Say Engranden Manamalsa Tayo tan Saray Gawa To

AGAYLAN ENGRANDE! Say maungol iran waterpol na Iguacú odino Niagara, saray baleg a tuloy a kelas na Arizona odino Hawaii, say makapakelkelaw iran fjord (sanga na dayat) na Norway odino New Zealand​—agaylan mangilagyat irayan natural a pakelaw na saray eyag ed pandinayew! Balet kasin sikaray produkto lambengat na kibanbana na inkuan ya Inan Pinalsa? Andi, sikaray nagkalalo ni nen satan! Sikaray makapataktakot iran gawa na Engranden Manamalsa, sakey a maaron mangatatawen ya Ama, a nipaakar ed sikato et insulat nen makabat ya Arin Solomon: “Ginawa to so balang bengatla a marakep ed panaon to: ontan met inpasen to so kaandoan ed puso ra, angan ontan say too agto natontonan so gawa a ginawa na Dios a manlapu ed gapu anga ed sampot.” (Eclesiastes 3:11) Tua, kaukolan so andi-anggaan a panaon pian nasukimat na totoo so amin a maglorian gawa diad pamapano na Manamalsa tayo ed talba.

Agaylan walaan itayo na Engranden Manamalsa! Tan alay liket tayo a sayan sigpot-a-makapanyarin Dios “dia ed kaonoran na sarayan agew [et] akisalita ed sikatayo dia ed panamegley na Anak to, a sikato so tinoro ton manawir ed saray amin a bengatla.” (Hebreos 1:2) Sayan Anak, a Jesu-Kristo so angapresya ed makaroyroyo iran bengatla ed palsa na Ama to. Saratan so mabetbet ton tinukoy ed sikara diad impangiyilustra ed saray gagala na Ama to tan diad impansalita na panamaseseg ed saray dumerengel to. (Mateo 6:28-30; Juan 4:35, 36) “Lapu ed pananisia” natatalosan na dakel a saray pakelaw na palsa so “agawa ra lapu ed salita na Dios.” (Hebreos 11:3) Nepeg ya isindag na inagew-agew a kabibilay tayo so ontan a pananisia.​—Santiago 2:14, 26.

Peteg ya engrande iray pinalsa na Dios tayo. Makapakelkelaw ya isisindag day kakabatan, pakayari, inkatunong, tan panangaro to. Alimbawa, inpariking to so dalin tayo tan ginapoan ton pateleken itan ed liber na banwa ta pian say arapen a palsa to, say too, so makapangayaga ed makapalikliket a pantutumbokan na panpanaon. Imbalikas na Dios: “Legan na pansiansia na dalin, say panagtanem na bini tan say panagani say panaon na betel tan say petang, say tiagew tan say sibila-o, say agew tan say labi ag ira ontonda.” (Genesis 8:22) Niarum ni, mabunbunlok a sinempenan na Dios so dalin tayo na makana iran mineral. Nagkalautla, intarok to so daakan a danum, a diad saginonor et magmaliw a nakakaukolan a kabiangan tan suporta ed amin ya ayep a manbibilay ed dalin.

Diad mauksoy a pantutumbokan na anemiran ‘panamalsa iran agew,’ balang sakey et nilibon taon ed dukey, say “aktibon puersa na Dios” so angiparaan ed dalin pian panayaman na too. Say liwawan pakanengnengan tayo, say dagem ya iingasen tayo, say amagan dalin a panbibilayan tayo, say tanaman, say pantutumbokan na agew tan labi, saray sira, saray manok, saray ayep​—amin et mauksoy ya intarok na Engranden Manamalsa tayo parad serbisyo tan panliketan na too. (Genesis 1:2-25) Maseguron, makapiulop tayo ed salmista diad pangikelyaw: “O Jehova, agay la so kinaraklan na saray gawam! Dia ed karonongan so nangawaan mo ed saraya ya amin: say dalin napno na kaykayamanan mo.”​—Salmo 104:24.

Say Obra-maestra na Dios ed Panamalsa

Unong a say komanem a panamalsan “agew” et manasingger ed anggaan to, ginawa na Dios so too tan say katulongan ton bii. Agaylan marundunong a kapantokan ed mangaraldalin a panamalsa, nagkalalon makapakelaw nen amin a pisikal a palsan akaunan agawa! Ipapakabat na Salmo 115:16 ed sikatayo: “Saray tawen, salanti saray katawenan, kien ira nen Jehova. Bangbalet say dalin inter to ed saray anak na totoo.” Mipadpara, dinisenyo nen Jehova itayon atooan a kakamarerwa pian sikatayo so namparan makapanliket tan makapanusar ed saray asasakbay a palsa to ed dalin. Agaylay pisasalamat tayo ed kamataan tayo​—a lalon masoliwet nen say sankaabigan a kamera—​a makanengneng ed de-kolor a kaliberliber tayo! Walaan itayo na kalayagan​—a magmaong nen dinanman a ginaway-toon sound system—​ya ontulong ed sikatayon mangayaga ed tongtongan, musika, tan say marakep iran uni na saray manok. Walaan itayo na nitekep a mekanismoy panagsalita, a pati ed marunong a dila. Say pakataway na dila, a pati say liknaay pakaangob et mangitarok met na liket ed pantaway na nanduruma iran tagano. Tan agaylan pablien tayoy aplos na maaron lima! Maseguron pisalamatan tayoy Manamalsa tayo, a singa ginawa na salmistan angibaga: “Pisalamatan taka ta makapataktakot tan makapakelkelaw so inkagawa na inkasiak: pankelkelawan so gawagawam; tan kabat a maong na kamarerwak.”​—Salmo 139:14.

Say Maaron-Kaabigan na Manamalsa Tayo

Insulat na salmista: “O misalsalamat kayo ed Jehova; ta sikato et maong . . . bokod toy mangawa na ankakabaleg a pankelkelawan; tan say panangasi [maaron-kaabigan, NW] to manando lawas.” (Salmo 136:1-4) Saman a maaron-kaabigan so mamapakiwas ed sikato natan a manggaway makapakelkelaw a bengabengatlan lalon engrande nen amin na palsan kapkapandeskribe tayo. On, anggaman manpapainawa manlapud panamalsay materyal a bengabengatla, sikato so mamapalsa ed espiritual a grado. Gagawaen to iya diad pangebat ed marelmeng ya angat a mapatpatnag a nipaarap ed sikato. Panon ya ontan?

Say inmunan laki tan bii so nipasen diad sakey a maglorian paraiso, Eden. Anggaman ontan, sakey a traidor ya anghel, si Satanas so angiletneg ed inkasikato bilang sakey a dios tan angitonton ed saman ya atooan a paris ed rebelyon sumpa’d si Jehova. Manepeg, a sentensyaan ira na Dios na ipapatey, tekep na pansumpalan a saray anak da, say interon atooan a rasa so niyanak ed makasalanan, ompapatey a kipapasen. (Salmo 51:5) Say salaysay na Biblia nipaakar ed si Job so mangipanengneng ya inangat nen Satanas so Dios, ya ibabaga [ton] anggapoy toon makapansiansian matoor ed Sikato diad silong na subok. Balet pinaneknekan nen Job a si Satanas et matila, a singa met ed dakel a matoor ya ariripen na Dios ed saray panaon na Biblia tan angga ed agew tayo. (Job 1:7-12; 2:2-5, 9, 10; 27:5) Si Jesus, bilang ayadyarin too so angiyalimbawa ed andiay-kaparan panamenben na katooran.​—1 Pedro 2:21-23.

Kanian, nikuan nen Jesus: “Say principe na mundo [Satanas] onsabi: et angapo so pibibiangan to ed siak.” (Juan 14:30) Ingen, angga ed sayan agew et “say sankamundoan mandokdokol ed kaugsan.” (1 Juan 5:19) Walan sinangsang ed kanepegan na inkasoberano nen Jehova, si Satanas so naikdan na 6,000 taon pian ipanengneng no kasin say dilin pananguley to ed katooan so nayarin ontalona. Agaylan makapasinagem a sikatoy onsasaew, unong a mantutultuloy a tasian na saray nakukusbon kipapasen na mundo! Say maaron Dios tayo, si Jehova, so asingger lan mangekal ed sayan abulok a sosyedad na mundo, ya iparungtal so makanepegan ya inkasoberano to diad sankadalinan. Agaylan maliket a pakainawaan so itarok na satan ed totoon manpipirawat ed mareen, matunong ya uley!​—Salmo 37:9-11; 83:17, 18.

Anggaman ontan, aliwan ontan labat! Say maaron-kaabigan na Dios so nagkalalon nidemostra ed letnegan na saray salita nen Jesus ed Juan 3:16: “Ta ontan la’y inpangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, no ag ingen wala so bilay to’n andi angaan.” Say panangipawil na katooan ed panilalo ed andi-anggaan a bilay diad dalin et lalanoren to so pamalsa na saray balon bengatla. Anto iraya? Panon dan gunggunaan so maneey-ey a katooan? Ibaga na ontumbok ya artikulo tayo.