Manlingkor ed si Jehova Tekep na Gayaga ed Puso
“Amin iraya a dusadusa onsabi ra naani ed sika, . . . lapu ed agka nanlinkor ed Jehova a Dios mo ed liket tan liga na puso.”—DEUTERONOMIO 28:45-47.
1. Anto so walan ebidensya a saramay manlilingkor ed si Jehova so magayaga, inerman so panlilingkoran da ed sikato?
SARAY ariripen nen Jehova so magayaga, balanglan gagawaen da so linawa to diad tawen odino ed dalin. Saray anghelikon “bitewen ed kabuasan” so kinmelyaw a sigagayaga ed inkiletneg na dalin, tan agpanduaruwaan a ‘manguunor ed salitay Dios’ iray nilaksan mangatatawen ya anghel tekep na gayaga. (Job 38:4-7; Salmo 103:20) Say bogbogtong ya Anak nen Jehova so sakey a magayagan “uloen a komikimey” diad tawen tan akaromog na ligsa ed panggawa na madibinon linawa bilang say toon Jesu-Kristo ed dalin. Niarum ni, “lapud gayaga a niyan ed arap to sinongdoan to so cruz [panamairapan a palitek, NW], ya inbantak to so baing, et imyorong ed kawanan na trono na Dios.”—Uliran 8:30, 31; Hebreos 10:5-10; 12:2.
2. Panon a naamtaan no saray Israelita so akaeksperiensia na saray bendisyon odino sumpa?
2 Naeksperiensia na saray Israelita so gayaga sano apaliket da so Dios. Balet komusta no sikaray onsunggay ed sikato? Sikaray apasakbayan: “Saratan a [dusadusa] wala naani ed sika a pantandaan tan pankelawan, tan dia ed saray binim a magnayon. Lapu ed agka nanlinkor ed Jehova a Dios mo ed liket tan liga [gayaga, NW] na puso, a nisengeg ed inkadaakan na saray amin a bengatla. Kanian manlinkor ka naani ed saray kakabusol mo ya ibaki nen Jehova ya onsumpa ed sika a sieeras, tan inkapgaan tan inkalakseb tan angapo so bengabengatla; et dia ed sika yan to naani so pako a balatyang ed tenger mo anga ed agto ka naderal.” (Deuteronomio 28:45-48) Saray bendisyon tan dusadusa so mangipapalinew no sioparay aripen nen Jehova tan no sioparay andi. Saratan a dusadusa so mamapaneknek met ya agnepeg ya ibaliwala iray prinsipyo tan gagala na Dios, nisay balawen ira. Lapud agtinulok na saray Israelita iray pasakbay nen Jehova nipaakar ed kadederal tan kadakep, say Jerusalem so nagmaliw ya “ayew ed saray amin a nacion ed dalin.” (Jeremias 26:6) Tuloken tayo sirin so Dios tan pangayagaan so panangabobon to. Say gayaga so sakey ed dakel a madibinon bendisyon ya eeksperiensiaen na saray maridios.
No Panon so Panlingkor Tekep na “Gayaga na Puso”
3. Anto so piguratibon puso?
3 Saray Israelita so kaukolan a manlingkor ed si Jehova tekep na “liket tan gayaga na puso.” Ontan met ed modernon-agew ya ariripen na Dios. Say pangayaga et “ligsa; napno na gayaga.” Anggaman sinaglawi so literal a puso ed Kasulatan, ag-iya literal a maniisip odino mankatunongan. (Exodo 28:30) Say manunan usar to et say pangibomba na dala a manusustini ed saray selula na laman. Anggaman ontan, diad dakel a pankanawnawa, tutukoyen na Biblia so piguratibon puso, a nagkalalo ni nen say sentro na liknaan, pilalek, tan pantalos. Ibabagan saya so mangitatalindeg ed “sentron kabiangan ed interamenti, say akindalem, diad ontan et say akindalem a too ya ipapatnag so inkasikato ed amin a nanduruman kimey to, ed saray pilalek to, liknaan, emosyon, saray liknaan, saray gagala, ed panag-isip to, ed saray panamabli, imahinasyon, say karunongan to, pikakabat, abilidad, ed saray sisiaen tan ed saray katunongan to, ed memorya to tan ed pakalikna to.” (Journal of the Society of Biblical Literature and Exegesis, 1882, pahina 67) Lalanoren na piguratibon puso tayo iray liknaan tan emosyon tayo, pati say gayaga.—Juan 16:22.
4. Anto so ontulong ed sikatayo pian manlingkor ed si Jehova tekep na gayaga ed puso?
4 Anto so makatulong ed sikatayo a panlingkoran si Jehova tekep na magayagan puso? Say sakey a positibo tan maapresyan panmoria ed saray bendisyon tan inter-Dios iran pribilihyo so makatulong. Alimbawa, maliket tayon nonoten so pribilihyo tayo ed pangisaklang na “sagradon serbisyo” ed tuan Dios. (Lucas 1:74) Wadtan so mitukoyan a pribilihyo a panangakbibit ed ngaran nen Jehova bilang Tastasi to. (Isaias 43:10-12) Niyarum tayo met dia so gayaga ed pakaamta a diad itumbok ed Salita na Dios et sikatoy napapaliket tayo. Tan agaylan gayaga so pangiwandag na espiritual a liwawa tan diad ontan et natutulongan tayo so dakel a makapaway manlapud kabilungetan!—Mateo 5:14-16; ipareng so 1 Pedro 2:9.
5. Anto so panlalapuan na maridios a gayaga?
5 Ingen, say panaglingkor ed si Jehova tekep na gayaga ed puso so aglambengat pakawalaan na positibon kanonotan. Talagan makagungguna so pagmaliw a positibo ed sisisiaen. Balet say maridios a gayaga so aliwan bengatlan napapawala tayo diad panamegley lambengat na panamaaligwas na inkatoo. Satan so sakey a bunga na espiritu nen Jehova. (Galacia 5:22, 23) No andian tayo na ontan a gayaga, nayarin kaukolan tayoy manggawa na saray pananguman pian napaliisan so kanonotan odino kakikiwas ed pigaran agmakasulatan a walna a nayarin mamaermen ed espiritu na Dios. (Efeso 4:30) Anggaman ontan, bilang saramay matoor ed si Jehova, agtayo ontakot a say kakulangay impapuson gayaga ed pigaran pankanawnawa so ebidensya na madibinon agpanangabobon. Sikatayoy ag-ayadyari tan mainomay a nasakitan, onermen, tan nawalaan ni ingen na depresyon no maminsan, balet natatalosan itayo nen Jehova. (Salmo 103:10-14) Kanian manpikasi tayo parad masanton espiritu to, a nodnonoten a satan a bunga ton gayaga so inter-Dios. Ebatan na maaron mangatatawen ya Ama tayo so ontan iran pikakasi tan mamakayari ed sikatayon manlingkor ed sikato tekep na gayaga ed puso.—Lucas 11:13.
Sano Anggapoy Gayaga
6. No anggapoy gayaga ed panaglingkor tayo ed Dios, anto so nepeg tayon gawaen?
6 Sano naandi la so gayaga ed serbisyo tayo, nayarin diad kaunoran et nakesayan so seseg tayo ed panaglingkor ed si Jehova odino napaneknekan ni ingen ya agmatoor ed sikato. No ontan, makabat no sipapaabeba tan sipipikasi tayon kunsideraen iray motibo tayo tan manggawa na nakakaukolan a pananguman. Pian nawalaan na inter-Dios a gayaga, nepeg a manlingkor tayo ed si Jehova lapud aro tan tekep na interon puso, kamarerwa, tan kanonotan tayo. (Mateo 22:37) Agtayo nepeg a manlingkor tekep na pilalaslasan ya awawey, lapud insulat nen Pablo: “No manbilay itayo ya onong ed Espiritu, manakar itayo met komon onong ed Espiritu. Ag itayo komon mapaagum ed maapan dayew, a pasanoken so sakey tan sakey, a mansisibletan so sakey tan sakey.” (Galacia 5:25, 26) Agtayo nawalaan na peteg a gayaga no sikatayoy manlilingkor lambengat lapud labay tayoy napalampasay arum odino labay tayoy nigalgalang.
7. Panon tayon naparngat-lamet so gayaga’d puso tayo?
7 Walay gayaga ed pananumpal ed dedikasyon tayo ed si Jehova. Sanen sikatayoy balo-balo nin dedikado ed Dios, siseseseg tayon ginapoan so kabibilay na sakey a Kristiano. Inaral tayo so Kasulatan tan maparanay ya akibiang ed saray miting. (Hebreos 10:24, 25) Angiter ed sikatayo na gayaga so pibibiang ed ministeryo. Balet, panon to no nababawasan lay gayaga tayo? Say panagaral na Biblia, iyaatendi ed miting, pibibiang ed ministeryo—on, sigpot a pibibiang ed amin a pamaakaran na Inkakristiano—so makapanpaligen ed bilay tayo ed espiritual tan mamarngat-lamet ed parehon aron niwala’d sikatayo ed inmuna tan ed datin gayaga na puso. (Apocalipsis 2:4) Diad ontan et agtayo naalig iray arum a singa andiay gayaga tan mabetbet a mankakaukolan na tulong ed espiritual. Maliket iray mamatatken a makatulong, balet balang sakey ed sikatayo so nepeg a manumpal ed dedikasyon tayo ed Dios. Anggapoy siopaman a makapanggawa na saya parad sikatayo. Kanian gawaen tayon kalat tayo a natumbok so normal a rotinay Kristiano ta pian nasumpal so dedikasyon tayo ed si Jehova tan nawalaan na peteg a gayaga.
8. Akin ya importanti so malinis a konsiensia no kaliktan tayoy mangayaga?
8 No kaliktan tayon nawalaan na gayaga a bunga na espiritu na Dios, kaukolan tayo so sakey a malinis a konsiensia. Legan ya iyaamot nen Arin David so kasalanan to, sikatoy nagmaliw a miserabli. Diad tua, say bilay to so singano nanaekatan, tan nayarin magmamaliw a sengegan na impansakit to ed pisikal. Agaylan alikna toy inawa sanen agawa so panagbabawi tan panangipatua ed kasalanan! (Salmo 32:1-5) Agtayo nayariay mangayaga no walay iyaamot tayon seryoson kasalanan. Nayarin pansengegan itan na magonigon a kabibilay. Maseguron aliwan satan so paraan pian makaliknay gayaga. Balet say pangipatua ed kasalanan tan pagbabawi so mangitatarok na kainawaan tan panangipawil na magayagan espiritu.—Uliran 28:13.
Panalagar Tekep na Gayaga
9, 10. (a) Anton sipan so inawat nen Abraham, balet panon a nayarin asubok so pananisia tan gayaga to? (b) Panon tayon nagunggunaan ed saray alimbawa nen Abraham, Isaac, tan Jacob?
9 Sakey a bengatla so pakawalaan na gayaga sanen inmunan naaralan tayo so nipaakar ed madibinon gagala balet sananey nin bengatla so pakapansiansian magayaga ed ilalabas na tao-taon. Saya so niyilustra ed agawa ed matoor a si Abraham. Kayari impanali ton pangibagat ed anak ton Isaac unong ed ganggan na Dios, inter na sakey ya anghel so onian mensahe: “Lapu ed siak a dili, kua’nen Jehova, sinambaan ko, a lapu ed ginawam so saya, tan agmo inkibot so anak mo, say bogbogtong ya anak mo, a dia ed panamapalar, papalaren ta ka, tan dia ed panamarakel parakelen ko so ilalak mo a singa saray bitewen ed katawenan, tan singa saray buer ya wala ed gilig na dayat; et say ilalak mo kayarianen to naani pulongpinto na kakabosol to. Tan dia ed ilalak mo so pakapipalaranan na saray amin a nacion dia; lapu ed tinolok mo so voces ko.” (Genesis 22:15-18) Anggapoy duaruwa, agayagaan a tuloy si Abraham ed sayan sipan.
10 Nayarin iilaloan nen Abraham a si Isaac so tutukoyen a “bini” a manlapud saya et nasumpal so insipan a bendisyon. Balet say inlabas na saray taon so nayarin anubok ed pananisia tan gayaga nen Abraham tan ed pamilya to lapud anggapoy agawan antokaman a maong a bengatla ed panamegley nen Isaac. Say panamekder na Dios nipaakar ed sipan ed si Isaac tan diad saginonor ed ilalak ton si Jacob so amaseguro ed sikara a say isasabi na Bini so diad arapen ni, tan saya so tinmulong ed sikara a napansiansia so pananisia tan gayaga ra. Anggaman ontan, sikara di Abraham, Isaac, tan Jacob so inatey ya ag-anggan anengneng so kasumpalan na sipasipan na Dios ed sikara, balet sikaray walaay liket ya ariripen nen Jehova. (Hebreos 11:13) Sikatayo met so makapantultuloy ed panaglingkor ed si Jehova a walaay pananisia tan gayaga legan ya aalagden so kasumpalan na sipasipan to.
Gayaga Anggaman ed Panamasegsegang
11. Akin a nayari tayon magmaliw a magayaga anggaman walay panamasegsegang?
11 Bilang ariripen nen Jehova, makapanlingkor tayo ed si Jehova tekep na gayaga na puso, anggan manasagmak tayoy panamasegsegang. Inyabawag nen Jesus a maliket iramay napapasegsegang nisesengeg ed sikato, tan inkuan nen apostol Pedro: “No ag ingen panliketan yo komon so pidama’yo ed saray irirap nen Cristo, pian dia ed kipatnag na gloria to manliket kayo met ed alablabas a gayaga. No napabpabanday kayo ed ngaran nen Cristo, mapalar kayo, ta say Espiritu na gloria tan Espiritu na Dios dia ed sikayo so panayaman da.” (1 Pedro 4:13, 14; Mateo 5:11, 12) No sika so mansusungdo na panamasegsegang tan maniirap lapud inkatunong, walad sika so espiritu tan abobon nen Jehova, tan satan so maseguron mamawalay gayaga.
12. (a) Akin a naarap tayoray subok ed pananisia tekep na gayaga? (b) Anton manunan leksion so nayarin naaralan tayo ed agawa ed sakey a Levitan adakep?
12 Naabet tayoray subok na pananisia tekep na gayaga lapud say Dios so Sakurong tayo. Saya so pinalinew na Salmo 42 tan 43. Nisesengeg ed pigaran rason, sakey a Levita so dinakep. Panpilpilalekan to so pandayew ed santuaryo na Dios ya alikna ton singa sakey a napgaan a biin ulsa, a manpirpirawat na danum ed sakey ya amagaan tan kinmelang a lugar. Sikatoy “napgaan,” odino manpirawat, ed si Jehova tan ed pribilihyo na pandayew ed Dios diad santuaryo To. (Salmo 42:1, 2) Sayan eksperiensia na adakep so nepeg a mamakiwas ed sikatayo a pisalamatan so panlilimog a pangagayagaan tayo a kaibay totoo nen Jehova. No say ontan a kipapasen a singa say inkipangaw lapud panamasegsegang so temporaryon angamper ed sikatayo ed pilimog ed sikara, ipawil tayo ed kanonotan tayo iray magayagan apalabas a mankakasakey ed sagradon serbisyo tan manpikasi pian makapansungdo legan a sikatayoy ‘manaalagar ed Dios’ ya ipawil to itayo ed datin kimey a kaiba iray managdayew to.—Salmo 42:4, 5, 11; 43:3-5.
‘Manlingkor ed si Jehova a Tinekepan na Liket’
13. Panon a say Salmo 100:1, 2 so mangipapanengneng a say gayaga so nepeg a magmaliw a pamaakaran na serbisyo tayo ed Dios?
13 Say gayaga so nepeg a magmaliw a manunan pamaakaran ed serbisyo tayo ed Dios. Saya so nipanengneng ed sakey a melodya a diman et inkanta na salmista: “Mangawa kayo na maligan tanol ed Jehova, sikayon amin a daldalin, manlinkor kayo ed Jehova a tinekepan na liket, dago kayo ed arapan to a mangancanta kayo [tekep na magayagan kelyaw, NW].” (Salmo 100:1, 2) Si Jehova “so maliket a Dios” tan labay ton saray ariripen to so makaromog na gayaga ed panumpal ed saray obligasyon a nisisiglaot ed dedikasyon da ed sikato. (1 Timoteo 1:11, NW) Kaukolan a mansayaksak so totoo ed amin a nasyon ed si Jehova, tan nepeg a magmaliw a mabiskeg so panangibalikas tayo na panamagalang, singa say “maligan tanol” na mabiktoryan armada. Lapud say panaglingkor ed Dios so makarepresko, kaukolan a tekepan iya na panliket. Kanian, pinaseseg na salmista so totoo ya onasingger ed kiwawala na Dios “tekep na magayagan kelyaw.”
14, 15. Panon a say Salmo 100:3-5 so onaaplika ed magayagan totoo nen Jehova natan?
14 Inyarum ni na salmista: “Amtaen [bidbiren, aksobien] yo a si Jehova sikato so Dios. Sikato so nangawa ed sikatayo, ya aliwa a sikatayo a dili; totoo to itayo, sikatayo so karcarnero na pastolan to.” (Salmo 100:3) Lapud si Jehova so Manamalsa tayo, sikatayoy kayarian to no panon a kayarian na pastol iray karnero to. Ontanlay panangasikaso ed sikatayo na Dios a sikatayoy mangitatandoron misadsalamat ed sikato. (Salmo 23) Nipaakar ed si Jehova, nankanta met so salmista: “Loob kayo ed saray pinto ed polong to a tarok yo so pisasalamat, tan dia ed saray panagpasiaran to a tarok yo so pandaydayew. Misalsalamat kayo ed sikato, tan igalang yo so ngaran to. Ta si Jehova maong; say panangasi to magnayon lawas, tan say katooran to maando ed amin a kailalakan.”—Salmo 100:4, 5.
15 Natan, saray magayagan totoo ed amin a nasyon so onloloob ed lolooban na santuaryo nen Jehova pian mangiyapay na pisasalamat tan galang. Sigagayaga tayo met a bebenditoen so ngaran na Dios diad panamegley na lawas pangibabaga na kamaongan nen Jehova, tan papakiwasen tayo na engrande iran kualidad a sikatoy galangen. Sikatoy sigpot a maong, tan say maaron-panangasi to odino panangabagey to’d ariripen to so lawas napanmatalkan, lapud saya so mantultuloy anggad panaon ya andi-angga. Diad “amin a kailalakan,” si Jehova so matoor ed pangipapanengneng na aro ed saramay manggawa ed linawa to. (Roma 8:38, 39) Sirin, maseguron walaan tayo na maabig a rason a ‘manlingkor ed si Jehova a tinekepan na liket.’
Manliket ed Ilalo Yo
16. Diad antoran ilalo tan iilaloan so nayarin mamagayaga ed saray Kristiano?
16 Insulat nen Pablo: “Manliket ed ilalo.” (Roma 12:12) Panliliketan na saray alanaan a patumbok nen Jesu-Kristo so maglorian ilalon imortal a mangatatawen a bilay a nilukasan na Dios ed sikara diad panamegley na Anak to. (Roma 8:16, 17; Filipos 3:20, 21) Saray Kristianon walaay ilalon maandon bilay ed Paraiso diad dalin so walaay basiyan met a manliket. (Lucas 23:43) Amin a matoor ya ariripen nen Jehova so walaan na rason pian manliket ed ilalon Panarian, lapud sikaray balanglan magmaliw a kabiangan na mangatatawen a gobierno odino sikaray manbilay ed mangaraldalin a sakop to. Agaylan makapagayagan bendisyon!—Mateo 6:9, 10; Roma 8:18-21.
17, 18. (a) Anto so nipasakbay ed Isaias 25:6-8? (b) Panon a nasusumpal iyan pasakbay nen Isaias natan, tan komusta met so nipaakar ed arapen?
17 Impasakbay met nen Isaias so sakey a magayagan arapen parad matulok a katooan. Insulat to: “Dia ed saya a palandey si Jehova na saray ejercito mangawa naani ed saray amin a baley na sakey a liket ed saray mataba a bengatla, sakey a liket na saray alak ed tapew na saray bolirek, saray mataba a bengatla a napno na utek, tan saray alak ed tapew na saray bolirek napaitneng ira. Et bagbagen to dia ed saya a palandey so lupa na sakbong a manakbong ed saray amin a baley, tan say pandong a nibilkag ed tagey na saray amin a nacion. Inakmon to so patey ed ando lan ando; et say Katawan a Jehova punasen to naani so saray lua ya onagus ed saray amin a lupa; et say kabalawan na baley to ekalen to naani a manlapu ed amin a dalin, ta si Jehova sikato so sinalita to.”—Isaias 25:6-8.
18 Say espiritual a piesta a pinanabangan tayo natan bilang managdayew nen Jehova so talagan sakey a makapagayagan pandoroypo. Diad tua, manleppuay gayaga tayo legan a siseseseg tayon manlilingkor ed Dios diad panilalo ed pandoroypo na literal a maong iran bengatla ya insipan to parad balon mundo. (2 Pedro 3:13) Diad letnegan na bagat nen Jesus, “[say] lupa na sakbong” a manasakbong ed katooan lapud kasalanan nen Adan so ekalen nen Jehova. Talagan makapagayaga so pakanengneng ed kaekal na kasalanan tan ipapatey! Agaylan ligsa so pangabrasa ed saray apaolin inad-aro, so pakaimanon anggapolay lua, tan say panbilay ed paraison dalin, a ditan et agla nabalaw so totoo nen Jehova noagta sikaray makapangiter na ebat ed Dios ed baleg a mamabalaw, si Satanas a Diablo!—Uliran 27:11.
19. Panon so ikiwas tayo ed saray iilaloan ya inyan nen Jehova ed arap tayo bilang Tastasi to?
19 Agta manleppua so gayaga tan pisadsalamat yo ed pakaamta ed no antoy gawaen nen Jehova parad ariripen to? On, saratan ya engranden ilalo so mangaarum ed gayaga tayo! Nagkalalo ni, say abenditoan ya ilalo tayo so manggagawa ed sikatayon manilalo ed maliket, maaro, tan mabunlok a Dios tayo tekep na onian liknaan: “Nia, saya sikato so Dios tayo; sikato so inalagar tayo, tan sikato ilaban to itayo. Saya sikato si Jehova; sikato so inalagar tayo, manliket tan mangayaga itayo dia ed panangilaban to.” (Isaias 25:9) Diad panamegley na masnag ya ilalo tayon mapekder a nipaslep ed kanonotan tayo, gawaen tayoy anggaay nayarian tayo pian lingkoran si Jehova tekep na gayaga na puso.
Panon Yon Ebatan?
◻ Panon tayon makapanlingkor ed si Jehova tekep na “gayaga ed puso”?
◻ Anto so gawaen tayo no anggapoy gayaga tayo ed panaglingkor ed Dios?
◻ Akin a makapangayaga so totoo nen Jehova anggaman ed panamasegsegang?
◻ Antoray rason a niwalad sikatayo a mangayaga ed ilalo tayo?
[Saray litrato ed pahina 17]
Say pibibiang ed amin a nengneng na Kristianon bilay so mamadaak ed gayaga tayo