Kasin Sikayoy Nepeg a Manpabautismo?

NGALNGALI sakey milyon a totoo so binautismoan na saray Tasi nen Jehova diad apalabas a taloy taon. Nanpromedyo iya na 824 ed kada agew, odino 4 totoo so abautismoan ed kada 7 minuto. Kasin saya labat so kopya na relihyoson seseg ed koma-15 tan koma-16 iran siglo?

Andi, sarayan indibidual so agpinilit a binautismoan lapud inkalapagan a panangumberte, odino nisesengeg ed emosyonal a panangingganyo na arum a relihyoson orador. Sikaray abautismoan lapud inganggan iya nen Jesu-Kristo, say Katawan tan Pangulo na Kristianos. Tinumbok daray kundang tan totontonen ya indatak nen Jesus tan inagamil na saray apostol a pinili tan inpasal ton mismo.

Kayari inkioli tan sakbay na intokotok nen Jesus ed tawen, inikdan toray patumbok to na sayan patanir a ganggan: “Onla kayo sirin, tan mangawa kayo na saray babangatan ed amin a naciones, ya binyagan yo ra ed ngara’y Ama, tan say Anak, tan say Espiritu Santo. Ya ibangat yo ra’n mangonor na amin a bengabengatla ya ingangan ko ed sikayo: tan nia, walaak a naynay ed sikayo, ya anga ed kasampotan na mundo.” (Mateo 28:19, 20) Nanlapula’d satan a panaon a manpatuloy, saya labat so bautismo ed danum a walaay abobon na Dios.

Mitunosan ed satan, ibabaga ed sikatayo na Biblia a saraman ya asasakbay a patumbok nen Kristo so nagmaliw a “tasik [nen Jesus] ed Jerusalem, tan ed amin a Judea tan Samaria, tan anga ed kasampotan na dalin.” (Gawa 1:8) Unong ya impasakbay nen Jesus, say panagpulong tan panagbangat a kimey da so mansumpal ed kabautismo na saray mananisia a magmaliw met a papatumbok nen Kristo.

Say inmunan nikurit ya alimbawa na saya so agawa diad Jerusalem ed agew na Pentecostes 33 K.P. Diad saman a panaon “manalalagey si [apostol Pedro], pati saray labinsakey” tan nansalita nipaakar ed Jesus a Mesias diad nandaragup a karaklan. Ibabaga ed sikatayo na salaysay a “naermenan ira ed kapusoan da” lapud paliwawa to, tan tinmepet ira no antoy nepeg dan gawaen. “Magbabawi kayo, tan manbinyag so sinansakey ed sikayo ed ngaran nen Jesu-Cristo, pian pakapaandian na kasalanan yo,” inkuan nen Pedro. Say resulta et “saraman . . . so angawat na salita to, nanbinyag ira; et niarum ed saray binangatan ed saman ya agew, so ngalngalin talon libo a kamarerua.” (Gawa 2:14-41) Saray tinmumbok a salaysay so mamatua a say bautismo na saray babangatan et unaan na impakadngel da ed Kristianon mensahe, impanisia ed maong a balita, tan panagbabawi.​—Gawa 8:12, 13, 34-38; 10:34-48; 16:30-34; 18:5, 8; 19:1-5.

Diad Anton Paraan?

Balet panon a sarayan balo nin babangatan so nabautismoan ed danum? Kasin diad panamegley na panagwalsik, panangikalbo’d ulo, odino panagpalgep? Anto so ipapanengneng na rekord na Biblia? Lapud angitilak si Jesus ed sikatayo na panoliranan a nepeg a ‘tomboken so baka’to,’ diad anton paraan a sikatoy binautismoan?​—1 Pedro 2:21.

Ipapanengneng na Biblia a si Jesus so abautismoan diad Jordan, a baleg ya ilog. Kayari inkabautismoan, sikato so tinmatdang “a nanlapu ed danum.” (Marcos 1:10; Mateo 3:13, 16) Kanian si Jesus so peteg ya inpalgep ed Ilog Jordan. Sikatoy binautismoan nen Juan, a diad panaanap na matukoy a pamautismoan et pinili [toy] pasen diad Lawak na Jordan ya asingger ed Salim “ta wala so dakel a danum diman.” (Juan 3:23) Say katuaan a say kumpleton kipalgep ed danum so estandarten panagbautismo ed limog na papatumbok nen Jesus so nanengneng ed saray salita na Etiopen eunoko. Diad inyebat ed bangat nen Filipe, inyabawag to: “Nia so danum, anto so makasbel a nabinyagan [nabautismoan, NW] ak?” Insan naimano tayon “linmasor ira a dua ed danum” tan kayari to et “sinmakbit ira ed danum.”​—Gawa 8:36-39.

Kasin ipapanengneng met na sekular ya awaran so agamil na bautismon kipalgep diad limog na Kristianos? Peteg ya ontan. Tan makapasagyat a wala niray dakel a baleg iran panagbautismoan a matukoy parad panangipalgep diad amayamay a daldalin. “Say arkeolohikon ebidensya so malaklaknab a mantasi ed panagpalgep a bilang say gendagendat a modo na bautismo legan na ununan samplora ya anggad labin apat iran siglo,” kuan na dyurnal a Ministry. Iyarum to: “Diad limog na saray deral ed asasakbay iran Kristianon paalagey, tan ontan met ed kadaanan iran iglesian siansian nauusar, so pakasuysuyan ed awaran na Kristianon panagbautismo. Saray pintura ed saray katakomba tan simbaan, saray mosaik diad suelo, dingding, tan gubida, inukit iran estatua, tan saray drowing diad kadaanan iran manuskrito na Balon Sipan so mangarum na saray detalye ed sayan awaran . . . Saya so kaaruman ed ebidensyan naromog diad amin a sulsulat na papari na saray iglesia a say panagpalgep so karaklan a panagbautismo na asasakbay ya iglesia.

Aksobien na New Catholic Encyclopedia: “Mapatnag a say Bautismo diad asasakbay ya Iglesia so diad panamegley na panagpalgep.” Agpankelawan sirin a naromog tayoray manunan-paulo ed dyaryo a singa saraya: “Impawil na saray Katoliko so Bautismon Panagpalgep” (The Edmonton Journal, Canada, Setyembre 24, 1983), “Say Bautismon Panagpalgep so Bantog ed Saray Katoliko Dia” (St. Louis Post-Dispatch, Abril 7, 1985), “Dakel a Katoliko so Mamipili ed Bautismon Panagpalgep” (The New York Times, Marso 25, 1989), tan “Pangagayagaan so Kipawil na Bautismon Panagpalgep” (The Houston Chronicle, Agosto 24, 1991).

Para’d Anton Gagala?

Akin a kinaukolan nen Jesus a saray babangatan to so manpabautismo? Bueno, matukoy itan a simbolo na sigpot-puson dedikasyon ed Dios. Say “maong a balita” so kaukolan a nipulong ed sankadalinan, tan saray babangatan so tugyopen na “totoo ed amin a nasyones.” (Mateo 24:14, NW; 28:19; NW) Kabaliksan na saya ya agla eksklusibon midedeneng so Dios ed Judion nasyon, a tugyopen na totoon nidedika’d sikato nanlapu’d inkiyanak. Si Cornelio tan say pamilya to so inmuna iran Hentil, odino aliwan-Judio, ya angawat na katuaan nipaakar ed si Jesu-Kristo tan nanpabautismo.

Ipanengneng na say inkipalgep ed danum a saramay binautismoan so inatey ed kursoy bilay a nisentro ed inkasikara. Say inyemwas da so mangisimbolo a sikaray mabilay la natan ed panggaway linaway Dios tan iyuuna itan ed saray bilay da, a singa ginawa nen Jesus. (Mateo 16:24) Say kabautismo “diad ngaran na Ama tan ed Anak tan ed masanton espiritu” so mangipatnag a naaralan tan inawat da so katuaan na balang sakey ed saraya tan bidbiren day itatalindeg da. (Mateo 28:19, NW; ipareng so Gawa 13:48.) Say bautismo so manunan kundang labat ed katutulok ed Dios tan panagpasakup ed linawa to.

Agsusuportaan na saray Kasulatan so kaslakan a bebembenan a relihyoson panmoria a say bautismo so sakramento, salanti, relihyoson seremonyan mangiiter na merito​—grasya, inkamasanto, odino espiritual a gungguna—​ed samay binautismoan. Alimbawa, say opisyal a ganggan nen Papa Eugenio IV ya inaon ed akaunan artikulo so angikuan nipaakar ed bautismo: “Say epekto na sayan sakramento et say kaperdona na amin a kasalanan, orihinal tan aktual; ontan met ed amin a dusa lapud kasalanan. Bilang nansumpalan, agnasingil iramay abautismoan ed apalabas iran kasalanan da; tan no sikaray ompatey sakbay na pakapankasalanan da, nadampot dan tampol so panarian na tawen tan pasingawey na Dios.”

Anggaman ontan, si Jesus so abautismoan anggan “angapo’y ginawa ton kasalanan.” (1 Pedro 2:22) Niarum ni, unong ed Kasulatan, naawat so kaperdona na saray kasalanan diad panamegley labat na dondon bagat nen Jesu-Kristo. Pinaseseg nen Ananias si Saulo na Tarso: “Alagey ka, et manbinyag ka et urasan mo so saray kasalanan mo, a tawagen mo so ngaran to [Jesus].” (Gawa 22:12-16) On, posibli labat so kilalaban diad panamegley na niyibung a dala nen Jesus tan diad ‘itawag ed ngaran to’ ed pananisia.​—Hebreos 9:22; 1 Juan 1:7.

Anto sirin so nipaakar ed saray salita nen Pedro ed 1 Pedro 3:21? Kuanto diman: “Sikato so kaalimbawaan natan na binyag ya mangilaban ed sikayo, aliwa a mangekal na dutak na laman, no ag ingen pankerew na maong a conciencia ed arap na Dios, lapu ed inkioli ed bilay nen Jesu-Cristo.” Inpareng nen Pedro so bautismo ed eksperiensia nen Noe ya akaliktar ed Delap. (Bersikulo 20) Diad impangipanengneng nen Noe na nagnap a pananisia ed Dios, inpaalagey toy biong diad kilabanan na pamilya to. (Hebreos 11:7) Mipadpara, diad pangagamil na pananisia ed si Jehova a Dios tan ed probisyon to parad kilalaban diad panamegley nen Kristo Jesus, niliktar iray totoo natan manlapud sayan kaplesan a marelmeng a sistema. Sikaray nepeg met ya onkiwas unong ed satan a pananisia. Diad pagbabawi ed saray kasalanan, pamasimbalo manlapud mauges a kurso, tan sigpot a pangidedika ed si Jehova a Dios diad pikakasi, nakekerew ed Dios so maabig a konsiensia. Balet diad basiyan na bagat nen Jesus, tan say inkioli to ya inparungtal toy kablian na saman a bagat ed Dios diad tawen, pian saray kasalanan so naperdona tan say kilalaban et posibli.​—1 Pedro 3:22.

Antoy Gawaen Yo?

Kasin sakey kayon mililimog ed saray Tasi nen Jehova ed pigara lan panaon? Angangko ta gagawaen yo lay nakakaukolan iran pananguman ed bilay yo a mitunosan ed saray prinsipyo na Biblia balet agni angala na saray kundang parad dedikasyon tan bautismo. Nayarin kaliktan yon gawaen so linawa na Dios, ingen nayarin natatakot kayon obligaen na bautismo. Diad ontan et mas labay yon paliisan so ontan a responsabilidad tan eebatan ed pigaran panaon. Ngalngali 11.5 milyon a totoo so inmatendi ed selebrasyon na Pangdem na Katawan nen katantaon. Anggaman ontan, say pantok a bilang na saramay mibibiang ed kimey na panagpulong na maong a balita ed interon taon so kulang a 4.5 milyon. Kabaliksan na saya a ngalngali pitoran milyon a totoo so mangipapanengneng na samet ya apresasyon parad katuaan na Dios, anggaman sikaray agbautismadon Tastasi nen Jehova. Siempre, arum ed saraya so malalangwer ya ananak tan balobalo nin interesado. Balet arum ed saramay mibibiang ed panagpulong a kimey so siansian agbautismado. Dakel so totoon akala na suston pikakabat ed Biblia balet ta agda ni nagnap ya inawat so probisyon na Dios parad kilalaban diad kabautismoan.

Sakey ya importanten punton kaukolan a tandaan et say pikakabat ed kakaukolanen na Dios ed sika so mangitatarok na eebatan. “Kanian dia ed satan a too ya amta ton gawaen so maong, et ag to gawaen dia ed sikato so kawalaan na kasalanan,” kuan na Santiago 4:17. Ipapanengneng na Ezequiel 33:7-9 a say toon angibagaan na saray ganggan tan instruksion na Dios so responsable a manumpal ed saratan. Kanian say problema et no kasin say sakey et walaan na masimoon a panangaro ed Dios tan peteg a pilalek a sikatoy paliketen. Say toon peteg a walaan na ontan a panangaro tan malabay a nawalaan na nikadkaduman siglaotan ed si Jehova a Dios so agnapokpokan ed pangidedika ed bilay to. Say bautismo so palaway a panangisimbolo na satan a dedikasyon. Satan so nakakaukolan a kundang parad kilalaban. Saray tuan mananisia so manpabautismo.​—Gawa 8:12.

Saray engranden iilaloan ya itatarya na Dios parad matoor, dedikado iran indibidual diad onsasabin balon mundo et palumbasan ton tuloy iray temporaryon bentaha a nayarin iyopresi na sayan daan a marelmeng a sistema na bengabengatla. Say takot ed kaparan too so naandi sano kunsideraen tayo so mabiskeg a lima na Dios. (1 Corinto 10:22; 1 Pedro 5:6, 7) On, natan la so panaon ed pangitepet yo ed inkasikayo, a singa ed impanepet na Etiopen eunoko ed si Filipe: “Anto so makasbel a nabautismoan ak?”

[Litrato ed pahina 7]

Singa say Etiopen eunoko, kasin tetepetan yo so inkasikayo: “Anto so makasbel a nabautismoan ak?”