‘Ginawa nen Jehova so Ginetma To’

1. Antoy inkuan nen Jeremias nipaakar ed saray propesiya nen Jehova sanen sigpot lan aderal so Jerusalem?

ADERAL lay Jerusalem. Siansia nin manasewek so syudad lapud impamool na saray linmusob a taga Babilonia. Nanonotan ni nen Jeremias iray makapakebbiew ya eyag na saramay papateyen. Imbaga na Dios ed sikato no anto iray nagawa, tan eksakton asumpal iratan. “Si Jehova ginawa to so ginetma to,” so inyey-ey na propeta. Agaylan makapasinagem so inkagba na Jerusalem!​—Basaen so Tagleey 2:17.

2. Anton propesiya ed nilasus a taon ed asasakbay so anengneng nen Jeremias ya asumpal?

² On, anengneng nen Jeremias so impakasumpal na dakel a propesiyan nipasabi ed totoo na Dios, pati saramay abayag lan nipropesiya. Manga nilasus a taon ed asasakbay, imparungtal la nen Moises ed Israel iray pansumpalan na itulok odino ag-itulok ed Dios, balanglan “bendisyon” odino “ayew.” Say labay nen Jehova parad totoo to et say sankaabigan, salanti, saray bendisyon. Balet, saray ayew a resulta na agkatutulok et makapataktakot. Impasakbay nen Moises a saramay agmanisia tan onsumpa ed si Jehova et “kanen da [ni ingen] so laman na saray anak da a lalaki tan say laman na saray anak da a bibii,” tan inulit iya nen Jeremias diad saginonor. (Deu. 30:19, 20; Jer. 19:9; Lev. 26:29) ‘Talaga kasin agawa itan a makapasinagem a bengatla?’ so nayarin isipen na arum. On, agawa itan legan na impangubkob na Babilonia, sanen anggapo lan balot so naakan. Inkuan nen Jeremias: “Saray lima na saray pangaskasian a bibii inlambong da ray anak da lanlamang. Sikara nensaman so tagano ra ed inkabagbag na anak a bii na baley ko.” (Tag. 4:10) Agaylan trahedya!

3. Antoy gagala na Dios ed impangibaki to na saray propeta ed totoo to?

³ Siempre, say gagala nen Jehova ed impangibaki to na saray propeta a singa si Jeremias et aliwan pian niyabawag labat so manasingger lan kadederal. Labay na Dios ya ompawil so totoo to diad dalan na katooran tan magbabawi iray managkasalanan. Oniay impabitar nen Esdras: “Si Jehova, a Dios na saray atateng da, nambaki ed sikara ed panamegley na saray igaganggan to, a binangon to ya asaksakbay tan imbaki to, lapu ed walaan na pangabagey ed baley to, tan ed ayaman to a pasen.”​—2 Awa. 36:15; basaen so Jeremias 26:3, 12, 13.

4. Antoy alikna nen Jeremias ed mensahen impasabi to?

⁴ Singa si Jehova, walaan met na panangabagey si Jeremias ed saray kabaleyan to. Napatnagan mo itan ed samay imbaga to sakbay ya aderal so Jerusalem. Sikatoy napapagaan a maong ed asingsingger lan kadederal. Sayan desyang et agkomon nagawa no ondengel labat iray totoo tan unoren day mensahe nen Jeremias! Isipen pa labat so alikna to ed mensahe na Dios ya impasabi to. “Say irap ko, say irap ko!” so inyakis to. “Nairapan ak a tuloy ed pusok. Say pusok agmandeen ed siak. Agak makareen lapu ed nadngel mo, O kamarerwak, so tanol na tambuyog, say gulo na bakal.” (Jer. 4:19) Sayan manasingger lan desyang et agto nayarian ya ag-ipasabi.

AKIN YA ONTANLAY TALEK TO?

5. Akin et matalek si Jeremias nipaakar ed mensahen impasabi to?

⁵ Akin ya ontanlay talek nen Jeremias a talagan nagawa so impropesiya to? (Jer. 1:17; 7:30; 9:22) Sikatoy toon walaan na mabiskeg a pananisia, ya inaral toy Kasulatan tan amta ton si Jehova et Dios na tuan propesiya. Papaneknekan na saray agawa’d apalabas a sarag nen Jehova so mangipasakbay na saray ebento a parad too et singano imposiblin nagawa, a singa say inkibulos na Israel ed panangaripen na Ehipto. Kabisado nen Jeremias so salaysay nipaakar ed Impaway na saray Israelita ed Ehipto. Kabat to met iray imbaga nen Josue, say mismon akatasi, ya angipanonot ed saray kapara ton Israelita: “Amta yo ed simoon a puso yo tan ed simoon a kamarerwa yo, ya anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo, anggapo so sakey a bengatla a linmiwat ed sikara.”​—Jos. 23:14.

6, 7. (a) Akin a nepeg kan interesado ed saray impropesiya nen Jeremias? (b) Antoy ontulong ed sika pian manmatalek ka’d mensahen ipupulong mo?

⁶ Akin a nepeg a mantultuloy mon imanoen iray impropesiya nen Jeremias? Unona, walay rason ton manmatalek a lawas totooren nen Jehova iray salita to. Komadua, arum ed saray inyabawag na Dios panamegley nen Jeremias et nasusumpal la natan, tan wala niray nanengneng mon nasumpal ed arapen. Komatlo, say kinarakel na inyabawag to diad ngaran na Dios tan say inkakpel ton angipasabi ed saratan so pakapatnagan a sikatoy matalonggaring a lingkor na Dios. Oniay inkuan na sakey ya iskolar ed Biblia: “Anggano ikompara ed arum iran propeta, si Jeremias et sankaprominentian.” Ontanlan kaimportantin propeta si Jeremias, a sikatoy inusar na Dios diad impideneng To’d totoo to, kanian arum ed saramay akadngel ed si Jesus et abaloan dan sikato si Jeremias.​—Mat. 16:13, 14.

⁷ Singa si Jeremias, manbibilay ka ed panaon a nasusumpal la iray importantin propesiya ed Biblia. Tan singa si Jeremias, kaukolan mo a pansiansiaen so panagmatalek mo a talagan tua iray sipan na Dios. (2 Ped. 3:9-14) Panon? Diad pantultuloy mon pamabiskeg ed panagmatalek mo a nagawan nagawa iray propesiya ed Biblia. Pian natulongan itayo, repasoen tayo ed sayan kapitulo so pigaran propesiya nen Jeremias a naimatonan ton asumpal. Aralen tayo met iramay propesiyan asumpal ed saginonor. Tan saray arum ni et direktan mangaapekta ed sika natan tan mangapekta ed arapen mo. Sayan panrepaso et mamabiskeg komon ed talek mo ed saray propesiya nen Jehova ta pian magmaliw ka a lalon kombinsido a ‘gawaen to so ginetma to.’​—Tag. 2:17.

SARAY PROPESIYAN IMPASABI TAN ANENGNENG NEN JEREMIAS YA ASUMPAL

8, 9. Antoy sakey a pakabidbiran a say Biblia et nikadkaduman libro?

⁸ Dakdakel so manasalin mangipasakbay na nagawa ed arapen, a singa saray ekonomista, politiko, managparles, tan eksperto ed kipapasen na klima. Naimanom a mairap ya ipasakbay iray aktual a nagawa ed onsublay iran agew odino simba, anggan simpli iratan. Balet say eksakton pakasusumpal na saray propesiya et sakey a pakabidbiran a nikadkadumay Biblia. (Isa. 41:26; 42:9) Amin a propesiya nen Jeremias et nagawan nagawa, balanglan nasumpal itan ed panaon to odino diad mabayag nin arapen. Dakel ed saratan so nipaakar ed saray indibidual tan saray nasyon. Unona, aralen tayoy pigaran propesiya ya asumpal legan na impanbilay nen Jeremias.

⁹ Siopa so makapangipasakbay ed magmaliw a kipapasey mundo, sakey odino duaran taon manlapud natan? Alimbawa, diad saray eksperto ed saray nagagawa’d nanduruman bansa, wala tay suston makapangipasakbay no kasin walay nagawan pananguman ed saray uley na gobierno? Diad pidumaan, si Jeremias a pinuyanan na Dios et impasakbay ton onlaknab so impluensya na Babilonia. Inkuan ton say Babilonia so “kopa a balitok” ya usaren nen Jehova pian iyibung so sanok to ed Juda tan ed dakel a syudad tan totoo ed kaliberliber, tan sikaray aripenen. (Jer. 51:7) Satan a mismo so naimatonan nen Jeremias tan saray kapanaonan to.​—Ikompara so Jeremias 25:15-29; 27:3-6; 46:13.

10. Antoy impasakbay nen Jehova nipaakar ed apatiran arari ed Juda?

¹⁰ Inusar met nen Jehova si Jeremias pian ipabitar so pansumpalan na apatiran arari ed Juda. Nipaakar ed si Joacaz, odino Shallum, ya anak nen Arin Josias, impasakbay na Dios a sikatoy iyakar ed Ehipto tan aglan balot makapawil ed Juda. (Jer. 22:11, 12) Ontan so agawa. (2 Ara. 23:31-34) Imbaga na Dios a say onsalat ed si Joacaz a si Joacim et niponpon a singa ed “sakey ya asno.” (Jer. 22:18, 19; 36:30) Ag-ibabaga na Biblia no panon so impatey to odino no antoy ginawa da’d bangkay to, balet ipapabitar na satan a legan na impangubkob, say anak ton si Joachin so sinmalat ed sikato. Impasakbay nen Jeremias a si Joachin (a kabkabat met a Conias tan Jeconias) et iyakar ed Babilonia tan diman ompatey. (Jer. 22:24-27; 24:1) Agawa itan. Komusta balet imay unor ya ari, si Zedekias? Impasakbay nen Jeremias a si Zedekias et niyawat ed lima na saray kakabusol, ya andiay panangabagey. (Jer. 21:1-10) Antoy agawa? Talagan sikatoy inerel na saraman a kakabusol. Pinatey da iray ananak to ed mismon arapan to, sikatoy binulag da, tan inawit da’d Babilonia, a diman inatey. (Jer. 52:8-11) On, asumpal ya amin irayan propesiya.

11. Siopa si Ananias, tan antoy impasakbay nen Jehova nipaakar ed sikato?

¹¹ Nabasa tayo ed Jeremias kapitulo 28 a legan na uley nen Zedekias, kinontra na palson propetan si Ananias imay imbaga nen Jehova panamegley nen Jeremias nipaakar ed panguley na Babilonia ed Jerusalem. Imbaliwala to ni ingen so imbaga na Dios, ya inkuan ton naputer so pako na panangaripen ya impasakbat nen Nabucodonosor ed Juda tan arum niran nasyon. Balet, ingganggan nen Jehova si Jeremias ya iparungtal toy katilaan nen Ananias, ya inulit ton imbaga a nepeg a panlingkoran na dakel a nasyon iray taga Babilonia, tan inkuan ton ompatey iyan palson propeta ed satan lanlamang a taon. Tan ontan so agawa.​—Basaen so Jeremias 28:10-17.

12. Antoy reaksion na dakel ed saray kapanaonan nen Jeremias ed manunan mensahen impasakbay to?

¹² Siempre, say manunan mensahe ya impaipasakbay na Dios ed si Jeremias et say kaderal na Jerusalem. Aminpigan impasakbay nen Jeremias a naderal so syudad no agmagbabawi iray Judio ed panag-idolatriya, ag-inkahustisya, tan inkaruksa ra. (Jer. 4:1; 16:18; 19:3-5, 15) Inisip na dakel ed saray kapanaonan nen Jeremias ya agbalot gawaen nen Jehova itan, ta diad Jerusalem so kawalaan na templo to. Abuloyan to kasi a naderal so masanton syudad? Kanian inisip dan agbalot nagawa itan. Ingen, amta tayo ya agmantila si Jehova. Ginawa to so ginetma to.​—Jer. 52:12-14.

13. (a) Panon a mipadparay panaon tayo ed panaon nen Jeremias? (b) Akin a nepeg kan interesado ed saray insipan na Dios ed pigaran indibidual ed panaon nen Jeremias?

¹³ Say kipapasen na totoo na Dios natan et mipadpara ed saramay matoor ed si Jehova diad panaon nen Jeremias. Amta tayo a magano lan deralen nen Jehova so amin ya ag-onkikiwas unong ed saray pasakbay to. Balet napaseseg itayo ed saray insipan to, a singa saramay Judio ed panaon nen Jeremias a nansiansia ed tuan panagdayew. Saray Recabita et matoor ed si Jehova tan matulok ed ganggan na inmunan ateng da, kanian inkuan na Dios a makaliktar ira sano naderal so Jerusalem. Talagan niliktar ira. Paneknekan iya na say impamitla’d saginonor ed “[si] Malkias ya anak a laki nen Recab,” a tinmulong ed impangapiger ed Jerusalem legan a gobernador si Nehemias. (Neh. 3:14; Jer. 35:18, 19) Pinaseguroan nen Jehova si Ebed-melec a sikatoy makaliktar met lapud impanmatalek to ed Dios tan impanuporta to ed si Jeremias. (Jer. 38:11-13; 39:15-18) Ontan met, insipan na Dios a say kaaro nen Jeremias a si Baruc et naawat toy “bilay” to bilang samsam. (Jer. 45:1, 5) Antoy nikuan mo ed impakasumpal na sarayan propesiya? Anto kasi gawaen nen Jehova ed sika no matoor ka?​—Basaen so 2 Pedro 2:9.

SARAY PROPESIYAN ASUMPAL ED SAGINONOR

14. Akin a makatantanda so propesiya na Dios nipaakar ed Babilonia?

¹⁴ Impasakbay na Dios ya aliwan say Juda labat so sakopen nen Nabucodonosor noagta pati say Ehipto. (Jer. 25:17-19) Singano imposible itan lapud makapanyarin tuloy so Ehipto, tan dodominaen to ni ingen so Juda. (2 Ara. 23:29-35) Kayari inkaderal na Jerusalem, ninonot na saray akeran Judio a taynan so Juda tan onla ra’d Ehipto pian nasalimbengan ira. Impilit da itan anggano pinasakbayan la ra nen Jehova ya ag-ira oonla tan anggano imbaga to lan bendisyonan to ra no mansiansia ra ed Juda. Balet, no ombatik ira’d Ehipto, sikaray naabetan na espada a tatakotan dan pakapateyan da. (Jer. 42:10-16; 44:30) Anggapoy nabasa ed saray sulat nen Jeremias no kasin anengneng toy inlusob na Babilonia ed Ehipto. Balet seguradon agawa imay impropesiya nen Jehova ed saramay Israelitan linma’d Ehipto sanen asakop itan na Babilonia diad kagapo na komanem a siglo B.C.E.​—Jer. 43:8-13.

15, 16. Panon ya asumpal so imbaga na Dios nipaakar ed kibulos na totoo to?

¹⁵ Impropesiya met nen Jeremias so panampot na samay anakop ed Ehipto, say Babilonia. Manga sanlasus a taon sakbay ya agawa itan, sustoy impasakbay nen Jeremias a say Babilonia et biglan naderal. Panon? Impasakbay ton saray danum a manproprotekta ed satan et “namagaan,” tan agmilaban iray sundalo to. (Jer. 50:38; 51:30) Detalyadon asumpal irayan propesiya sanen saray Medo tan Persiano et impaagus da’d sananey so Ilog Eufrates, bineltang da itan, insan da nilooban so syudad, ya ag-aliklikas na saray taga Babilonia. Paninteresan mo met seguro imay nipasakbay ya aglan balot napanayaman so syudad. (Jer. 50:39; 51:26) Say agla natan napanayaman a Babilonia, a datin mabiskeg a syudad, et mamaneknek a susto so propesiya na Dios.

¹⁶ Inyabawag nen Jehova panamegley nen Jeremias a saray Judio et 70 a taon a manlingkor ed saray taga Babilonia. Insan ipawil ira na Dios diad dalin da. (Basaen so Jeremias 25:8-11; 29:10.) Sigpot a nanmatalkan nen Daniel iyan propesiya, tan satan so angibasiyan to no kapigan mangangga so “pankibalatar na Jerusalem.” (Dan. 9:2) Inkuan nen Esdras a “pian say salita nen Jehova ed panamegley na sangi nen Jeremias [et] nasumpal, si Jehova niliing to so espiritu nen Ciro, ari ed Persia,” say anakop ed Babilonia, pian ipawil iray Judio ed dalin da. (Esd. 1:1-4) Diad satan, saramay akapawil et napanggayagaan da so kareenan ed dalin a nianakan da tan say kipawil na tuan panagdayew ditan, unong ya impasakbay la nen Jeremias.​—Jer. 30:8-10; 31:3, 11, 12; 32:37.

17. Panon a saray salita nen Jeremias nipaakar ed “pannangnangis” diad Rama et manutukoy ed duaran nandumaan ya inkagawa?

¹⁷ Wala met iray propesiyan insulat nen Jeremias a pigay taon ni linmabas insan asumpal. Inkuan to: “Onia so kuan nen Jehova: Sakey a boses so nadngel ed Rama, paney-ey, tan ampait a pannangnangis, si Raquel mannangnangis lapu ed saray anak to; et agnaligliwa lapu ed saray anak to, tan andi la ra.” (Jer. 31:15) Ompatnag a saray narel a Judio et atipon ed syudad na Rama, manga waloran kilometro ed amianen na Jerusalem, kayari inkaderal na satan nen 607 B.C.E. Anganko et walaray priso a pinatey ni ingen diad Rama. Nayarin satan so primeron kasumpalan na propesiya, a singano mannangnangis si Raquel ed impatey na “saray anak to.” Balet, kayari na masulok ya anem a lasus a taon, impapatey nen Arin Herodes iray kapangiyanak ya ugugaw ed Betlehem. Impaliwawa nen Mateo a managsulat na Ebanghelyo a saray salita nen Jeremias et angipasakbay ed makapasinagem a liknaan lapud satan ya impamatey.​—Mat. 2:16-18.

18. Panon ya asumpal so propesiya na Dios nipaakar ed Edom?

¹⁸ Say sananey nin propesiya et asumpal met diad unonan siglo C.E. Diad panamegley nen Jeremias, impasakbay na Dios a say Edom et sakey ed saray nasyon a lusoben na saray taga Babilonia. (Jer. 25:15-17, 21; 27:1-7) Balet wala ni imbaga na Dios a nagawa. Say Edom et magmaliw a singa Sodoma tan Gomorra. Amtam lay labay ton ibaga iya​—aglan balot napanayaman tan aglan balot naromog itan. (Jer. 49:7-10, 17, 18) Ontan so eksakton agawa. Diad padesir mo, iner so pakaromogan natan ed saray ngaran ya Edom tan Edomita? Diad saray modernon mapa? Anggapo’d saratan. Naromog labat iratan diad saray libro nipaakar ed saray agawgawa nensaman tan ed panaon na Biblia odino diad saray mapa ed saratan a panaon. Insalaysay nen Flavius Josephus a nen komaduan siglo B.C.E., saray Edomita so pinilit a mangawat ed Judaismo. Kayari na satan, sanen aderal so Jerusalem nen 70 C.E., agla ra nabidbir bilang sakey a nasyon.

19. Antoy ipaparungtal na libron Jeremias nipaakar ed pakayari na Dios a manumpal na propesiya?

¹⁹ Singa naimanom, diad kada kapitulo na libron Jeremias et dakdakel so propesiyan nipaakar ed saray indibidual tan saray nasyon. Maslak ed sarayan propesiya et asumpal la. Anggan saya labat a katuaan et nagunggonaan ka la no imanoen tan aralen mo itan a libro, lapud walay papaneknekan na satan nipaakar ed Makapanyarin-amin a Dios. Ginawa nen Jehova tan gawaen to no antoy ginetma to. (Basaen so Isaias 46:9-11.) Saya so mamabiskeg ed panagmatalek mo ed saray impasakbay na Biblia. Diad tua, say kasumpalan na arum ed saray propesiyan insulat nen Jeremias et direktan mangapekta ed sika tan ed arapen mo. Usisaen tayo pa so pigara ed saraya diad nakekeraan iran parapo na sayan kapitulo.

SARAY PROPESIYAN MANGAPEKTA ED SIKA

20-22. Akin a nibagan walaay pigaran kasumpalan iray propesiya ed Biblia, laktip lay arum a walad libron Jeremias? Iyilustra.

²⁰ Say sakey a propesiya ed Biblia et walaan na pigaran kasumpalan. Paneknekan itan na samay ebat nen Jesus ed tepet na saray disipulo to nipaakar ed ‘tanda na kiwawala to tan say kasampotan na sistema na mundo.’ (Mat. 24:3) Say sakey a kasumpalan na satan et nen 66 anggad 70 C.E. Balet mapatnag a walaray kabiangan na satan a propesiya a nasumpal ni labat legan na “baleg a kairapan” a nagawa’d sayan interon mauges a mundo. Satan a kairapan et “agni agawa manlapud inggapo na mundo anggad natan, anggapo ni, tan agla nagawa lamet.” (Mat. 24:21) Walaray ontan met a propesiyan insulat nen Jeremias. Pigara ed saraya so unonan asumpal nen 607 B.C.E. balet say komaduan kasumpalan et abaybayag ni, a singa naamtaan tayo nipaakar ed ‘si Raquel a mannangnangis lapu ed saray anak to.’ (Jer. 31:15) On, arum ed saray impasakbay nen Jeremias et manutukoy ed panaon a pambibilayan mo, tan mangapekta’d sikan mismo so kasumpalan na saratan.

²¹ Naimanom itan ed libron Apocalipsis. Si apostol Juan, a pinuyanan na Dios, so anukoy ed saray impropesiya nen Jeremias nipaakar ed impangangga na Babilonia nen 539 B.C.E. Diad Apocalipsis, naimano tayo so pamparehoan na sayan akadkaunan ebento tan say nigeter a nagawan babaleg a kasumpalan. Say sakey ed saray propesiyan impasabi nen Jeremias tan asumpal ed modernon panaon et say kapelag na baleg ya empiryo, salanti, say sankamundoan ya empiryo na palson relihyon, say “Makapanyarin Babilonia.” (Apo. 14:8; 17:1, 2, 5; Jer. 50:2; 51:8) Kaukolan ya ‘ompaway ed sikato’ iray totoo na Dios pian ag-ira napideral. (Apo. 18:2, 4; Jer. 51:6) Saray danum na satan a syudad, a mangisisimbolo ed saray totoo odino saray onsusuporta ed sikato, so ‘namagaan.’​—Jer. 51:36; Apo. 16:12.

²² Say sakey a nasumpal ni ed arapen et samay insipan na Dios a sikatoy ombales ed palson relihyon lapud impamairap to’d totoo To. ‘Ombawi si Jehova ed sikato unong ed ginagawa to ed arum.’ (Jer. 50:29, Maung a Balita; 51:9; Apo. 18:6) Tan saray piguratibon dalin na palson relihyon et aglan balot napanayaman.​—Jer. 50:39, 40.

23. Anton kipawil ed espiritual so agawa nen koma-20 a siglo, ya impasakbay nen Jeremias?

²³ Singa naimanom la, saray propesiya nen Jeremias et walaan met na makaligliwan mensahe. Impasakbay toy kipawil na tuan panagdayew diad dalin ed modernon panaon. No panon a saray Judio et nibulos ed syudad na Babilonia nensaman, saray totoo na Dios ed modernon panaon so nibulos met ed Makapanyarin Babilonia sanen niletneg la’d tawen so Panarian. Diad espiritual a pantalos, impawil nen Jehova so totoo to ed tuan panagdayew, a nanresulta ed pisasalamat tan panliliket. Benendisyonan to ray sagpot dan ontulong ed arum a mandayew ed sikato tan napenek iran maong ed espiritual. (Basaen so Jeremias 30:18, 19.) Natan et naeeksperiensyam a mismo no panon a susumpalen nen Jehova so sipan ton mangitarya na saray pastol parad totoo to, salanti, saray lalakin matatken ed espiritual a peteg a mangaasikaso tan manasalimbeng ed pulok.​—Jer. 3:15; 23:3, 4.

24. Antoran mapuersan salita nen Jeremias so nasumpal ni labat ed arapen?

²⁴ Saray mensahe nen Jeremias ed saray totoo na Dios nensaman et namparan nipaakar ed marakep a sipan To parad saray matoor tan pasakbay a naderal iray agmansiansia ed relasyon da’d si Jehova. Ontan met natan. Sankapatnagan tayo so inkaganatan na sayan pasakbay ya atukoy ed sarayan salita: “Saray pinatey nen Jehova sikara naani ed satan ya agew manlapu ed sakey a sampot na dalin angga met lanlamang ed sananey a sampot na dalin: ag-ira naani napaney-eyan, tan ag-ira met natipon, o nitabon; sikara naani dutak ed tapew na dalin.”​—Jer. 25:33.

25. Antoy responsabilidad natan na saray totoo na Dios?

²⁵ On, singa si Jeremias, manbibilay itayo ed mair-irap a panaon. Singa nen panaon to, say reaksion na totoo ed mensahe nen Jehova et mankabaliksan na bilay odino patey. Aliwan propeta iray totoo na Dios natan. Ag-itayo apuyanan pian aruman iray napanmatalkan tan matuan salita nen Jehova a walad Biblia. Balet niganggan itayon mangipulong na maong a balita na Panarian diad amin a panaon anggad kasampotan na sayan mundo. (Mat. 28:19, 20) Seguradon agtayo labay a ‘takewen iray salita nen Jehova’ diad agpangibaga’d totoo no antoy magano lan nagawa. (Basaen so Jeremias 23:30.) Determinado tayo ya agpaandien so belat tan epekto na saray salita to. Dakel a propesiyan impaiyabawag na Dios ed si Jeremias so asumpal la. Saya so mangipaseguro ed sikatayo a saramay agni asumpal et sigpot a napanmatalkan. Nepeg tayon ibaga’d totoo a lawas gawaen na Dios so ‘ginetma to tan sumpalen toy ingganggan to ed saray inmuna ya agew.’​—Tag. 2:17.

26. Anto nin propesiya so aralen tayo?

²⁶ Agtayo sigpot a naaralan so nipaakar ed kimey tan mensahe nen Jeremias bilang propeta no agtayo imanoen so alay abig a propesiya nen Jehova nipaakar ed ‘balo a sipanan’ ed totoo to, saray ganggan ya isulat to’d kapusoan da. (Jer. 31:31-33) Sayan propesiya tan say kasumpalan to a direktan mangaapekta ed sika so tema na ontumbok a kapitulo.