Ipatnag So Inkamagunaet diad Pangiyabawag ed Maong a Balita
“Wala so inkamagunaet ed biang ko diad pangiyabawag ed maong a balita met ed sikayo.”—ROMA 1:15.
1, 2. Panon so mabetbet ya ikiwas na totoo ed pankaganatan?
“SIKARA so nanlapu ed amin a pasen . . . nilasuslasus a boluntaryo so dinmagsa ed satan a pasen, a sinmabi ed saray trak a napno na tagano tan kawes, a nampaalagey na saray tarong, arum so nantrabaho ed 18 ya anggad 20 oras ed sanagew, arum so agla naugip ed pigaran inmunan agew kayari na makapataktakot ya inkagba na diki.”
2 Ontan so inkiwas na saray totoo sanen dinesyang na delap so sakey a komunidad ed sentral a California nen imbeneg a primabera, ya anagdag ed 24,000 a totoon ombatik ed kaligenan. On, sano saray desyang—a manlapud lokal a delap ya angga ed saray yegyeg ya anggad saray aksidente ed nuklar—ya ondapo, saray totoo so mabetbet ya onkiwas a boluntaryo tan onlan ontulong. Sikara so mangilislis ed saray manggas da, a singa panangibaga, a subaen daray kaatapan tan kairapan tan magunaet ya ontulong ed arum—anggan diad saray sigpot ya agkabkabat.
Diad Panaon na Kaganatan
3. Anton alablabas a pankaganatan so aarapen na katooan natan?
3 Natan, say katooan so nidudunget ed sankabalgan a desyang ed awaran. Aliwan lapud deral a gagawaen na too ed kaliberliber, ed kebbiew na bakal nuklar, odino diad idadaak na krimen tan karawalan, a singa sarayan bengatla so seryoso. Noag ingen, say katooan so nipapaarap ed saman so tinawag nen Jesu-Kristo na “baleg a kairapan ya agni agawa nanlapud inggapo na mundo ya anggad natan, andi, nisay nagawa lamet.” Diad pangipanengneng ed agaylan panagderal a gawaen na “baleg a kairapan,” intuloy nen Jesus ya ibaga: “Diad tua, anggad saratan ya agew so napatikeyan, anggapo so laman a nilaban.”—Mateo 24:21, 22.
4. Diad arap na ontan a pankaganatan, panon so nepeg tayon ikiwas?
4 Panon so ikiwas yo no kabat yon saray dakel a totoo, a pati arum ed saramay maapit ed sikayo, so agla mabayag et natawtaw ed satan a kairapan? Kasin sikayo so magunaet ya ontulong? Nonoten so mapropetikon pasingawey nen Ezequiel ed lakin walaan na tinteroan na sekretaryo. Nibaga ed sikato a saramay nawalaan na simbolikon tanda lambengat ed kamulingan da so makaliktar ed kaderal na Jerusalem, tan sikato so sakey a manggawa ed satan a manangiliktar na bilay a tanda. Panon so inkiwas to? “Ginawak so singa unong na ingganggan mo ed siak,” so inreport to.—Ezequiel 9:1-11.
5. Anton kimey so niganggan ed sikatayon gawaen, tan panon so inkaganat na satan?
5 Kasin ipapatnag yo so parehon inkamabulos tan inkamagunaet a singa saman so lakin akakawes na lienso a ginawa to so unong na ingganggan nen Jehova? Anto so ingganggan nen Jehova? Diad panamegley na Anak to, Jesu-Kristo, inter to so bilin: “Onla kayo sirin tan manggawa na babangatan ed amin a nasyones, . . . a bangatan yo ra a mangunor ed amin a bengatlan ingganggan ko ed sikayo.” (Mateo 28:19, 20) Saya so lalon manangiliktar na bilay a kimey a singa samay simbolikon panagtanda ed kamulingan diad agew nen Ezequiel. Siopaman ya ag-onkiwas tan magmaliw a babangatan nen Jesu-Kristo so managmak na kadederal diad lima na Manunan Manamatey na Dios. (2 Tesalonica 1:6-8) Kasin nalilikas yo so kaganatan? Kasin satan so ipapanengneng yo diad pangipapatnag na inkamagunaet a mangiyabawag ed maong a balita?
Inkamagunaet—Panon a Nipatnag?
6. Anto so labay ya ibaga na “inkamagunaet”?
6 Saray totoo nen Jehova, ed interamente, so makalilikas ed kaganatan na panaon. Amin tayo so magunaet a makanengneng ed dakel a totoo no nayari a niliktar diad onsasabin “baleg a kairapan.” Say inkamagunaet unong ed sakey a diksionaryo, so “makdem odino mapetepet a pilalek diad pangegemtan odino diad pakagamor na bengatla.” Say sakey a magunaet nipaakar ed sakey a bengatla so mangipaarap ed kanonotan tan kiwas diad pakagamor ed satan. Gawaen to so amin a bengatla ed pakayari to pian natalonaan so anggan anton babeng tan samben, tan sikato so mantultuloy diad panggawa ed satan ya anggad narapat to so kalat to. Ontan so alikna nen apostol Pablo nipaakar ed ministeryo to, tan maong no sikato so aligen tayo.—1 Corinto 4:16.
7. Akin a labay nen Pablo so onla ed Roma?
7 Imanoen, alimbawa, iray salita nen Pablo ed saray Kristianos ed Roma, diad Roma 1:13-16. “Aminpigapigan ginetmak so onla ed sikayo,” so kuanto ed sikara. Akin? “Ta pian komon et nagamoran ko so arum a bunga met ed limog yo,” so impaliwawa to. Diad saya, kasin si Pablo so basta wala ed kaisipan to so idalaw ed saray agagi ed Roma tan angangko ta pasesegen to ran mamayubon nagkalalon nagnap “ed bunga na espiritu,” a singa ibabaga na arum a komentarista? (Galacia 5:22, 23) Andi, ta saray inyarum ton salita ya “anggan diad limog na amin a nasyones” et agawan malinew a sikato so nanggetman makagamor ed bunga na Panarian ed limog na saray aliwan-Kristianon komunidad diman ed Roma. Kinaliktan ton itarok so maong a balita ed Roma tan angangko a manlapud’man ya anggad saray pasen ed arawi.—Roma 15:23, 24.
8. Panon a si Pablo “so asebelan” ya onla ed Roma?
8 “Balet siak so asebelan ya anggad natan,” so inkuan nen Pablo. Sinebelan ya anto? Kasin sikato so okupadon tuloy ed saray personal a bengatlan dampoten? Bueno, si Pablo so sakey a toon okupado balet ta aliwan diad saray personal ya interes. Diad panaon na impansulat to ed saray taga Roma (ngalngalin 56 K.P.), asumpal to la so duaran malaknab a misioneron biahe to tan sikato so okupadon manggagawa ed komatlo. Mabetbet, a diad sarayan biahe et sikato so indirihe na masanton espiritu diad saray espesipikon kimey. (Nengnengen so Gawa 16:6-9.) Anggan singa sanen insulat to so sulat to, saray plano so agawa diad iyakar to ed Jerusalem “pian manlingkor ed saray sasantos” diman. (Roma 15:25, 26) Tan naeksperiensia to met so dakerakel nin arum a ‘pakasebelan’ ed sayan nengneng.—Nengnengen so 2 Corinto 11:23-28.
9. Panon so impangipatnag nen Pablo na inkamagunaet diad pangiyabawag ed maong a balita?
9 Anggaman ontan, agnilikna nen Pablo a sikato so walaan na magenap a gawaen, nisay inkatunongan to a sikato so walaan na kimey tan saman so daakan. Kinaliktan to ni so manggawa na mas dakel. Diad tua, insulat to: “Wala so inkamagunaet ed biang ko diad pangiyabawag ed maong a balita met ed sikayo ditan ed Roma.” Ontan so tutukoyen na inkamagunaet! Matukotukoy, si Propesor F. F. Bruce ed libro ton The Epistle of Paul to the Romans so angikuan ed sayan apostol: “Say panangipulong ed ebanghelyo so wala ed dala to, tan agto nayarian so ontunda ed satan; sikato so agbalot ‘andian na kimey’ noagta sikato so pirmin wala ed satan, a babayaran to so ontan ya utang to ed amin a katooan—sakey ya utang ya agton balot nagnap a nabayaran legan a sikato so manbibilay.” Kasin ontan so panmoria yo ed ministeryo?
10. Anto ran ‘babeng’ so nayarin wala ed dalan tayo, balet panon so nepeg tayon pangarap ed saratan?
10 Natan, amin a totoo nen Jehova so okupado ed dakel iran responsabilidad. Arum so walaan na pamilyan asikasoen. Arum so walaan na obligasyon ed arum a pasen. Arum so limitado ed nayarian dan gawaen nisengeg ed edad odino bunigas na laman. Tan siansia nin saray arum so walaan na ambelat a kimey ed Kristianon kongregasyon. Ingen, namoria tayo met a say panaon so nanaupot la a para ed peles a sistema na bengabengatla, tan say panagtasi ed Panarian so nepeg a niiter. (Marcos 13:10) Sirin, singa si Pablo, nepeg tayon ipatnag so inkamagunaet a makadampot diad kimey na panagpulong anggaman ed saray ‘sebesebel’ a nayarin onsara ed dalan tayo. Ag-itayo komon manngiras, a nonoten a dakel so kimey a gawaen tayo.—1 Corinto 15:58.
“Akautang” ed Amin
11. Anto so kabaliksan na “Siak so akautang”?
11 Wala so sananey a manamakiwas a puersa ed benegan na andi-kesaw iran sagpot nen Pablo diad panangiyabawag ed maong a balita. “Namparan diad saray Griego tan diad saray Barbaro, namparan diad saray makabat tan diad saray makulangkulang et siak so akautang,” so imbaga nen Pablo. (Roma 1:14) Diad anton dalan a si Pablo so “akautang”? Arum iran patalos so angusar ed sayan balikas a bilang “Siak so obligado” (New English Bible), “Siak so walaan na obligasyon” (Today’s English Version), odino “Utang ko so kimey” (Jerusalem Bible). Kasin ibabaga to, sirin, a say kimey na panagpulong so makapabelat a kimey odino obligasyon a nakaukolan ton sumpalen ed arap na Dios? Mainomay so pakabayubo ed ontan ya awawey no nabalang tayo so pakanengneng ed inkaganatan odino isuawi na saray pakasagyatan a minumundo. Balet aliwan ontan so wala ed kanonotan nen Pablo.
12. Diad siopa a si Pablo so “akautang,” tan akin?
12 A singa “apilin baseha” na Dios tan singa “sakey ya apostol na nasyones,” ginawa nen Pablo so sankabelatan a responsabilidad ed arap na Dios. (Gawa 9:15; Roma 11:13) Ingen say pantebek ed obligasyon so aliwa lambengat ed Dios. Inkuanto a sikato so “akautang” ed ‘saray Griego, Barbaro, makabat tan saray makulangkulang.’ Nisengeg ed panangasi tan pribilehyon niiter ed sikato, nilikna ton kimey to so pampulong ta pian amin a totoo so makadngel ed maong a balita. Amoria to, met, a linawa na Dios ya “amin a nengneng na totoo so nilaban tan ondateng ed suston pikakabat ed katuaan.” (1 Timoteo 1:12-16; 2:3, 4) Sikato no akin a sikato so nansagpot ya andi-tunda, ya aglambengat nambilay unong ed responsabilidad to ed Dios noagta ontan met ed impanbayar to na utang to ed saray kapara ton totoo. Kasin naliknam so ontan a personal ya utang ed saray totoo diad teritorya yo? Kasin liknaen mo a sika so akautang ed sikara diad pangibanikel mo na inkasikan mangitarok ed sikara na maong a balita?
“Ag-imbaing So Maong a Balita”
13. Anto so impangipasen nen Pablo ed maong a balita?
13 Peteg a si Pablo so matalonan ehemplo diad panangipatnag na inkamagunaet ed panangiyabawag na maong a balita. Inapresya ton tuloy so agkanepegan a panangasin impanengneng na Dios ed sikato, tan agto nilabay a satan so mansumpal ya andi-kakanaan. (1 Corinto 15:9, 10) Sikato no akin ya intuloy ton imbaga: “Ta agko imbaing so maong a balita.” (Roma 1:16) Manlapud punto de bista na too, saray Kristianos so aliwa lambengat ya aglabalabay noagta sikara met so minudmora. “Sikami so nagmaliw a basura ed mundo, dutak na amin a ganagana,” so inkuan nen Pablo. (1 Corinto 4:13) Ingen sikato so agbinmaing a mangitarok na maong a balita ed Roma, say sentro na de-aral a mundo tan say letnegan na imperyal ya Imperyo na Roma. Sanen nidunget ed agpanlabay, inkapauges, odino isusumpa ni ingen ed kimey na panagpulong tayo, nayarian tayon nonoten so makapaseseg ya ehemplo nen Pablo.
14. Akin a si Pablo so “ag-angibaing ed maong a balita”?
14 “Ag-imbaing so maong a balita” so peteg a sananey a nengneng na pangibagan “ikinon so maong a balita,” tan ontan so nepeg tayon gawaen. Akin? Lapud “sikato so, diad tua, pakayari na Dios ed kilalaban diad siopaman a walaan na pananisia,” so impaliwawa nen Pablo. Sikato so walaan na malaem a personal ya eksperiensian mamabiskeg ed balikas to. Diad maong a balita, inkuan nen Pablo, “sikatayo so mangigegeba ed saray panagkatunongan tan ed amin ya atagey a bengatlan pinatalindeg a sumpad pikakabat ed Dios; tan itatarok tayo so amin a kaisipan diad inkadakep pian nagawan matulok ed Kristo.” (2 Corinto 10:5) No kasin saman so sumpa ed tradisyon na saray Judios, say pilosopya na saray Griego, odino biskeg na saray Romano, say maong a balita so nansumpal a mananalo.
15. Panon a say inkamagunaet so manamakiwas a puersa ed bilay nen Pablo?
15 Agaylan maabig ya imbes a liknaen a satan so pakabelatan, si Pablo so ‘magunaet’ a manumpal ed inter-na-Dios a responsabilidad to! A singa imbalikas to a mismo: “Lapud say pankaukolan so nipasakbat ed siak. Peteg, abagey ak la no agko iyabawag so maong a balita!” (1 Corinto 9:16) Sayan inkamagunaet so tinmulong ed sikaton mantultuloy diad dakel a taon na andi-kesaw a serbisyo, ta pian kaunoran et nayarian ton ibaga: “Siak so akibakal na maabig a pibabakal, binatik ko so babatiken ya angga ed kasampotan, sinumpal ko so pananisia.”—2 Timoteo 4:7.
Say Inkaepektibo So Mangarum ed Pansumpalan
16. Anto ran posiblen angat so nayarin arapen laki a walaan na tinteroan na sekretaryo diad pasingawey nen Ezequiel?
16 Singa si Pablo, say lakin walaan na tinteroan na sekretaryo ed pasingawey nen Ezequiel so andi-duaruwan magunaet nipaakar ed kimey to. Insempet to so maabig a report: Asumpal so misyon! Say salaysay so agmangibabaga ed sikatayo no panon so inyakar ton mananap ed amin na saray “mannangis tan managugol ed amin na saray makapadimlan bengatlan nagagawa.” (Ezequiel 9:4) Anggaman anggapo so nibaga nipaakar ed no panon so inkasumpal na amin na sayan panagtanda, malinlinew a saman so aliwan simplen kimey.
17. (a) Anto ran angat so aarapen yo diad kimey na panaggaway-babangatan, tan panon so pangarap yo ed saratan? (b) Kasin saray nakakaukolan a sagpot so makana?
17 Mipadpara natan, say kimey tayo so aliwan simpli. Say tepet, sirin, so: Panon so inkaepektibo tayo ed sayan manangiliktar-bilay a kimey? Pian makapanggawa na babangatan ed dakel a totoo no nayari, nepeg a sikatayo so mibiang ed sayan kimey a maparanay tan sistematiko, ya agpalabasen so anggan anton pankanawnawa diad pangipanabang na maong a balita. Singa sikatayo, saray totoo ed komunidad tayo so okupado; nayarin sikara so mataltalag ed abung sano sikatayo so ondalaw, tan no sikara so wadtan, sikara so mabetbet ya okupado. Anto so gawaen tayo? Bueno, nakaukolan tayo so mangiyapiger na suston rekord tan ompawil ed nanduruman panaon, a naynay, ya ilaloan a makaromog itayo na sakey a pitongtongan. Kasin saray ontan a sagpot so makabaliksan? Abuloyan so ontumbok ya antikey a salaysay a nanlapud duaran unabung a mangiter na ebat:
“Labay kon ibalikas so apresasyon ko ed saray Tasi nen Jehova diad dakel ya indalaw da ed abung ko. Kabat ko no maminsan a say kimey yo so agmoriaen na saramay wala ed paway na iglesia yo a tekep na entusiasmon kanepegan ton siyayaman. Sirin inisip kon ipinabang koray eksperiensiak ed sikayo tan ikuan ko so salamat ed sikayo!”
“Wala so dakerakel ed sikami a nanaerasan ed katuaan, dakel ed sikamin tuloy so manisia ya amin a dalan so mangipaarap ed kilalaban. Sikayon masebeg a mananap ed sakey a panlingkoran, agkayo onsasawa ed sikami! Sikami so aliwan makapasinagem a totoo, anggaman insultoen mi kayo, pabaingan mi kayo, tan idepak mi kayo. Agkayo onsusuko, lapud sikami so nibangat na dakel a katilaan, nibaga ed sikami so dakel iran makapakigtot ya estorya, tan binangatan a manggula ed sikayo pian nisiblet so mensahe na Panarian nen Jehova ed sikami.”
18. (a) Panon so pakatulong yo ed arum a mantebek ed maong a balita? (b) Panon so impanalona na sakey a manangipalapag ed mapatnag ya agpanangimano?
18 Pian nasabi so puso na sinansakey tan natulongan iran mantebek ed maong a balita nakakaukolan to so mas nen say akintapew a piarap, ya itulor so niparaan a mensahe, odino mangitilak na arum a literatura na Biblia. Nepeg tayon pambanikelan a tebeken so nakakaukolan da tan saray kapagaan da, saray labay tan agda labay, saray takot tan saray panangidumaduma. Amin na saya so mankaukolan na abalbaleg a panagnonot tan sagpot—tan inkamagunaet ed biang tayo. Imanoen so onggendan ya eksperiensia:
Sakey a manangipalapag so akitongtong ed sakey a bii diad sakey a puerta na apartment balet anggapo so malaem ya impakapitongtong. Diad impakaimanon walaray pigaran ugugaw ed kaliberliber, tinepet to no kaunongan karakel so anak na bii. Inmebat a saraya so agto anak noagta ananak na bayaw to, a kasabisabi ton nanlapu ed sananey a bansa. Agnambayag say tongtongan so sinmabi ed tema diad kakulangan na ayaman. Akipakna so manangipalapag a say makatunongan a panag-ayaman so mairap ya anapen ed angkabaleg iran syudad, unong a sikato met so walaan na saray kakanayon ya onsabi lan magano, tan inyopresi to so tulong. Say bii so aliketan tan tinawag to so bayaw to ed puerta. Nantultuloy so tongtongan tan sikara so naniteran na numero na telepono. Agto alingwanan so gagala na idalaw, say manangipalapag so mataktikan angilukas ed pahina 157 ed libron Makapambilay na Ando lan Ando tan impaliwawa to a diad insipan a balon sistema, saray problema ed panag-ayaman tan impleyo so naandi la. Say laki so asagyat a tuloy tan sipaparaan ya angawat ed libro. Saginonor, say manangipalapag so pinmawil ya imbalita to so nipaakar ed paabang ya apartment; intultuloy to met so tongtongan da ed Biblia.
19. Panaon la natan ed panggawa tayo na anto? Tan anto, so nakaukolan tayon singbaten a malaknab?
19 Say panaon na panangipulong ed maong a balita so nanaupot la. No panon kabayag ni so pantultuloy a “pangipuger na apatiran anghel ed apatiran dagem na dalin” so agtayo kabat. (Apocalipsis 7:1) Diad anggan anton kipapasen, say “baleg a kairapan” so siansia nin wala ed arapen, tan saray totoon masimpit impanpuso so natitipon. Peteg, saray “uma” so “amputi la ed panagani.” (Mateo 24:21, 22; Juan 4:35) Natan la so panaon na pambanikel tayon mabiskeg diad sayan aglan-balot-naulit a kimey. Panon so sankaabigan a pakausar tayo ed nakekeraan a panaon? Anto so nayarian tayon gawaen pian nawalaan na nanagnap a pibiang ed sayan manangiliktar-bilay a kimey? Tan anto so ontulong ed sikatayon mantultuloy a mangipatnag ed inkamagunaet diad panangiyabawag ed maong a balita? Sarayan tepet so nasingbat ed ontumbok a paway.
Imanoen So Ehemplo nen Pablo Unong ed Roma 1:13-16—
◻ Akin a sikato so magunaet ya onla ed Roma?
◻ Anto so angamper ed sikato diad iyakar? Balet panon so inkiwas to?
◻ Diad siopa tan akin a sikato so “akautang”?
◻ Panon so liknaan to nipaakar ed maong a balita? Akin?
◻ Singa si Pablo, anto so gawaen tayo pian magmaliw ya epektibo diad panangiyabawag ed maong a balita?