Iyabawag ed Arawi So Panarian na Dios
“Paulian iray inaatey a mangiponpon ed inaatey da, balet onla kayo tan iyabawag ed arawi so panarian na Dios.”—LUCAS 9:60.
1. Antoran importantin tepet so pinalesa na balikas nen Jesus ed Lucas 9:60?
SAY Panarian na Dios—satan so sankaimportantian ya interes ed bilay nen Jesus! Ontan met natan ed amin tayon tuan patumbok to. Bilang Kristianos, sikatayo so manbabanikel a manumbok ed bakat nen Jesus a maapit diad pambilay a tukoy ed Biblia. (1 Pedro 2:21) Balet natan, diad sayan taon 1986, nayari kasin nakaukolan tayo lamet ya usisaen iray manuna ed bilay tayo? Alimbawa, panon yon ipaliwawa so impangibaga nen Jesus ed sakey “paulian iray inaatey a mangiponpon ed inaatey da”? Akin ya isipen yon indanet nen Jesus ed saman so kaimportantian na panangiyabawag ed mensahe na Panarian, a miduma ed saman so ompatnag a matukoy ed saray kapagaan na pamilya? Anto so ikuan yo?
2. Kapigan so inggapo na inkasoberano nen Jehova, tan panon so inkamasungdo na satan?
2 Abayag ni sakbay ya inusar nen Jesus so balikas a “say panarian na Dios,” insulat nen salmista David diad madibinon inkapuyanan: “Si Jehova a mismo so angiletneg a malet ed trono to ed mismon katawenan; tan say dilin inkaari to so manguuley ed amin a bengatla.” (Salmo 103:19) Say inkasoberano nen Jehova so ginmapo sanen inggapo to so impamalsa to. Say pundasyon na trono to so agbalot nagalaw. Say kanepegan to ed sankatalbaan ya inkasoberano so agbalot nasamsam ed sikato. Agtanton pankelawan ya imbalikas na sakey a salmista: “Iyabawag ed limog na nasyones so gloria to, . . . ta si Jehova so baleg tan daydayewen a tuloy”!—Salmo 96:3, 4; 109:21; Daniel 4:34, 35.
3. (a) Antoran agawgawa so angitonton ed sakey ya angat diad pananguley nen Jehova? (b) Panon so impangigagala na Dios diad pangareglo ed salisalan na sankatalbaan ya inkasoberano?
3 Anggaman kuan, aliwan amin so nantultuloy a mangidayew ed si Jehova. Si Satanas, ya inmunan apostata, so inmangat ed dalan na impangibalikas tan impangagamil nen Jehova na inkasoberano To ed saray pinalsa To ed dalin. (Genesis 3:1-5; Job 1:6-12; 2:1-5) Bilang nansumpalan, diad dalin tan saginonor ed tawen, arum a pinalsa so dineral na rebelyoson awawey nen Satanas. Inimpluensyaan met nen Satanas so totoon mangiletneg na saray nanggegendanan a panarian na too. Saraya so inusar ton mangangat ed kanepegan na Dios a manuley. (Apocalipsis 13:1-6) Pian sayan salisalan na sankatalbaan ya inkasoberano so naareglo, ginagala nen Jehova so bengatlan nikadkaduma, a singa nipasakbay ed Daniel 2:44: “Diad saray agew na saratan ya arari say Dios na tawen so mangiletneg na sakey a panarian ya aglan balot naderal. . . . Mekmeken to tan panganggaen to so amin na sarayan panarian, tan sikato a mismo so mansiansia lawas.”
Si Jehova So Nagmaliw ya Ari ed Israel
4. Diad anton pantalos a nayarian nen David ya ibaga a “si Jehova a mismo so nagmaliw ya ari,” tan anto so kakaukolan na satan a nagawa?
4 Nagmaliw la sirin natan a mabitar ya, anggaman say inkasoberano nen Jehova so ginmapo ni ed samay inggapo na impamalsa to, ginagala to so manggawa na espesipikon balikas na pananguley to diad pangareglo ed ando lan ando ed salisalan na pankanepegan na inkasoberano to. Sayan balikas et say mangatatawen a Mesianicon Panarian. Say mangaraldalin a panarian ya inletneg nen Jehova ed nasyon na Israel so nanserbi a bilang memelag-kalaknab a representasyon na sayan Panarian “ya aglan balot naderal.” Sirin, sanen inyakar nen Arin David so kaban na sipan ed dalem na syudad na Jerusalem, ayarian ton malikeliket ya inkanta: “Komon saray katawenan so manliket, tan say dalin komon so manggayaga, tan ibaga ra komon ed limog na nasyones, ‘si Jehova a mismo so nagmaliw ya ari!’” (1 Awaran 16:31) On, diad nikadkaduman pantalos et si Jehova so “nagmaliw ya Ari” ed interon Israel. Saman so sakey a panaon na baleg a panggayaga, tan saman a makapakelkelaw ya agawa so kinaliktan nen David ya iyabawag ed arawi!
5, 6. (a) Diad anton pamaakaran a si David so nikadkaduma diad limog na arari? (b) Siopa so inyanino nen David, tan diad anton pamaakaran?
5 Say binalegan nen Arin David a managpastol so angiletneg na basiyan diad impagmaliw ton nikadkaduman ari ed limog na arari. Sikato so sakey a pastol-ari. Dineskribe na salmista so impamili na Dios ed si David a para ed sayan betang, a kuanto: “[Si Jehova] so amili ed si David ya aripen to tan inala to a manlapud saray pukokan na pulok . . . pian magmaliw a sakey a pastol ed si Jacob a katooan to tan ed Israel a tawir to. Tan ginapoan toran pastolan unong ed katooran na puso to, tan diad inkatalabit na saray lima to et sikara so inggapo ton imbasbas.”—Salmo 78:70-72.
6 Say maaron panangipastol nen David ed katooan to, say katooran na puso to ed Dios to, tan say abilidad to a bilang sakey a pangulo so nanggawa ed sikaton kualipikadon tuloy a mangiretrato ed onsabin Mesias, a sikato so nausar ed nikaduman dalan diad pangibalikas na sankatalbaan ya inkaari nen Jehova tan onkiwas a bilang maaron Pastol-Ari. Sayan makapakelaw ya imbaleg ed saray gagala nen Jehova so impasakbay ed saginonor nen propeta Ezequiel: “Siak so mamatalindeg ed [Israel] na sakey a pastol, tan sikara so pakanen to, anggan say aripen kon David. . . . Tan siak a dili, si Jehova, so magmaliw a Dios da, tan si aripen kon David a pangulo ed pegley da. Siak a dili, si Jehova, so nansalita.”—Ezequiel 34:22-24.
Pinmatnag So Nipasakbay a Pastol-Ari
7, 8. Panon so impakabidbir ed nipasakbay a Pastol-Ari, tan anto so kanepegan na impatnag to? (b) Nipaakar ed anton gagala a si Jesus so “inabobonan” nen Jehova?
7 Say Sakey ya impasakbay nen Jehova et say dilin Anak to, si Jesus. Nipaakar ed sikato, imbaga na anghel Gabriel ed si birhen Maria: “Nia! inginew mo ed panag-anakan mo tan iyanak mo so sakey ya anak a laki, tan tawagen mo so ngaran to a Jesus. Sayan sakey so baleg tan natawag na Anak na Sankatageyan; tan iter nen Jehova a Dios ed sikato so trono nen David ya ama to, tan sikato so manuley a bilang ari ed abung nen Jacob lawas, tan anggapo so anggaan na panarian to.” (Lucas 1:31-33) Agaylan makapakelaw a balikas na inkaari nen Jehova so pagmaliwan na saya! Peteg, say ontan ya onsabin nagawa so mankaukolan na sankabalgan a panangiyabawag ed sankamundoan: “Si Jehova a mismo so nagmaliw ya ari!”
8 Ontumbok ed mamilagron inkianak nen Jesus tan say imbaleg to ed inkatoo, inpresenta to so inkasikato ed bautismo ed danum diad ilog Jordan. Diad saman a panaon binidbir na Dios si Jesus a bilang Anak to diad impangikalbo to na espiritu ed sikato tan inkuanto: “Sika so Anako, say inad-aro; inabobonan taka.” (Lucas 3:22) Nipaakar ed anto so “inkaabobonan” nen Jesus? Ipaliwawa na salaysay nen Lucas: “Si Jesus a mismo, sanen inggapo to so kimey to, et ngalngalin mantaon na talumplo.” (Lucas 3:23; Ref. Bi. paimanod’leksab: “Odino, ‘inggapo to [so manbangat].’”) Kuan na Revised Standard Version tan say New International Version, “Sanen inggapo to so ministeryo to.” Anto so “kimey,” odino “ministeryo” nen Jesus? Anto so “imbangat” to? Iter nen managsulat a Mateo so ebat: “[Si Jesus] so linma ed interon Galilea, a nambabangat ed saray sinagogas da tan impulong to so maong a balita na panarian tan tinambal to so amin a nengneng na sakit tan amin a nengneng na agpakayari ed limog na totoo.”—Mateo 4:23.
9. Diad antoran pamaakaran a si Jesus so singa si laki ton David?
9 Indeboto nen Jesus so bilay to diad ‘pangiyabawag ed arawi ed panarian na Dios.’ A singa si laki ton David, impatnag to so katooran na puso diad agton balot impangikumpromiso na katutulok to ed Panarian nen Jehova. (Lucas 9:60; 4:3-13; Juan 16:33) Pinaneknekan nen Jesus so inkasikato a sikato iman a “sakey a pastol” ya insipan nen Jehova a patalindegen. Sikato so maliket a managano ed espiritual diad saraman so “kinatatan tan imbantak a singa karneron andian na managpastol” na saray relihyoson papangulo. (Mateo 9:36) Nipaakar ed inkaonsiano ton mangipastol ed totoo tan no panon so nankalkalnan inlaknab ed saray taon ya onsabi, inkuan nen Jesus: “Siak so maabig a pastol, tan kabat ko so karnerok tan siak so kabat na karnerok . . . Tan walaan ak na arum a karnero, ya anggapo ed sayan panangipukokan; saratan met so awiten ko tan talinengen da so boses ko, tan sikara so magmaliw a sakey a pulok, sakey a pastol.”—Juan 10:14, 16.
10. Panon so pakaaral tayo ed saray nanduruman kiwas na Judios diad imbitasyon nen Jesus ya ontumbok ed sikato?
10 Panon so inkiwas na saray Judios ed imbitasyon nen Jesus a magmaliw a malakarneron patumbok to? Say reaksion da so nanduruma. Legan ya usisaen tayo so arum ed sarayan kiwas, imanoen no anto so kiwas yo nanlapulad impakadngel yo ed mensahe na Panarian na Dios.
“Magmaliw a Patumbok Ko”—Panon So Ikiwas Yo?
11. Deskribien so kiwas nen Simon, Andres, Santiago, Juan, tan si Mateo diad imbitasyon nen Jesus, “Tumbok yoak.”
11 Legan a manaakar si Jesus diad asingger ed dayat na Galilea, apasimatan to si Simon tan si Andres ya agi to a mansisigay. “Inkuan nen Jesus ed sikara: ‘Tumbok yoak, tan gawaen takayon sumisigay na totoo.’ Tan tampol a tinaynanan daray iket da tan sikato so tinumbok da. Tan nen akaarawi na daiset anengneng to si Santiago ya ilalak nen Zebedeo tan si Juan ya agi to . . . tan . . . sikara so tinawag to. Diad saman tinaynanan da si ama ran Zebedeo ed baluto a kaiba na saray inupaan a totoo tan sikato so tinumbok da.” (Marcos 1:16-20) Say parehon positibon kiwas so impanengneng nen Levi, odino Mateo. “[Si Jesus] so angikuan ed sikato: ‘Magmaliw a patumbok ko.’ Tan tinaynanan to so amin a bengatla sikato so inmalagey tan tinumbok to.”—Lucas 5:27, 28.
12. Anto so problema ed samay toon angibaga ed si Jesus: “Tumboken taka inerman a nayarin laen mo”?
12 Anggaman kuan, aliwan amin so kinmiwas a positibo ed imbitasyon nen Jesus, “Magmaliw a patumbok ko.” Isipen iman so toon adeskribe ed Lucas kapitulo 9, a nabet nen Jesus legan a manbibiahe ed nanduruman baley. Inkuanto ed si Jesus: “Tumboken taka inerman a laen mo.” Impanengneng na salaysay nen Mateo a sayan too so sakey ya eskriba. Saray eskriba so dederlengen na saray totoo tan sikara so atawag na “Rabbi.” Natan imanoen so ebat nen Jesus: “Saray kuyangen so walaan na ungib tan saray manok ed tawen so walaan na ubong, ingen say Anak na too so andian na pangisaralan to ed ulo to.” (Lucas 9:57, 58) Ibabaga nen Jesus ed sayan too a sikato so managmak na kairapan no sikato so magmaliw a patumbok to. Say tutukoyen na saya et say too so makinon a tuloy a mangawat ed sayan modo na panagbilay. Say agpanseguro diad agpikabat no iner so pamalabasan to na labi so mairap ton itepel.
13. Akin et inmebat si Jesus ed nengneng a ginawa to ed sananey a nayarin magmaliw a patumbok to?
13 Inkuan nen Jesus ed sananey a manalalagey: “Magmaliw a patumbok ko.” Balet, diad ebat, inkuanto ed si Jesus: “Abuloyan moak nin ununa ya ontaynan tan iponpon ko so amak.” Imanoen so ebat nen Jesus: “Paulian iray inaatey a mangiponpon ed inaatey da, balet onlaka tan iyabawag mo ed arawi so panarian na Dios.” (Lucas 9:59, 60) Sayan baraan na too so agmanutukoy a say ama to so inatey la. No sikato so inatey la, say anak so nayarin andid’man ed kalsada ya ontatalineng ed si Jesus. Andi, ompatnag ed imbaga na too a sikato so manpatanir ed panaon a panalagar diad ipatey na ama to. Sikato so ag-akaparaan a mangiyuna ed Panarian na Dios a tampol ed bilay to.—Mateo 6:33.
14, 15. (a) Anto so nipanengneng ed kerew na komatlon too ed si Jesus? (b) Anton leksion so naaralan tayo natan diad ebat nen Jesus ed sayan too?
14 Ibabaga na kuritan so sakey a komatlon too, a namboluntaryo: “Tumboken taka, Katawan; balet abuloyan moak nin ununa a manpatanir ed sankaabungan ko.” Mapatnag a sayan too so onkekerew na saray kipapasen diad pagmaliw ton sakey a patumbok nen Jesus. Sikato, diad tua, so mangibabaga ed si Jesus: ‘Nia! Magmaliw ak a sakey ed saray patumbok mo, no . . .’ Anto so ebat nen Jesus? “Anggapo so toon mangibembem na lima to ed lukoy tan onlingaw ed saray bengatlan walad benegan et manepeg ed panarian na Dios.” (Lucas 9:61, 62) No kaliktan na managbaka a maptek so babakaen to ed uma, itultuloy to so onnengneng ed unaan. No sikato so lingaw-lingaw, say babakaen to so nayarin magmaliw a pikpikewet. Ompan sikato ni ingen so napatir! Ontan met ed saray patumbok nen Jesus; say ilingaw da ed sayan daan a sistema na bengabengatla, anggan diad sankasikmat labat, so panatangguyor ed gonigon, a saray sali to so nagapol tan makaarawi ed ‘mainget a dalan a mamaarap ed bilay.’—Mateo 7:14; nengnengen so Lucas 17:31-35.
15 Kasin nadngel yo so imbitasyon nen Jesus: “Magmaliw a patumbok ko”? Anto so kiwas yo? Kasin impanengneng yo so parehon positibon kiwas a singa saray babangatan a Simon, Andres, Santiago, Juan, tan Mateo? Singa saratan a lalaki, kasin sikayo so akaparaan a manggawa na anggan anton sakripisyon nakaukolan ta pian tumboken iray bakat na Katawan? No say ebat yo so on, sirin napanggayagaan yo so mabmablin pribilehyo na pibiang diad pangiyabawag ed maong a balita na Panarian na Dios.
16. Panon so impangiparaan nen Jesus ed saray patumbok to diad pibiang ed sikato diad panangipulong ed maong a balita?
16 Sakbay ya imbaki nen Jesus iray babangatan to a mangiyabawag ed Panarian, sioonsianon imbangat tora no panon so panggawa ra na ontan diad panamegley na dilin ehemplo to. Diad panumbok ed saya, sikara so inikdan nen Jesus na detalyadon bilin ed no panon so pananap ed saray malakarneron totoo ed anggan anton laen a teritorya. Saray bilin nen Jesus so siansia nin aplikado ed sayan koma-20 siglo. Usisaen tayo so arum ed saraya a singa nikurit ed kapitulo 10 na awaran nen Mateo.
Saray Bilin ed Panagpulong-ed-Panarian
17. Ipareng so sustansya na mensahe na Panarian ya impulong nen inmunan siglo ed saman so ipupulong natan.
17 Say tema na mensahe na saray babangatan so pareho ed saman so inyabawag nen Jesus: “No onla kayo, a manpulong, kuan yo, ‘Say panarian na katawenan so inmasingger la.’” (Mateo 10:7) Anggaman kuan, satan a Panarian so niletnegla ed katawenan. Say Pastol-Ari nen Jehova, si Kristo Jesus, so manuuley la! Sirin, saray salita nen David so lalon makabaliksan natan: “Komon manliket so katawenan, tan komon say dalin so manggayaga, tan ibaga ra komon ed limog na nasyones, ‘si Jehova a mismo so nagmaliw ya ari!” (1 Awaran 16:31) Natan, aliwa labat a sikatayo so apribilehyoan a manuporta ed sayan nikaduman balikas na sankatalbaan ya inkaari nen Jehova noagta walaan itayo met na gayagan manbilay ed panaon sano say salisalan na inkasoberano nen Jehova so nakaukolan a naareglo ed amin a panaon ya onsabi.
18. Anto so indanet nen Jesus ed saray patumbok to diad Mateo 10:8-10, tan siopa so nagkalautlan makapangapresya ed saya natan?
18 Dedeskribien na Mateo 10:8-10 so awawey na saraman so mibibiang ed kimey na panagpulong. Say Panarian na Dios so nakaukolan ya ununa ed bilay da, saray pisikal a nakakaukolan so segundaryo. Akin? Inkuan nen Jesus: “Ta say managkimey so manepeg ed tagano to.” Say mangatatawen ya Ama tayo so naynay a mangasikaso ed saraman so mangiteen na talek da ed sikato. Tan nilasus-nilibo a sigpot-panaon iran ministro na saray Tasi nen Jehova natan so makatasi ed sayan katuaan.—Numeros 18:30, 31; Deuteronomio 25:4.
19. Panon a say pananap ed saray manepeg so nagagawa natan, tan diad leksab na siopa panangiwanwan?
19 Ontumbok ya imbilin nen Jesus: “Diad antokaman a syudad odino baryo a looban yo, anapen yo so manepeg, tan sikayo so manayam ditan ya angga ed itaynan yo.” (Mateo 10:11) Manepeg ed anto? Manepeg ed pribilehyo na pangabrasa ed sayan aripen nen Jehova tan ontalineng ed mensahe na Panarian na Dios. Siempre, saray babangatan nensaman so nayarin nanayam ed abung na satan a toon manepeg tan satan so inusar ton pundowan legan a sakusaken da so amin a teritorya diad pananap ed saray manepeg. Natan, tutumboken na saray Tasi nen Jehova so miulibay ya oksuyan. Uusaren da so nilaksalaksan oras tan ibabanikel da so malaem a sagpot diad pananap ed saray manepeg diad nanduruman teritorya. Insan, sano saraya so naromog, saray Tastasi so walaan na baleg a liket diad ipawil lamet ed saratan ya unabung tan isalaysay ed sikara so Salita na Dios. Sirin, natan, si Jesus so sioonsianon mangipapastol ed arum a malakarneron totoo diad kawanan a dapag na pabor to.—Mateo 25:31-33.
20. Panon a say manepeg ya unabung so makasagmak na kareenan a kinaliktan na managpulong na Panarian ed satan?
20 “Sano sikayo so onloob ed abung, ibano yo so unabung; tan no say unabung so manepeg, komon ta say kinaliktan yon kareenan so onsabi ed satan.” (Mateo 10:12, 13) “Komon ta wala so kareenan ed sayan abung” so kaslakan a panangilugay ed agew nen Jesus. (Lucas 10:5) Saray angheles so nankanta diad panaon na inkianak nen Jesus: “Gloria ed katagyan ed tagey diad Dios, tan diad dalin ed limog na totoon maong-linawa.” (Lucas 2:14) Say manepeg ya unabung so makalikna ed sayan nipasakbay a kareenan diad pangawat ed mensahe na Panarian na saray babangatan. Natan, say maong a balita na Panarian so walaan na parehon epekto. Itarok toray totoo diad mareen a relasyon ed Dios diad panamegley nen Jesu-Kristo, tan itarok to met so kareenan diad limog na kapananisiaan.—2 Corinto 5:20, 21; Filipos 4:7; Efeso 4:3.
21. Akin a say tinaon-a-teksto ed 1986 so matukotukoy a tuloy?
21 Legan na 1986 a kalendaryon taon, saray Kingdom Hall na Tastasi nen Jehova ed sankadalinan so mangiparungtal ed tinaon a teksto ya inaon ed Lucas 9:60: “Onlakayo . . . iyabawag ed arawi so panarian na Dios.” Agaylan maabig a panonot tan panamaseseg so pagmaliwan na saya ed amin na saray tuan ministro na Dios diad pibiang a maparanay ed panangipulong ed Panarian na Dios! On, satan a Panarian so wadia la nanlapulad 1914! Sikato so instrumento na Dios ed saray lima na Mesianicon Ari to diad panmekmek ed amin a minumundon panarian nen Satanas. Agpankelawan, sirin, a say Panarian na Dios so nepeg a manunan importante ed bilay na balang sakey ed saray Tasi nen Jehova. Kabat tayo a kabaliksan na saya so kilalaban tayo a mangipaarap ed bilay!—1 Timoteo 4:16.
Panon So Iyebat Yo?
◻ Panon kabayag tan inkaligen so inkaari nen Jehova?
◻ Anton sankatalbaan a salisalan so nakaukolan natan a naareglo?
◻ Anto so nepeg ya akaparaanan a gawaen na amin a patumbok nen Jesus?
◻ Akin a say balikas “si Jehova a mismo so nagmaliw ya ari” so lalon makabaliksan natan?
◻ Anton gagala so serbian na tinaon-a-teksto ed 1986?
[Litrato ed pahina 9]
Imbeneg nen Mateo so amin a bengatla tan tinumbok to si Jesus