‘Paligsaen Ko so Kinmapuy a Kamarerwa’

1. Anton bendisyon ed balon mundo so nagkalautlan pipirawaten mo?

“BALON mundo.” No narengel mo itan, kasin say naisip mo et saray nipasakbay a bendisyon a singa say perpekton laman, dakel a masustansian kakanen, maamon ayayep, odino marakep ya ayaman? Nayarin nanonotan mo ‘ray teksto ed Biblia ya akabasiyan na saratan ya iilaloan mo. Balet agmo lilingwanan iyan sakey nin bendisyon​—maong a kipapasen ed espiritual tan emosyon. No anggapo itan, naandi lanlamang so amin nin liket a naliknam.

2, 3. Base ed saray insulat nen Jeremias, anton nikaduman bendisyon so nailaloan tayo?

² Sanen impaipasakbay na Dios ed si Jeremias so kipawil na saray Judio manlapud Babilonia, imbaga To met so magmaliw a liknaan da: “Sika naalongan ka lamet naani na saray pandereta, et onla ka naani ed saray sayaw na saray manliket.” (Basaen so Jeremias 30:18, 19; 31:4, 12-14.) Wala ni imbaga ton mamaseseg met ed sika: ‘Paligsaen ko so kinmapuy a kamarerwa, tan balang maermen a kamarerwa et peselen ko.’ Oniay impangipatalos na NET Bible ed sayan sipan na Dios: “Peneken ko so amin a pankaukolan na saramay naksawan tan pabiskegen kon maong so kamarerwa na saramay makapkapuy la.”​—Jer. 31:25.

³ Agaylan abig ya ilalo! Inkuan nen Jehova a paligsaen odino sigpot ton peneken so pankaukolan na kinmapuy tan nadidismaya. On, tan tooren na Dios so insipan to. Saray sulat nen Jeremias et mangiter ed sikatayoy kompiyansa a napenek itayo met. Niarum ni, naamtaan tayo ed saratan a sulat no panon a natan ni labat et napaseseg itayo la tan magmaliw a positibo. Ipapanengneng met na saratan iray praktikal a paraan no panon tayon napaseseg so arum pian ombiskeg so kinmapuy a kamarerwa ra.

4. Akin a natalosan tayo so nalilikna nen Jeremias?

⁴ Satan a sipan et makaligliwa ed si Jeremias, ontan met ed sikatayo. Akin? Nonoten pa imay punton asalambit ed Kapitulo 1 na sayan publikasyon​—si Jeremias et singa met si Elias a “sakey a toon walaan na liknaan a singa sikatayo.” (Sant. 5:17) Manisip ka pay pigaran rason no akin a no maminsan et nadidismaya odino maneermen si Jeremias. Legan na satan, isipen pa no anto kasi naliknam no wala ka’d ontan iran situasyon tan no akin a nayarin nadismaya ka ed saratan.​—Roma 15:4.

5. Antoray nayarin pakakadismayaan nen Jeremias?

⁵ Nayarin say sakey a pakakadismayaan nen Jeremias et saray kabaleyan to. Sikatoy binmaleg ed Anatot, sakey a syudad na Levita pigaran kilometro manlapud amianen-bukig na Jerusalem. Seguradon walaray kabkabat to ditan, tan anganko et kakanayon to ni ingen. Inkuan nen Jesus a say sakey a propeta et agnapagalangan diad dilin baley to, tan ontan so naeksperiensya nen Jeremias. (Juan 4:44) Aliwa labat ya inkaandiay interes tan agpanagrespeto so impanengneng ed sikato na saray kabaleyan to. Aminsan et inkuan na Dios a ‘saray lalaki na Anatot et manaanap ed bilay to.’ Oniay masanok dan inkuan: “Agka manpropesiya ed ngaran nen Jehova, pian agka ompatey ed panamegley na lima mi.” Agaylan panamagyaw na saray kabandaan to tan ompan pati kakanayon to, a sikara komon so onsuporta ed sikato!​—Jer. 1:1; 11:21.

6. No walaray katrabahom odino arum nin onsusumpa ed sika, panon kan nagunggonaan ed naeksperiensya nen Jeremias ed “saray lalaki na Anatot”?

⁶ No nanairapan ka lapud isusumpa na saray kabandaan mo, kaeskuelam, katrabahom, odino arum a kapamilyam, naligliwa ka no naamtaan mo no panon a pinabiskeg nen Jehova si Jeremias. Diad saman et inkuan na Dios a ‘dusaen to’ iray taga Anatot ya onsusumpa ed propeta to. (Basaen so Jeremias 11:22, 23.) Seguradon akatulong ed si Jeremias so panamaseguro na Dios pian natalonaan to ‘ray impakadismaya to lapud isusumpa diad lugar to. Diad kaunoran et talagan dinusa na Dios iray taga Anatot diad ‘impangiyakar to ed sikara na mauges.’ Diad kipapasen mo, tandaan ya oobserbaan odino iimanoen nen Jehova iray bengatla. (Sal. 11:4; 66:7) Say ‘pansiansiam’ ed saray bangat na Biblia tan panggawam na duga et nayarin ontulong ed arum ya onsusumpa pian agda la nasagmak so mauges ya onsabi komon ed sikara.​—1 Tim. 4:16.

SARAY GAWA A MAKAPADISMAYA

7, 8. Anton panagmaltrato so asagmak nen Jeremias, tan panon a naapektoan ed satan?

⁷ Aliwa labat ya insalitan panamagyaw so asagmak nen Jeremias ed saray kabaleyan to. Sakey lan alimbawa imay ginawa na sakey a prominentin too ed Jerusalem, samay saserdoten manngaran na Fasur.a Sanen nadngel to so propesiyan nanlapud Dios, “kinabil to si Jeremias a propeta, tan sikato so inyan to ed panangipangawan.” (Jer. 20:1, 2) Nayarin mankabaliksan iya na mas ni nen say impanampal ed lupa. Ibabaga na arum ya ingganggan nen Fasur a leweten si Jeremias na anggad 40 danay. (Deu. 25:3) Legan a papairapen si Jeremias, nayarin sikatoy ininsulto, ineyag-eyagan, tan nilutlutdaan ni ingen na totoo. Aliwan saratan labat. Sanlabin impaiyan nen Fasur si Jeremias ed “panangipangawan.” Isusuheri na Hebreon salitan inusar dia a say laman to et apuliwes tan apikos. On, anggapoy nagawaan nen Jeremias noagta sanlabin nanliknay irap, ta sikatoy insukog ed tablan panangipangawan.

⁸ Panon a naapektoan si Jeremias ed ontan a panagtrato? Inkuan to ed Dios: “Nagmaliw ak a sakey a panelekan ed amin ya agew.” (Jer. 20:3-7) Naisip to ni ingen ya ontunda lan mangipulong ed ngaran na Dios. Balet amta tayon ag-itan sarag a gawaen nen Jeremias tan talagan agto itan ginawa. Imbes, say mensahen papaiyabawag na Dios ed sikato et “singa mandarlang ya apoy ya akapotan ed saray pukel” to, tan nepeg toy mansalita parad si Jehova.​—Basaen so Jeremias 20:8, 9.

9. Akin a makatulong ed sikatayo so pannodnonot ed eksperiensya nen Jeremias?

⁹ Makatulong ed sikatayo iyan salaysay no makakarengel itayo na ansasakit a panagbalaw na saramay kabkabat tayo, nayarin saray kakanayon, kabandaan, katrabaho, odino kaeskuela. Agtayo la nabibigla no nadismaya itayon sagpaminsan lapud satan. Nayarin nadismaya itayo met no duduksaen da itayo lapud mansiasiansia tayo ed tuan panagdayew. Bilang imperpekton too, naapektoan met si Jeremias ed ontan iran bengatla. Agta no antoy liknaan tayo bilang totoo et ontan met si Jeremias? Ingen, agtayo lilingwanan a diad tulong na Dios et apapawil nen Jeremias so liket tan kompiyansa to. Sikatoy agnantultuloy ya adismaya, tan nepeg ya ontan itayo met.​—2 Cor. 4:16-18.

10. Antoy ipaparungtal na Biblia nipaakar ed liknaan nen Jeremias?

¹⁰ No maminsan et biglan manguma-uman so liknaan nen Jeremias. Nasasalim met kasi itan​—a nayarin malikeliket tan positibo ka natan insan biglan maer-ermen tan nadidismaya ka? No nipaakar ed positibon liknaan, imanoen pa ray balikas diad Jeremias 20:12, 13. (Basaen.) Kayari na impamairap ed sikato nen Fasur, aliketan si Jeremias lapud sikatoy singa sakey ed saramay pakaskasin totoo a niliktar ed “lima na saray managgawa na mauges.” No maminsan et nayarin malikeliket ka, a labalabay mon kantaan si Jehova, anganko lapud niliktar ka ed peligro odino walay makapaliket ya agawa ed bilay mo odino diad panlilingkor mo bilang Kristiano. Talagan alay abig so pakaliknay ontan!​—Gawa 16:25, 26.

11. No bilang ta biglan manguma-uman so liknaan tayo, antoy nepeg tayon nonoten nipaakar ed si Jeremias?

¹¹ Ingen, lapud aliwa itayon perpekto, nayarin no maminsan et biglan manguma-uman so liknaan tayo, a singa si Jeremias. Kayari ton inkuan a ‘kantaan yo si Jehova,’ sikatoy akalikna na pinasyan ermen, a nayarin akalua ni. (Basaen so Jeremias 20:14-16.) Kinmapuy a maong so liknaan to kanian inisip to no anto kasi kakanaan na inkianak to! Diad paneermen to, inkuan to a samay toon angipakabat ed inkianak to et pakaskasi a singa Sodoma tan Gomorra. Balet niay nepeg tayon nonoten: Kasin nantultuloy a nanermen si Jeremias? Kasin sikatoy sinmuko, a pinaulyanan to lan mantultuloy so pakakadismaya to? Andi. Seguradon nilabanan to itan a liknaan, tan sikatoy tinmalona. Imanoen pa so tinmumbok a salaysay, unong ed inkaalasir na libron Jeremias. Samay sakey nin Fasur, a prinsipe, so imbaki nen Arin Zedekias a mantepet ed si Jeremias nipaakar ed saray taga Babilonia ya onlulusob ed Jerusalem. Imbes ya ontakot, si Jeremias so makmakpel ya angiyabawag ed panangukom nen Jehova tan say pansumpalan na satan. (Jer. 21:1-7) Malinew sirin a nantultuloy si Jeremias ed kimey to bilang propeta!

12, 13. Antoy nayarin gawaen tayo pian natalonaay biglan panguma-uman na liknaan tayo?

¹² Walaray lingkor na Dios natan a nasasali ran manguma-uman so liknaan da. Ompan makasengeg iya ed saray nagagawa ed laman tayo​—nayarin biglan manguman so karakel na hormones odino kemikal ed laman tayo a mangaapekta ed emosyon. No ontan, nayarin kaukolan so suhestion na doktor no antoy gawaen pian anggan panon et nakontrol itan. (Luc. 5:31) Diad maslak ed sikatayo balet, say liket odino ermen a nalilikna tayo no maminsan et aliwa met ya alabas odino abnormal. Kabiangan na imperpekton bilay tayo so maslak a negatibon liknaan. Nayarin resulta itan na kesaw odino impatey na inad-aro. No ontan so kipapasen tayo, nonoten ya asali met nen Jeremias itay biglan manguma-uman so liknaan to, balet sikatoy nansiansia ed panangabobon na Dios. Pian ontalona, nayarin kaukolan tayon umanen so rotina tayo pian nawalaay magenap a painawa. Odino nayarin ikdan tayoy panaon so inkasikatayo a naligliwa kayari na makapaermen ya agawa ed sikatayo. Balet importante ya agtayo papaulyanan so pipiaral tan arum niran teokratikon kimey. Makana iratan pian mansiansia itayon balanse tan maliket ed panaglingkor ed Dios.​—Mat. 5:3; Roma 12:10-12.

¹³ Balanglan say ikakapuy na liknaan mo et sagpaminsan odino kabiangan na nisipor a pananguman na liknaan, makatulong ed sika so eksperiensya nen Jeremias. Singa nibaga la, onkakapuy so liknaan to no maminsan. Ingen, agto inabuloyan so pakakadismaya a mangiyarawi ed sikato ed Dios ya inaro to tan matoor ton nanlingkoran. Sanen saramay onsusumpa ed sikato et binales day kaugsan so ginawa ton kamaongan, kinmerew na tulong ed si Jehova tan nanmatalek ed sikato. (Jer. 18:19, 20, 23) Determinado tayo komon sirin ya aligen si Jeremias.​—Tag. 3:55-57.

KASIN PABISKEGEN MO IRAY KINMAPUY A KAMARERWA?

14. Panon a nagkalautlan apaseseg si Jeremias?

¹⁴ Maabig no imanoen tayo no panon ya apaseseg si Jeremias tan no panon ton pinaseseg iray ‘kinmapuy a kamarerwa.’ (Jer. 31:25) Si Jehova a mismo so amaseseg ed sikato. Maseguron napabiskeg kan maong no sikay pangibagaan nen Jehova na: “Ginawa ta ka ed saya ya agew a sakey a kinutaan a syudad . . . Et mibakal ira naani ed sika; balet agda ka naani taloen; ta siak wala ak ed sika, kuan nen Jehova, pian ilaban ta ka.” (Jer. 1:18, 19) Talagan walay rason nen Jeremias pian nibaga ton si Jehova so “biskeg ko, tan salimbeng ko, tan apireng ko ed agew na kairapan.”​—Jer. 16:19.

15, 16. Base ed paraan na impamaseseg nen Jehova ed si Jeremias, antoy nayarin gawaen tayo pian napaseseg so arum?

¹⁵ Makapainteres so inkuan nen Jehova ed si Jeremias: “Wala ak ed sika.” Wala ta’y nanengneng mo’d saya a makatulong ed sika pian antam so gawaen mo no walay kabat mon mankaukolan na panamaseseg? Nayarin amta tayo a kaukolan itan na sakey ya agi odino kanayon, balet duma ‘may walay gawaen tayo pian sikatoy napaseseg. Diad kaslakan et sankaabigan so pangalig ed samay ginawa nen Jehova ed si Jeremias​—say kiwalam ed abay na samay mankaukolan. Insan no matukoy et mangibalikas kay panamaseseg, balet agka mansasalita lan mansasalita. Nayarin mas maabig so nagawaan na daiset a salita no ninonot iratan a maong pian mamaseguro tan mamabiskeg. Agkaukolan a malabor so ibagam. Usaren iray simplin salita a pakapatnagan na interes, panangiyansakit, tan Makristianon aro. Baleg so nagawaan na ontan iran salita.​—Basaen so Uliran 25:11.

¹⁶ Oniay inkerew nen Jeremias: “O Jehova, . . . nonoten mo ak, tan dalawen [“imanoen,” NW] mo ak.” Antoy resulta? Insalaysay to: “Saray salitam aromog ira, et kinan ko ra; et saray salitam sikara nensaman ed siak so sakey a liket tan gayaga na pusok.” (Jer. 15:15, 16) Samay labay mon pasesegen et nayarin mankaukolan met na mapangasin imano. Tua, saray salitam et aliwan singa kaabig na saray salita nen Jehova. Balet, sarag moy mangaon na pigaran balikas na Dios ed saray ibabagam. Say masimoon, impapuso, tan nibase’d Biblia iran balikas so peteg a makapaliket ed puso na nadidismaya.​—Basaen so Jeremias 17:7, 8.

17. Anton importantin leksion so naaralan tayo ed paraan na impideneng nen Jeremias ed si Zedekias tan Johanan?

¹⁷ Nonoten ya aglabat mangaawat si Jeremias na panamaseseg na Dios, noagta papasesegen to met so arum. Panon? Aminsan et imbalikas nen Arin Zedekias ed si Jeremias a sikatoy natatakot ed saramay Judion akialyansa ed saray taga Babilonia. Makapaseseg iray imbalikas to ed ari, ya imbaga ton ontulok ed si Jehova pian maong so pansumpalan to. (Jer. 38:19, 20) Sanen asakop lay Jerusalem tan pigpigara lay Judion akera ditan, ninonot nen Johanan, say hepe na militar da, ya awiten ira ed Ehipto. Balet nantepet nin unona ed si Jeremias. Dinengel na propeta so imbalikas nen Johanan tan nampikasi ed si Jehova. Insan, impasabi to so makapaseseg ya ebat nen Jehova, ya imbaga ton maong so pansumpalan da no unoren day bilin na Dios a mansiansia ra’d Jerusalem. (Jer. 42:1-12) Diad sayan duaran inkagawa, dinmengel ni Jeremias antis a nansalita. Importante so idengel diad pamaseseg ed arum. Abuloyan ya ibesngaw na maneermen so walad puso to. Dengelen iray kapagaan tan tatakotan to. Sano matukoy, mangibalikas na makapaseseg iran salita. Tua, agka direktan makaawat na mensahen nanlapud Dios ya ipasabim ed samay mankaukolan na panamaseseg, balet sarag mon ilaktip iray positibon salitan manlapud Biblia, saramay nipaakar ed maabig a nagawa ed arapen.​—Jer. 31:7-14.

18, 19. Diad panamaseseg ed arum, anton alimbawa so naalig tayo manlapud salaysay nipaakar ed saray Recabita tan si Ebed-melec?

¹⁸ Ag-inunor nen Zedekias tan Johanan so makapaseseg a bilin nen Jeremias, tan nayarin ontan met so ikiwas na arum ed panamaseseg mo. Balet agka komon nadidismaya. Kinmiwas so arum ed panamaseseg nen Jeremias, tan nayarin dakel met so onkiwas ed panamaseseg mo. Nonoten pa ray Recabita, a grupo na Cineo ya akiulop ed saray Judio ed dakel a taon. Say sakey ed saray ingganggan ed sikara na inmunan ateng dan si Jehonadab et ag-ira oninum na alak, ta sankaili ira. Sanen onlulusob iray taga Babilonia, inyakar nen Jeremias iray Recabita diad sakey a pananganan ed templo. Ingganggan na Dios si Jeremias a parungoan to ray alak. Balet lapud panagrespeto na saray Recabita ed inmunan ateng da tan aliwa ran singa saray agmatulok ya Israelita, agda ininum so alak. (Jer. 35:3-10) Impasabi nen Jeremias ed sikara so komendasyon nen Jehova tan say sipan To a pansumpalan da. (Basaen so Jeremias 35:14, 17-19.) Sakey iyan alimbawa a sarag mon aligen no mamapaseseg ka: Matuan komendaan so arum no nayadyari.

¹⁹ Ontan met so ginawa nen Jeremias ed Etiopen si Ebed-melec, a mapatnag a sakey ya opisyal ed palasyo nen Arin Zedekias. Saray prinsipe ed Judea et andiay panangasin angipelag ed si Jeremias diad mapitek a bobon insan da tinaynan pian ompatey. Kanian akikasi si Ebed-melec ed kinen Arin Zedekias, ya angiter ed sikato na autoridad a mangiliktar ed propeta. Ginawa itan na sayan toon dayo, anggano pakapeligroan to. (Jer. 38:7-13) Lapud saya, nayarin binusol na saray prinsipe ed Judea si Ebed-melec, kanian napapagaan met anganko no anto kasi nagawa’d sikato. Diad satan et agnampareen si Jeremias, tan agto inisip a natalonaan lanlamang itan nen Ebed-melec. Sikatoy nansalita, ya innabang toy makapaseseg iran balikas nipaakar ed pamendisyon na Dios ed si Ebed-melec diad arapen.​—Jer. 39:15-18.

20. Antoy nepeg a pirawaten tayon gawaen parad saray agagi tayo, ugaw man o matatken?

²⁰ On, legan tayon babasaen so libron Jeremias, makaromog itayo na maabig iran alimbawa no panon tayon nagawaan a mismo imay impaseseg nen apostol Pablo ed saray agagi ed Tesalonica: “Itultuloy yon ligliwaen tan pabiskegen so sakey tan sakey . . . Niwala komon ed sikayo so agnaparaan a kaabigan na Katawan tayon Jesu-Kristo.”​—1 Tes. 5:11, 28.