Akin a Nepeg Mon Aroen so Kaabay Mo?

SAY andi-anggaan a bilay so dependi ed panangaro tayo ed Dios tan ed kaabay. Asaglawi itan a punto ed sakey a tongtongan ya agawa ngalngali 2,000 a taon la so apalabas.

Sakey a lakin Judio a marunong ed Mosaikon Ganggan so nantepet ed si Jesu-Kristo: “Anto’y gawaen ko, pian natawir ko so bilay ya andi angaan?” Inmebat si Jesus: “Anto so nisulat ed gangan? Panon so panbabasam?” Diad impangaon ed Ganggan, inkuan na laki: “Aroen mo so Katawan [Jehova, NW] a Dios mo ed amin a pusom, tan amin a kamarerwam, tan amin a kasil mo, tan amin ya isip mo; tan say kaparam a too onong ed sika lanlamang.” “Matunong so inebat mo,” inkuan nen Jesus. “Saya so gawam [a mantultuloy], et nabilay ka.”​—Lucas 10:25-28.

Diad saman, tinmepet so manuupapet ed si Jesus: “Siopa [a talaga] so kaparak [kaabay ko, NW] a too?” Imbes a direktan inmebat, insalaysay nen Jesus so sakey ya ilustrasyon nipaakar ed sakey a lakin Judion tinakewan, pinekpek, tan tinaynan a ngalngali la ompatey. Insan sinmabi so duaran Judio​—say inmuna et sakey a saserdote tan kayari to et sakey a Levita. Namparan sikara so akaimano ed kipapasen na kapara ran Judio balet anggapo so ginawa ra pian sikatoy tulongan. Sakey a Samaritano so tinmumbok a dinmalan. Apakiwas tekep na panangabagey, nilinisan toray sugat na asakitan a Judio, inawit to ed sakey a darawesan, tan tinarokan to na kaaruman a panangasikaso.

Tinepetan nen Jesus so manuupapet ed sikato: “Siopa ed saraya’n talo, so isipen mo ya angipatnag na kapara’n too [ed] naplag ed saray tulisan?” Malinew, samay mapangasin Samaritano. Impanengneng sirin nen Jesus a say tuan panangaro ed kaabay et palumbasan toray ketegan lapud poli.​—Lucas 10:29-37.

Anggapoy Panangaro ed Kaabay

Natan et ompapalalo so gulaan ed baetan na totoon walaan na nanduruman poli. Alimbawa, saray balon-Nazi diad Alemanya ed agano ni so angipasubsob ed sakey a laki ed dalin tan ginatingatinan da diad ambelat iran bota ra, a ngalngalin aputer ya amin so taglang to. Insan da kinalboan na mabayanin alak tan sinelselan ta pian napoolan. Say lakin pinaulyanan ya ompatey so inataki lapud ta sikatoy abaloan a sakey a Judio. Diad sakey ya agmisiglaotan ya inkagawa, sakey ya abung diad asingger ed Hamburg so binomba, tan taloran totoon walaay polin Turko so apoolan​—say sakey ed sikara et ugaw a biin manedad na samplora.

Diad lugar na Balkan tan diad bandad bukig, nilibon bilay so atigway ed saray bakal nisesengeg ed pandumaan na poli. Saray arum so inatey diad impanlalaban na totoon walaan na nanduruman abenegan diad Bangladesh, India, tan Pakistan. Tan diad Aprika, saray kolkolan lapud pandumaan ed tribu tan rasa so sengegay inkabalang na bilay na dakel ni.

Maslak so natatakot ed ontan a karawalan tan sikaray agbalot manggawa na bengatlan mamasakit ed kaabay da. Diad tua, say abalbaleg a demostrasyon ed Alemanya so angondena ed karawalan lapud panduruma na poli diman. Ingen, kuan na The New Encyclopœdia Britannica: “Saray membro na ngalngali amin na kultora na mundo so manisian say paraan na panagbilay da so mas superyor anggan ed saramay walaay maapit a relasyon a sankaabay.” Saratan a panmoria so makasbel ed panangaro ed kaabay. Wala ta so nagawaan nipaakar ed saya, nagkalautla ta inkuan nen Jesus a say bilay et dependi ed panangaro ed Dios tan ed kaabay?

[Picture Credit Line ed pahina 2]

Cover: Jules Pelcog/Die Heilige Schrift

[Picture Credit Line ed pahina 3]

The Good Samaritan/The Doré Bible Illustrations/Dover Publications, Inc.