Aktibon Panangipangulo nen Kristo Natan
“Siak so wala ed sikayo ed amin na saray agew ya angga ed kasampotan na sistema na bengabengatla.”—MATEO 28:20.
1. Diad anton dalan ya impudir nen Kristo iray “kayarian” to ed saray babangatan to?
SANEN ngalngalilan taynanan nen Kristo iray babangatan tan ompawil ed tawen nen 33 K.P., “saray kayarian to so impudir to ed sikara.” Saya so manasaglawi ed pagmaliw dan “embahadores a kasandi nen Kristo” tan ituloy da so kimey ya inggapo to, ya inatnat da ed “sankaarawian a pasen na dalin.” Sakbay na impanaynan to ed sikara, sikara so binilin ton “manggawa na babangatan a totoo ed amin a nasyones.” Kasin walaan itayo na ebidensya a sikato so atentibo ed no panon so impanggawa ra ed sayan kimey? Peteg a walaan itayo!—Mateo 25:14; 2 Corinto 5:20; Gawa 1:8; Mateo 28:19.
2. Anto so mangipanengneng a si Kristo so maapit a manutumbok ed saray aktibidades na inmunan-siglon kongregasyon?
2 Masulok ya 60 taon kayari na insegep nen Kristo ed tawen, impanengneng to a sikato so manutumbok a mapetepet ed saray kimey na Kristianon kongregasyon ed dalin. Diad puyan a niiter ed si apostol Juan, sakey a membro na inmunan-siglon mananguley ya ulop, si Jesu-Kristo so angipawit na saray mensahe ed pitoran kongregasyon a wala ed Asia Minor. Limara ed sikara et inkuanto: “Amtak iray gawa yo.” Tan impanengneng to a sikato so mikabisadon tuloy ed nagagawa ed loob na sananey a duara, Smirna tan Pergamo. Sikato so angiter na espesipikon panamaseseg tan simbawa ed kada kongregasyon. Anggapo so panduaruwa ed kanonotan da ed no siopa so aktibon Pangulo ra.—Apocalipsis 1:11; 2:1–3:22.
3. Diad siopa so peteg ya akapangipaarapan ed saray pitoran mensahe, tan anto so mamaneknek ed saya?
3 Diad tua, saraman a pitoran mensahe so agnigeter ed kalaknab da diad pitoran kongregasyon ed Asia. Say maabig a konseho tan saray pasakbay a kinarga ra so inmaplika ed amin na saray kongregasyon, manlapud inmunan siglo ya angga “ed agew na Katawan,” a kawalaan tayo natan.a Saray mata nen Kristo, a niulibay ed “mandarlang ya apuy,” so nantultuloy a nambantay diad nagagawa ed dalem na “amin a kongregasyon.”—Apocalipsis 1:10; 2:18, 23.
Say Katawan tan Say Aripen To
4. Panon a si Kristo so “nambiahe ed biektaew” tan insan pinmawil “kayari na andukey a panaon”?
4 Kayari na impangiyulibay to ed inkasikato ed “sakey a too, ya onlan manbiahe ed biektaew, [ya] anawag ed saray ariripen to tan impudir to ed sikara iray kayarian to,” inyarum nen Kristo: “Kayari na andukey a panaon et say katawan na saraman ya ariripen so sinmabi tan akipalinewan ed sikara.” (Mateo 25:14, 19) Nen 33 K.P. et si Kristo so “linma ed dalan to ya amaarap ed tawen,” a sikato so yinmurong “ed nikawanan na Dios.” (1 Pedro 3:22) “Kayari na andukey a panaon,” ya ontumbok ed inkitrono to nen 1914, si Kristo so ginmapon ‘manuley ed pegley na kakabusol to’ diad impangibantak to ed si Satanas tan saray demonyos to ed dalin. (Salmo 110:1, 2; Apocalipsis 12:7-9) Insan impaarap to so imano to ed saray ariripen to. Sinmabi so panaon diad pipalinewan to ed sikara. Lawas a nagkalalo, sikato so aktibon Pangulo ra.
5. Kapigan so insabi na panaon na pipapalinewan, tan panon so inkatumangan na matoor?
5 Say modernon awaran na saray totoo na Dios so mangipanengneng a sayan panaon na pipapalinewan so sinmabi nen 1918-19. Say parabolo na saray talento so mangiyilustra ed no panon so pipalinewan na Katawan ed nakdaan na alanaan ya ariripen to. Sikara so nakaukolan a mipalinewan a sinansakey ed nengneng na impangusar da ed saray kayarian to, “balang sakey unong ed dilin pakayari to,” odino espiritual iran posibilidad. Saramay mabunga so linmoob ed gayaga na Katawan da, ya angikuan ed sikara: “Sikayo so matoor ed saray pigaran bengatla. Turoen ta kayo a mangasikaso ed saray dakel a bengatla.”—Mateo 25:15, 20-23.
6. Anto so pormaen a tugyop na saratan a matoor ya alanaan a Kristianos, tan anto so impudir na Katawan da ed panangasikaso ra?
6 Say ontan iran sinansakey ya alanaan a Kristianos so aromogan a matoor iran embahadores na manuuley lan Ari, a mabulos a manggawa na babangatan na Katawan da. Sikara so atugyop ya aromog a say “aripen” ya angibagaan na Katawan da: “Siopa a peteg so matoor tan makabat ya aripen a tinuro na katawan to a mangasikaso ed saray kayarian to, pian iter ed sikara so tagano ra ed manepeg a panaon? Maliket itan ya aripen no sikato so nasabian na katawan to a manggagawa na ontan. Tua kuan ko ed sikayo, Sikato so turoen to a mangasikaso ed amin a kayarian to.”—Mateo 24:45-47.
7. (a) Panon a saray “kayarian” nen Kristo so apadaak nanlapulad 1914? (b) Anto so mangipanengneng a si Kristo so aktibon Pangulo met na “arum a karnero”?
7 Saray “kayarian” nen Kristo so nagmaliw a lalon dakerakel nanlapulad 1914. Sikato so akawesan na “maarin pakayari,” a lalanoren to so apadaak a pakauley tan malalaknab iran responsabilidad. (Lucas. 19:11, 12) Inmunan sikato so nantipon ed nakekeraan na “saray anak na panarian,” saray 144,000 ya alanaan a Kristianos a “sinaliw ed limog na katooan” pian magmaliw ya arari tan saserdote a kaiba to diad tawen. (Mateo 13:38; Apocalipsis 14:1-4; 5:9, 10) Insan, a singa maawaran a pinmatnag nen 1935, sikato so manitipon ed “baleg ya ulop” na “arum a karnero” ya angibagaan to: “Saratan met so awiten ko.” (Apocalipsis 7:9, 10; Juan 10:16) On, sikato so Sakey a mangitarok ed sarayan “karnero,” tan sikato so magmaliw ya aktibon Pangulo ra. Makapasagyat, say Griegon teksto et kabaliksan ton literal, “Tan saraman so nakaukolan ed siak ya impangulo.” Panon so aktibon pangipapangulo to ed amin a “karnero” to natan?
Saray Manangasikaso ed Nikawanan a Lima nen Kristo
8, 9. (a) Anton pasingawey so naawat nen apostol Juan? (b) Anto so inretrato na saray pitoran kandelero tan saray pitoran bibitewen?
8 Si apostol Juan, sakey a membro na mananguley ya ulop na inmunan Kristianon kongregasyon, so akaawat na sakey a pasingawey a ditan et “anengneng to so pitoran kandelero a balitok, tan diad pegley na saray kandelero et wala so sakey a singa anak na too . . . Tan wala ed nikawanan a lima to so pitoran bibitewen.” Impaliwawa nen Jesu-Kristo ed si Juan: “No nipaakar ed sagradon sekreto na pitoran bibitewen ya anengneng mo ed nikawanan a limak, tan ed pitoran kandelero a balitok: Saray pitoran bibitewen et kabaliksan da so angheles na pitoran kongregasyon, tan saray pitoran kandelero et kabaliksan da so pitoran kongregasyon.”—Apocalipsis 1:12-20.
9 Nankomento ed sayan balikas, say libron “Then Is Finished the Mystery of God” so angikuan: “Kasin saratan ya ‘angheles’ so agnanengneng? Andi. Si apostol Juan so angawat ed interon Puyan a nanlapud si Jesu-Kristo diad panamegley na sakey a mangatatawen ya anghel, tan agmakatunongan ed sikato so pansulat to met ed saray angheles ed tawen, diad agnanengneng ya ayaman. Agda nakaukolan iray mensahen nisulat ed saray pitoran kongregasyon ed Asia. Say manunan kabaliksan na titulon ‘anghel’ et ‘mensahero; manangitarok na mensahe.’ . . . Unong a sarayan pitoran simbolikon bibitewen so anengneng a wala ed nikawanan a lima nen Jesus, sikara so wala ed panangasikaso to tan kargo tan diad leksab na panangiwanwan to, say ‘kawanan a lima’ na niyaplikan pakayari to so makayarin mangiwanwan tan manalimbeng ed sikara. . . . No nipaakar ed ‘pitoran kandelero’ ed pasingawey ed ‘agew na Katawan’ so angiretrato ed amin a tuan Kristianon kongregasyon ed sayan peles, peteg ya ‘agew na Katawan’ nanlapulad 1914 K.P., sirin saray ‘pitoran bibitewen’ so mangisimbolo ed amin a nailalak-ed-espiritu, alanaan a singa-anghel iran manangasikaso na saratan a kongregasyon natan.”b—Pahina 102-4.
10. Anton apadaak a “kayarian” so nipudir ed panangasikaso na aripen?
10 Sarayan alanaan a manangasikaso ed nikawanan a lima nen Kristo so amin et kabiangan na atugyop ya “aripen” a tinuro To a “mangasikaso ed amin a kayarian to.” Lapud say Katawan na aripen so akawesan a mismo na apalaknab iran responsabilidad nanlapulad 1914, “amin a kayarian to” so nepeg a manasaglawi ed dakel niran bengatla a para ed aripen nen say diad abenegan. Nisengeg ed sakey a bengatla, bilang “embahadores a kasandi nen Kristo,” say nakdaan so embahadores natan na manuuley ya ari ed niletneg a Panarian. (2 Corinto 5:20) Sikara so nagmaliw ya inkargado ed amin ya espiritual iran bengatla a kayarian na Katawan ed dalin. Sikara so nepeg a manserbi diad kasumpalan na saray propesiya ya onaplika nanlapulad inkiletneg na Panarian. Saya so mangisasakup ed panangipulong ed “sayan maong a balita na panarian . . . ed amin ya atooan a dalin ya onkanan pantasi.” (Mateo 24:14) Lawas a nagkalalo, sikara so nepeg ya onlan manggawa na “babangatan a totoo ed amin a nasyones,” sirin tiponen da so agnabilang a “baleg ya ulop.” (Mateo 28:19, 20; Apocalipsis 7:9) On, sarayan “kalikaliktan a bengabengatla ed amin a nasyones” so kabiangan na apadaak a “kayarian” nen Kristo ed dalin.—Aggeo 2:7.
11. (a) Anto so kakaukolan na sarayan apadaak a “kayarian”? (b) Siopa so mangididirihe ed kimey, tan panon?
11 Amin na saya et kabaliksan to so lalon kimey a para ed atugyop ya “aripen,” apalaknab a lawak na saray kimey, ya onlaknab a literal ed “amin ya atooan a dalin.” Kakaukolan to met so apalaknab a hedkuarter tan saray pasilidad na sanga diad pangasikaso ed kimey tan diad panag-imprinta tan panangibunog na literatura a para ed panagpulong tan personal a panagaral. A singa nen inmunan siglo, sayan kimey so nagagawa ed leksab na aktibon panangipangulo nen Jesu-Kristo, a sikato so piguratibon “wala ed pegley na saray kandelero,” odino kongregasyon. Sikato so mangididirihe ed sikara diad panamegley na alanaan iran manangasikaso, a simbolikon eegnaan to “ed nikawanan a lima to.” (Apocalipsis 1:13, 16) A singa nen inmunan Kristianon panaon, sakey a grupo na sarayan alanaan a manangasikaso so manibukel na nanengneng a Mananguley ya Ulop na kongregasyon nen Kristo ed dalin. Say “kawanan a lima” na niyaplikan pakayari to so mangididirihe ed sarayan matoor a lalaki legan ya aasikasoen da so kimey na Panarian.
Diad Panamegley na Espiritu
12, 13. (a) Nisesengeg ed baleg ya indaak, anton tepet so onlesa? (b) Panon so panguusar nen Kristo ed espiritu a mamano ed pankaukolan na saray manangasikaso ed limog na saray babangatan to ed dalin?
12 Tekep na arum a “karneron” manbilang natan na anggad taloran milyon, a naorganisa ed masulok a 52,000 kongregasyon, mapatnag a say alanaan a nakdaan so mankaukolan na tulong diad pangasikaso ed saray mangaraldalin a kayarian na Katawan. Kulang a 9,000, pati saray dakerakel ya agagin bibii so mibibiang ed saray emblema diad Memoryal, sirin anggapo so anggan sakey ya alanaan a manangasikaso ed kada kongregasyon. Kasin kabaliksan na saya a si Jesu-Kristo so aliwan inkargado ed saray kongregasyon ya anggapo so nailalak-ed-espiritun “anghel,” odino ‘bitewen’?
13 Andin balot! A singa anengneng tayo la ed akaunan artikulo, diad inmunan siglo et si Kristo so aktibon angipangulo ed kongregasyon to diad panamegley na masanton espiritu. Natan et uusaren toray nailalak-ed-espiritun membro na Mananguley ya Ulop a manuro na saray manangasikason apili ed limog na “arum a karnero.” Saraya so nepeg a makasumpal ed parehon nakakaukolan a singa saray alanaan a mamatatken, a singa nidatak ed saray kasulatan a singa say 1 Timoteo 3:1-7 tan Tito 1:5-9. Sarayan Makasulatan a kualipikasyon so nisulat ed leksab na panangiwanwan na masanton espiritu. Saray rekomendasyon tan pananuro so nagawa kayari na pikakasi tan diad leksab na panangiwanwan na masanton espiritu. Diad saratan ya aliwan-alanaan a mamatatken et onaplika so konseho nen Pablo ed parehon biskeg: “Imanoen yo so inkasikayo tan ed amin a pulok, a sikato so anuroan na masanton espiritu ed sikayo a manangasikaso.”—Gawa 20:28.
14. (a) Panon a say propesiya ed Isaias 32:1, 2 so nasusumpal la? (b) Panon a saray amin a mamatatken so nepeg ya onsuko ed “kawanan a lima” nen Kristo?
14 Sirin, diad saray pigamplon libon kongregasyon, say matunong a manuuley ya Arin Jesu-Kristo so manguusar ed “arum a karnero” a bilang “piprinsipe” a manalimbeng ed “karnero” to a manlapud espiritual a dagem, alaboob, tan kakelangan. (Isaias 32:1, 2) Singa si David nensaman, saray mamatatken, balanglan kabiangan na alanaan a nakdaan odino say “arum a karnero,” so manpikasi ed si Jehova: “Say espiritum so maong; komon ta iwanwan toak ed dalin na kaptekan.” (Salmo 143:10) Tan si Jehova so onderengel ed pikakasi ra. Diad panamegley na Anak to, iter To ed sikara so espiritu To, tan sayan paraan so uusaren nen Jesus ya aktibo diad pangipapangulo to ed saray babangatan to ed dalin. Siempre, amin a mamatatken so nepeg ya onsuko ed “kawanan a lima” na panangontrol nen Kristo, panangiwanwan, tan panangidirihe, ya aagamilen to ed panamegley na espiritu tan saray nailalak-ed-espiritun membro na Mananguley ya Ulop.
Diad Panamegley na Saray Angheles
15. Anton arum a paraan so wala ed si Kristo ya usaren to diad pangipangulo to ed saray babangatan to ed dalin ya aktibo?
15 Sinaglawi na inmunan artikulo a saray angheles so nausar nen inmunan siglo a mangiwanwan tan mangiliktar ed saray inmunan Kristianos tan ontulong ed sikara diad kimey na panagpulong da. Kasin makatunongan so panisip a say manuuley ya Ari tayon Jesu-Kristo so agla manguusar ed saray angheles ed aktibon panangiwanwan ed saray babangatan to natan? Aliwa lambengatlan agmakatunongan noagta sikato met so agmakasulatan.
16, 17. Anton prueba so wala ed sikatayo a si Kristo so manguusar ed saray angheles diad panagani “ed saray anak na panarian” tan diad panagtipon ed “arum a karnero”?
16 Unong ed parabolo nen Jesus ed trigo tan saray sisanyas, say panaon-na-panagani so onsabi diad “kasampotan na sistema na bengabengatla,” a ginmapo nen 1914. Legan na panagani, “saray anak na panarian” so nibiig a manlapud “saray anak na marelmeng.” Siopa so uusaren na Katawan a manggawa ed panagani? “Saray managani et saray angheles.” Inyarum nen Kristo: “Say Anak na too so mangibaki ed saray angheles to tan sikato so manipon a manlapud panarian to ed saray amin a bengatlan pansengegan na kagapolan tan saray totoon manggagawa na kaugsan.” (Mateo 13:37-41) Uusaren nen Kristo iray angheles a manalimbeng ed saray agagi to ed dalin.
17 Balet kumusta so “arum a karnero”? Kasin uusaren nen Kristo iray angheles a manipon ed sikara? Petepeteg! Say parabolo to ed karnero tan kanding so angikuan: “Sano say Anak na too so onsabi ed gloria to, tan amin na saray angheles so kaiba to, saman et sikato so onyurong ed maglorian trono to. Tan amin na saray nasyones so natipon ed arap to, tan sikato so mangibiig ed saray totoo a manlapud sinansakey, a singa say sakey a pastol so mangibiig ed karnero a manlapud saray kanding.” (Mateo 25:31, 32) Uusaren nen Kristo iray angheles to ed sayan panangibiig a kimey. Unong a singa sakey ya anghel so angidirihe ed saray kurang nen Felipe ya inmarap ed si Etiopen Eunuko, sirin wala so daakan ya ebidensya natan a si Kristo so manguusar ed saray angheles to a mangidirihe ed kurang na saray Tastasi to ed saray malakarneron totoo. Dakel a totoo so amaneknek ed katuaan a sikara so nampikasin kinmerew na tulong sakbay a tinmuktok so sakey a Tasi ed puerta ra.—Gawa 8:26, 27.
Nagnap a Talek ed Panangiwanwan nen Kristo
18, 19. Diad letnegan na agawa nen inmunan siglo, ed anto a sikatayo so matalek?
18 Nen inmunan siglo, saray sirkumstansya so aliwan naynay a nipalugar diad impangusar nen Kristo ed mananguley ya ulop ed Jerusalem a manresolbe diad sakey ya espesipikon problema. Sanen si Pablo so niyarawi ed baybay ya Asia Minor tan nakaukolan ton amtaen no dinan a teritorya so ontumbok a lukasan, si Kristo so kinmiwas ed panamegley na espiritu. (Gawa 16:6-10) Natan saray Tasi nen Jehova so matalek ya anggan siopa ed saray agagi ran magmaliw a temporaryon niyarawi a manlapud Mananguley ya Ulop nisengeg ed panamasegsegang so siansian wala ed leksab na aktibon panangipangulo nen Kristo, diad panamegley na espiritu tan pananuporta na anghel.
19 Diad inmunan Kristianon panaon, arum iran desisyon a ginawa na mananguley ya ulop so nayarin mairap a talosan ed saman a panaon. Saya so andi-duaruwa ed kaso sanen si Pablo so imbakin pinmawil ed Tarsus odino sanen sikato so imbaki ed templo kayari na komatlon misioneron impanbaroy to. (Gawa 9:30; 21:23-25) Ingen, si Kristo so peteg a wala ed benegan na saratan a desisyon. (Gawa 22:17-21; 23:11) Natan et sikatayo so matalek ya antokaman ya iyabuloy nen Kristo a nagawa ed limog na saray babangatan to ed dalin so walaan na atagey a gagala ed benegan to, anggan singa nen inmunan siglo.
20. Ed anto a sikatayo so kumbinsido, tan anto so determinasyon tayo?
20 Sirin, sano nabasa tayo ed Biblia a si Kristo “so ulo na laman, say kongregasyon,” sikatayo so nakumbinse a sikato so aliwa labatlan titulo ya Ulo. (Colosas 1:18) Amta tayo, manlapud eksperiensia, a sikato so sakey a peteg, aktibon Ulo. Sano basaen tayo so libro na Gawa tan nanengneng tayo no panon so impangidirihe nen Kristo ed saray bengatla diad limog na inmunan Kristianos, naimatonan tayo ya uusaren to so parehon paraan natan. Nanengneng tayo so ebidensya na panguusar nen Kristo ed masanton espiritu, angheles, tan “say matoor tan makabat ya aripen” tan say Mananguley ya Ulop to, diad panuro ed saray espiritual a kualipikadon mamatatken. Matalek ed aktibon panangidirihe nen Kristo ed saray bengatla, sikatayo so determinadon onla a “mansalita na katuaan” tan ombulaslas ed aro “diad amin a bengatla ed sikato ya ulo, si Kristo.”—Efeso 4:15.
[Saray Paimano ed Leksab]
a Para ed nagnap a paliwawa ed sarayan pitoran mensahe tan say aplikasyon to, nengnengen so libron “Then Is Finished the Mystery of God,” kapitulo 7 ya anggad 14, impalapag na Watchtower Bible and Tract Society of New York, Inc.
b Say Disyembre 15, 1971, a paway na The Watchtower so angipalinew a nagkalalo ed sayan punto, a kuanto: “Andi-duaruwa, aliwan sakey ya indibidual a matatken, presbitero, manangasikaso odino pastol, noagta say interon ‘ulop na mamatatken’ so tinawag na niglorian Katawan, si Jesu-Kristo, na ‘anghel’ ya insimbolo na sakey a mangatatawen a bitewen. . . . Say ‘ulop na mamatatken’ (odino presbitero) diman ed Efeso so onkiwas a singa sakey a bitewen diad panangisindag na mangatatawen, espiritual a liwawa ed kongregasyon a sikara so ginawa na masanton espiritu a managpastol ed sikara.”
Saray Manunan Punton Nonoten
◻ Anto so prueba tayo a si Kristo so maapit a manutumbok ed saray aktibidades na inmunan-siglon kongregasyon?
◻ Siopa so turoen nen Kristo a mangasikaso ed amin a “kayarian” to, tan anto so isasakup na saraya?
◻ Siopa so insimbolo na pitoran bibitewen diad kawanan a lima nen Kristo?
◻ Panon so panguusar nen Kristo ed masanton espiritu, angheles, tan say alanaan a Mananguley ya Ulop diad panangiwanwan ed kongregasyon to natan?
◻ Akin a sikatayo so nawalaan na nagnap a talek diad panangiwanwan nen Kristo ed saray bengatla natan?
[Kahon ed pahina 17]
Saray subok ya onsabi lapud saray bakal, rebolusyon odino direktan panamasegsegang a panangisebel so nayarin manggawan imposibli ed sikayo so panggawa ed Kristianon panagdayew ed nagnap ya organisadon nengneng. Saray sirkumstansya so nayarin natibukel a manggawan imposibli so panugyop na angkabaleg iran pantitipon ed kongregasyon. Say pitatalosan ed sangan opisina so temporaryon napultot. Saray dalaw na manangasikaso na sirkito so nayarin napatunda. Saray balon palapagan so nayarin ag-onsabi. No anggan dinan ed sarayan bengatla so nagawa ed sikayo, anto so gawaen yo?
Say ebat so: Diad leksab na saray sirkumstansya, gawaen yo so nayarian yo, tan diad anggaan na nayarian yo, diad nengneng na puron panagdayew. Say personal a panagaral so posibli. Mabetbet a saray angkelag a grupo na agagi so makapanaabet a manaral diad kaabungan. Saray palapagan ya inaral ed imbeneg tan say Biblian mismo so usaren a basiyan ed saray miting. Agnatatalagnaw odino onaburido. Inkalapagan, diad antikey a panaon et arum a porma na komunikasyon ed saray responsablen agagin lalaki so niletneg. Say Mananguley ya Ulop so mananap na saray dalan diad pakapitalosan ed saray agagi.
Balet no naromog mo so inkasika a niyarawi a manlapud amin a Kristianon agagim, lawas nonoten a sika so agniarawi a manlapud si Jehova tan diad Anak ton si Jesu-Kristo.—Organized to Accomplish Our Ministry, pahina 168.
[Litrato ed pahina 14]
Si Kristo so simbolikon wala ed pegley na saray kongregasyon, a sankaegnaan toray manangasikaso ed kawanan a lima to