Kasin Ipasirayew Tayoy Antokaman?

ANTOY kabaliksan na manpasirayew? Antam?— Nia so alimbawa. Asalim ta lay nanggawa na sakey a bengatla ya agka marunong ed satan? Nayarin asalim lay nanggalaw na soccer. Odino nayarin asalim lay aki-baldo. Wala ta lay nanelek ed sika tan kinantiawan to ka?— Sikatoy manpapasirayew.

Antoy liknaan mo no ontan so gawaen na arum? Labay mo itan?— Sirin, antoy nikuan mo a liknaan na arum no manpasirayew ka?— Maong kasi so pangibaga ed sakey, “Maong ak ni nen say sika”?— Kasin labay nen Jehova so totoo a manggagawa na ontan?—

Kabat na Sankamaongan a Managbangat iray totoo ya impasen day inkasikaran magmaong nen say arum. Sikaray mangipasirayew, odino mangilastog, ed inkasikara tan melmelagen day arum. Kanian aminsan ya agew et angistorya si Jesus pian ipanengneng ed sikara a makapuy so pampasirayew. Dengelen ta’y istorya.

Say istorya et nipaakar ed sakey a Fariseo tan ed sakey a managsingil na buis. Saray Fariseo et managbangat na relihyon, a naynay ya onkikiwas a singa mas matunong odino mas masanto ira nen say arum a totoo. Say Fariseo ed istorya nen Jesus so linma ed templo na Dios diad Jerusalem pian manpikasi.

Inkuan nen Jesus a linma met so managsingil na buis ed templo pian manpikasi. Aglabay na maslak a totoo iray managsingil na buis. Ipasen dan sasaolen ira na saray managsingil na buis. On, dakel a managsingil na buis et aliwan matua.

Diad templo, onia so pikakasi na Fariseo: ‘O Dios, pisalamatan ta ka lapud aliwa ak a managkasalanan a singa arum a totoo. Agko sasaolen iray totoo odino manggagawa na arum a mauges iran bengatla. Aliwa ak a singa sayan managsingil na buis. Matunong ak a too. Manpapalabas ak na panangan a mamidua ed sakey simba pian dakel so panaon kon mannonot ed sika. Tan mangiiter ak ed templo na kakaplo na amin a bengatlan niwalad siak.’ Agta inisip na Fariseo a sikatoy mas maong nen say arum?— Tan imbaga to met itan ed Dios.

Balet say managsingil na buis et aliwan ontan. Agto anggan onnengneng ed tawen sano manpikasi. Sikatoy nansiansian akaalagey diad arawi ya akatuek so ulo to. Maermen a maong so managsingil na buis ed saray kasalanan to, tan tatabiogen toy pagew to lapud ermen to. Agto imbaga ed Dios so kamaong to. Imbes, impikasi to: ‘O Dios, kasian moak a managkasalanan.’

Dinan ed sarayan duaran lalaki so isipen mon makapaliket ed Dios? Kasin say Fariseo, samay impasen toy inkasikato a mao-maong? Odino samay managsingil na buis, samay panermenan toray kasalanan to?—

Inkuan nen Jesus a say managsingil na buis so makapaliket ed Dios. Akin ey? Impaliwawa nen Jesus: ‘Lapud siopaman ya ipapasen toy inkasikato a mas maong nen say arum so nipaabeba. Balet samay ipapasen toy inkasikato ya abeba so nipaatagey.’​—Lucas 18:9-14.

Antoy leksion ya ibabangat nen Jesus ed istorya to?— Ibabangat ton aliwan maabig so pangipasen a mas maong itayo nen say arum. Nayarin agtayo ibagan iisipen tayon mas maong itayo, balet diad kakikiwas tayo, nipatnag tayo ya ipapasen tayon mas maong itayo nen say arum. Kasin kinmiwas ka la na ontan?— Nonoten si apostol Pedro.

Sanen imbaga nen Jesus ed saray apostol to a sikatoy taynan da no sikatoy naerel, impasirayew nen Pedro: ‘Anggan taynanan da ka lan amin, agtakan balot taynan!’ Balet alingo si Pedro. Sikatoy matalek a maong ed inkasikato. Tinaynan toy Jesus. Balet, sikatoy pinmawil, a singa aralen ta diad Kapitulo 30 na sayan libro.​—Mateo 26:31-33.

Imanoen ta so sakey ya alimbawa natan. Nayarin sika tan say kaklasem so atepetan diad eskuelaan. Panon to no naebatan mon tampol, balet samay kaklasem et agto naebatan a tampol? Siempre, maliket ka no antam iray ebat. Balet kasin maabig ya ikomparam so inkasika ed samay sakey a matantan ya onebat?— Maabig kasi so pangipasen mo’d inkasika a mas maong ka tan ipasen moy arum a makapuy?—

Ontan so ginawa na Fariseo. Impasirayew to a sikatoy mas maong nen say managsingil na buis. Balet inkuan na Sankamaongan a Managbangat ya aliwa so Fariseo. Tua a sarag na sakey a too so manggawa na sakey a bengatla a mas maong nen say panggawa na sakey. Balet agkabaliksan na satan a sikatoy mas maong.

Kanian no mas dakel so amta tayo nen say arum, kasin maong so pampasirayew?— Nonot mo pa itan. Kasin ginawa tayoy dilin utek tayo?— Andi, say Dios so angiter na utek na balang sakey ed sikatayo. Tan maslak a bengatlan amta tayo et naaralan tayo ed arum. Nayarin abasa tayo iray bengatla ed sakey a libro. Odino nayarin walay angibaga na saratan ed sikatayo. Anggano sikatayon mismo so akaaral ed satan, panon tayon agawaan itan?— On, diad impangusar tayoy utek tayo ya inter na Dios.

No mamapasya so sakey, maabig so pangibagam na bengatlan makapaseseg ed sikato. Ibagam ed sikato a labay moy ginawa to. Nayarin natulongan mo pian ondakep ni gawaen to. Agta ontan so labay mon gawaen na totoo ed sika?—

Arum a totoo so mas mabiskeg nen say arum. Panon to no mas mabiskeg ka nen say agim? Rason itan kasi pian manpasirayew ka?— Andi. Agta say kakanen tayo so mamapabiskeg ed sikatayo? Tan agta say Dios so mangiiter na sinag na agew, say uran, tan amin niran bengatla a nakaukolan pian ombaleg iray naakan?— Kanian say Dios so kaukolan a pisalamatan tayo lapud ibibiskeg tayo.​—Gawa 14:16, 17.

Anggapo ed sikatayo so malabay a mangipasirayew, agta ontan?— Nonoten ta iray salita nen Jesus: ‘Say labay yo a gawaen komon ed sikayo na saray totoo, ontan met komon so gawaen yo ed sikara.’ No gawaen tayo itan, agtayon balot naalig so Fariseo a nampasirayew diad istorya na Sankamaongan a Managbangat.​—Lucas 6:31.

Aminsan et walay anawag ed si Jesus a sikato so maong. Kasin imbaga na Sankamaongan a Managbangat ya, ‘On, maong ak’?— Andi, agto imbaga. Imbes, inkuan to: “Anggapo so maong nilikud so sakey, salanti Dios.” (Marcos 10:18) Anggaman ayadyari so Sankamaongan a Managbangat, agto nampasirayew. Imbes, inter toy amin a dayew ed Ama to, si Jehova.

Kanian, wala kasi nipasirayew tayo?— On, wala. Nayarian tayon ipasirayew so Manamalsa tayo, si Jehova a Dios. Sano nanengneng tayo so marakdakep ya iseselek na agew odino arum a makapakelkelaw a pinalsa, nayarian tayon ibaga, ‘Say makapakelkelaw a Dios tayo, si Jehova, so nanggawa ed saya!’ Komon ta naynay itayon akaparaan a mangitongtong ed makapakelkelaw iran bengatla ya agawaan la nen Jehova tan gawaen to ni ed arapen.