Kareenan a Manlapud Dios​—Kapigan?

“Say Dios a mangiter na kareenan so manmekmek ed si Satanas diad leksab na saray sali yo ed magano.”​—ROMA 16:20.

1, 2. (a) Anto so imbaga na sakey a Hindun makabat nipaakar ed bakal tan kareenan? (b) Sioparay maliket a makapanggayaga na kareenan a manlapud Dios?

“NO MANTULTULOY so inaambagel a lumba ed armamento, satan so mansumpal ed pampapateyan ya agnin balot agawa ed awaran. No wala so natilak a mananalo say mismon impanalo et say mabilay a patey ed nasyon so onimwas a mananalo.” Satan a pasakbay nen Mohandas Gandhi nen 1938 so peteg a ninmengneng diad arapen a panaon to.

² Akadkauna ni, nen 1931, imbaga nen Gandhi ed viceroy a Britis: “Sano say nasyon mo tan nasyon ko so mankakasakey ed saray bangat ya indatak nen Kristo ed sayan Sermon ed Palandey, naresolbe ta ray problema ya aliwa lambengat ed saray nasyon ta noagta ontan met ed interon mundo.” A singa impanengneng na makabat a Hindu, say sermon nen Jesus so mangituturo ed dalan a mamaarap ed magnayon a kareenan. Diad saman a sermon et imbaga nen Kristo: “Maliket iray mareen, lapud sikara so natawag na ‘ananak na Dios.’” (Mateo 5:9) Dakel ya “ananak” so manggagayaga natan na kareenan a nanlapud Dios. Nasabi panaon, amin na saray mauyamo ed dalin so makaromog na “abalbaleg a liket diad inkadaakan na kareenan.” (Salmo 37:11) Balet kasin sikatayo so makapanmatalek ed sayan nagawa?

3. Akin ya anggapo so peteg a kareenan ed dalin natan?

³ Natan, say kigtot ed kadederal na mundo so mamapayong ed katooan. Inkuan na agano nin impanaral: “Say sigpot a kaapaan et say $3-4,000,000,000,000 (3-4 trilyon dolyar) a ginastos nanlapulad Guerra Mundo II diad pamalesa na armas nuklar a, no nausar, et kabaliksan to so sankagloboan a panagbitkel. . . . Say megatonahe ed simpenan na mundo ed saray ayuran nuklar so magenap a mamatey ed 58 bilyon a totoo, odino mamatey ed kada toon manbibilay natan na 12 danay.”a Ingen say inaambagel a lumba so mantutultuloy ya ombibiskeg. Peteg a MAD (ambagel), lapud saratan a letra et kabaliksan to so Mutually Assured Destruction, say makapakebbiew a kaisipan a panisimbangan na saray mabibiskeg a pakayari ed tatawagen da na kareenan. Peteg a saya so aliwan kareenan a manlapud Dios.

4. (a) Anton nenengnengen so ipaparungtal na mundo natan? (b) Ingen anton mabiskeg ya ilalo so aabrasaen na saray managdayew ed si Jehova?

⁴ Diad amin a pamaakaran, sayan mundo so mangipipresenta na makapaermen a nenengnengen. Agnin balot agawa nensaman a say sosyedad na too so mangitetepel ed lalon kaugsan ed pulitika, lalon karawalan ed krimen, lalon sakit na ulo ed ekonomya, odino ag-inkamaridios tan kagewgewan ed relihyon nen say diad sayan kaplesan a panaon. Agbalot nagmaliw a lalon tua ed katooan ya “amin a pinalsa so mantutultuloy a maningel tan manpapautot.” Ingen ta isisipan na Dios a sayan toon pinalsa “so nabulos a manlapud inkaaripen ed kabubulok tan nawalaan na maglorian kawayangan na ananak na Dios.” (Roma 8:21, 22) Saraman so manangaro-ed-kareenan a mandadayew ed Dios na Biblia, say Soberanon Katawan a Jehova, so apaseguroan na iloob ed satan a kawayangan. Sikato so sakey a kawayangan a nilamut a malet ed tuan kareenan, maandon kareenan. (Ezequiel 37:26-28) Balet kapigan tan panon so isabi na satan a kareenan?

Panmoria na Dios ed ‘Saray Panaon tan Panpanaon’

5. Anton tepet so ontalindeg a misiglaotan ed 1 Tesalonica 5:1?

⁵ Niligliwa nen apostol Pablo iray Kristianos ed Tesalonica diad impangipaliwawa to no panon so inkisiglaot na kikioli ed “kiwawala na Katawan” a Jesus. Ontumbok et imbaga to: “No nipaakar ed saray panaon tan panpanaon, agagi, agyo la nakaukolan ya isulat ed sikayo.”​—1 Tesalonica 4:15; 5:1.

6. Panoy pikabat tayo a ‘saray panaon tan panpanaon’ so importante ed Dios?

⁶ Kasin ipapanengneng na saray salita na apostol a ‘saray panaon tan panpanaon’ so aliwan importante ed Dios? Arawin ontan! (Eclesiastes 3:1) Saman so “sanen say nagnap a getar na panaon so sinmabi,” diad sampot na 69 simba na taotaon, ya “imbaki na Dios so Anak to.” Tan say ministeryo nen Jesus so nantultuloy ed talora tan kapalduan taon​—manlapud 29 K.P. ya anggad 33 K.P.​—unong a singa nipropesiya. (Galacia 4:4; Daniel 9:24-27) Eksakton saman so diad impanampot na “aturon panaon na nasyones” nen 1914 a si Jesus so nitandoro a bilang Ari ed “mangatatawen a Jerusalem.” (Lucas 21:24; Hebreos 12:22; Ezequiel 21:27; Daniel 4:31, 32) Say “baleg a kairapan” so onsabi met diad “agew tan oras” ya inggeter nen Jehova. “Agmanabala.”​—Mateo 24:21, 36; Habacuc 2:3.

7. Akin ya agla nakaukolan nen Pablo ya isulat ed saray taga Tesalonica so nipaakar ed ‘saray panaon tan panpanaon’?

⁷ Anggaman kuan, diad sayan punto et agnakaukolan nen Pablo ya isulat “iray panaon tan panpanaon.” Saraman a Kristianos ed Tesalonica so kumbinsido la a saman so ‘panaon’ ed konklusyon na Judion sistema na bengabengatla, a manampot ed 20 taon ed saginonor, nen 70 K.P. Say seseg tan “gayaga na masanton espiritu” so sinminag a bilang ehemplo. (1 Tesalonica 1:4-7) Ontan met, saray Tasi nen Jehova natan so sigpot a sikakabat a saray sankamundoan a guerra tan arum iran kairapan a nagagawa nanlapulad 1914 “so tanda” na agnanengneng a kiwawala nen Jesus ed pakayari na Panarian tan gloria.​—Mateo 24:3-8; 25:31.

8. Akin a sikatayo so nepeg a mansiansian aliing tan aktibo?

⁸ Ontumbok, pinaseguroan na apostol iray kapara ton Kristianos, a kuanto: “Ta sikayon dili et kabat yon maong a say agew nen Jehova so onsabi a singa sakey a matakew ed labi.” (1 Tesalonica 5:2) Anggaman agtayo amta so eksakton panaon, satan ya agew ed panangidapo na panangukom so manderen manasingger. Sikato so ombetag a bigla, tamtampol, diad aturon oras na Dios. Sirin, nepeg a sikatayo so mansiansian aliing tan aktibo.​—Lucas 21:34-36.

Pantok a Tawag ed Kareenan

9. (a) Anton kelyaw so ontatalindeg, tan akin a saray tuan Kristianos so agmibiang ed satan? (b) Siopa so mangibebelyaw ed sayan tawag, tan panon so kipareng da ed saray manuley diad agew nen Jeremias?

⁹ “Kareenan tan kaligenan!” Sikatayo dia so papasakbayan nen Pablo ed kiyabawag a narengel diad pantok na “kiwawala” nen Kristo. (1 Tesalonica 5:3) Kasin satan a kelyaw so magano tayo lan narengel? Iner so nayarin panlapuan na ontan a tawag a para ed sankamundoan a kareenan tan kaligenan? Mapatnag ya aliwan manlapud limog na saray patumbok nen Kristo, lapud imbaga nen Jesus a nisay sikara nisay Panarian to so “kabiangan na mundo.” (Juan 15:19; 17:14, 16; 18:36) Saraman so mangibelyaw ed saya et nepeg sirin a saray taga mundo a sumpa ed onsasabin Panarian na Dios. Sikara so kabiangan na mundo a ‘mandukdukol ed pakayari na sakey a marelmeng,’ si Satanas a Diablo. (1 Juan 5:19) Singa saray mapulitika tan relihyoson papangulo ed agew nen Jeremias, saraya so mansalita “na pasingawey ed dilin puso ra,” a kuan da, “Kareenan so onwala ed sikayon totoo,” a sililingon mangibabaga a say kareenan so manlapud Dios. Agaylan katilaan so ibabaga ra!​—Jeremias 23:16, 17, 19, 20.

10. Anton panggegendanan na saray agawgawa so angitonton ed peles a kipapasen na mundo?

¹⁰ Saray panggegendanan na agawgawa so angitonton ed sayan kelyaw na “kareenan tan kaligenan!” Saman so nen 1920 a say Liga na Nasyones so pinawala diad kasumpal na Baleg a Bakal, ya akabatan natan a bilang Guerra Mundial I. Say gagala na sayan Liga et say pangekal ed bakal a manlapud dalin ed ando lan ando. Balet say Guerra Mundial II so angigalasugos ed Liga diad kaaralman. Nen Oktubre 24, 1945, sayan muyongan so abilay lamet, a tinmalindeg a nanlapud saray dapol a walaan na sakey a balon ngaran, say Nasyones Unidas. (Ipareng so Apocalipsis 17:8.) Say manunan getma to et “say pangipreserba na kareenan tan kaligenan ed mundo.” Saray pundador to so angibalikas na determinasyon “a mangisalba ed ontumbok iran kapolian a manlapud salot na bakal.” Kasin say NU so matalona diad panangipaseguro na ontan a kareenan tan kaligenan?

11. Panon kaseryoso so krisis ya onaarap ed mundo?

¹¹ Anggaman panon inkasimoon so arum ed saray pundador na NU, satan ya organisasyon a singa say Liga ed sakbay to, so sinmaew a manumpal ed gagala to. Say mundo natan so manyudyurong ed pulbura na saray armas ed bakal a nuklar. Say aksidente ed Chernobyl, U.S.S.R., nen Abril 1986, a nansumpal ed inkasmak na radyoaktibo ed Europa, so mangipanengneng ya anggan sano usaren ed mareen a gagala, say biskeg nuklar so walaan na makapakebbiew a nagawaan. Arum a nasyones ed Abalaten a Pasipiko so manasalin mamasiansia ed pasen da a bilang sona a bulos-ed-nuklar. Balet no bilang ta onterak so sankalaknaban a bakal nuklar, anggapo so niliktar ed anggan iner a pasen.

Kasin Posibli So “Kareenan tan Kaligenan”?

12. Anton deklarasyon so ginawa na NU a para ed 1986, tan diad anton ebat ed limog na nasyones?

¹² Sigpot a sikakabat ed ompapalalon krisis, inyabawag na Nasyones Unidas so 1986 ya Internasyonal a Taon na Kareenan. Saya so anagmak na akames a panangawat ed limog na nasyones. Kaslakan ed sikara so anuporta ed Taon na Kareenan na NU diad sakey a dalan odino sananey, balet ituturo ra a say bakal nuklar so mamapayong a kigtot ed kareenan. Kaleganan to, saray angkekelag-a-bakal so mantutultuloy a nagagawa ed interon dalin, 150 ed sikara nanlapulad Guerra Mundial II, a walaan na nantetekep a pinatey a masulok a 30,000,000. Kasin nibaga ya anggan anton nasyon et peteg a kinmiwas ed saraman so bantog a salita ed Isaias 2:4 ya inyukit ed bakor na plaza na NU?

13. Panon so kasusuportaan na saray relihyoson papangulo?

¹³ Saray relihyon ed mundo so aliwan paatras diad panangiter na suporta ed Taon na Kareenan na NU. Inyabawag nen Papa Juan Paulo II so Enero 1 a bilang Sankamundoan ya Agew na Kareenan tan pinaseseg toray opisyales a mangiter na panangipangulon nakakaukolan diad pangiletneg na basiyan a para ed sankatalbaan a kareenan. Sikato met so tinmawag ed saray pananisia na mundo a mandaragup diad pampikasi ed Assisi, Italya, legan na Internasyonal a Taon na Kareenan. Say Arsobispo na Canterbury, ulo na Iglesia ed Inglatera, tan saray grupo na Budista so ampetapetang ya angabrasa ed sayan imbitasyon. Say Sankamundoan a Konsilyo na Iglesia so angipaway na deklarasyon ed Internasyonal a Taon na Kareenan, ya ipapaseseg ton say pangilukpos na armas ed nuklar so onggapon tampol.

14. Panon lambengat so nayarin italona na sakey a proyekto a para ed kareenan?

¹⁴ Anggaman kuan, diad sayan pamaakaran na panangiletneg na “kareenan tan kaligenan,” anto so linawa “na Dios a mangiter na kareenan”? Kasin ipapanengneng na mapropetikon Salita na Dios a saray ag-ayadyarin totoo tan nasyones so makapangitarok na kareenan tan kaligenan ed sayan mundo? Arawin ontan! Say “bengatlan aligwas” so mandepende ed panangimaton nen Jehova ed saray pamaakaran a mitukoyan ed inkatunong to tan ed dayew to.​—Isaias 55:11; 61:11.

Onsasabin “Biglan Kadederal”

15. Anton makapakebbiew a pasakbay so ontumbok a ginawa nen Pablo?

¹⁵ Ibabaga nen apostol Pablo ed sikatayo so ngalngalilan nagawa. Kuanto: “Kapiganman ya ibabaga ra: ‘Kareenan tan kaligenan!’ insan biglan kadederal so tampol ya onsabi ed sikara a singa pasakit na sakey a biin malukon; tan sikara so agmakaliktar.”​—1 Tesalonica 5:3.

16. Akin a saray dalan na nasyones so aliwan daladalan na Dios?

¹⁶ Diad ununan pakabasa, saratan a salita so nayarin singa makapakigtot. Balet saray bengatla so ipapalinew na Biblia. Saray dalan na nasyones natan so aliwan daladalan na Dios. (Isaias 55:8, 9) Say katunongan to ed pangaabuloy to ed saray nanduruman porma na uley-na-too a mantultuloy et say pangebat ed sakey a salisalan a pinalesa na mauges ya Uleg, si Satanas a Diablo, ed ngalngalilan 6,000 taon a linmabas. Sanen sinagyat nen Satanas iray inmunan atateng tayon mamili na panindependente ed Dios, sinuppiat to no kasin peteg a nakaukolan na totoo so uley-na-Dios.​—Genesis 3:4, 5.

17. Anton kuritan so ginawa na uley-na-too, tan anto so papaneknekan na saya?

¹⁷ Kaleganan na saray milenyon tinmumbok, inabuloyan na Dios so totoon mangiksperimento ed amin a naisip a porma na gobierno na too. Balanglan nantultuloy ed pigaran taon odino diad nilasus a taon, kada nengneng na uley-na-too so sinmaew a makapasinagem diad pangitarok na tuan kareenan tan kaligenan. Say bakal, krimen, kakebbiewan, tan patey so mantutultuloy a mamapairap ed katooan diad leksab na amin a nengneng na gobierno na too. Diad amin ya awaran, “inuleyan na too so too ed kasakitan to.” (Eclesiastes 8:9) Aliwan duma natan. Siopaman a sikakabat ed salisalan so makapangibaga natan, a singa inkuan na propeta na Dios: “Kabat kon maong, O Jehova, ya agkayarian na mangaraldalin a too so dalan to. Agkayarian na too so anggan say panakar a mangiwanwan ed kundang to.”​—Jeremias 10:23.

18. Akin a say kelyaw na nasyones ed “Kareenan tan kaligenan!” so kaapaan?

¹⁸ Natan say panaon so asingger la pian aregloen so salisalan a maminsan ed amin a panaon. Say uley-na-Dios lambengat so makapangitarok na tuan kareenan tan kaligenan ed katooan. Anggaman kuan, aliwan say uley-na-Dios so lablabayen na nasyones sano ikelyaw da so “Kareenan tan kaligenan!” Labay dan mantultuloy so pananguley unong ed saray dilin sikikinon ya ideolohya ra. Balet say panaon so nanaupot la! Saray nasyones so makakasingob ed bengatlan ansakit a nagawa. Tano andi, amin so naandi diad palaspas a panagderal na nuklar. Sirin gawaen da so impasakbay nen Jeremias: “Salien dan tambalen so babag na katooan ko ya anleglemew, a kuan da, ‘Wala so kareenan! Wala so kareenan!’ anta anggapo so kareenan.” Balet ta satan so kaapaan!​—Jeremias 6:14; 8:11, 15.

Say Nipropesiyan Anggaan

19. Panon so iterak na “agew nen Jehova”?

¹⁹ “Biglan kadederal . . . tampol,” so inkuan nen apostol Pablo. Inyarum nen Isaias a propeta na Dios: “Nia! Saray mismon bayani ra so kinmelyaw ed lansangan; saray mismon igaganggan na kareenan so mannangis na ampaipait.” (Isaias 33:7) Diad dakel iran pasen, ipapanengneng na Biblia a say panangidapo nen Jehova na panangukom ed marelmeng a nasyones tan totoo so onsabin maples, ag-ililaloan​—tuan “singa sakey a matakew ed labi.” (1 Tesalonica 5:2, 3; Jeremias 25:32, 33; Sofonias 1:14-18; 2 Pedro 3:10) Diad sakey a panaon sano say mundo so maksil a mangiyaabawag ya adampot to la so kipapasen na kareenan tan kaligenan, say “agew nen Jehova” so onterak a tekep na makapataktakot a kabiglaan. Saray totoo na Dios so makabidbir ed kelyaw a “Kareenan tan kaligenan!” ed saman so kipapasen to tan maligen ed intarya nen Jehova a salimbengan.​—Salmo 37:39, 40; 46:1, 2; Joel 3:16.

20. (a) Say NU so anton nengneng na “ayep”? (b) Panon so panmoria nen Jehova ed palson relihyon, tan akin?

²⁰ Diad Salita na Dios, say kurang na Liga na Nasyones tan say kasandi to, say Nasyones Unidas, so niulibay ed saman so “eskarlatan-kolor ya atap ya ayep” a walaan na pitoran ulo (a mangirerepresenta ed saray pakayari na mundo a ditan so nanlapuan to) tan samploran saklor (a mangitatalindeg ed saray ginogobiernon pakayarin manusuporta natan ed satan). Satan so ipapanengneng na Biblia a sakey a mapulitikan “ayep,” a nipareng ed “leon” na Britis tan say “uso” na Ruso. Diad beneg to et wala so sakey a biin akakabayo, “Babilonia a Baleg, say ina na saray balangkantis tan saray makapadimlan bengatla ed dalin.” (Apocalipsis 17:3-8) Saya so mangibalikas a maong ed panmoria nen Jehova ed palson relihyon, ya agmangirerepresenta ed sikato tan say matunong a panarian to. Sikato so mibabalangkantis ed espiritual diad pibabali to ed saray pulitika. Say pisisiglaotan na relihyon ed NU diad panangibasingkawel na mundo a para ed kareenan tan kaligenan so sakey ya ehemplo na saya. Labay to met so nawalaan na kareenan tan kaligenan a manlapud mensahe na panangukom na Dios ya iyaabawag na saray Tasi nen Jehova. Nisengeg ed saya, inimpluensyaan to so arum iran gobierno a manebel ed Kristianon kimey na saray Tastasi.​—Salmo 2:1-3.

21. (a) Anton kiwas so mananda ed igapo na “agew nen Jehova”? (b) Diad anton kasampotan so ontumbok a gawaen na “agew”?

²¹ Panon so iterak na “agew nen Jehova”? Diad sayan sankabilungetan a labi ed awaran na too, satan so peteg ya onsabi “singa matakew”! Satan so nagawa sano imanyubra na Dios iray nasyones ed ayep ya NU ya ompuligar a bigla ed palson relihyon. Diad pangipanengneng da na mabiskeg a panggula ed Babilonia a Baleg, sikato so lakseban da ed kipapasen to tan sigpot a gaygayen da. Sayan kadederal so onsabin tampol a saray datin mapulitikan kainarowan to so mangibelyaw: “Mauges a tuloy, mauges a tuloy, sika a baleg a syudad, sika a Babilonia a mabiskeg a syudad, lapud diad sakey ya oras et sinmabi so kaukom mo!” Balet saray nasyones tan saray armadas da so onataki met ed totoo na Dios. Insan, say Ari na Arari, si Jesu-Kristo, so maneral ed amin na saraman so kakabusol tan imedmer da ed kaaralman so manunan-sumusumpa, si Satanas a Diablo.​—Apocalipsis 17:16, 17; 18:10; 19:11-21; 20:1-3; ipareng so Ezequiel 38:11, 16, 18-23.

22. (a) Anton engranden ilalo so wala ed saray totoon mananisia natan? (b) Panon so nayarin panggayaga yo ed kareenan a manlapud Dios?

²² Siansia, say tuan kareenan tan kaligenan so onaligwas diad leksab na Panarian na Dios! (Salmo 72:1, 7; Isaias 9:6, 7) Makapaliket, dakel natan a ‘mansiasiansian aliing tan manbabantay’ so manbilay a makanengneng ed satan. (1 Tesalonica 5:4-6) “Sakey a baleg ya ulop . . . a nanlapud amin a nasyones,” a mangaagamil na pananisia ed tarya nen Jehova a dondon diad panamegley nen Kristo, so niliktar ed “baleg a kairapan” pian panggayagaan so maandon kareenan a manlapud Dios. (Apocalipsis 7:9-17; 21:3, 4) Komon ta sakey ka ed sikara!

[Paimano ed Leksab]

Panon So Pangebat Yo?

◻ Akin a ‘saray panaon tan panpanaon’ so importante ed Dios tan diad sikatayo?

◻ Panon so nepeg a pangipasen tayo ed isasabi na “agew nen Jehova”?

◻ Siopa so mibibiang ed kelyaw diad 1 Tesalonica 5:3, tan kapigan?

◻ Antoran nikadkaduman nagawgawa so managdag ed satan a kelyaw?

Insulat nen datin Senador na E.U. a si J. William Fulbright ed agano ni nipaakar ed saray mabibiskeg-pakayari: “Nagnap ed biskeg, say lumba ed armas so diad kaunoran et mansumpal ed balanglan bakal nuklar odino diad kapairap na saratan a nasyones. Agto nagawaan​—tan agto nayarian​—a gawaen a balido so ideolohya na balang ulop. Say lawas napruebaan to, no agto ni agawaan, et say kapilit na saray mabibiskeg-pakayari diad kakulangkulangan a panagbitkel.”