Manmatalek ed si Jehova!

“Manmatalek ka ed Jehova ed amin a pusom.”​—ULIRAN 3:5, NW.

1. Panon ya akasagyat so Uliran 3:5 ed sakey a walad kalangweran a laki, tan anto so manbayag a resulta?

SAKEY ya abayag lan misionero so nansulat: “‘MANMATALE’ KA ED JEHOVA ED SIMOON A PUSOM, TAN AGKA ONSARAL ED TAPEW NA DILI A PAKATALOS MO.’ Saratan a salitan nanlapud Biblia, ya akakuadro tan akapeket ed dingding na sakey ya ayaman a binisitak, so akala na imanok. Minorekdek ko itan ed nakekeraan a kabiangan na saman ya agew. Nayari kasin siak, so tepet ko ed inkasiak, so manmatalek ed Dios ed amin a pusok?” Sayan too so mantaon nensaman na 21. Diad edad a 90 tan siansian matoor a manlilingkor bilang sakey a matatken ed Perth, Australia, sikato so makalingay ed apalabas a bilay to a walaan na daakan a bunga na sigpot-puson panagmatalek ed si Jehova, katekep la na 26 a mapeget iran taon na panagpayunir ed balo iran lawak na misionero ed Ceylon (natan et Sri Lanka), Burma (natan et Myanmar), Malaya, Thailand, India, tan Pakistan.a

2. Anton panagmatalek so nepeg ya ipaseseg ed sikatayo na Uliran 3:5?

² “Manmatalek ka ed Jehova ed amin a pusom”​—sarayan salita na Uliran 3:5, unong ed patalos na New World Translation, so nepeg a mamakiwas ed sikatayon amin a mantultuloy a mangidedika na bilay tayo a sigpot-puso ed si Jehova, a matalek a pabiskegen to so pananisia tayo, anggan ed punton natalonaan iray pinmalandey a babeng. (Mateo 17:20) Usisaen tayo pa natan so Uliran 3:5 unong ed konteksto to.

Maka-Aman Panamilin

3. (a) Anton panamaseseg so naromog ed ununan siameran kapitulo na Uliran? (b) Akin a nepeg tayon maapit ya imanoen so Uliran 3:1, 2?

³ Saray manangilukas a siameran kapitulo na libro na Biblian Uliran so mamapasindag ed maka-aman panamilin, makabat a simbawan nanlapud si Jehova para’d amin a manilalo ed gayagan magmaliw ya ananak diad katawenan odino “onloob ed kawayangan na gloria na saray anak na Dios” ed paraison dalin. (Roma 8:18-21, 23) Walaay makabat a simbawan nausar na atateng ed pamabaleg na ananak da. Matalonggaring so simbawa na Uliran kapitulo 3, ya angigapo ed pasantabin: “Ana’ ko, agmo lingoanan so tunong ko; say pusom ingen unoren to komon so saray gangan ko.” Legan a say kaunoran iran agew na marelmeng a mundo nen Satanas so manasingger ed anggaan da, komon ta sikatayo so nagkalalon maapit a mangimano ed saray panonot nen Jehova. Say dalan so singano andukey, balet say sipan ed amin a mansusungdo et say “karukey na saray agew, tan saray taon na bilay, tan kareenan, niarum ira ed sika”​—maandon bilay ed balon sistema nen Jehova.​—Uliran 3:1, 2.

4, 5. (a) Anton maliket a siglaotan so dedeskribien na Juan 5:19, 20? (b) Panon ya onaaplika angga ed agew tayo so simbawa na Deuteronomio 11:18-21?

⁴ Say maliket a siglaotan ed baetan na ama tan say anak so importantin tuloy. Ontan so impangiyuksoy na Manamalsa tayo, si Jehova a Dios. Inkuan nen Kristo Jesus nipaakar ed maapit a siglaotan to ed si Jehova: “Say Anak angapo’y nagawaan to ed inkasikato, noag say nanengneng to a gagawaen na Ama. Ta ganagana’y gawaen to, saraya met so gawaen na Anak ya ontan. Ta say Ama aroen to so Anak, tan ipanengneng to ed sikato so saray amin a bengatla’n gawaen to lanlamang.” (Juan 5:19, 20) Ginetma nen Jehova a satan lanlamang a parehon inkamaapit so nepeg a niwala ed baetan ton mismo tan ed amin a pamilya to ed dalin, tan ontan met ed baetan na atooan a kaamaan tan ilalak da.

⁵ Say manmamatalek a siglaotan na pamilya so nipaseseg ed kadaanan ya Israel. Sinimbawa diman nen Jehova so kaamaan: “Kanian yutel yo so salsalitak ed puso yo tan kamarerwa yo, et iberber yo a singa sakey a panamirbiran ditan ed lima yo, et sikara naani so pinagkaberber na nanleetan na kamataan yo. Et ibangat yo so saraya naani ed saray anak yo, a sikaraya so salitaen yo ed sikara no manyodyorong ka ed abung mo, tan no manakar ka ed dalan, tan no ondokol tan onbangon ka. Et isulat mo naani so saraya ed pasipasindeg na pinto na abung mo, tan dia ed saray kapukaput mo, ta pian say agew mo et ondukey ira tan ontan da met na anak mo, ed dalin ya insipan nen Jehova ed saray ama yo ya iter to ed sikara, a singa say agew na katawenan ya wala ed tagey na dalin.” (Deuteronomio 11:18-21) Say impuyan a Salita na Engranden Instruktor tayo, si Jehova a Dios, so peteg ya onkanan mangisiglaot ed sikaton maapit a tuloy ed saray ateng tan ed saray anak da, ontan met ed amin niran manlilingkor ed sikato diad Kristianon kongregasyon.​—Isaias 30:20, 21.

6. Panon tayon makaromog na panangabobon na Dios tan too?

⁶ Say makabat a maka-aman simbawa para’d totoo na Dios, matatken tan kalangweran, so mantultuloy ed bersikulo 3 tan 4 na Uliran kapitulo 3: “Say abig na linawa [maaron-kaabigan, NW] tan katooran agda ka komon ikaindan; ibaklaw mo ra ed tenger mo; isulat mo ra ed tapi na pusom. Dia ed ontan makaromog ka na pamalangkap tan maong a pakatalos dia ed pakanengneng na Dios tan too.” Si Jehova a Dios a mismo so manunaan ed panangipanengneng na maaron-kaabigan tan katuaan. Sasalitaen na Salmo 25:10, “amin a daladalan nen Jehova sikara so panangasi tan katuaan.” Diad pangalig ed si Jehova, pablien tayo irayan kalidad tan say mananalimbeng a pakayari ra, ya ikdan tayo na importansya a singa ed panamabli tayo ed sakey a kuentas ya andian na kapara tan inyukit ya agnabura ed kapusoan tayo. Diad ontan, sikatayo so sisisimoon a makapanpikasi: “O Jehova; say maaro ya abig na linawam [maaron-kaabigan, NW] tan say katuaan mo so mangyapiger lawas ed siak.”​—Salmo 40:11.

Sakey a Magnayon a Panagmatalek

7. Diad antoran paraan ya ipapanengneng nen Jehova so inkanapanmatalkan to?

⁷ Say panagmatalek so inukeran na Webster’s Ninth New Collegiate Dictionary bilang “maseguron ilalo ed kualidad, abilidad, biskeg, odino inkapeteg na siopaman odino antokaman a bengatla.” Say kualidad nen Jehova so mapekder a nipatnag ed maaron-kaabigan to. Tan sikatayoy sigpot a makapanmatalek ed abilidad ton manumpal ed insipan to, ta say mismon ngaran to a Jehova et mangipakabat ed sikato bilang say baleg a Manangiletneg. (Exodo 3:14; 6:2-8) Bilang Manamalsa, sikato so Subol na biskeg tan dinamikon enerhiya. (Isaias 40:26, 29) Sikato so uliran na katuaan, ta ‘ag nayarin mantila so Dios.’ (Hebreos 6:18) Kanian, sikatayo so napapaseseg a mangipasen na sigpot a panagmatalek ed si Jehova, say Dios tayo, say baleg a Lapuan na amin a katuaan, a walaan na makapanyarin-amin a pakayarin manalimbeng ed saray manmamatalek tan amin ed engranden gagala to so maglorian nasumpal.​—Salmo 91:1, 2; Isaias 55:8-11.

8, 9. Akin a makapaermen a nibagan say panagmatalek so anggapo ed mundo, tan panon a duman tuloy iray totoo nen Jehova?

⁸ Diad nipaabeban mundon kawalaan tayo, makapaermen a nibaga ya anggapo so panagmatalek. Imbes, nanengneng tayo so agum tan inkabulok ed amin a pasen. Diad apis na Mayo 1993 a paway na magasin a World Press Review et mabitabitar a nanengneng so mensahen: “SAY BIGLAN INDAAK NA INKABULOK​—Marutak a Kuarta ed Balon Uksoy na Mundo. Say industriya na inkabulok so onlalaknab manlapud Brazil ya anggad Alemanya, manlapud Estados Unidos ya anggad Argentina, manlapud Espanya ya anggad Peru, manlapud Italya ya anggad Mexico, manlapud Vatican ya anggad Russia.” Lapud niletneg itan ed gula, agum, tan agpanagmatalek, say inkuan a balon uksoy na mundo na too et ag-akapangitarok na antokaman noagta say mantultuloy iran sinagem para’d katooan.

⁹ Miduma ed mapulitikan nasyones, saray Tasi nen Jehova so naliliketan a magmaliw a “nacion a say Dios to si Jehova.” Sikara lambengat so simamatuan makapangibaga na, “Diad Dios Kami Manmamatalek.” Balang sakey ed sikara so makapangikantan sigagayaga: “Dia ed Dios (idayew ko so salita to), . . . Dia ed Dios so anginan ko na panamatale’ ko. Agak antakot.”​—Salmo 33:12; 56:4, 11.

10. Anto so mamapabiskeg ed dakel a kalangweran a Kristianos pian mansiansia ed integridad da?

¹⁰ Diad sakey a bansa ed Asia a ditan et nilibon kalangweran a Tastasi so akasagmak na masyadon panagpekpek tan inkipangaw, maslak ed sikara so akapansungdo lapud panagmatalek ed si Jehova. Sakey a labi ed prisoan, sakey a malangwer a Tasi ya akasagmak na makapataktakot a panamairap so akaliknan agto la nayarian so mansungdo. Balet sakey a tobonbalo so kalkalnan inmasingger ed sikato ed saman a labi. Inyesaes to: “Agka onsusuko; siak so akikompromiso tan nanlapulad saman et agak la awalaan na deen na kanonotan.” Apabiskeg so determinasyon na inmunan kalangweran a mansiansian ontalindeg a malet. Sikatayoy sigpot a makapanmatalek ed si Jehova a tulongan to itayon manalona ed antokaman tan ed amin a sagpot nen Satanas ed pamuyak na integridad tayo.​—Jeremias 7:3-7; 17:1-8; 38:6-13, 15-17.

11. Panon tayon napapakiwas a manmatalek ed si Jehova?

¹¹ Say ununan ganggan so nabasa ed kabiangan ya: “Aroen mo so Katawan [Jehova, NW] a Dios mo ed amin a pusom.” (Marcos 12:30) Legan a dadalepdepen tayo so Salita’y Dios, saray engranden katuaan a naaaralan tayo so onsesepsep ed kapusoan tayo ta pian sikatayo so napakiwas a manggawa na anggaay nayarian tayo diad serbisyo na makapakelkelaw a Dios tayo, say Soberanon Katawan a Jehova. Walaan na sakey a puson manleplepwa na apresasyon ed sikato​—lapud amin ya imbangat to ed sikatayo, ginawa to para’d sikatayo, tan gawaen to ni para’d sikatayo—​a sikatayoy nasasagyat a sigpot a manmatalek ed panangilaban to.​—Isaias 12:2.

12. Diad ilalabas na taon, panon ya impanengneng na dakel a Kristiano so panagmatalek da ed si Jehova?

¹² Sayan panagmatalek so napaaligwas diad ilalabas na taon. Sakey a mapaabeban Tasi nen Jehova a matoor a nanlingkor ed loob na masulok a 50 a taon ed hedkuarter na Watch Tower Society ed Brooklyn, nanlapulad Abril 1927, so nansulat: “Diad sampot na saman a bulan siak so akaawat na allowance a $5.00 a nisigpit ed sakey a sobre a walaan na sakey a marakep a kard ya angipabitar ed teksto ed Biblia ed Uliran 3:5, 6 . . . Walaan na amin a rason a manmatalek ed si Jehova, ta diad hedkuarter et amoriak a tampol a si Jehova so walaan na sakey a “matoor tan makabat ya aripen” a sitotoor a manatalima ed amin na interes na Panarian dia ed dalin.​—Mateo 24:45-47.”b Say puso na sayan Kristiano so nitalaga, aliwan ed panangaro na kuarta, noagta ed pakagamor na ‘sakey a kayamanan ya ag-onsaew a balot ed katawenan.’ Mipadpara met natan, saray nilibon manlilingkor ed saray ayaman a Bethel na Watch Tower Society ed sankadalinan so manggagawa na ontan diad silong na sakey a nengneng a legal a sipanan na inkaduka (legal vow of poverty). Sikaray manmamatalek ed si Jehova a mangitarok ed inagew-agew iran pankaukolan da.​—Lucas 12:29-31, 33, 34.

Onsaral ed si Jehova

13, 14. (a) Iner lambengat so pakaromogan na mabunigas a simbawa? (b) Anto so nepeg a paliisan ta pian makaliktar ed panamasegsegang?

¹³ Sikatayo so sisimbawaen na mangatatawen ya Ama tayo: “Agka onsaral ed tapew na dili a pakatalos mo.” (Uliran 3:5) Saray minumundon manag-konseho tan sikologo so agbalot makapanilalo a makarateng ed kakabatan tan pakatalos a nanengneng ed si Jehova. “Say pakatalos to so angapo so sampot to.” (Salmo 147:5) Imbes ya onsaral ed kakabatan na prominentin totoo ed mundo odino ed dilin anggapoy-pikakabat a liknaan tayo, manilalo tayo ed si Jehova, ed Salita to, tan ed saray mamatatken ed Kristianon kongregasyon para’d mabunigas a simbawa.​—Salmo 55:22; 1 Corinto 2:5.

¹⁴ Say kakabatan na too odino prominentin posisyon so agmakatulong ed sikatayo diad maples ya onsasabin mairap a subok. (Isaias 29:14; 1 Corinto 2:14) Diad Hapon legan na Guerra Mundial II, sakey a makasarag balet mankinon a pastol na totoo na Dios so sinmaral ed dilin pakatalos to. Diad silong na desdes sikato so nagmaliw ya apostata, tan maslak ed pulok so tinmunda sanen nipaarap ed panamasegsegang. Sakey a matoor ya agin biin taga Hapon, a sipapakpel ya akaliktar ed makapataktakot ya impantrato diad marutdutak iran selda na prisoan, so nankomento: “Saramay nansiansian matoor so andian na nikadkaduman abilidad tan agnaiimano. Maseguron amin tayo so kaukolan a lawas manmatalek ed si Jehova ed amin a puso tayo.”c

15. Anton maridios a kalidad so nakakaukolan no labay tayon paliketen si Jehova?

¹⁵ Say panagmatalek ed si Jehova, imbes ed dilin pakatalos tayo et lalanoren to so inkamapaabeba. Agaylan importanti iyan kalidad para’d amin a malabay a mamaliket ed si Jehova! Siempre, anggan say Dios tayon Soberanon Katawan ed interon talba, so mangipapanengneng na inkamapaabeba ed pidedeneng to ed matudio iran palsa to. Satan so nepeg a pisalamatan tayo. “Sikato so mampaabeba ya onnengneng ed saray bengabengatla ed tawen, tan dia ed dalin? Sikato ipaalagey to so duka ya agwaten ed dabok, tan lakeyen to so naokolan ya agwaten ed dumsis.” (Salmo 113:6, 7) Lapud baleg a panangasi to, perdonaen toray kaleteyan tayo diad letnegan na sankabalgan a langkap to ed katooan, say mablin dondon bagat na inadaron Anak to, si Kristo Jesus. Agaylay nepeg a pisalamat tayo lapud sayan agkanepegan a panangasi!

16. Panon a nadampot na agagin lalaki iray pribilihyo ed kongregasyon?

¹⁶ Si Jesus a mismo so mangipapanonot ed sikatayo: “Siopaman a mangitanduro na inkasikato, napaabeba naani; et siopaman a mangipaabeba na inkasikato, nitanduro naani.” (Mateo 23:12) Tekep na inkamapaabeba, kaukolan a dampoten na bautismadon agagi iray responsabilidad ed Kristianon kongregasyon. Ingen, nepeg ya ipasen na saray manangasikaso so inkaturo ra, ya aliwan sakey ya status symbol, noagta bilang pankanawnawan gawaen so sakey a kimey a sipapaabeba, siaapresya, sigugunaet, a singa ginawa nen Jesus, a nankuan: “Si Amak mankikimey ni anga ed natan, tan siak mankimey ak.”​—Juan 5:17; 1 Pedro 5:2, 3.

17. Anto so nepeg ya apresyaen tayon amin, a mangitonton ed anton kimey?

¹⁷ Komon ta sikatayo so lawas sipapaabeba tan sipipikasin mangapresya a sikatayo so dabok lambengat ed imaton nen Jehova. Agaylan gayaga tayo, sirin, a “say maaron abig na linawa [maaron-kaabigan, NW] nen Jehova sikato so manlapu ed andi anga ya anga ed saraman so ontakot ed sikato, tan say inkatunong to anga ed saray anak na saray anak”! (Salmo 103:14, 17) Amin tayo sirin so magmaliw a magunaet ya estudyante na Salita’y Dios. Say panaon ya uusaren ed personal a panagaral tan ed pamilyan panagaral, tan diad saray miting na kongregasyon, so nepeg a nitekep ed sankablian iran oras tayo ed kada simba. Diad onian paraan a sikatayo so mamapaalagey na “pikakabat ed Sankasantosan.” Satan “so pakatalos.”​—Uliran 9:10.

“Dia ed Saray Amin a Dalan Mo . . .”

18, 19. Panon tayon niyaplika so Uliran 3:6 ed kabibilay tayo, tan ed anton resulta?

¹⁸ Legan a nipapaarap tayo ed si Jehova, say madibinon Lapuan na pakatalos, say Uliran 3:6 so tinmumbok a mangibabagan: “Dia ed saray amin a dalan mo sikato so bidbiren mo, et sikato itonton to so saray basbas mo.” Sayan pamidbir ed si Jehova et lalanoren toy pansiansian maapit ed sikato diad pikakasi. Inerman so kawalaan tayo tan antokaman so onlesan situasyon, sikatayoy makaasinger a tampol ed sikato diad panpikasi. Legan a gagawaen tayo so inagew-agew a kimkimey tayo, legan a manpaparaan tayo para’d lawak a serbisyo, legan a sikatayo so mankakabkaabungan a mangiyaabawag na Panarian to, say mapetepet a pikakasi tayo et papalaren to komon so aktibidad tayo. Diad ontan et nawalaan tayo na agnakalkulan pribilihyo tan gayaga ed ‘piolop-olop ed Dios,’ a sitatalek ya ‘itonton toray basbas tayo,’ a singa ginawa to ed matakot-ed-Dios ya si Enoc, Noe, tan ed matoor iran Israelita, a singa di Josue tan Daniel.​—Genesis 5:22; 6:9; Deuteronomio 8:6; Josue 22:5; Daniel 6:23; nengnengen met so Santiago 4:8, 10.

¹⁹ Sano ipakabat tayo ed si Jehova iray kerew tayo, makapanmatalek tayo a “say deen na Dios, a talonaan to’n amin a pakatalos, bantayan to so kapusoan yo tan saray nonot yo ed Cristo Jesus.” (Filipos 4:7) Sayan deen na Dios, a nanengneng ed magayagan itsuray lupa na sakey, so makapangirekomenda na mensahe tayo ed saray unabong a naabet tayo legan na panpupulong tayo. (Colosas 4:5, 6) Saya so makapaseseg met ed saramay maniirap lapud kapagaan odino ag-inkahustisya ya ontanlan kaslakan ed mundo natan, unong ya ipapanengneng na onggendan a salaysay.d

20, 21. (a) Legan na makapataktakot a panaon na Nazi, panon a say integridad na Tastasi nen Jehova so amaseseg ed arum? (b) Anton desisyon so nepeg a liingen ed sikatayo na boses nen Jehova?

²⁰ Si Max Liebster, sakey a natural a Judio ya akaliktar ed Holocaust diad singa mamilagron paraan, so aneskribe ed impanbaroy ton amaarap ed Nazi extermination camp ed sarayan salita: “Sikamiy inkandado ed saray carriage na tren a ginawan dakdakel ya ankekelag a selda para’d duaran too. Kayari impangiseksek ed siak ed sakey ed saratan, nipaarap ak ed sakey a prison saray mata to et mangipapanengneng na inkamaamo. Sikatoy wadman lapud panagrespeto ed ganggan na Dios, a mas lablabayen to so nipisok tan nayarin anggan ompatey nen say mamaagos na dala na arum a totoo. Sikatoy sakey ed saray Tasi nen Jehova. Saray ilalak to so inyarawi da ed sikato, tan say akulaw to so pinatey da. Inilaloan to ya ontan met so nasagmak to. Say 14-agew ya impanbaroy so angiter ed siak na ebat na saray pikakasik, lapud sayan mismon panagbaroy ya amaarap ed ipapatey et aromog ko so ilalon bilay ya andi-anggaan.”

²¹ Kayari impakasali ed “ungib na saray leon” ed Auschwitz, a singa impanawag to ed saya, tan inkabautismo to, sayan agi so angasawa na sakey ed saray Tasi nen Jehova a sikato to met so nipisok tan say ama to so anagmak na panamairap ed panangipangawan a kampo ed Dachau. Legan a say ama (na agin bii) so wadman, nadngelan (na ama) a say akulaw to tan say marikit to so inerel. Dineskribe to so epekto to ed sikato: “Siak so aburidon tuloy. Balet sakey ya agew legan a siak so akapila pian manames, nadngel ko so sakey a boses a mangaaon ed Uliran 3:5, 6 . . . saya so onaaniweng a singa sakey a boses a nanlapud katawenan. Saya so kaukolan ko pian ompawil ed gendat so inkasimbang ko.” Diad tua et boses iman na sakey nin priso a mangaaon ed sayan teksto, balet saman ya agawa so mangidadanet ed pakayari na Salita’y Dios ya onsekar ed sikatayo. (Hebreos 4:12) Komon ta say boses nen Jehova so mabiskeg a mitongtong ed sikatayo natan diad panamegley na saray salita na 1994 a tinaon-a-Teksto tayo: “Manmatalek ka ed Jehova ed amin a pusom”!

[Saray paimano ed leksab]

Bilang Sumaryo

◻ Anton nengneng na simbawa so ipaparungtal na Uliran?

◻ Panon tayon nagunggunaan na panagmatalek ed si Jehova?

◻ Anto so nalalanor diad isaral ed si Jehova?

◻ Akin a nepeg tayon bidbiren si Jehova ed amin a basbas tayo?

◻ Panon itayon iwanwan nen Jehova?

[Saray litrato ed pahina 15]

Say magayagan mensahe na Panarian so manasagyat ed matuan impanpuson totoo