Say Relihyon Mo—Kasin Sakey a Barkon Agnepeg a Taynan ed Kapiganman?
SAKEY a barko so walad utel na bagyo. Saray tripulante, a mapetepet a mipupuligesgesan diad pangisalba ed barko ra, so nidudunget ed apuraan a pandesisyon: balanglan mansiansia ed barko odino taynan itan tan isalba ra so inkasikara. Kasin kabat mo a sayan makapataktakot a senaryo et nauusar bilang teolohikon ilustrasyon?
Saray teologo, nagkalautla’d saray Katolikon iskolar, so mabetbet a mangikukumpara ed simbaan da ed sakey a barkon manggugunaet a makaliktar ed bagyo. Ikuan dan sayan barko, a si Jesus odino si Pedro so walad timon, so mangilalaman ed mogmon paraan na kisalba. Say panmoria na klero nipaakar ed satan et: ‘Agbalot tataynan so barko. Say simbaan so akasagmak la na seryoso iran krisis, balet satan so barkon akaliktar ed amin a bagyon linmabas ed awaran.’ Kuan na arum, ‘Akin a taynan itan? Wala ta ni panpilian? Akin ya agmansiansia tan ontulong a mangipaarap ed satan ed mas kalmadon danudanum?’
Mitunosan ed sayan piguratibon lenguahe, dakel a totoo, a membro na amin a nengneng na saray relihyon, so mangikatunongan, ‘Amtak ya agsustoy relihyon ko ed dakel a bengatla, balet ilaloan kon manguman itan. Agko labay a taynan itan. Labay koy mitulongan ed panalona na saray problema to.’ Say onian nengneng na panagkatunongan so nayarin pawalaen na masimoon a panamabli ed abangonan a relihyon na sakey odino lapud takot ed “pakapangitapat” ed satan.
Say matukoy ya alimbawa et samay nipaakar ed si Hans Küng, bantog a kritikon Katolikon teologo, a nanumameng: “Nepeg ko tan taynan so barko legan na bagyo, a taynan iramay kaibak a nanlayag anggad natan diad pangarap ed dagem, panlimas, tan ed pipuligesgesan ni ingen pian niliktar?” Inyebat to: “Agkon balot isuko so inkaepektibok ed loob na iglesia.” Sananey nin panpilian et say “isisian manlapud sayan iglesia, lapud insaew to, bilang kasalat na panangaro’d atagtagey iran totontonen, tan anganko, pian magmaliw a lalon autentiko iran Kristiano.”—Die Hoffnung bewahren.
Balet kasin makapansiansia so sakey a too ed barko na dilin iglesia to diad ilalon say Dios, diad panangasi to et abuloyan to ed ag-ageteran a panat na panaon so amin a relihyon pian manreporma? Satan so seryoson tepet. Singa ipapanengneng na ilustrasyon, say panapuran itaynan ed mamipeligron barko diad ilugan ed agmaligen iran lifeboat so singa inkapeligro na pansiansia ed onlelereg a barko. Makabat ta so pansiansia ed sakey ya iglesia ed antokaman a sagpot, antokaman so kipapasen to? Antoran posiblin reporma so iyoopresi na saray relihyon natan? Anggad kapigan ira abuloyan na Dios a mankimey sumpad linawa to?
[Picture Credit Line ed pahina 3]
Chesnot/Sipa Press