Kapitulo Siete
No Anto so Naaralan Tayo Manlapud Panangiyabuloy na Dios ed Karelmengan
1, 2. (a) No tamtampol a pinatey nen Jehova iray rebelde ed Eden, panon itayo komon a naapektaan ed satan? (b) Antoran maaron probisyon so pinawala nen Jehova parad sikatayo?
‘DAISET tan mauges iray agew na saray taon na bilay ko,’ so inkuan nen patriarkan Jacob. (Genesis 47:9) Miulibay, imbaga nen Job a say too et ‘daiset so saray agew to, tan napno na gonigon.’ (Job 14:1) Singa sikara, maslak ed sikatayo so manasagmak na saray kairapan, ag-inkahustisya, anggan saray trahedya. Ingen, say inkianak tayo so aliwan ag-inkahustisya ed biang na Dios. Tua, andian itayo na ayadyarin nonot tan laman tan say Paraison ayaman a datin walad si Adan tan Eva. Balet anto no sikaran tampol so pinatey nen Jehova sanen nanrebelde ira? Ipasen lan nayarin anggapo so anggan anton sakit, ermen, odino patey, anggapo met balet so rasa na too. Ag-itayo komon nianak. Sipapangasin inabuloyan na Dios si Adan tan Eva a manilalak, anggaman atawir na saraya so ag-inkayadyari. Tan diad panamegley nen Kristo, inyuksoy nen Jehova so pakagamor tayo ed samay abalang nen Adan—say andi-anggaan a bilay ed paraison dalin.—Juan 10:10; Roma 5:12.
2 Agaylan makapaseseg so panilalon manbilay na ando lan ando ed balon mundo diad pegley na Paraison kaliberliber, a ditan et anggapo la so sakit, ermen, ot-ot, tan patey, ontan met ed totoon marelmeng! (Uliran 2:21, 22; Apocalipsis 21:4, 5) Balet manlapud rekord na Biblia, naaralan tayo ya anggaman importantin tuloy ed sikatayo tan ed si Jehova so personal a kilalaban tayo, wala so bengatlan lalon makana a nisiglaot ed sayan pamaakaran.
Nisesengeg ed Baleg a Ngaran To
3. Anto so nalalanor diad kasumpalan na gagala nen Jehova ed dalin tan katooan?
3 Nalalanor so ngaran na Dios diad kasumpalan na gagala to nipaakar ed dalin tan katooan. Satan a ngaran, a Jehova, et kabaliksan to so “Pagmaliwen To.” Sirin say ngaran to so mangilalaman ed kagalangan to bilang say Sankatalbaan a Soberano, say Managgagala, tan say Dios na katuaan. Lapud posisyon nen Jehova, say kareenan tan pankaabigan na amin ed interon talba so mandepende ed pangiter na sigpot a respeton kanepegan na ngaran to pati say lalaktipen na satan tan amin so nepeg ya ontulok ed sikato.
4. Anto so kabiangan ed gagala nen Jehova a para ed dalin?
4 Kayari ton pinalsa si Adan tan Eva, inikdan ira nen Jehova na kimey a sumpalen. Impalinew ton say gagala to so aliwa labat lan pamatulok ed dalin—pian inatnat iray ketegan na Paraiso—noagta pian makmakan itan na saray ilalak da. (Genesis 1:28) Kasin sayan gagala so onsaew lapud impankasalanan da? Agaylan kabalawan komon ed ngaran na makapanyarin-amin a Jehova no agto sumpalen so gagala to ed sayan dalin tan katooan!
5. (a) No kinan na inmunan totoo so bunga na kiew a pakaamtaan na maong tan mauges, kapigan so ipatey da? (b) Panon a sinumpal nen Jehova so salita to ed Genesis 2:17 bangta rerespetoen to so gagala to nipaakar ed dalin?
5 Pinasakbayan nen Jehova si Adan tan Eva a no ontunganga ra tan mangan ira ed bunga na kiew a pakaamtaan na maong tan mauges, sikara so ompatey “dia ed agew” a pangan da. (Genesis 2:17) Matua ed salita to, sikaray pirmin binaat nen Jehova ed saman a mismon agew na impankasalanan da tan impaakseb to so sentensyan patey. Manlapud imaton na Dios, si Adan tan Eva so inatey la ed saman ya agew. Anggaman ontan, pian nasumpal so gagala to nipaakar ed dalin, sikaray inabuloyan nen Jehova a mamawala na pamilya sakbay na ipatey da ed pisikal a paraan. Anggaman kuan, lapud say 1,000 taon so singa sakey agew ed Dios, sanen anampot so bilay nen Adan ed 930 taon, saman so diad loob na sakey ya “agew.” (2 Pedro 3:8; Genesis 5:3-5) Sirin nitandoro so inkamatua nen Jehova ed no kapigan ipakat so dusa, tan ag-inamper na impatey da so gagala to ed dalin. Balet kaleganan ni, saray ag-ayadyarin totoo, a pati saray marelmeng, so naabuloyan a manbilay.
6, 7. (a) Unong ed Exodo 9:15, 16, akin ya inabuloyan nen Jehova so marelmeng a mantultuloy nin magano? (b) Diad kipapasen nen Faraon, panon a nipanengneng so pakayari nen Jehova, tan panon a nipakabat so ngaran To? (c) Antoy pansumpalan sano mangangga so peles a marelmeng a sistema?
6 Samay imbaga nen Jehova ed manuley na Ehipto ed panaon nen Moises so lalon angipabitar no akin ya inabuloyan na Dios so marelmeng a mantultuloy. Sanen agpinaalis nen Faraon so ananak na Israel a manlapud Ehipto, sikato so agtampol kinabil nen Jehova. Samploran bakbak so indapo ed dalin, ya angipanengneng ed pakayari nen Jehova diad makapakelaw a dalan. Sanen nipasakbay so komapiton bakbak, imbaga nen Jehova ed si Faraon a magmainomay To komon a punasen si Faraon tan saray totoo to ed tapew na dalin. “Ingen ta dia ed tuay-tua,” kuan nen Jehova, “sikato’ya so amaawetan ko ed sika, pian ipanengneng ko ed sika so pakapanyarik, tan pian say ngaran ko nibawag ed amin a mundo.”—Exodo 9:15, 16.
7 Sanen inliktar nen Jehova iray Israelita, say ngaran to so tuan malaknab ya akabatan. (Josue 2:1, 9-11) Natan, ngalngalin 3,500 taon ed saginonor, agni alingwanan so ginawa to nensaman. Aliwa labat lan say personal a ngaran nen Jehova so niyabawag noagta ontan met ed katuaan nipaakar ed samay Sakey a mangaakbibit ed satan a ngaran. Saya so amasiansia ed kagalangan nen Jehova bilang Dios a mananumpal ed saray sipan to tan onkikiwas diad biang na saray lingkor to. (Josue 23:14) Impanengneng na satan a lapud makapanyarin-amin a biskeg to, anggapo so makaamper ed gagala to. (Isaias 14:24, 27) Makapanmatalek itayo sirin a sikato so magano lan onkiwas diad biang na saray matoor a lingkor to diad paneral to ed interon marelmeng a sistema nen Satanas. Say ontan a panangipatnag ed makapanyarin-amin a biskeg to tan dayew ya itarok na satan ed ngaran nen Jehova so agbalot nalingwanan. Saray gunggona so agmangangga.—Ezequiel 38:23; Apocalipsis 19:1, 2.
‘O Say Kaaralman na Kakabatan na Dios!’
8. Antoran katuaan so ipapaseseg nen Pablo a konsideraen tayo?
8 Diad sulat to ed saray taga-Roma, intepet nen Pablo: “Wala tay ag-inkatunong ed Dios?” Maranet ya inebatan to: “Andin balot”! Insan indanet to so panangasi na Dios tan tinukoy to so imbaga nen Jehova nipaakar ed impangiyabuloy to ni ed si Faraon a manbilay a magano. Impanengneng met nen Pablo a sikatayon totoo so singa damili ed lima na domadamili. Insan imbaga to: “Et anto, ta, no say Dios dia ed panlabay to a pangipatnag na sanok to, tan ipaamta toy pakayari to, intepel to a sankamasungdoan so saray baseha na sanok ya inggana ed kadederal: tan pian gawaen to a sankapatnagan so kayamanan na gloria to, ed saray banga [“baseha,” NW] na panangasi, a nen saman inggana to ed gloria, salanti sikatayo, a tinawag to met, aliwa lambengat a nanlapu ed saray Judios no agmet saray Gentiles?”—Roma 9:14-24.
9. (a) Sioparay “baseha na sanok ya inggana ed kadederal”? (b) Akin ya impanengneng nen Jehova so pirmin andukey a panangitepel ed arap na saray onsusumpa ed sikato, tan panon a say unor a kasumpalan so onkanan pankaabiganan na saramay mangaaro ed sikato?
9 Nanlapula’d samay impanrebelde ed Eden, siopaman ya onsumpa’d si Jehova tan diad saray ganggan to so nagmaliw iran “baseha na sanok ya inggana ed kadederal.” Kaleganan na amin a panaon nanlapula’d saman, inagamil nen Jehova so andukey a panangitepel to. Niludlurey na marelmeng iray ginawa to, pinasegsegang daray ariripen to, pinatey da ni ingen so Anak to. Ipanengneng to so baleg a bemben-linawa, inyabuloy nen Jehova so magenap a panaon pian sigpot a nanengneng na amin a pinalsa so makadesyang iran nansumpalan na impanrebelde ed Dios tan ed uley na toon independente ed sikato. Ontan met, lapud impatey nen Jesus et nitarya so paraan na panangiliktar ed matulok a katooan tan diad ‘paneral ed saray gawa na Diablo.’—1 Juan 3:8; Hebreos 2:14, 15.
10. Akin ya inabuloyan nen Jehova so marelmeng ed linmabas lan 1,900 taon?
10 Legan na masulok a 1,900 taon nanlapula’d samay inkioli nen Jesus, inyabuloy ni nen Jehova so “baseha na sanok,” a pinugeran to so kadederal da. Akin? Say sakey et lapud ipaparaan to iraman so nikasakey ed si Jesu-Kristo diad mangatatawen a Panarian to. Saraya so manbilang na 144,000, tan sikara so “baseha na panangasi” a sinalita nen apostol Pablo. Unona, saray indibidual ed limog na saray Judios so naimbitaan a manibukel ed sayan mangatatawen a klase. Saginonor et inimbitaan na Dios so totoo ed Gentil a nasyones. Agpinilit nen Jehova so anggan siopa ed saraya a manserbi ed sikato. Balet manlapud limog na saramay kinmiwas a walaay pisasalamat ed saray maaron probisyon to, inter to ed arum so pribilehyo na pagmaliw a kaiban-manuley na Anak to diad mangatatawen a Panarian. Say pangipaparaan ed satan a mangatatawen a klase so ngalngali la natan a nakompleto.—Lucas 22:29; Apocalipsis 14:1-4.
11. (a) Anton grupo so nagugunggonaan natan ed andukey-a-panangitepel nen Jehova? (b) Panoy kagunggonaan na saray inaatey?
11 Balet anto so nipaakar ed saray manayam ed dalin? Say andukey-a-panangitepel nen Jehova so nanggawa met a posible ed katipon na “sakey a baleg ya ulop” a nanlapud amin a nasyones. Minilyon la natan so bilang da. Insipan nen Jehova a sayan mangaraldalin a klase so makaliktar ed anggaan na sayan sistema tan makapanilalo ed andi-anggaan a bilay diad sakey a paraison dalin. (Apocalipsis 7:9, 10; Salmo 37:29; Juan 10:16) Diad inggeter na Dios a panaon, dakerakel ya inaatey so napaoli ed bilay tan naikdan na pankanawnawan magmaliw a mangaraldalin ya uuleyan na mangatatawen a Panarian. Ipapasakbay na Salita na Dios ed Gawa 24:15: “Wala naani kioli ed bilay na saray matunong tan agmatunong.”—Juan 5:28, 29.
12. (a) Antoy naaralan tayo nipaakar ed panangiyabuloy nen Jehova ed karelmengan? (b) Panoy liknaan yo nipaakar ed panangimaton nen Jehova ed sarayan pamaakaran?
12 Kasin wala so ag-inkahustisya ed amin na saya? Anggapo, lapud diad impamuger to ed kadederal na marelmeng, odino saray “baseha na sanok,” ipapatnag na Dios so panangabagey ed arum, a mitukoyan ed gagala to. Ipapanengneng na saya so inkamapangasi tan inkamaaro to. Ontan met, diad inkiabuloy na panaon a mangimaton ed kipaparungtal na gagala to, malaem so naaralan tayo nipaakar ed si Jehova a mismo. Pankelkelawan tayo so nanduruman aspekto na personalidad to a nipatnag—say inkahustisya to, say panangasi to, say andukey-a-panangitepel to, say malaklaknab a kakabatan to. Say makabat a panangimaton nen Jehova ed salisalan na sankatalbaan ya inkasoberano—say kanepegan ton manuley—so lawas ontalindeg bilang pantasi ed katuaan a say paraan na pananguley to so sankaabigan. Kaiba nen apostol Pablo, ibaga tayo: “O say kaaralman na kayamanan na kakabatan tan pakaamta na Dios! Agaylan agnausisa a kanonotan to, tan agnatebek ira a dalan to!”—Roma 11:33.
Pankanawnawan Pangipanengneng na Debosyon Tayo
13. No sagmaken tayo so personal a panirap, anton pankanawnawa so nipaarap ed sikatayo, tan antoy ontulong ed sikatayon onkiwas a sikakabat?
13 Dakel ed saray lingkor na Dios so walad kipapasen a manasaglawi ed personal a paniirap. Mantutultuloy so paniirap da lapud agni dineral na Dios so marelmeng tan agto ni intarok so nipaakar ed nipasakbay a kapaabig na katooan. Kasin saya so mamaalipanes ed sikatayo? Odino kasin namomoria tayo iratan a kipapasen bilang pankanawnawan mibiang diad pamaneknek a say Diablo so matila? Napabiskeg itayon manggawa na ontan no lawas nonoten so kerew: “Anako, onkabat ka, tan paliketen mo so pusok, pian naebatan ko so mamalaw ed siak.” (Uliran 27:11) Si Satanas, samay sakey a mamabalaw ed si Jehova, so mamapakasalanan a no saray totoo so managmak na kaandian ed materyal odino pisikal a kairapan, sikara so manetel ed Dios, ayewen da ni ingen. (Job 1:9-11; 2:4, 5) Napaliket tayo so puso nen Jehova no, diad katooran tayo ed sikato ed arap na saray kairapan, et ipanengneng tayo a say akusasyon nen Satanas so aliwan tua ed biang tayo.
14. No manmatalek itayo ed si Jehova sano nasusubok itayo, antoran gunggona so nagamoran tayo?
14 No manmatalek itayo ed si Jehova sano nasusubok, nabayuboan tayo so mabmabli iran kalidad. Alimbawa, bilang resulta na saray nanirapan nen Jesus, sikato so “akaaral na katutulok” diad laknab ya agto nin balot naaralan nensaman. Makaaral itayo met ed saray subsubok ed sikatayo ta nababayuboan tayo so andukey-a-panangitepel, panagsungdo, tan apaaralem ya apresasyon ed saray matunong a dalan nen Jehova.—Hebreos 5:8, 9; 12:11; Santiago 1:2-4.
15. Legan a susungdoan tayon siaanos so kairapan, panon so nayarin kagunggonaan na arum?
15 Iimatonan na arum so gagawaen tayo. Lapud sasagmaken tayo nisesengeg ed panangaro tayo parad inkatunong, arum ed sikara so nayarin makamoria a siansia no sioparay tuan Kristiano natan. Tan diad pikasakey da ed sikatayo diad panagdayew, sikaray makapidasig a para ed saray bendisyon na andi-anggaan a bilay. (Mateo 25:34-36, 40, 46) Labay nen Jehova tan say Anak to a saray totoo et nawalaan na satan a pankanawnawa.
16. Panon a say panmoria tayo ed personal a kairapan so misiglaotan ed pamaakaran na pankakasakey?
16 Agaylan abig sano moriaen tayoray anggan mairap a kipapasen bilang pankanawnawan pangipanengneng na debosyon tayo ed si Jehova tan bilang pakapibiang tayo diad panumpal ed linawa to! Say panggawa tayo na ontan so mangiter na ebidensyan sikatayo so peteg a mamapaarap diad pikakasakey ed Dios tan si Kristo. Impikasi nen Jesus ed si Jehova iray amin a tuan Kristiano, a kuanto: “Aliwan saraya labat [saray maapit ya akilimogan ton babangatan nensaman] so pikasik, noag saraman met so manisia ed siak ed panamegley na salita ra; pian saksakey iran amin; salanti singa sika, Ama, wala ka ed siak, tan siak ed sika, pian wala ra met ed sikata.”—Juan 17:20, 21.
17. Anton talek so niwala ed sikatayo no manmatoor itayo ed si Jehova?
17 No matoor itayo ed si Jehova, sikatayo so tumangan ton mabunbunlok. Ibabaga na Salita to: “Mansiansia kayo a malet, agkayo nagiing, lawas padaak yo so kimey yo ed Katawan, bangta amta yo a say kimey yo aliwa ya anggapo so kabaliksan to ed Katawan.” (1 Corinto 15:58) Kuanto met: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.” (Hebreos 6:10) Kuan na Santiago 5:11: “Nia, ibilang tayo a mapalar so saray managtepel. Nadngelan yo so impantepel nen Job, tan anengneng yo so anggaan ya initer na Katawan; no panon a say Katawan maabagey a tuloy, tan mapangasi.” Anto so nansumpalan nen Job? “Dia ed ontan si Jehova benendisyonan to so kaunoran a kasampotan nen Job a lalo nen say gapo to.” (Job 42:10-16) On, si Jehova so “mananumang ed saray mananap ed sikato.” (Hebreos 11:6) Tan agaylan tumang so tatalaranan tayo—andi-anggaan a bilay ed paraison dalin!
18. Anto ed kaunoran so nagawa ed anggan anton makapaot-ot iran pakanodnonotan a nayarin sasagmaken tayo?
18 Apigden na uley na Panarian na Dios so amin a deral ed pamilya na too diad linmabas a libulibon taon. Palumbasan na saray gayaga ed satan a panaon so anggan anton paniirap a sasagmaken tayo natan. Ag-itayo la gonigonen na anggan anton mauges iran pakanodnonotan ed apalabas ya impanirap. Saray makapabiskeg a kanonotan tan kimkimey ed agew-agew a panagbilay na totoo ed balon mundo so kalkalnan mamunas ed makapaot-ot iran pakanodnonotan. Iyaabawag nen Jehova: “Mamalsa ak na saray balo a tawen [sakey a balon mangatatawen a gobiernon Panarian a manguley ed katooan] tan balo a dalin [sakey a matunong a sosyedad na too]; ta saray inmuna a bengatla ag-ira la nanonotan, ag-ira la onla ed nonot. Balet manggayaga tan manliket kayo ed ando lan ando ed saman a palsaen ko.” On, diad balon mundo nen Jehova, nayarian lan ibaga na saray matunong: “Say amin a dalin wala ed painawa, tan sikato so mareen: ombutay ira a mankankanta.”—Isaias 14:7; 65:17, 18.
Repason Pantongtongan
• Anggaman iyaabuloy to so mauges, panon nen Jehova a manepeg ya impanengneng so baleg a respeto ed dilin ngaran to?
• Panon a say impangiyabuloy na Dios ed “baseha na sanok” so nanggawa ed panangasi ton ninatnat ya angga ed sikatayo?
• Anto so nepeg tayon panggunaetan a nanengneng diad saray kipapasen a manasaglawi ed personal a paniirap?
[Saray litrato ed pahina 67]
Si Jehova et “benendisyonan to so kaunoran a kasampotan nen Job a lalo nen say gapo to”