Impikasi nen Hana ya Nawalaan na Anak a Laki

Walay lakin Israelita ya say ngaran to et Elkana tan duaray asawa to, si Hana tan Penina. Pero mas inaro toy Hana. Balet si Penina et dakdakel so anak to, kanian lanang ton babalawen si Hana ta anggapoy anak to. Tinaon ya ipipila nen Elkana so pamilya to diad tabernakulo ed Silo pian mandayew ira diman. Aminsan nen wadman ira, anengneng nen Elkana ya maer-ermen so inar-aro ton asawa ya si Hana. Imbaga to: ‘Hana, agka la kari onaakis. Di bale ta wadia ak ya kaibam. Inar-aro ta ka.’

Insan linman bukor si Hana ya manpikasi. Akis lan akis legan ya mikakasi ed si Jehova ya tulongan to komon. Im-promise to: ‘Aman Jehova, no ikdan mo ak na anak a laki, iter kod sika, tan manlingkor ed sika diad interon bilay to.’

Anengneng na Atagey a Saserdoten si Eli ya mansibsibek si Hana kanian say amta to et abuek. Imbaga nen Hana ed si Eli: ‘Andi katawan ko, agak abuek. Walay problemak kanian papatulongan ak ed si Jehova.’ Aliwa manayay inisip nen Eli, kanian imbaga tod si Hana: ‘Komon ta iter na Dios so kekerewen mo.’ Kayari to, agla maermen si Hana tan inmalis la. Kalabas na manga sakey taon, nananak si Hana na laki tan inngaran to na Samuel. Seguradon malikeliket si Hana, awa?

Agnilingwanan nen Hana imay promise tod si Jehova. Nen agla onsususo si Samuel, sikatoy inawit nen Hana diad tabernakulo pian manlingkor diman. Imbaga nen Hana ed si Eli: ‘Aya may ugaw ya impikasik. Iter ko lad si Jehova tan manlingkor ed sikato diad interon bilay to.’ Tinaon ya ombibisitay Elkana tan Hana ed si Samuel tan iyaawitan day balon kawes ya ilalatop ya anggapoy taklay. Inikdan ni nen Jehova si Hana na taloran anak ya lalaki tan duaran bibii.