Say Mundo So Agmakana ed Sikara
“Sikara so tinupak, sikara so asubok, . . . tan say mundo so agmakana ed sikara.”—HEBREOS 11:37, 38.
1, 2. Diad leksab na anto ran sirkumstansya a saray tasi nen Jehova ed kadaanan iran panaon so amemben na katooran, tan panon a saray gawa ra so mangapekta ed saray ariripen na Dios natan?
SARAY Tasi nen Jehova ed kadaanan iran panaon so amemben na katooran ed Dios anggaman ed dakel iran subok ya indapo na agmatunong a sosyedad na too. Alimbawa, saray ariripen na Dios so tinupak tan pinatey ed kampilan. Sikara so anagmak na inkapabanday tan kairapan. Ingen ta sikara so ag-atenyeg ed pananisia. Peteg, sirin, a singa imbaga nen Pablo: “Say mundo so agmakana ed sikara.”—Hebreos 11:37, 38.
2 Say makapabiskeg-pananisian gawa na saray maridios a totoo sakbay-na-delap, patriarkias, tan si Moises so manenyeg ed saray modernon-agew a tastasi nen Jehova a manserbi ed Dios diad pananisia. Balet kumusta iray arum ya abitla ed Hebreos kapitulo 11 tan 12? Panon so kagunggunaan tayo diad panalaysay ed nengneng na pananisia ra?
Pananisia na Uko-ukom, Arari, tan Propetas
3. Panon a saray agawgawan anaglawi ed Jerico tan si Rahab so mangipanengneng a say pananisia so nepeg a paneknekan na saray gawa?
3 Say pananisia so aliwa lambengat a sisisiaen; nepeg a sikato so paneknekan diad saray gawa odino aksion. (Basaen so Hebreos 11:30, 31.) Kayari na impatey nen Moises, say pananisia so angitarok ed saray Israelitas a nantutumbokan ya impanbiktorya ed Canaan, balet saya so nankaukolan na sagpot ed biang da. Alimbawa, diad pananisia nen Josue tan saray arum “et saray bakor na Jerico so nagba kayari na inkaliktub da ed pitoran agew.” Balet “diad pananisia et si Rahab a balangkantis so ag-atawtaw a kaiba na saraman so [andi-pananisian manaayam ed Jerico] a kinmiwas a situtunganga.” Akin? “Lapud sikato so angawat ed saray [Israelitan] espiya diad mareen a dalan,” a pinaneknekan to so pananisia to diad impangiyamot ed saray Canaaneo. Say pananisia nen Rahab so walaan na putel a letnegan diad saray balitan “pinamaga nen Jehova iray danum na Ambalangan Dayat” a manlapud arap na saray Israelitas tan sikara so impabiktorya to ed saray Amoreon ararin Sihon tan Og. Si Rahab so nanggawa na manepeg iran impampasimbalo ed moral tan sikato so abendisyonan ed aktibon pananisia to diad inkipreserba to a kaiba na sankaabungan to sanen nagba so Jerico tan diad impagmaliw ton sakey a linya na ateng-a-bii nen Jesu-Kristo.—Josue 2:1-11; 6:20-23; Mateo 1:1, 5; Santiago 2:24-26.
4. Anto so idadanet na saray eksperiensia nen Gideon tan Barak no nipaakar ed panangipanengneng na pananisia ed arap na kaatapan?
4 Say pananisia so nipanengneng diad nagnap a panagmatalek ed si Jehova ed arap na kaatapan. (Basaen so Hebreos 11:32.) Inako nen Pablo a sikato so saewen na panaon no itultuloy ton ibinsabinsa so nipaakar ed si “Gideon, Barak, Samson, Jepte, David tan ontan met ed si Samuel tan arum niran propetas,” a saray agawaan da so angiter na daakan ya ebidensya na pananisia tan panagmatalek ed Dios diad saray maatap a panaon. Sirin, diad pananisia tan diad ulop na 300 lambengat a lalaki, si Ukom a Gideon so inikdan na Dios na pakayarin maneral ed biskeg na militar na saray maruksan Midianitas. (Uko-ukom 7:1-25) Pinabiskeg nen propetesan Debora, si Ukom a Barak tan say 10,000 impantriyan puersa a kulang na armas so analo ed baleg a tuloy a puersa nen Arin Jabin a walaan na 900 a de-ayuran karwahe na pibabakal ya inkomanda nen Sisera.—Uko-ukom 4:1-5:31.
5. Diad anto ran dalan so angipatnagan nen Samson tan Jepte na pananisia ya angiter na ebidensya na nagnap a panagmatalek ed si Jehova?
5 Sananey ya ehemplo na pananisia a manlapud agew na uko-ukom na Israel et si Samson, say makapanyarin kabusol na saray Pilisteos. Tua, sikato so diad kaunoran et nagmaliw a bulag a kautibo ra. Balet si Samson so angitarok na patey diad dakel ed sikara sanen kinusbo to so saray lusek na abung a pangiyaapayan da na baleg a bagat ed palson dios da a Dagon. On, si Samson so inatey a kaiba na saraman a Pilisteos balet aliwan singa say andian na ilalon panagbitkel. Diad pananisia et sikato so nanmatalek ed si Jehova tan nampikasi ed sikato diad biskeg a nakaukolan pian idapo to so panangibales ed saraman so kakabusol na Dios tan totoo To. (Uko-ukom 16:18-30) Si Jepte, ya impanbiktorya nen Jehova a sumpad saray Amonitas, so angipatnag met na pananisia ya angiter na ebidensya ed sigpot a panagmatalek to ed si Jehova. Dia lambengat ed ontan a pananisia ya asumpal to so sipan to ed Dios diad impangideboto to ed anak ton bii diad serbisyo ed si Jehova a bilang magnayon a marikit.—Uko-ukom 11:29-40.
6. Panon so impangipanengneng nen David na pananisia to?
6 Makatantanda met ed pananisia to et si David. Sikato lambengat so wala ed kalangweran sanen binakal to so Pilisteon alan a Goliat. ‘Ondago ka ed siak diad kampilan, gayang, tan panegkal,’ so inkuan nen David, ‘balet siak so ondago ed sika diad ngaran nen Jehova na saray ehersito.’ On, si David so nanmatalek ed Dios, a pinatey to so abalbaleg a Pilisteo, tan nantultuloy a mabayanin mibabakal-ari diad pankaabigan na saray totoo na Dios. Tan lapud pananisia nen David, sikato so sakey a toon makapaliket ed puso nen Jehova. (1 Samuel 17:4, 45-51; Gawa 13:22) Legan na bilay, si Samuel tan arum iran propetas so angipatnag met na baleg a pananisia tan sigpot a panagmatalek ed Dios. (1 Samuel 1:19-28; 7:15-17) Agayla ran maabig ya ehemplo a para ed peles-agew iran ariripen nen Jehova, saray walad kalangweran tan matatken!
7. (a) Siopa ed “panamegley na pananisia et tinalo daray panarian a manbabakal”? (b) Siopa so “angipakurang na inkatunong” ed panamegley na pananisia?
7 Diad pananisia et sikatayo so matalonan mangabet ed amin a subok na katooran tan makagawa na antokaman a mitukoyan ed madibinon linawa. (Basaen so Hebreos 11:33, 34.) Diad pangisita na nagkalalo nin gawa na pananisia, mapatnag a walad kanonotan nen Pablo iray Hebreon uko-ukom, arari, tan propetas, lapud kapkapanalambit to so ontan iran lalaki. “Diad panamegley na pananisia” et saratan ya uko-ukom a singa si Gideon tan si Jepte et “tinalo daray panarian ed bakal.” Ontan met nen Arin David, a tinalo toray Pilisteos, Moabitas, Sirianos, Edomitas, tan arum nira. (2 Samuel 8:1-14) Ontan met ed panamegley na pananisia, saray maptek ya uko-ukom so “angipakurang na inkatunong,” tan say matunong a simbawa nen Samuel tan arum a propetas so amakiwas ed arum ya ompaliis odino ombeneg ed gawan-mauges.—1 Samuel 12:20-25; Isaias 1:10-20.
8. Anton sipan so agamoran nen David, tan diad anto so angitontonan to?
8 Si David so sakey a diad panamegley na pananisia et “agamoran toray sipan.” Insipan nen Jehova ed sikato: “Say mismon tronom so magmaliw a sakey a niletneg a malet ed panaon ya ag-ageteran.” (2 Samuel 7:11-16) Tan sinumpal na Dios diad impangiletneg to ed Mesianicon Panarian nen 1914.—Isaias 9:6, 7; Daniel 7:13, 14.
9. Diad leksab na anto ran sirkumstansya a ‘saray sangi na leon so apepet ed panamegley na pananisia’?
9 Si propeta Daniel so matalonan angabet ed subok na pananisia sanen intultuloy to so nampikasi ed Dios unong ed inagew-agew ya ugali to anggaman ed maarin ganggan. Diad pananisia na sakey a manamemben na katooran, si Daniel so “amepet ed saray sangi na leon” unong a si Jehova so angiliktar ed sikaton mabilay ed ungib na leon ya angibantakan ed sikato.—Daniel 6:4-23.
10. Siopa so “nansiansia ed biskeg na apuy” diad panamegley na pananisia, tan anto so itulong na mipadparan pananisia ed sikatayo a gawaen?
10 Saray Hebreon kakaiba nen Daniel a manamemben na katooran a si Sidrac, Misac, tan Abednego so “nansiansia ed biskeg na apuy.” Sanen sikato so pinagyaw ed patey diad pinapetang na alablabas a palbaan, imbaga ra ed si Arin Nabucodonosor a, balanglan sikara so iliktar na Dios da odino andi, sikara so agmanlingkor ed saray monarkon dirios na Babilonia odino mandayew ed talintaon impaalagey to. Ag-inerep nen Jehova so apuy ed saman a palbaan, balet ta sineguro ton saman so agmamasakit ed saray taloran Hebreos. (Daniel 3:1-30) Say kaparan pananisia so ontulong ed sikatayon mamemben na katooran ed Dios diad punto na nayarin patey ed lima na kabusol.—Apocalipsis 2:10.
11. (a) Diad panamegley na pananisia, siopa so “akaliktar ed tarem na kampilan”? (b) Siopa so “agawan mabiskeg” ed panamegley na pananisia? (c) Siopa so “nagmaliw a mabayani ed bakal” tan “dineral daray armada na sankaili”?
11 Si David so “akaliktar ed tarem na kampilan” na saray totoo nen Arin Saul. (1 Samuel 19:9-17) Saray propeta ya Elias tan Eliseo so akaliktar ed patey diad kampilan. (1 Arari 19:1-3; 2 Arari 6:11-23) Balet siopa a ‘manlapud maletey a kipapasen so agawan mabiskeg ed panamegley na pananisia’? Bueno, impasen nen Gideon so inkasikato tan saray totoo to a maletey a tuloy a mangiliktar ed Israel a manlapud saray Midianitas. Balet sikato so “ginawan mabiskeg” na Dios, ya angiter ed sikato na impanbiktorya—tan dia lambengat ed 300 a lalaki! (Uko-ukom 6:14-16; 7:2-7, 22) “Manlapud maletey a kipapasen” sanen say buek to so kinatli, si Samson so “ginawan mabiskeg” nen Jehova tan intarok to ed patey so dakerakel a Pilisteos. (Uko-ukom 16:19-21, 28-30; ipareng so Uko-ukom 15:13-19.) Nayarin wala ed kaisipan met nen Pablo si Arin Hezekias a bilang sakey ya “agawan mabiskeg” a manlapud maletey a kipapasen ed militar tan anggan diad pisikal. (Isaias 37:1-38:22) Diad limog na saray ariripen na Dios a “nagmaliw a mabayani ed bakal” et si Ukom Jepte tan si Arin David. (Uko-ukom 11:32, 33; 2 Samuel 22:1, 2, 30-38) Tan saraman so “aneral ed saray armada na sankaili” so angisakup ed si Ukom Barak. (Uko-ukom 4:14-16) Amin na sarayan agawgawa so nepeg a mangumbinse ed sikatayo a diad panamegley na pananisia et nayarian tayon matalonan abeten so amin a subok na katooran tayo tan nagawaan so antokaman a mitukoyan ed linawa nen Jehova.
Arum Iran Ehemplo ed Pananisia
12. (a) Anto ran “bibii so angawat ed saray inaatey da diad inkioli”? (b) Diad anton dalan a say kioli na pigaran totoo na pananisia so “magmaong”?
12 Isasakup na pananisia so panisia ed kikioli, sakey ya ilalon ontulong ed sikatayo a mamemben na katooran ed Dios. (Basaen so Hebreos 11:35.) Lapud pananisia, “inawat na saray bibii so inaatey da diad inkioli.” Diad pananisia tan pakayari na Dios, et pinaoli nen Elias so anak a laki na balo ed Zarepat tan pinaoli ed bilay nen Eliseo so anak a laki na Shunamitan bii. (1 Arari 17:17-24; 2 Arari 4:17-37) “Balet arum iran lalaki so pinairap [literal, “pineknek ed bulawit”] lapud agda awaten so kibulos diad panamegley na dondon, ta pian sikara so makagamor ed magmaong a kioli.” Mapatnag a sarayan abidbir ed Kasulatan iran tastasi nen Jehova so pinekpek ed patey, ya agda awaten so kililiktar a mankaukolan na panangikumpromiso ed pananisia ra. Say kioli ra so “magmaong” lapud agla nakaukolan a sikara lamet so ompatey (a singa saraman so pinaoli nen Elias tan Eliseo) tan nagawa ed leksab na uley na Panarian diad panamegley nen Jesu-Kristo, say “Maandon Ama” a say dondon to so angitarya na pankanawnawa a para ed andi-anggaan a bilay diad dalin.—Isaias 9:6; Juan 5:28, 29.
13. (a) Saray “inkaludlurey tan inkalewetlewet” so sinagmak na siopa? (b) Siopa so akasagmak na “inkabalorbalor tan inkipangawpangaw”?
13 No walaan itayo na pananisia, nayarian tayon sungdoan so panamasegsegang. (Basaen so Hebreos 11:36-38.) Sano napasegsegang, makatulong so pannonot ed ilalo na kioli tan say pakabidbir a nayarian itayo na Dios a pabiskegen a singa ginawa to ed saray “arum [ya] angawat na inkasubok da [odino, impakasali ed pananisia] diad inkaludlurey tan inkalewetlewet, peteg, nagkalalo nen say satan, diad panamegley na inkabalorbalor tan inkipangawpangaw.” Saray Israelitas “so nantultuloy . . . a nanludlurey ed saray propetas to, ya anggad say sanok nen Jehova so dinmapo ed katooan to.” (2 Awaran 36:15, 16) Diad pananisia, si Micaias, Eliseo, tan arum iran ariripen na Dios so nansungdo ed saray “impanludlurey.” (1 Arari 22:24; 2 Arari 2:23, 24; Salmo 42:3) Saray “impanlewetlewet” so kabkabat ed saray agew na arari tan propeta na Israel, tan saray kakabusol so “angabil” ed si Jeremias, aliwan diad impanampal ed sikato a bilang insulto. Saray “inkabalorbalor tan inkapriso” so nayarin mangipanonot ed sikatayo ed saray eksperiensia to tan ontan met ed si propeta Micaias tan Hanani. (Jeremias 20:1, 2; 37:15; 1 Arari 12:11; 22:26, 27; 2 Awaran 16:7, 10) Lapud walaan na mipadparan pananisia, saray modernon-agew a tastasi nen Jehova so akayarin mangisungdo ed saray miulibay ya impanirap “nisesengeg ed inkatunong.”—1 Pedro 3:14.
14. (a) Siopa so arum ed saramay “tinupak”? (b) Siopa so nayarin “ategtegteg”?
14 “Sikara so tinupak,” kuan nen Pablo. Sakey ed ontan a too na pananisia ed si Zacarias, ilalak nen saserdoten Jehoiada. Alimbos na espiritu na Dios, sikato so nansalita a sumpad saray apostata ed Juda. Nansumpalan? Diad ganggan nen Arin Jehoash, saray nannunonong so anupak ed sikato diad patey ed looban na abung na Jehova. (2 Awaran 24:20-22; Mateo 23:33-35) Inyarum nen Pablo: “Sikara so asubok, sikara so tinegteg.” Nayarin walad kanonotan to si propeta Micaias a sakey ed saraman so “asubok,” tan saray maseguron tradisyon na Judios so mangibabagan si Isaias so ategteg a nankadua kaleganan na impanuley nen Arin Manases.—1 Arari 22:24-28.
15. Siopa so anagmak na “inkapabpabanday” tan “impanteyengteyeng ed kabueran”?
15 Arum so “inatey diad kampilan,” a, singa alimbawa, et saray kapara nen Elias a propeta na Dios a “pinatey ed kampilan” diad saray agew nen marelmeng ya Arin Ahab. (1 Arari 19:9, 10) Si Elias tan Eliseo so kaiba na saramay walaan na pananisia a “nanakarakar a nankawes na katat-na-karnero, diad saray katat-na-kanding, legan a sikara so makabos, diad kairapan, diad impakapabpabanday.” (1 Arari 19:5-8, 19; 2 Arari 1:8; 2:13; ipareng so Jeremias 38:6.) Saraman so “nanteyengteyeng ed kabueran tan kapalandeyan tan saray kueba tan ungiungib na dalin” a bilang puntirya na panamasegsegang so mangisakup ya aliwa lambengat ed si Elias tan Eliseo noagta ontan met ed saray 100 a propetan inyamot nen Obadias a tunggal 50 ed saray kueba, a sikara so nirasyonan to na tinapay tan danum sanen si managtalintaon Reyna Jezebel so ginmapon “mamegpeg ed saray propetas nen Jehova.” (1 Arari 18:4, 13; 2 Arari 2:13; 6:13, 30, 31) Agayla ran manamemben na katooran! Agpankelawan ya imbaga nen Pablo: “Say mundo [agmatunong a sosyedad na too] so agmakana ed sikara”!
16. (a) Akin a saray sakbay-Kristianon tastasi nen Jehova so agni angawat “na kasumpalan na sipan”? (b) Para ed saray tasi nen Jehova ed sakbay-Kristianon panaon, say pagmaliw a “nagawan ayadyari” so nepeg a misiglaotan ed anto?
16 Say pananisia so mangiter ed sikatayo na kumbiksion a diad inggeter na Dios a panaon et amin na saramay mangaro ed sikato so “makagungguna ed kasumpalan na sipan.” (Basaen so Hebreos 11:39, 40.) Saray sakbay-Kristianon manamemben na katooran “so naikdan na pantasi ed panamegley na pananisia ra,” a natan et sakey a pamaakaran na Makasulatan a kuritan. Balet ta agda ni naawat “so kasumpalan na sipan” na Dios diad panamegley na mangaraldalin a kioli a tekep na ilalo ed maandon bilay diad leksab na uley na Panarian. Akin? “Ta pian sikara komon so agnagawan ayadyari a nilikud ed” saray alanaan a patumbok nen Jesus, ya “anengneng lan akauna na Dios so bengatlan magmaong”—imortal a bilay ed tawen tan saray pribilehyo na piuley ed si Kristo Jesus. Diad panamegley na kioli ra, a ginmapo ed samay kayari na inkiletneg na Panarian nen 1914, saray alanaan a Kristianos so “agawan ayadyari” ed katawenan sakbay a saray Tasi nen Jehova ed sakbay-Kristianon panaon so napaoli ed dalin. (1 Corinto 15:50-57; Apocalipsis 12:1-5) Para ed saraman ya akadkaunan tastasi, ya “agawan ayadyari” so nepeg a misiglaotan ed mangaraldalin a kioli ra, say “kabulos [da ed kaunoran] a manlapud panangaripen na kabubulok,” tan pakagungguna ra ed atooan ya inkayadyari ed panamegley na saray serbisyo na Atagey a Saserdoten Jesu-Kristo tan say 144,000 a mangatatawen iran saserdoten katambayan to legan na Milenyon Uley to.—Roma 8:20, 21; Hebreos 7:26; Apocalipsis 14:1; 20:4-6.
Pansiansiaen a Sankanengneng So Manamayadyari na Pananisia
17, 18. (a) Pian ontalona ed lumba diad maandon bilay, anto so nepeg tayon gawaen? (b) Panon a si Jesu-Kristo so “Manamayadyari na pananisia tayo”?
17 Diad impanalaysay ed saray gawa na sakbay-Kristianon tastasi nen Jehova, inturo nen Pablo so manunan ehemplo na pananisia. (Basaen so Hebreos 12:1-3.) Agaylan sengegan na kapaseseg so pakawalaan na ‘agaylan baleg a lurem na tastasi a walad kaliberliber tayo’! Saya so managdag ed sikatayon mangipukay ed amin a pakabelatan a mangamper ed espiritual ya aligwas tayo. Tulongan to itayon ompaliis ed kasalanan diad kabalang odino kakulangan na pananisia tan ombatik a tekep na sungdo ed Kristianon lumba a para ed andi-anggaan a bilay. Pian narapat tayo so kalat, anggaman kuan, nepeg tayon gawaen so bengatlan nagkalalo ni. Balet anto ‘tan?
18 Pian sikatayo so ontalona diad lumba a para ed maandon bilay ed balon sistema na Dios, nakaukolan tayo so “onnengneng a mapetepet ed Manunan Ahente [odino, Manunan Pangulo] tan Manamayadyari na pananisia tayo, si Jesus.” Say pananisia nen Abraham tan arum niran manamemben na katooran a nambilay sakbay na mangaraldalin a ministeryo nen Jesu-Kristo so ag-ayadyari, aliwan nagnap, unong ta agda atalosan nensaman iray agni asumpal a propesiyas nipaakar ed Mesias. (Ipareng so 1 Pedro 1:10-12.) Balet diad panamegley na inkianak nen Jesus, ministeryo, impatey, tan inkioli, dakel iran Mesianicon propesiyas so asumpal. Sirin saray pananisia ed ayadyarin pantalos so “sinmabi” ed panamegley nen Jesu-Kristo. (Galacia 3:24, 25) Nagkalalo ni, manlapud mangatatawen a posisyon to et si Jesus so nantultuloy a Manamayadyari na pananisia na saray patumbok to, a singa sanen inkalbo to ed sikara so masanton espiritu nen Pentecostes 33 K.P. tan diad panamegley na puyan a nantultuloy ya amabiskeg na pananisia ra. (Gawa 2:32, 33; Roma 10:17; Apocalipsis 1:1, 2; 22:16) Agaylan sikatayo so misalsalamat ed sayan “Matoor a Tasi,” sayan “Manunan Pangulo” na saray Tasi nen Jehova!—Apocalipsis 1:5; Mateo 23:10.
19. Akin a si Jesus so ‘imanoen a maapit’?
19 Lapud aliwan mainomay so pansungdo ed saray panagbalaw na andi-pananisia, impaseseg nen Pablo: “Imanoen a maapit so sakey [si Jesus] a nansungdo ed ontan a sumlang a tongtong na saray makasalanan a sumpad saray dilin pankaabingan da, pian sikayo komon so nakesawan tan onsuko ed saray kamarerwa yo.” Peteg, no pansiansiaen tayon akateen iray mata tayo “ed Matoor a Tasi,” si Jesu-Kristo, sikatayo so agbalot onkesaw diad panggawa ed madibinon linawa.—Juan 4:34.
20. Anto so arum ed saray bengatlan naaralan yo nipaakar ed pananisia diad impanalaysay ed Hebreos kapitulo 11:1–12:3?
20 Manlapud ‘baleg a lurem na tastasi’ et naaralan tayo so malaem nipaakar ed saray nengneng na pananisia. Alimbawa, saray pananisian singa say wala ed si Abel so mamabiskeg na apresasyon tayo ed bagat nen Jesus. Say tuan pananisia so manggawa ed sikatayon makpel a tastasi, a singa si Enoc a nansalitan sitetepel ed mensahe nen Jehova. A singa ed si Noe, say pananisia tayo so mamakiwas ed sikatayon manumbok ed saray bilin na Dios a maapit tan manlingkor a bilang managpulong na inkatunong. Say pananisia nen Abraham so mangidanet ed sikatayo na pankaukolan na katutulok ed Dios tan panmatalek ed saray sipan To, anggaman arum ed sikara so agni asumpal. Say alimbawa nen Moises so mangipanengneng a say pananisia so ontulong ed sikatayon mansiansian andi-matik ed sayan mundo tan ontalindeg a matoor diad dapag na totoo nen Jehova. Saray kurang na uko-ukom ed Israel, arari, tan propetas so mamaneknek a say pananisia ed Dios so mamabiskeg ed sikatayo diad utel na panamasegsegang tan subsubok. Tan agaylan sikatayo so misalsalamat a say sankamatalonaan ya ehemplo nen Jesu-Kristo so manggawa ed pananisia tayon mabiskeg tan agnagiing! Sirin, diad si Jesus a bilang Pangulo tayo tan diad biskeg na Dios tayo, itultuloy tayon ipatnag so masungdon pananisia a bilang Tastasi nen Jehova.
Antoray Ebat Yo?
◻ Anto ran gawa na sakbay-Kristianon tastasi nen Jehova so mamaneknek a say pananisia so nipanengneng diad nagnap a panagmatalek ed Dios diad arap na kaatapan?
◻ Akin a nibagan diad pananisia et matalonan naabet tayo so kada subok na katooran tayo?
◻ Anto so prueba a diad panamegley na pananisia et nasungdoan tayo so panamasegsegang?
◻ Akin a si Jesus so atawag na “Manamayadyari na pananisia tayo”?
◻ Anto so arum ed saray dakerakel a nengneng na pananisia?
[Saray Litrato ed pahina 14, 15]
Impanengneng nen David so pananisia diad insaral ton nagnap ed si Jehova. Maabig ya ehemplo ed saray totoo nen Jehova natan!
[Litrato ed pahina 16]
“Saray bibii so angawat ed saray inaatey da diad inkioli.” Saray pananisia ed kioli so ontulong ed sikatayon mamemben na katooran ed si Jehova