon? Nampabautismo ira. Akin? Lapud ingganggan nen Jesus a manpabautismo so amin a babangatan to. (Mateo 28:19, 20; Gawa 8:12; 18:8) Agnaamper so sakey a too sano say puso to so peteg a tinenyeg na maaron probisyon nen Jehova diad panamegley nen Jesus. Gawaen to so antokaman a nakakaukolan iran pananguman ed bilay to, idedika to so inkasikato ed Dios diad pikakasi, tan isimbolo toy dedikasyon to diad panamegley na kipalgep ed danum. Diad panamegley na onian panangipatnag na pananisia a sikato so ‘onkekerew na maong a konsiensia ed Dios.’​—1 Pedro 3:21.

13. No namoria tayon sikatayo so akagawa na kasalanan, anto so nepeg tayon gawaen nipaakar ed satan, tan akin?

¹³ Siempre, anggan diad kayari na bautismo et wala niray ugali tayon makasalanan. Anto sirin? Inkuan nen apostol Juan: “Sarayan bengatla isulat ko ed sikayo pian agkayo mankasalanan. Tan no wala so toon mankasalanan, wala so apireng tayo ya onarap ed Ama, si Jesu-Kristo a matunong. Tan sikato so manamaandi kasalanan tayo.” (1 Juan 2:1, 2) Kasin kabaliksan na saya ya anggan anton kasalanan so nagawaan tayo, no manpikasi itayo parad panamerdona na Dios et naperdona itayo la? Aliwan ontan. Say tombok ed kaperdona et say puron panagbabawi. Nayarin kaukolan met so tulong na matatken, eksperiensyadon tuloy ed Kristianon kongregasyon. Nepeg tayon bidbiren so agawan mauges tan satan so masimoon a pagbabawian ta pian panggunaetan ya aglan balot uliten itan. (Gawa 3:19; Santiago 5:13-16) No saya so gawaen tayo, napaseguroan itayo ed tulong nen Jesus tan say kipawil na pabor nen Jehova ed sikatayo.

14. (a) Ipaliwawa so sakey ya importantin dalan a sikatayo so ginunggonaan na bagat nen Jesus. (b) No peteg a walaan itayo na pananisia, anto so gawaen tayo?

¹⁴ Nilukasan na bagat nen Jesus so dalan a mamaarap ed maandon bilay diad tawen para ed “melag a pulok,” say segundaryon kabiangan na bini ya asaglawi ed Genesis 3:15. (Lucas 12:32, NW; Galacia 3:26-29) Nilukasan to met so dalan a mamaarap ed maandon bilay ed paraison dalin para ed binilyon nin arum a katooan. (Salmo 37:29; Apocalipsis 20:11, 12; 21:3, 4) Say maandon bilay so ‘langkap ya iter na Dios . . . diad panamegley nen Kristo Jesus a Katawan tayo.’ (Roma 6:23; Efeso 2:8-10) No walaan itayo na pananisia ed satan a langkap tan misalsalamat itayo ed paraan ya impagmaliw na satan a posible, saya so ipatnag tayo. Diad pakatebek ed no panon so makapakelaw ya impangusar nen Jehova ed si Jesus diad panumpal ed linawa To tan no panon a makanakana ed sikatayon amin so panumbok a maapit ed saray bakat nen Jesus, gawaen tayo so Kristianon ministeryo a sakey ed saray sankaimportantian a kimey ed bilay tayo. Ompatnag so pananisia tayo diad talek na pangibaga tayo ed arum nipaakar ed sayan makapakelaw a langkap manlapud Dios.​—Gawa 20:24.

15. Panon a say pananisia ed si Jesu-Kristo so walaan na manamakasakey ya epekto?

¹⁵ Agaylan maabig, manamakasakey ya epekto so ontan a pananisia! Diad panamegley na satan, sikatayo so mas niyasingger ed si Jehova, ed Anak to, tan ed sinansakey ed loob na Kristianon kongregasyon. (1 Juan 3:23, 24) Satan so mamaliket ed sikatayo unong ta sipapangasin inter nen Jehova ed Anak to “so ngaran ya analonggaring ed ami-amin a ngaran [nilikud so ngaran na Dios]; a dia ed ngaran a Jesus so talimukoran na amin a pueg, na saray wala ed tawen, tan wala ed dalin tan wala ed dalem na dalin, tan pian ganagana a dila nepeg a patuaen a si Jesu-Kristo sikato so Katawan, a kirayewan na Dios Ama.”​—Filipos 2:9-11.

Repason Pantongtongan

• Sanen pinmatnag so Mesias, akin a malinew so pakabidbiran ed sikato na saraman so tuan anisia ed Salita na Dios?

• Anto so arum ed saray bengatlan nepeg tayon gawaen pian nipanengneng tayo so apresasyon ed bagat nen Jesus?

• Diad antoran dalan ya agunggonaan itayo la ed bagat nen Jesus? Panon so pakatulong na saya ed sikatayo sano manpikasi itayo ed si Jehova nipaakar ed kaperdona na saray kasalanan?

[Litrato ed pahina 36]

Imbaga nen Jesus ed saray patumbok to a nepeg dan bangatan so arum a manumpal ed saray ganggan na Dios