Nakakaukolan na Pikakasi So Kimey
“Si Jehova so arawi a manlapud saray marelmeng, balet say pikakasi na saray matunong so dengelen to.”—ULIRAN 15:29.
1. Anto so sakey a kondisyon a gawaen pian say Dios so mangebat ed saray pikakasi tayo?
AMIN a nakakaukolan nen Jehova so makabat, maptek, tan maaro. Sikara so agbalot makapabelat. (1 Juan 5:3) Isasakup na satan iray nakakaukolan to nipaakar ed pikakasi, sakey ed satan et say nepeg tayon pangipakurang na bilay a mitukoyan ed saray pikakasi tayo. Say kurang na kiwas tayo so nepeg a mamaliket ed si Jehova a Dios. Tano andi, panon so pakapanilalo tayo ed sikaton mangimano ed saray kerew tan pikakasi tayo a tekep na pabor?
2, 3. Akin ya ag-inebatan nen Jehova so pikakasi na saray Israelitas, a singa nanengneng ed saray salita nen Isaias, Jeremias, tan Miqueas?
2 Saya so sakey a nengneng na pikakasin agnanaimano na maslak a walad Kakristianoan, unong a singa agnaimano na saray apostatan Israelitas ed agew nen Isaias. Sikato no akin a sikato so impairepresenta ed propeta to a mangibaga: “Anggamano manggawa kayo na dakel a pikakasi, agak ontalineng . . . Manuras kayo; manlinis kayo; ekal yo so kaugsan ed saray pidedeneng yo a manlapud arap na matak; tundaan yo so manggawa na mauges. Aralen yon gawaen so maong.” (Isaias 1:15-17) On, no saraman ya Israelitas et kaliktan da so pabor na Dios, nakaukolan da so onkiwas ed nengneng a mamaliket ed sikato. A singa maabig a nibaga: “No labay yon sikayo so dengelen na Dios sano manpikasi kayo, Sikato so nepeg a dengelen yo sano sikato so mansalita.”
3 Diad tua, naulit-ulit ya aromog nen Jehova a Dios a nakaukolan ya ipanonot ed katooan ton Israel irayan katuaan. Sirin nabasa tayo: “Siopaman a mangiyarawi na layag to a manlapud pandengel ed ganggan—anggan say pikakasi to so bengatlan makapadimla” ed Dios. “Si Jehova so arawi ed saray marelmeng, balet say pikakasi na matunong so dengelen to.” (Uliran 28:9; 15:29) Lapud sayan kipapasen, inyermen nen Jeremias: “Sinakbungan mo [Jehova] so inkasika ed sakey a lurem, pian anggapo so makalabas a pikakasi.” (Tagleey 3:44) Peteg, say pasakbay ya akapuyanan nen Miqueas ya iter so asumpal: “Sikara so ontawag ed si Jehova ya onkerew na tulong, balet agto ra ebatan. Tan iyamot to so lupa to ed sikara ed satan a panaon, unong a sikara so nanggawa na kaugsan ed saray pidedeneng da.”—Miqueas 3:4; Uliran 1:28-32.
4. Anto so mangipanengneng ya anggan diad limog na saray totoo nen Jehova et arum so agmangapresya ed pankaukolan na kimey a mitukoyan ed pikakasi ra?
4 Sirin nakaukolan so pambilay a mitukoyan ed saray pikakasi tayo. Kasin makana so pangidanet ed sayan katuaan natan? Peteg ya ontan, aliwan lapud kipapasen ed Kakristianoan noagta ontan met lapud kipapasen na arum ed saray dedikadon totoo nen Jehova. Diad masulok a 3,000,000 a manangipalapag na maong a balita nen katantaon, anggad 37,000 so adispelosip diad gawan makapuy ed sakey a Kristiano. Satan so nansumpal ed resyo na ngalngalin sakey ed 80. Nayari, maslak ed sarayan sinansakey so manpipikasin naynay. Balet kasin sikara so onkikiwas a mitukoyan ed saray pikakasi ra? Andin balot! Anggan arum ed saray mamatatken a wala ed sigpot-panaon a serbisyo ed pigamplo lan taon so kaiba na saramay adisiplinaan ed sakey a dalan odino diad sananey. Agaylan makapaermen! Tua, “Saman so manisip a manalalagey so mangimano a sikato so agnatumba,” a sikato so ag-onkiwas ed nengneng a manggawa ed saray pikakasi ton agnaawat ed Managgawa to.—1 Corinto 10:12.
No Akin a Saray Pikakasi So Mankaukolan na Kimey
5. Pian ebatan nen Jehova iray pikakasi tayo, panon a nepeg tayon paneknekan so inkasimoon tayo?
5 Pian saray pikakasi tayo so dengelen nen Jehova, aliwa lambengat a sikatayo so malinis ed moral tan espiritual noagta sikatayo met so mamaneknek na inkasimoon ed saray pikakasi tayo diad pankimey ed saman so ipipikasi tayo. Say pikakasi lambengat so aliwan kasandi na simamatua, matudion sagpot. Aggawaen nen Jehova ed sikatayo so nagawaan tayo ed inkasikatayo diad panamegley na magunaet a pangiyaplika ed simbawa na Salita to tan panumbok ed panangiwanwan na masanton espiritu. Sikatayo so nepeg a mabulos a manggawa ed amin a nayarian tayo ed sayan pamaakaran ta pian sikato so walaan na letnegan diad pangebat ed saray pikakasi tayo. Sirin, ‘agtayo kekerewen so alabas nen say mabulos tayon kimeyan,’ a singa sankaabigan ya impangibaga na sakey.
6. Nisengeg ed anton duaran rason a sikatayo so manpikasi?
6 Anggaman kuan, say tepet so nayarin nitepet: ‘Akin a manpikasi no kimeyan tayo met lamlamang so ipipikasi tayo?’ Nepeg tayo so manpikasi ed anggan diad duaran maabig a rason. Ununa, diad saray pikakasi tayo et bidbiren tayon amin a maabig a bengatla so nanlapud Dios. Sikato so Manangiter na amin a maabig tan ayadyarin palangkap—say sinag na agew, uran, mabungan panpanaon, tan dakel nira! (Mateo 5:45; Gawa 14:16, 17; Santiago 1:17) Komadua, balanglan saray sagpot tayo so maaligwas odino andi so mandepende ed panamendisyon nen Jehova. A singa nabasa tayo ed Salmo 127:1: “Noag si Jehova a mismo so mangipaalagey na abung, saray managpaalagey so mankimey ya andi-kakanaan. Noag si Jehova so manbantay ed syudad, saray managbantay so manpuyat ya andi-kakanaan.” Miparan punto et saray salita nen apostol Pablo ed 1 Corinto 3:6, 7: “Siak so nantanem, si Apollo so nansalog, balet say Dios so mamapabaleg; sirin nisay saman so nantanem so antokaman nisay saman so nansalog, noagta say Dios a mamapabaleg.”
Arum Iran Kadaanan ya Ehemplo
7, 8. (a) Anton agawa ed bilay nen Jacob so mangipanengneng ya inapresya ton saray kimey so nepeg ya ulopen na pikakasi? (b) Anton ehemplo so inter nen Arin David ed sayan pamaakaran?
7 Irereport na Kasulatan so dakel iran kason mangipanengneng a saray matoor ya ariripen nen Jehova so nankimey ed saman so impikasi ra. Imanoen tayo so pigaran manangirepresentan ehemplo. Lapud agamoran na apo nen Abraham a si Jacob so bendisyon ed kanepegan-na-inkapanguloan, si kuya ton Esau so angigagaem na panggulan pamatey ed sikato. (Genesis 27:41) Ngalngalin 20 taon ed saginonor, sanen si Jacob so ompapawil a nanlapud Paddan-aram diad dalin a nianakan to a kaulop so baleg a sankaabungan to tan dakel ya ayayep to, nadngel ton si Esau so onsasabin mangabet ed sikato. Anonotan to so panggula nen Esau, si Jacob so nampikasin masimoon ed si Jehova diad kasalimbengan a manlapud sanok nen agi to. Balet kasin ontan lambengat? Andin peteg. Sikato so angipawit na mapalangkap iran regalo ed sikato, inkatunongan to: “Nayarin napaliket ko diad regalon niyakar ya akauna nen say siak.” Tan sirin onman so agawa, ta sanen saray duaran sanagi so nanabet, nilakap nen Esau si Jacob tan inanguban to.—Genesis, kapitulo 32, 33.
8 Si David so nanggawa na sananey ya ehemplo na pankimey ed saman so ipipikasi tayo. Sanen sinamsam nen Absalom ya ilalak to so trono to, si Ahitopel a managsimbawa nen David so dinmapag ed si Absalom. Sirin si David so nanggawa na magunaet a kerew a say simbawa nen Ahitopel so onsaew komon. Kasin si David so basta angipikasi ed ontan? Andi, binilin to si Husai a matoor a managsimbawa to a miulop ed si Absalom ta pian komon et onsaew so simbawa nen Ahitopel. Tan ontan so inkagawa na saray bengatla. Si Absalom so kinmiwas ed mauges a simbawan inter ed sikato nen Husai, ya impulisay to so simbawa nen Ahitopel.—2 Samuel 15:31-37; 17:1-14; 18:6-8.
9. Panon nen Nehemias ya impanengneng ya inapresya to so prinsipyon saray pikakasi so mankakaukolan na kimey?
9 Ingen sananey nin ehemplo a nayarin nisita ed kasimbawaan tayo et say ginawa nen Nehemias. Sikato so awalaan na baleg a proyekton sumpalen—panangipaalagey ed saray bakor na Jerusalem. Anggaman kuan, dakel a kakabusol so nannununong a sumpad sikato. Si Nehemias so nampikasi tan nankimey, anggan singa unong na nabasa tayo: “Nampikasi kami ed Dios mi tan nantultuloy a nambantay a sumpad sikara diad labi tan agew.” Nanlapulad saman, kapaldua ed saray walad kalangweran a lalaki nen Nehemias so nantanyareg ya akaparaan a manalimbeng ed sananey a kapaldua, saraman so mangipapaalagey na bakor.—Nehemias 4:9, 16.
Say Ehemplo nen Jesus
10, 11. Antoran ehemplon inter nen Jesus so mangipanengneng a sikato so kinmiwas a mitukoyan ed saray pikakasi to?
10 Si Jesus so angiletneg ed sikatayo na maabig ya ehemplo diad pankimey ed saman so ipipikasi tayo. Imbangat ton ipikasi tayo: “Napasantos komon so ngaran mo.” (Mateo 6:9) Balet ginawa met nen Jesus so amin a nayarian to ta pian saray dumerengel to so mamasantos komon ed ngaran nen Ama to. Ontan met, ag-inggeter nen Jesus ed inkasikato so panagpikasi: “Ama, igloriam so ngaran mo.” (Juan 12:28) Andi, ginawa to so panangigloria ed ngaran nen Ama to tan pinaseseg to so arum a manggawa na ontan.—Lucas 5:23-26; 17:12-15; Juan 17:4.
11 Diad impakanengneng ed baleg a pankaukolan ed espiritual na totoo, inkuan nen Jesus ed saray babangatan to: “Say aaniyen so baleg, balet saray komikimey so daiset. Sirin, kerewen ed Katawan na panagani [si Jehova a Dios] a mangibaki na komikimey ed aaniyen to.” (Mateo 9:37, 38) Kasin ontan labat so ginawa nen Jesus? Andin balot! Tampol kayari na saman, imbaki to so 12 apostoles to a sanpaparis diad impanliber a nampulong, odino ‘nanani.’ Saginonor, imbaki nen Jesus so 70 ebanghelistas a manggawa met na ontan a kimey.—Mateo 10:1-10; Lucas 10:1-9.
Panangiyaplika ed Prinsipyo
12. Anto so kipaakaran na kimey ed saray pikakasi ya iter na Dios so inagew-agew a tagano tayo?
12 Malinlinew, sikatayo so iilaloan nen Jehova a Dios a matukoy, ya onkiwas a mitukoyan ed saray pikakasi tayo, a ditan et paneknekan tayo so inkasimoon tayo. Imbaga nen Jesus ed sikatayon ipikasi: “Iter mo ed sikami natan so kanen mi a para ed sayan agew.” (Mateo 6:11) Manepenepeg, sirin, amin na saray patumbok to so onkerew ed Dios na ontan. Balet kasin ilaloan tayon say mangatatawen ya Ama tayo so mangebat ed satan a pikakasi ya agtayo manggawa na antokaman nipaakar ed satan? Siempre andi. Sikato no akin a nabasa tayo: “Say mangiras so mangipapanengneng na inkasikaton mapilalek”—anganko anggan diad panagpikasi—“balet say kamarerwa to so andian.” (Uliran 13:4) Ginawa nen apostol Pablo so parehon punto diad 2 Tesalonica 3:10, a kuanto: “No siopaman et agto labay so mankimey, sikato komon so agmamangan.” Say panangipikasi ed inagew-agew a kanen tayo so nepeg ya ulopen na inkamabulos a mankimey. Makapasagyat, sikakabat ya imbaga nen Pablo a saraman so “agmalabay a mankimey” so nepeg ya agmamangan. Arum a malabay a mankimey so nayarin andian na impleyo, mansasakit, odino matatken lan tuloy pian mantrabaho. Peteg a labay da so mantrabaho, balet saya so agda la nayarian unong ed sirkumstansya ra. Sirin, sikara so nayarin manepeg ya ipikasi ed inagew-agew a kanen da tan manilalon mangawat ed satan.
13. Pian ebatan nen Jehova iray pikakasi tayo a para ed masanton espiritu to, anto so nepeg a gawaen tayo?
13 Sikatayo met so sinimbawa nen Jesus ya onkerew ed mangatatawen ya Ama to ed masanton espiritu To. A singa ipapaseguro nen Jesus ed sikatayo, say Dios so lalon mabulos a mangiter ed sikatayo na masanton espiritu to nen saray mangaraldalin ya atateng a mangiter na maabig a bengatla ed saray anak da. (Lucas 11:13) Balet kasin nailaloan tayo si Jehova a Dios a mangipabtang na masanton espiritu ed sikatayo a mamilagro, ya anggapo so anggan anton sagpot ed biang tayo? Andin balot! Nepeg a gawaen tayo so antokaman pian naawat tayo so masanton espiritu. Niarum ed pangipikasi ed satan, nakaukolan tayo so mantaganon sigugunaet ed Salita na Dios. Akin? Lapud si Jehova a Dios so agmangiter na masanton espiritu a nisian ed Salita to, tan agtayo nailaloan a naawat so masanton espiritu no ipulisay tayo so mangaraldalin a paralanan ya uusaren nen Jehova natan, “say matoor tan makabat ya aripen,” ya inrepresenta na Mananguley ya Ulop na saray Tasi nen Jehova. No anggapo so tulong a manlapud sayan “aripen,” sikatayo so agmakayarin mantalos ed sigpot a kabaliksan na nababasa tayo nisay kabat tayo no panon so pangiyaplika ed nanaaralan tayo.—Mateo 24:45-47.
14, 15. (a) Pian ebatan nen Jehova so pikakasi tayo a para ed kakabatan, panon so nepeg tayon pikoopera? (b) Panon a saya so nipatnag diad ehemplo nen Arin Solomon?
14 Say prinsipyo a saray pikakasi so mankaukolan na kimey so onaplika met ed sarayan salita na babangatan a Santiago, say agi nen Jesus ed laman: “No wala so siopaman ed sikayo ya onkukulang na kakabatan, sikato komon so mantultuloy ya onkerew ed Dios, lapud sikato so mangiter a sibubunlok ed amin tan agmanbalaw; tan niiter ed sikato.” (Santiago 1:5; Mateo 13:55) Balet kasin ipabtang na Dios iyan kakabatan ed sikatayo diad panamegley na milagro? Andi. Ununa ed amin, nepeg a sikatayo so nawalaan na suston awawey, a singa nabasa: “Bangatan toray mauyamo ed dalan to.” (Salmo 25:9) Tan panon so pangibangat na Dios “ed saray mauyamo”? Diad panamegley na Salita to. Lamet, nepeg tayon ibanikel so sagpot diad pantalos tan pangiyaplika ed satan, a singa nipanengneng ed Uliran 2:1-6: “Anako, no awaten moray balikas ko tan isimpen moray dilin ganggan ko, ta pian imanoen mo so kakabatan ed layag mo, pian ikiling mo komon so pusom ed pakatebek; no, nagkalalo, onkelyaw ka ed pakatalos a mismo tan ibesngaw mo so boses mo ed pakatebek a mismo, no itultuloy mon anapen itan a singa pilak, . . . diad ontan et natalosan mo so takot ed si Jehova, tan naromog mo so suston pikakabat ed Dios. Ta si Jehova a mismo so mangiter na kakabatan.”
15 Sanen impikasi nen Arin Solomon so kakabatan tan mamilagron inebatan na Dios so pikakasi to, kasin say prinsipyo a saray pikakasi so mankaukolan na kimey so onaplika met? On, peteg, lapud bilang ari na Israel, si Solomon so kinaukolan a mangisulat ed dilin sakal to ed Ganggan, basaen ton inagew-agew, tan iyaplika to ed bilay to. Balet sanen si Solomon so nankurang a sumlang ed saray bilin to, a diad impamarakel to na kaasawaan to tan saray kabayo, saray kimey to so agla mitukoyan ed saray pikakasi to. Bilang nansumpalan, si Solomon so nagmaliw ya apostata tan inatey ed ontan a “makulangkulang a sakey.”—Salmo 14:1; Deuteronomio 17:16-20; 1 Arari 10:26; 11:3, 4, 11.
16. Anton ilustrasyon so mangipanengneng a saray pikakasi tayon manalona ed silalaman iran kaleteyan so nepeg ya ulopen na saray kimey?
16 Say prinsipyon saray kimey so nepeg ya ulopen na pikakasi so onaplika met sano onkekerew tayo ed tulong na Dios a talonaan so nigalet, sinisiblet ya ugali. Sirin inako na sakey a biin payunir so impagmaliw ton adik ed saray serye na drama, a bantayan tora a manlapud alas 11 n.k. ya anggad 3:30 n.n. ya inagew-agew. Diad impakaaral to ed sakey a paliwawa ed kumbension distrito ya agaylan makadesyang irayan imoral a programa, say pamaakaraan so inyarap to ed Dios diad pikakasi. Balet kinaukolan to so pigaran panaon diad panalona to ed ugali. Akin? Lapud, a singa inkuanto: ‘Ipikasik a talonaan so ugali tan insan manbantay met lamlamang ed saray programa. Sirin dinisidik so mantultuloy ed lawak na kimeyan a sanagew ta pian siak la so agnatukso. Kabekta et asabik so punto a nayarian kon erepen so TV ed kabuasan tan mantultuloy ya ontan ed interon agew.’ On, niarum ed pampikasi diad panalona ed kakapuyan to, kinaukolan ton kimeyan itan a talonaan.
Pikakasi tan Panagtasi Tayo
17-19. (a) Antoran katuaan so mangipanengneng a saray Tasi nen Jehova so onkikiwas a mitukoyan ed saray pikakasi ra? (b) Anton ehemplo na sakey so manggawa ed parehon punto?
17 Anggapo so prinsipyo a saray pikakasi tayo so mankaukolan na kimey a nagkalalon tua nen say kimey na panangipulong-ed-Panarian. Sirin, amin na saray Tasi nen Jehova so aglambengat mangipipikasi ed idaak na komikimey ed panagani noagta ontan met ya iyaplika ra so inkasikara ed satan a kimey. Bilang resulta, anengneng da so abalbaleg iran indaak ed dakel a daldalin. Diad pangimano ed sakey lambengat ya ehemplo: Nen 1930 et wala lambengat so sakey a tasi nen Jehova a manpupulong ed Chile. Natan, saman a sakey a Tasi so aliwa lambengat a sanlibo noagta 30,000. (Isaias 60:22) Kasin saya lambengat so resulta na saray pikakasi? Andi, nalalanor met so kimey. Akin, nen 1986 lambengat, saray Tasi nen Jehova ed Chile so angideboto na masulok a 6,492,000 oras ed kimey na panagpulong!
18 Satan met so tua sano nasebelan so kimey na panagpulong. Saray Tastasi so aglabat mangipipikasi ed idaak noagta ontan met a sikara so mankimey a maamot tan itultuloy so panagpulong. Anggaman ed opisyal ya isusumpa, sirin, nagagawa so idadaak ed sarayan daldalin. Sirin, diad 33 daldalin a saray Tasi nen Jehova so akaabet ed ontan iran opisyal ya isusumpa, legan na 1986 serbisyon taon et indeboto ra so masulok a 32,600,000 oras diad kimey da ed panagpulong tan nanliket ira ed 4.6-porsienton indaak!
19 Siempre, say prinsipyon saray pikakasi so mankaukolan na kimey so onaplika met ed sinansakey. Nayarin ipikasi tayo ed si Jehova a nawalaan na sakey a panangiyaral ed Biblia balet ta nayarin agtayo gagawaen so anggaan na nayarian tayon makagamor na sakey. Ontan so eksperiensia na sakey a payunir. Diad impakawalaan to lambengat na sakey a panangiyaral ed Biblia, impikasi to so pakawalaan na mas dakel ni. Kasin pinaulian to lambengat so pamaakaran ya ontan? Andi, noagta sikato so maalwar ya angimano ed ministeryo to tan aromog ton diad panagpawil to et agto palelesaen so tema na pakawalaan na panangiyaral ed Biblia. Nantultuloy ed sayan pamaakaran, agnambayag et sikato so awalaan na duara nin panangiyaral ed Biblia.
20. Panon a nayarin say prinsipyo a saray pikakasi so mankaukolan na kimey et nasegek?
20 Dakel niran ehemplo so nayarin niiter diad pamaneknek a saray pikakasi so mankaukolan na kimey. Alimbawa, wala raman so nipaakar ed personal iran siglaotan ed pamilya odino diad kongregasyon. Balet saray akaunan ehemplo so magenap lan manggawan nagnap a malinew a saray pikakasi so mankaukolan na kimey. Saya so lohikal a tuloy lapud agtayo nailaloan si Jehova a Dios a mangiter na maapabor a konsiderasyon ed saray kerew tayo no sikato so pasanoken tayo ed mismon kondukta tayo. Tumboken to met a nepeg tayon gawaen ya amin so anggaan na nayarian tayo a mitukoyen ed saray pikakasi tayo no ilaloan tayon gawaen nen Jehova ed sikatayo so agtayo nagawaan ed inkasikatayo. Peteg, saray prinsipyo nen Jehova so makabat tan maptek. Sikara so makabaliksan, tan onkana ed dilin pankaabiganan tayo no sikatayo so onkiwas a mitukoyan ed saratan.
Kasin Nanonotan Yo?
◻ Anton nakakaukolan nipaakar ed pikakasi so agnaimano na dakel diad kadaanan ya Israel?
◻ Akin a say Dios so aliwan agmakatunongan diad pankaukolan a sikatayo so mankimey tan ipikasi met iman so pilalek tayo?
◻ Antoran kadaanan ya ehemplo so mangipanengneng a saray ariripen nen Jehova so nankimey ed saman so impikasi ra?
◻ Pian ebatan na Dios iray pikakasi tayo ed masanton espiritu to tan para ed kakabatan, anto so nepeg a gawaen tayo?
◻ Panon a say prinsipyon saray pikakasi so mankaukolan na kimey so onaplika ed lawak na ministeryo tayo?
[Litrato ed pahina 9]
Pinaseseg nen Jesus iray babangatan ton mangipikasi ed dakel a komikimey ed panagani. Balet sikato met so angibaki ed kimey na panagpulong, odino ‘panagani’
[Litrato ed pahina 10]
Kasin ipipikasim so tulong diad pangontrol na panagbantay mo ed telebisyon? Sirin iyaplika so prinsipyon saray pikakasi so mankakaukolan na kimey diad pangerep mo ed TV