“Onla Kayo . . . tan Manggawa na Saray Babangatan”

1-3. (a) Antoy kaslakan a gagawaen na sakey a dumaralos sano dakel so aanien balet ta bukbukor to? (b) Anton kipapasen so inkipaarapan nen Jesus nen primabera na 33 C.E., tan panon ton pinolaingan itan?

SAKEY a dumaralos so nambaka tan angitanem na bini ed daralusan to pigay bulan lay apalabas. Tinalaranan to so intubo na satan tan sanen tinmakken la, sikatoy manlikliket. Natan, nanenengneng to lay gunggona na amin ya impansagpot to, lapud asabi lay panaon na panag-ani. Balet, say problema to et saya: Amayamay so aanien to tan agto nasarag itan a bukor. Pian nasolbar iyan problema, denesidi toy mangupa na pigaran umaani. Lalo la ta daiset lay nakekeran panaon pian anien so nansagpotan to.

² Nen primabera na 33 C.E., nipaarap met si Jesus ed mipadparan kipapasen. Legan na ministeryo to ed dalin, sikatoy nantanem na saray bini na katuaan. Asabi panaon et kaukolan lan anien iratan tan daakan so aanien. Dakerakel so interesadon totoo a kaukolan a natipon bilang babangatan. (Juan 4:35-38) Panon kasin pinolaingan nen Jesus iyan pankaukolan? Sanen sikatoy walad palandey na Galilea, antis na insegep to ed tawen, sikatoy angiganggan ed saray babangatan to a mananap na dakel nin komikimey. Inkuan to: “Onla kayo sirin, tan manggawa kayo na saray babangatan ed amin a nasyones, a binyagan yo ra . . . ya ibangat yo ran mangunor na amin a bengabengatla ya ingganggan ko ed sikayo.”​—Mateo 28:19, 20.

³ Asegek ed satan a ganggan so kabaliksan na pagmaliw a petepeteg a patumbok nen Kristo. Usisaen tayo sirin so taloran tepetepet. Akin ya angiter si Jesus na ganggan nipaakar ed dakel nin komikimey? Panon ton impasal iray babangatan to pian naromog da iratan? Tan panon a nalalanor itayo ed sayan ganggan?

No Akin a Nakaukolan so Dakel a Komikimey

4, 5. Akin ya agnasumpal nen Jesus so ginapoan ton kimey, tan siopa so mangituloy ed kimey sano sikatoy ompawil la ed tawen?

⁴ Nen ginapoan nen Jesus so ministeryo to sanen 29 C.E., amta ton sikatoy mangigagapo na kimey ya agto nasumpal a bukor. Lapud antikey lay nakekeran panaon to diad dalin, limitado labat so lugar a nakobrian to tan say karakel na totoo a napasabian to na mensahe na Panarian. Tua, saray Judio tan proselita so manunan pinulongan to, salanti, “saray abalang a karnero na abung na Israel.” (Mateo 15:24) Balet, sarayan “abalang a karnero” so nitaytayak ed interon Israel, a libo-libon kilometro kuadrado kaawang. Sakey ni, diad kaunoran et nepeg a nipasabi ed interon mundo so maong a balita.​—Mateo 13:38; 24:14.

⁵ Amta nen Jesus a baleg nin kimey so gawaen kayari ipatey to. Onia so inkuan to ed saray 11 a matoor ya apostol to: “Tua, tua, kuan ed sikayo, say manisia ed siak, saray kimey a gawaen ko gawaen to met, tan angkakabaleg a kimkimey nen saraya so gawaen to, lapud onla ak ed Ama.” (Juan 14:12) Lapud ompawil la’d tawen so Anak, say mangituloy lay panagpulong tan panagbangat et saray patumbok to, ya aliwa labat a saray apostol noag ontan met ed amin a babangatan ed arapen. (Juan 17:20) Sipapaabeban binidbir nen Jesus a say nagawaan da et mas ‘baleg nen say’ agawaan to. Panon? Diad taloran paraan.

6, 7. (a) Diad antoran paraan a saray kimey na papatumbok nen Jesus et mas baleg nen say agawaan to? (b) Panon tayon nipanengneng ya ag-aturingan so talek nen Jesus ed sikatayoran papatumbok to?

⁶ Unona, mas dakel so teritorya a nakobrian na saray patumbok nen Jesus. Diad sayan panaon, asabi la na panagtasi ra so ararawin pasen ed dalin, a lampas lan maong ed ketegan na nasyon a pinulongan nen Jesus a mismo. Komadua, mas dakel a totoo so nakatongtong da. Samay melag a grupo na babangatan a tinaynan nen Jesus so maples a nagmaliw a nilibo. (Gawa 2:41; 4:4) Natan et minilyon la ira, tan nilasus libo ni so onaarum a nababautismoan ed kada taon. Komatlo, mas andukey a peryodo na panaon so pampulong da, salanti, anggad sayan panaon, a manga 2,000 a taon lay apalabas manlapud samay impangangga na talora tan kapalduan taon a ministeryo nen Jesus.

⁷ Imbalikas nen Jesus so panagmatalek to ed saray patumbok to sanen inkuan ton manggawa ra na “angkakabaleg a kimkimey nen saraya.” Inmatalek to ed sikara so kimey a sankaimportantian ed sikato, say pangipulong tan pangibangat ed “ebanghelyo na panariay Dios.” (Lucas 4:43) Sikatoy kombinsido a matoor dan sumpalen so kimey. Antoy kabaliksan na satan ed sikatayo natan? Sano maseseg tan interon puso tayon susumpalen so ministeryo tayo, ipapanengneng tayo ya ag-aturingan so talek nen Jesus ed sikatayoran papatumbok to. Agta agaylan baleg a kagalangan iya?​—Lucas 13:24.

Impasal a Mantasi

8, 9. Anton ehemplo so impanengneng nen Jesus diad ministeryo, tan panon tayon naalig so ehemplo to diad ministeryo tayo?

⁸ Sankaabigan so impangipasal nen Jesus ed saray babangatan to parad ministeryo. Manuna ed amin, sikatoy angipanengneng na ayadyarin ehemplo ed sikara. (Lucas 6:40) Diad tinumbokan na sayan kapitulo, siningbat tayo no antoy awawey to ed ministeryo. Nonoten pan magano iramay babangatan a kaiba nen Jesus a nambaroy pian manpulong. Naimano ran sikatoy nampulong ed anggan iner a pakaromogan ed totoo, diad saray baybay tan gilig na kapukdolan, diad saray syudad tan tindaan, tan diad kaabungan. (Mateo 5:1, 2; Lucas 5:1-3; 8:1; 19:5, 6) Naimatonan da so inkakuli to, a sikatoy masakbay ya ombabangon tan manlilingkor anggad labi. Parad sikato et aliwan pamalabasan labat na oras so ministeryo! (Lucas 21:37, 38; Juan 5:17) Seguradon alikas da a sikatoy papakiwasen na ontan lan panangaro ed totoo. Nayarin apatnagan da ed lupa to so panangabagey to. (Marcos 6:34) Diad padesir mo, anto kasi so epekto na ehemplo nen Jesus ed saray babangatan to? No bilang ta wadman ka, anto met kasi so epekto na satan ed sika?

⁹ Bilang papatumbok nen Kristo, aaligen tayo so ehemplo to diad ministeryo tayo. Kanian, gagawaen tayo so anggaay nayarian tayo ed sigpot a ‘pantatasi’ tayo. (Gawa 10:42) Singa met ed si Jesus, oonla itayo ed saray totoo diad kaabungan da. (Gawa 5:42) No nakaukolan, itutukoy tayo so eskedyul tayo pian seguradon nasabian tayo ra’d kaabungan da no manpulong itayo. Sakey ni, aanapen tan mataktika tayon pupulongan so totoo ed publikon paspasen, salanti, diad saray karsada, parki, saliwan, tan diad pantratrabahoan tayo. Itutultuloy tayoy “mansagpot tan mantepel” ed ministeryo tayo lapud seseryosoen tayo iyan kimey. (1 Timoteo 4:10) Say pirmi tan impapuson panangaro ed arum so mamapakiwas ed sikatayon mantultuloy a mananap na pankanawnawan napulongan so totoo ed inerman a pasen tan kapagno naromog ira.​—1 Tesalonica 2:8.

10-12. Antoran importantin leksion so imbangat nen Jesus ed saray babangatan to antis to ran imbaki a manpulong?

¹⁰ Say sananey nin paraan na impangipasal nen Jesus ed saray babangatan to et diad impangiter to na detalyadon instruksion. Antis ton imbaki a manpulong so 12 apostol, tan diad saginonor et say 70 a babangatan, binilin to ni ra no panon so pampulong. (Mateo 10:1-15; Lucas 10:1-12) Maabig so resulta na satan, lapud oniay inkuan na Lucas 10:17: “Pinmawil so saray pitomplo a sililiket.” Singbaten tayo natan so duaran importantin leksion ya imbangat nen Jesus, a tandaan tayo a saray salita to et nepeg a talosan unong ed saray naimatonan ton kustombre na saray Judio ed saman a panaon.

¹¹ Imbangat nen Jesus iray babangatan to a manmatalek ed si Jehova. Oniay inkuan to ed sikara: “Agkayo mangitatarok na balitok, anggan pilak, anggan gambang [odino gansa] ed kabulsaanan yo. Agkayo met manawit na panagbalonan yo ed panakar-akar, anggan duaran aysing, anggan [sa]patos anggan tayokod; ta say komikimey makana ed kanen to.” (Mateo 10:9, 10) Parad saray biahero ed saman a panaon, kaslakan la so pangawit na kargaan na kuarta, balonan, tan reserban sandalyas. Sanen binilin nen Jesus iray babangatan to ya agda panaaburidoan iratan a bengatla, singa oniay imbaga to: “Manmatalek kayon sigpot ed si Jehova, lapud sikato so akauley ed saray pankaukolan yo.” Taryaan ira nen Jehova diad pamakiwas to ed saramay mangawat ed maong a balita a mamarawes ed sikara, ta satan so kustombre na saray taga-Israel.​—Lucas 22:35.

¹² Imbangat met nen Jesus iray babangatan to a paliisan da iray agkapilitan a pakaabalaan. Oniay inkuan to: “Anggapo so too ya ibano yo ed dalan.” (Lucas 10:4) Kasin bibilinen ira nen Jesus a magmaliw a mabinbinta odino agmakaaro? Andi. Diad saman a panaon et aliwa labat lan basta mantatangeran odino maniimisan iray totoo sano mangibano ira. Noagta, walaray katekep na satan a nanduruman pormalidad tan andukey a pitotongtong. Onia so inkuan na sakey a lakin natatawag ya iskolar na Biblia: “Say panangilugay na saray taga-Bukig et agmipara ed gagawaen tayon ituek na daiset odino pipasamanoan labat, noagta sikaray maminpigan manlalakapan, tan onyuko, tan ondakmomo ni ingen ed dalin. Amin iraya et mangalay dakel a panaon.” Sanen imbaga nen Jesus ed saray babangatan to ya agda gagawaen so niyugali lan panangibano, onia so labay ton ibaga: “Usar mo ed makabat a paraan so panaon mo, ta say mensahen tarok mo et apurado.”a

13. Panon tayon nipanengneng ya ipapapuso tayo ray instruksion ya inter nen Jesus ed saray inmunan siglon babangatan to?

¹³ Ipapapuso tayo met natan imay bilin nen Jesus ed saray inmunan siglon babangatan to. Sano manpupulong tan manbabangat itayo, sigpot itayon manmamatalek ed si Jehova. (Uliran 3:5, 6) Amta tayon anggapoy pankulangan tayo ed bilay no “anapen [tayo] nin unona so panarian.” (Mateo 6:33) Pepekderan na saray sigpot-panaon a manangiyabawag na Panarian ed interon mundo ya anggan diad panaon na kairapan et agbalot antikey so lima nen Jehova. (Salmo 37:25) Natetebek tayo met a nakaukolan a paliisan iray pakaab-abalaan. No agtayo manalwar, nayarin nisuawi itayo na sayan sistema na bengabengatla. (Lucas 21:34-36) Aliwa iyan panaon pian manpaabala. Say mensahe tayo et apurado lapud bilay so nalalanor. (Roma 10:13-15) No pansiansiaen tayon mabilabilay ed kapusoan tayo so inkaganat na panaon, pugeran itayo na satan pian agtayo abuloyan ya upoten na sayan mundo so panaon tan biskeg a mas maabig no usaren la’d ministeryo. Tandaan, antiktikey lay nakekeran panaon tan dakerakel ni aanien.​—Mateo 9:37, 38.

Kaiba Itayo ed Kimey

14. Anto so mangipapanengneng a say ganggan ya akasulat ed Mateo 28:18-20 et para ed amin a patumbok nen Kristo? (Nengnengen met so paimano’d leksab.)

¹⁴ Say pinaolin si Jesus so angipudir na ambelat a responsabilidad ed saray patumbok to sanen inkuan ton, “Onla kayo . . . tan manggawa kayo na saray babangatan.” Sanen imbaga to itan ed saray babangatan to diad palandey na Galilea, aliwa labat lan saray wadman so sankanonot to.b Say kimey ya ingganggan to et saknapen toy “amin a nasyones,” tan mantultuloy itan “angga ed kasampotan” na sistema na bengabengatla. Malinew sirin a parad amin a papatumbok nen Kristo itan a ganggan, a pati sikatayo natan. Usisaen tayo so imbaga nen Jesus ya akasulat ed Mateo 28:18-20.

15. Akin a nepeg ya ontulok itayo ed ganggan nen Jesus a manggawa na saray babangatan?

¹⁵ Antis ya inter nen Jesus so ganggan, onia ni so inkuan to: “Amin a pakauley niiter ed siak ed tawen tan dia ed dalin.” (Bersikulo 18) Talaga ta’n walaan na ontan kabaleg a pakauley si Jesus? On! Sikato so arkanghel, a mangimamando ed minilyon ya angheles. (1 Tesalonica 4:16; Apocalipsis 12:7) Bilang “ulo na kongregasyon,” walay pakauley to ed saray papatumbok to diad dalin. (Efeso 5:23, NW) Manlapu nen 1914, sikato lay manuuley bilang Mesianikon Ari ed tawen. (Apocalipsis 11:15) Tan sakop ni ingen na pakauley to so anggan saray walad lubok, lapud walay pakayari ton mamaoli. (Juan 5:26-28) Diad impangiyabawag to nin unona ed laknab na pakauley to, impabitar nen Jesus a saray sinmaginonor ya imbaga to et aliwan suhestion noagta ganggan. Kanian, nepeg ya ontulok itayo, lapud agnanlapud inkasikato so autoridad to noagta inter itan na Dios.​—1 Corinto 15:27.

16. Sanen imbaga nen Jesus ya “onla kayo,” antoy igaganggan ton gawaen tayo, tan panon tayon susumpalen iyan aspekto na ganggan?

¹⁶ Indatak natan nen Jesus so ganggan, ya oniay impangigapo to: “Onla kayo.” (Bersikulo 19) Diad ontan et igaganggan to itayo sirin a manbulontaryo lan mangipasabi ed mensahe na Panarian ed arum. Tan diad panumpal ed sayan aspekto na ganggan, nayari tayon usaren so nanduruman metodo. Say pankabkaabungan et sankaepektiboan a paraan pian personal a nakatongtong so totoo. (Gawa 20:20) Manaanap itayo met na saray pankanawnawa a makapantasin impormal; a diad inagew-agew a bilay tayo et magunaet tayon igapo so tongtongan nipaakar ed maong a balita kapag no matukoy. Ontan met, nayarin saray metodo tayo ed panagpulong et nanduruma, ya iyaadapta tayo ed saray pankaukolan tan sirkumstansya ed lugar a pupulongan tayo. Balet, sakey a bengatla so agmanguuman: ‘Oonla’ itayo pian anapen iray makanepegan.​—Mateo 10:11.

17. Panoy ‘panggagawa tayo na saray babangatan’?

¹⁷ Insublay ya impaliwawa nen Jesus so gagala na ganggan a “manggawa kayo na saray babangatan ed amin a nasyones.” (Bersikulo 19) Panoy ‘panggagawa tayo na saray babangatan’? Say panaggawa na babangatan et aliwa labat lan basta panginabang na kakabatan ed arum. Sano iyaaral tayo so Biblia ed saray interesado, say kalat tayo et tulongan iran magmaliw a papatumbok nen Kristo. Kapag no posible, ipapabitar tayo iray ehemplo nen Jesus, pian sikatoy naaralan dan ipasen bilang Managbangat tan Uliran da, diad ontan et aligen da so kabibilay to tan gawaen da so kimey a ginawa to.​—Juan 13:15.

18. Akin a say bautismo et sankaimportantian ya ebento ed bilay na sakey a babangatan?

¹⁸ Say importantin kabiangan na ganggan et nibalikas ed oniaran salita: “Binyagan yo ra ed ngaray Ama, tan say Anak, tan say espiritu santo.” (Bersikulo 19) Say binyag odino bautismo et sankaimportantian ya ebento ed bilay na sakey a babangatan, lapud satan so matukoy a simbolo na interon puson dedikasyon to ed Dios. Kanian, makana itan parad kililiktar. (1 Pedro 3:21) On, sano itultuloy na bautismado lan babangatan a gawaen so anggaay nayarian to diad panagserbi ed si Jehova, nailaloan to a nagamoran to ray magnayon a bendisyon ed balon mundo ya onsabi. Kasin wala lay atulongan yon magmaliw a bautismadon babangatan nen Kristo? Diad ministeryo tayo bilang Kristiano, anggapo lay mas makapaliket nen say satan.​—3 Juan 4.

19. Anto so ibabangat tayo ed saray balo ni, tan akin a mantultuloy ni so panagbangat kayari ran abautismoan?

¹⁹ Impaliwawa nen Jesus so sinmublay a kabiangan na ganggan diad impangikuan: “Ibangat yo ran mangunor na amin a bengabengatla ya ingganggan ko ed sikayo.” (Bersikulo 20) Ibabangat tayo ray balo ni a mangunor ed saray ganggan nen Jesus, a kabiangan ed satan so ganggan a pangaro ed Dios tan ed kaparan too, tan say pagmaliw a managgawa na babangatan. (Mateo 22:37-39) Tuloytuloy tayo ran babangatan no panon dan ipaliwawa iray katuaan na Biblia tan italindeg so ombibiskeg a pananisia ra. Sano kualipikado la ran mibiang ed panagpulong, uulopen tayo ra, ya ibabangat tayo ra panamegley na salita tan alimbawa no panon so epektibon pibiang ed sayan kimey. Sano abautismoan la so babangatan, aglabay ya ibaga na satan ya asumpal la so panagbangat ed sikato. Nayarin kaukolan ni na saray balon bautismado so kaaruman ya instruksion pian nasarag dan arapen iray subsubok ed impagmaliw dan patumbok nen Kristo.​—Lucas 9:23, 24.

“Wala Ak a Naynay ed Sikayo”

20, 21. (a) Legan tayon susumpalen so ganggan nen Jesus, akin ya anggapoy rason pian ontakot itayo? (b) Akin ya aliwa iyan panaon pian ontantan ed kimey, tan antoy nepeg a determinasyon tayo?

²⁰ Say unor ya imbaga nen Jesus diad samay ganggan to et talagan makapaseseg: “Nia, wala ak a naynay ed sikayo, ya angga ed kasampotan na mundo.” (Mateo 28:20) Kabat nen Jesus ya ambelat iyan asainmin. Amta to met a say panggawa tayo ed saya et sanokan na saray onsusumpa. (Lucas 21:12) Balet, anggapoy rason pian ontakot itayo. Amta na Lider tayo ya agtayo nagawaan iyan asainmin a bukor. Agta makaligliwan naamtaan a samay walaan na “amin a pakauley . . . ed tawen tan dia ed dalin” so manuporta ed sikatayo pian nasumpal tayo iyan ganggan?

²¹ Impaseguro nen Jesus ed saray babangatan to ya ibaan to ra diad ministeryo ra diad ilabas na saray siglo “angga ed kasampotan” na sistema na saray bengabengatla. Anggad agni asabi so anggaan, nepeg tayon itultuloy a gawaen so ingganggan nen Jesus. Nepeg ya agtayo ontatantan natan. Peles ni na impasyan espiritual a panagani! Natitipon natan so dakerakel ya interesadon totoo. Bilang papatumbok nen Kristo, magmaliw itayon determinadon sumpalen so ambelat a ganggan ya impudir ed sikatayo. Panggunaetan tayo sirin ya usaren so panaon, biskeg, tan kaykayarian tayo pian sumpalen so ganggan nen Kristo ya: “Onla kayo . . . tan manggawa na saray babangatan.”