Naamtaan na Guardia na Prisoan so Katuaan

Diad Filipos, walay aripen ya bii ya aselepan na demonyo. Uusaren na demonyo iyan bii pian manhula, tan lapud saya et sikatoy pankuakuartaan na saray amo to. Nen linmay Pablo tan Silas diad Filipos, lanang ya ontutumbok ed sikara iyan bii anggan iner so laen da. Pigay agew ya tumbotumbok tan paeeyagen na demonyon sinmelep ed sikato, ya ibabaga to: “Sarayan lalaki et ariripen na Sankatagyan a Dios.” Nen agla akaanos si Pablo, imbaga to ed demonyo: ‘Diad ngaran nen Jesus, paway kad sikato!’ Kanian pinmaway so demonyo ed samay bii.

Nen agla makapanhula imay bii, nampasnok ya maong iray amo to ta agda la napankuartaan. Inggayugoy day Pablo tan Silas pian iyarap ed saray opisyal na syudad tan imbaga da: ‘Ag-uunoren na sarayan lalaki so ganggan tan guguloen da so interon syudad!’ Impalewet na saray opisyal si Pablo tan Silas, insan da ra impriso. Inkulong ira na guardia diad sankadaleman tan sankabilungetan ya parte na prisoan tan sinigpit to na tabla iray sali ra.

Diad pegley-labi, angansion si Pablo tan Silas na panangidayew ed Dios, tan ondedengel iray arum ya priso. Insan biglan yinmegyeg na makmaksil tan agalaw so interon prisoan. Alukasan iray puerta na prisoan tan nakal iray gulonggulong tan sigpit na saray priso. Linman tampol so guardia ed sankadaleman na prisoan tan anengneng ton akalukas iray puerta. Inisip to ya akatakas la ray priso, kanian inala toy espada to pian pateyen toy sarili to.

Balet inmeyag si Pablo: ‘Aleg, agmo sasakitay sarilim! Wadia kamin amin!’ Dinmago ya tampol imay guardia na prisoan tan tinmalimukor ed si Pablo tan Silas. Tinepet tod sikara: ‘Antoy dapat kon gawaen pian naligtas ak?’ Imbaga dad sikato: ‘Dapat manisia kad si Jesus, pati say pamilyam.’ Insan imbangat nen Pablo tan Silas ed sikato tan ed pamilya to so salita nen Jehova, kanian abautismoan iran amin.