Pangutkot na Aragdalem ed Salita na Dios
‘No sikato so itultuloy mon anapen a singa inyamot a kayamanan, naromog mo so mismon pikakabat ed Dios.’—ULIRAN 2:4, 5.
1. Anto so tuan sengegan na liket, tan akin?
“MALIKET so toon akaromog na kakabatan, tan say toon akagamor na pakatalos, ta say pakagamor ed satan so magmaong nen say pakagamor na pilak tan say pakawalaan ed satan so magmaong nen say balitok. Sikato so lalon mabli nen saray korales, tan amin na saray arum a panliketan mo so agnayarin ipara ed satan. Say dukey na saray agew so wala ed nikawanan a lima to . . . Sikato so sakey a kiew na bilay ed saraman so ompeket ed sikato, tan maliket iraman so mamemben a malet ed sikato.”—Uliran 3:13-18.
2. Akin a saray Tasi nen Jehova so maliket, balet anton simbawa so niiter ed sikara diad panaon na bautismo ra?
2 Peteg, saray tuan Kristianos so maliket diad impakaromog ed kakabatan. Kabaliksan na satan so pakayarin mangusar diad pikakabat da ed Salita na Dios diad aktibon panagdayew da, diad panresolbe ra ed inagew-agew a problema ra, tan diad panggawa na desisyon nipaakar ed saray kalat da ed bilay. Sakbay a naawat ed bautismo na saray Tasi nen Jehova, kada manunan pikakabat ed Biblia na kandidato so nasubok diad malaknab a serye na mabitar iran tepet. Sakey ed saray manangisaran tepet so mangitepet: “Kayari na bautismom ed danum, akin a makana ed sika so pamasiansia na maabig ya eskedyul ed personal a panagaral tan say pibiang a maparanay ed ministeryo?” Saya so mangipurek ed kanonotan na kandidato ed bautismo diad pankaukolan na pantultuloy a manaral ed labas na saray elementaryan bengatla tan “ontundas ed inkatatken.” (Hebreos 6:1) Balet kasin sayan simbawa so inimano na amin?
3, 4. (a) Anto so imbaga nen Pablo nipaakar ed arum a Kristiano ed Corinto tan diad Judea? (b) Anto so mapatnag a kipapasen na arum a Kristiano natan?
3 Diad inmunan sulat to ed saray Kristianos ed Corinto, inreklamo nen apostol Pablo ya agtora ayarian ya apitongtongan “a bilang espiritual a totoo,” noagta kinaukolan toran pitongtongan “a bilang ugugaw ed Kristo.” (1 Corinto 3:1) Miulibay, insulat to, nayarin diad saray Kristianon manaayam ed Judea: “Nipaakar ed sikato walaan kami na malaem ya ibaga tan mairap ya ipaliwawa, lapud nagmaliw kayon matewet ed panagdengel yo. Lapud, peteg, anggaman nepeg yo la komon so managbangat nisesengeg ed kabayag na panaon, kinaukolan yo lamet so sakey a mangibangat ed sikayo a manlapud gapo na saray elementaryan bengatla na sagradon balikas na Dios; tan nagmaliw kayon singa saraman so mankaukolan na gatas, ya aliwan say anawet a tagano. Ta balang sakey ya uninom ed gatas so agmikakabat ed salita na inkatunong, ta sikato so sakey ya ugaw.”—Hebreos 5:11-13.
4 Natan, ontan met, ompatnag ya arum, sano aminsan ya agegemtan da so magenap a pikakabat diad pangidedika ra na inkasikara ed si Jehova, dingan na ilalo na pambilay na ando lan ando ed Paraiso diad dalin, agda la bayuboan so seryoso, mantultuloy iran ugali ed panagaral. Nayarin liknaen dan malaem la so kabat da a “mantultuloy,” diad espiritual a panagsalita. Sikara la so ag-onlampas ed “gatas” a kipapasen. Prankan imbaga nen Pablo a saray ontan so mansiasiansian “agmikakabat ed salita na inkatunong,” salanti, sikara so agniugalin mangusar ed “salita na inkatunong” pian manubok ed saray bengatla. Inyarum nen Pablo: “Ingen say anawet a tagano so para ed saray matatken a totoo, ed saraman so diad panamegley na impangusar et nipasal so pakayari na panagmorekdek da a mangibiig ed susto tan aliwa.”—Hebreos 5:14.
“Anawet a Tagano” Nakaukolan ed Ibaleg
5, 6. (a) Anto so tua ed arum a wala la ed katuaan diad dakel lan taon, tan akin a saya so aliwan normal? (b) Anto so imbaga nen Pablo ed saratan, tan sirin anto so nepeg dan gawaen?
5 Kaunongan lan karakel na taon a sikayo so dedikadon aripen nen Jehova? Morekdeken pa so espiritual ya ibubulaslas yo diad inlabas na saray taon. Nasarag yo kasin isalaysay a manlapud Biblia iray manunan katuaan lambengat, “saray elementaryan bengatla na sagradon balikas na Dios”? Pigara ed saray walad Kristianon dalan ed 10 odino 20 taon so siansia nin walad kipapasen na “gatas.” Anto so isipen na totoo ed sakey ya ugaw a 10 taon, odino ed sakey a walad kalangweran a laki o bii a manedad na 20, a siansia nin sikato so mansususo? Agta saya so inkamakurit? Agta say ontan ya iinumen a gatas so mamakebet ed ibabaleg na too? Nayarin say sakey so mantultuloy a manbilay, balet sikato so ag-ombaleg ed sakey a mabiskeg tan mabunigas a matatken. Satan met so tua ed espiritual.
6 Akin ya arum a Kristiano ed pigara lan taon so aliwan mabiskeg ed espiritual diad aktibon pibiang a panulong ed saray normal ya “ugugaw,” saraman so kataltalindeg da ni ed dapag nen Jehova? Sarayan ag-inmabante so akaawat ed dakel a taon na panaon tan imano na Kristianon mamatatken tan arum iran matatken. Siansia ni, a singa inkuan nen Pablo, sikara so “nepeg la komon a managbangat nisesengeg ed kabayag na panaon.” Pian magmaliw iran managbangat, nepeg da so onaligwas ed labas na kakanen a “gatas” tan napasal iran mangan ed “anawet a tagano.” Panon so panggawa ra ed saya?—Hebreos 5:12.
7. Unong ed Hebreos 5:14, para ed siopa a manepeg so “anawet a tagano,” tan panon so pagmaliw na sakey a Kristianon ontan?
7 Ibabaga nen Pablo a say “anawet a tagano so kayarian na matatken a totoo,” tan saratan so sinalaysay ton singa “saraman so diad panamegley na impangusar et nipasal so pakayari na panagmorekdek da a mangibiig ed susto tan aliwa.” Diad arum a salita, saraman so mangiyugali ed antokaman a pikakabat ed Salita na Dios a walad sikara diad pangibiig ed susto tan aliwa so mankalkalnan mangipapasal ed saray pakayari na panagmorekdek da tan nadampot da so Kristianon inkatatken. Sikara so naugali ed pangusar “na salita na inkatunong” a manubok ed saray bengatla tan sirin mangibiig ed no anto so maabig tan no anto so makapasakit ed moral, espiritual, tan anggan diad pisikal. Diad pangiyaplika ed naaralan da, sikara la so “agmikakabat ed salita na inkatunong.” Magmaliw iran “matatken a totoo,” saraman so “akankayarian na anawet a tagano.”—Hebreos 5:13, 14.
Bayuboan So Maabig Iran Ugali na “Panangan”
8. Panon a nayarin geteran na sakey a Kristiano so inkasikato ed panangan na “gatas,” balet panon ton nauman iray ugali na espiritual a “panangan” to?
8 Saray mansasakit a totoon papainumen na gatas ed andukey a panaon so nakaukolan a mangiyugali ed laman da diad pangan lamet ed anawet a tagano. Mipadpara, saraman so amayubo ed ugali na “inkaumit” ed espiritual a taganon ipaparungo “na matoor tan makabat ya aripen,” ya ikera ra ed plato ra, a singa panangibaga, iraman so pinilin taganon mankaukolan na “panaggatgat” (panag-isip tan panagsukimat), so mankaukolan a pangibanikel diad pamayubo na maabig iran ugali na espiritual a “panangan.” Nakaukolan dan ‘liingen so malinew iran pakayari na panag-isip da’ tan ‘ibanikel da so inkasikaran mabiskeg.’—Mateo 24:45; 2 Pedro 3:1, 2; Lucas 13:24.
9. Anto so ontulong ed sakey a tinmabang so panangan to?
9 Taloran bengatla so makatulong ed sakey a toon nansakit pian napapawil to so samit na panangan to ed anawet, makapabiskeg a tagano: (1) manepeg a motibasyon, salanti, say pilalek ed iyabig tan ibiskeg lamet, (2) makapasamit na panangan a taganon nipaparungon maparanay, tan (3) magenap a preskon dagem tan ehersisyo. Panon na sarayan punto a tulongan so sakey a tinmabang so panangan to ed saray aragdalem a bengatla ed Salita na Dios?
10. Anton manepeg a motibo so nepeg a mamakiwas ed sikatayo diad pmadaak na pikakabat tayo ed Salita na Dios?
10 Anggan siopan toon angidedika na bilay to ed si Jehova so nepeg a nawalaan na motibasyon diad pamadaak to na pikakabat ed Salita na Dios. Say aro tayo ed si Jehova so mamakiwas ed sikatayon mikabat a magmaong ed saray makapakelaw a kalidad to, linawa to, tan gagala to. Nakaukolan na saya so aralem a panag-aral tan panagdalepdep. (Salmo 1:1, 2; 119:97) Nagkalalo ni, say ilalo tayon pambilay na ando lan ando ed Paraison dalin na Dios so mandepende ed mantultuloy a ‘panangasol [tayo] na pikakabat ed alenleneg a tuan Dios tan ed Anak to, si Jesu-Kristo.’ (Juan 17:3) Ingen say pilalek tayo ed bilay ya andi-anggaan so agnepeg a sikato so manunan motibo diad panaral ed Kasulatan. Satan so lingon ginawa na saray andian na pananisian Judios. Say “panguusisa tayo ed Kasulatan” so nepeg a nagawan manuna a nisesengeg ed aro ed Dios tan diad pilalek a manggawa ed linawa to.—Juan 5:39-42; Salmo 143:10.
11. Panon so kapaparungoan tayo na makapasamit-panangan a tagano ed maparanay a panaon?
11 Say daakan a makapasamit na panangan ed espiritual a taganon ipaparungon maparanay tan “diad manepeg a panaon” na “matoor tan makabat ya aripen” so nepeg a mamakiwas ed sikatayon amin a mangipanengneng na apresasyon tayo diad sigpot a panganamot ed nitataryan maabig iran bengatla. (Mateo 24:45) Nepeg tayon bayuboan so maabig iran ugali ed espiritual a “panangan” diad pangigana na supisyenten panaon diad panagbasa tan panagaral ed amin a maabig ya artikulon impalapag na Watch Tower Society a libro tan magasin. Nipaparungo so espiritual a tagano a maparanay diad saray limaran sinimban pantitipon a naorganisa ed saray kongregasyon na Tastasi nen Jehova ed sankamundoan. Kasin sikayo so presente ed amin na sarayan miting tan akaparaan kayon maong a mangatgat ed nipaparungon tagano?
12. (a) Anto so sananey a dalan a pamabiskegan na sakey a Kristiano ed espiritual a samit na panangan to? (b) Sirin, antoran tepet so nayarin itepet tayo ed inkasikatayo?
12 Say aro ed Dios tan ontan met ed aro ed kaabay so nepeg a mamakiwas ed sikatayon manaral ed Salita To. (Lucas 10:27) Say sakey a toon tinmabang so pisikal a panangan to so nagunggunaan ed preskon dagem tan ehersisyo. Sirin, met, say Kristianon malabay a mamasamit na panangan ed “anawet a tagano” so natulongan diad ipaway to’d kimey na panagpulong tan diad pangusar to’d pikakabat to a mangikayat ed “sayan maong a balita na panarian” tan diad “panggawa na babangatan a totoo ed amin a nasyones.” (Mateo 24:14; 28:19, 20) Nodnonoten, inkuan nen Pablo ed saraman so “nagmaliw ya ontan a singa mankaukolan na gatas,” odino espiritual ya ugugaw, a “nepeg da la komon so managbangat nisesengeg ed kabayag la na panaon.” (Hebreos 5:12) Iner so talindeg yo, nisesengeg ed panaon a sikayo so nagmaliw a tuan Kristiano? No sika so sakey ya agin laki, kasin inmabante ka la ed punton sika la so mausar bilang sakey a “managbangat” ed lawak, tan ontan met angangko a bilang sakey a matatken ed kongregasyon? No sika so sakey a Kristianon agin bii, kasin sika so makayarin mangikondukta na makapaalagey iran panangiyaral na Biblia ed kaabungan na totoo a mangipapanengneng na interes ed katuaan na Dios odino angangko diad panulong ed saray Kristianon agagim a bibii ed kimey na panagtasi?
Gawaen a Maliket so Panagaral
13. Anto so pandumaan na panagbasa tan panagaral?
13 Nibaga a say panagbasa so makapaliket bang say panagaral so kimey. Wala so bengatlan katuaan ed satan. Nagawaan so malaem a panagbasan makapaalagey diad makapaliket a panagrelaks. Anto so mas lalon maliket nen say sakey ya oras odino duara a nausar diad kumportablen posisyon a basaen so report a manlapud Yearbook of Jehovah’s Witnesses odino say sakey a paway na magasin ya Awake!? Say panagaral, anggaman kuan, et kabaliksan to so kimey. Inkuan na sakey a diksionaryo: “Tutukoyen na panagaral so sinustinin walaan na gagalan panangiyapasakey ed ontanlan maalwar a panangimano ed saray detalye a nayarin mangiparungtal ed saray posibilidad, panangiyaplika, panduruma, odino siglaotan na bengatlan inaral.” On, kakaukolan na panagaral so sagpot. Ingen unong ya anggan anton kimey a maabig ya agawa so makapnek tan makatumang, say panagaral so nayarin makapaliket tan espiritual a makagungguna. Interes tayo so panggawa na ontan. Panon?
14. Anto so nayarin nakaukolan yon gawaen pian say personal a panagaral yo so nagawan lalon makapaliket tan makagungguna?
14 Pian say panagaral so makapaliket tan peteg a makagungguna, nakaukolan so pangideboto na magenap a panaon ed satan. Lapud “say panagaral et tutukoyen to so sinustinin walaan na gagalan panangiyapasakey” tan “maalwar a panangimano ed saray detalye,” mabetbet a simamatuan nibaga yo ya inaral yo la so Panag-Bantayan yo odino say palapagan ya uusaren ed Panagaral na Libro ed Kongregasyon? Agta mas lalon susto so pangibaga a mabetbet a sikayo so mamarparlas labat diad pangaaral yo ed materyal tan masiglat a gulisan iray ebat ed tepet, ya anggapo so peteg a panguusisa ed saray detalye tan diad saray rason ed niiter a paliwawa? No onia so kipapasen ed sikayo, angangko ta say ununan kundang a nepeg yon alaen diad pamaaligwas ed espiritual ya ugali na “panangan” yo et say ‘panganamot na pankanawnawan panaon’ diad panaral. (Efeso 5:15-17) Nayarin kabaliksan na saya so panggawa na biglan panangiyalis na panaon a manlapud arum iran aliwan tanton nakaukolan iran kimey. Balet nayarin sikayo so nasurprisa ed agaylan makapagayagan panagaral sano walaan kayo na panaon a mangusisa ed materyal nen say pelesan yon parlasan.
15. Anto ni so nepeg ya agpaulianan diad panagaral ta pian makapaliket tan makagungguna ed espiritual?
15 Nisiglaot ed panaon et say pamaakaran na panagpikasi. Nakaukolan so panamendisyon nen Jehova ed panagaral pian magmaliw a makagungguna ed espiritual. Nakaukolan tayo so manpikasi ed sikato, diad ngaran nen Jesus, a kerewen ed sikaton lukasan toray kanonotan tan kapusoan tayo tan gawaen toran peteg a mangawat ed saray katuaan ya aaralen. Panon kabetbet so inyurong yon magangganat a mangiparaan ed sakey a miting, a diad saginonor et amoria yon alingwanan yo so kinmerew ed si Jehova na panamendisyon to tan diad kakabatan na pangiyaplika yo ed saray bengatlan naaral yo diad inagew-agew a panagbilay yo? Akin a sibletan yo so inkasikayo diad tulong nen Jehova sano wadtan a kerewen?—Santiago 1:5-7.
Mangutkot na Aragdalem
16. Mitukoyan ed teman teksto na sayan aaralen, anto so nepeg tayon gawaen pian naromog so pikakabat, pakatebek, tan pakatalos?
16 Ibabaga na Uliran 2:4, 5: ‘No sikato so itultuloy mon anapen a singa inyamot a kayamanan, naromog mo so mismon pikakabat ed Dios.’ Say konteksto na satan a balikas so mangibabaga ed pankaukolan na pananap ed saray “balikas,” “bilibilin,” “kakabatan,” “pakatebek,” tan “pakatalos.” Say pananap ed kayamanan so mankaukolan na sagpot tan anos. Nakakaukolan to so malaem a panagkutkut. Aliwan miduma sano anapen “so mismon pikakabat ed Dios,” ed “pakatebek,” tan ed “pakatalos.” Nakaukolan met na saya so malaem a panagkutkut, odino panguykoy ed dalem. Agliliknaen a magenap la so pamarlas ed tapew na Salita na Dios.
17. Anto so ibabaga na Kasulatan nipaakar ed saray kanonotan nen Jehova, tan sirin para ed anto so nepeg tayon pisalsalamatan?
17 Inkelyaw na salmista: “Agaylan kabaleg iray gawam, O Jehova! Aralem a tuloy iray kanonotan mo.” (Salmo 92:5) Insulat a makapasagyat nen apostol Pablo: “O agaylan kaaralem so kayamanan na Dios tan kakabatan tan pikakabat!” (Roma 11:33) Diad sananey a sulat, sinalita to “so aralem iran bengatla na Dios.” (1 Corinto 2:10) Tua, singa insalaysay nen Pablo, iparungtal na Dios iratan ya aralem a bengatla “diad panamegley na espiritu to,” a say aktibon puersa to so onkiwas a mabiskeg ed alanaan iran Kristiano a tinuro nen Kristo Jesus a mangitarya na espiritual a tagano. Nepeg a sikatayo so peteg a misalsalamat ed espiritual a panagkutkut a ginawa na “aripen” a klase pian nagawan lalon malinew ed sikatayo “iray inyamot ya aralem a gagala na Dios.”—1 Corinto 2:10, Today’s English Version.
18. Panon so pakapankutkut na kada Kristiano na aragdalem ed Salita na Dios, tan antoran nikaduman kagawaan na panagkutkot so nitarya?
18 Ingen satan so agmangilukpos ed balang sinansakey a Kristiano diad responsabilidad na pangutkot na aragdalem ed Salita na Dios, diad gagalan pangala ed sigpot a kaaralman na saray nipaliwawan kanonotan. Lalanoren na saya so inengneng ed saray nisitan kasulatan. Kabaliksan to so pamasa ed saray paimano-ed-leksab diad saray artikulo na Watchtower, arum et ipaarap to so managbasa ed sakey a daan lan palapagan a mangitarya na malaglaem a paliwawa ed ontan a balikas odino propesiya. Kakaukolan to so pangutkot na aragdalem, pangibanikel a pananap ed satan a daan a palapagan tan insan aralen iray atukoy a pahina. Tutugyopen to so sigpot a pangusar na nikabiig iran katulongan ed panagaral na Biblia ya intarya na “aripen” a klase ed saray dakel a taon, a singa saray indese, konkordansya, Aid to Bible Understanding, tan “All Scripture Is Inspired of God and Beneficial.” On, nitarya ed saray Kristiano so matalunggaring iran rementa na panagkutkot, say sankabaloan et say balon Ingles-lenguahen Reference Bible, a diad isabi panaon, et wala la ed pigaran arum a lenguahe. Sarayan panagkutkot a kagawaan so usaren tayo komon diad maabig.
Manaral a Tekep na Gagala
19. Anton salita na panag-alwar so makana nipaakar ed pikakabat?
19 Say gagala ed pangutkot na aragdalem ed Salita na Dios et aliwan say panggawa ed sikatayon manlikna a superyor ed saray agagi tayo odino say pangipangta ed pikakabat tayo. Saya so mabetbet a kipapasen na minumundon totoo. Diad prinsipyo, say insulat nen Pablo so tua: “Say pikakabat so mapasirayew, balet say aro so mamabiskeg.” (1 Corinto 8:1) Say aro so mamakiwas ed sikatayon sipapaabeba a mangusar ed pikakabat tayo diad panagpulong tan panaggaway-babangatan a kimey tan diad pitulongan a sikakabat ed espiritual a kablian diad saray Kristianon pantitipon.
20. Antoran bilin so inter nen Pablo ed sayan pamaakaran?
20 Sikatayo komon so “aliwa lan ugugaw,” noagta “ombaleg ed amin a bengatla ed sikato ya ulo, si Kristo.” (Efeso 4:13-15) “Ontundas itayo ed inkatatken.” (Hebreos 6:1) Magmaliw itayo komon a totoon matatken, a makayarin mangatgat ed “anawet iran tagano” a manggawa ed sikatayon mabiskeg ed espiritual tan makatulong diad dalem na Kristianon kongregasyon. Anggaman kuan, lalanoren na saya so mas nen say panangasol na pikakabat diad panagaral. Nakakaukolan to so panangan ed saray salita nen Jehova odino nipalapag iran balikas a tekep na apresasyon, a sikato so salaysayen tayo ed ontumbok ya artikulo.—Salmo 110:1; Isaias 56:8; 66:2.
Diad Dalan na Panangipanonot
◻ Akin a saray arum so nansiansian espiritual ya “ugugaw”?
◻ Anto so makatulong ed sakey a toon magmaliw a matatken?
◻ Panon so pakabayubo tayo ed maabig iran ugali na espiritual a “panangan”?
◻ Anto so manggawa ed personal a panagaral tayo a lalon makapaliket?
◻ Akin a nakaukolan so pangutkot na aragdalem ed Salita na Dios?
[Kahon ed pahina 11]
Sengegan ya ontulong ed sakey a toon nawalaan na espiritual a bunigas
1. Manepeg a motibasyon: Bayuboan so mabiskeg a pilalek diad pagmaliw a mikabat a magmaong ed si Jehova.
2. Maparanay a panangan: Anamoten so espiritual a taganon itataryan maparanay na “matoor tan makabat ya aripen”
3. Ehersisyo: Usaren so pikakabat diad panulong ed arum, a singa say ipaway ed kimey na panagpulong