Saray Milagro nen Jesus—Awaran Odino Mito?
“Dia ed komapat a panagbantay ed labi sikato so linma ed sikara, ya manaakar ed tapew na dayat.”—Mateo 14:25.
PARAD minilyon ed sankamundoan, say panisian nanggawa na saray milagro si Jesu-Kristo so singa kaimportanti napanisia ed Dios a mismo. Saray managsulat na Ebanghelyo—Mateo, Marcos, Lucas, tan Juan—so manedeskribe 35 iran milagro nen Jesus. Anggaman ontan, isusuheri na saray salaysay da a sikatoy nanggawa na dakel nin labas-nen-natural a gawa.—Mateo 9:35; Lucas 9:11.
Sarayan milagro so ag-agawa parad panagpaliket. Saratan so makanan pamaakaran ed ibabaga nen Jesus a sikatoy Anak na Dios, say abayag-lan-tatalaranan a Mesias. (Juan 14:11) Nanggawa na mamilagro iran tanda si Moises sanen imparungtal toy inkasikato ed naaripen a nasyon na Israel. (Exodo 4:1-9) Makatunongan, say Mesias, say sakey a nipropesiyan magmaliw a babaleg nen say si Moises, so nailaloan met a mamawala na pakapatnagan na madibinon tulong. (Deuteronomio 18:15) Kanian tatawagen na Biblia si Jesus a “laki ya inabobonan na Dios ed sikayo [Judios] ed panamegley na saray gawa a makapanyari, tan makapakelaw, tan saray tanda.”—Gawa 2:22.
Diad apalabas iran panaon, andi-duaruwan inawat na totoo ed inkalapagan so panangipanengneng na Biblia ed si Jesus bilang managgaway milagro. Balet diad agano niran dekada, saray salaysay ed Ebanghelyo so dinmalan ed panamalaw na saray kritiko. Diad libro ton Deceptions and Myths of the Bible, tutukoyen nen Lloyd Graham so salaysay na Biblia nipaakar ed impanakar nen Jesus ed danum tan ibabaga to ni ingen: “Lapud katuaan a minilyon so mangipapanengneng na ontan ya inka-ignoranti, agtayo kaukolan a panumamengan a walay aliwa ed mundo tayo. Anton magmaong a mundo so pangibasiyan mo’d ontan ya inka-ignoranti?”
Imposibli?
Anggaman ontan, saratan a kritisismo so aliwan makatunongan. Uukeran na The World Book Encyclopedia so milagro bilang “ebenton agnisalaysay diad panamegley na kabkabat iran ganggan na palsa.” Unong ed satan ya uker, say color TV, cellular phone, odino laptop a computer so impasen iran milagro ed apalabas lambengat a siglo! Makatunongan ta so pagmaliw a dogmatiko tan ibagan imposibli so sakey a bengatla lapud agtayo nisalaysay itan unong ed kaplesan a sientipikon pikakabat?
Nia ni sananey a katuaan a kaukolan ya isipen: Diad orihinal a Griegon lenguahe ya akasulatan na “Balon Sipan,” say salitan inusar parad “milagro” so dyʹna·mis—salitan manunan mankabaliksay “pakayari.” Satan so nipatalos met a “makapanyari iran kimey” odino “abilidad.” (Lucas 6:19, NW; 1 Corinto 12:10, NW; Mateo 25:15) Ibabaga na Biblia a saray milagro nen Jesus so panangipatnag na “baleg a pakapanyari Dios.” (Lucas 9:43) Kasin imposibli iratan a gawa parad makapanyarin-amin a Dios—Sakey a walaan na “daakan a dinamikon biskeg”?—Isaias 40:26, NW.
Ebidensya na Inka-autentisidad
Say maapit a pangusisa ed apatiran Ebanghelyo so mamapawala na kaaruman ya ebidensyan napanisiaan iratan. Say sakey a punton kunsideraen et sarayan salaysay so nikaduman tuloy manlapud is-istorya tan saray tongtong-basilyo. Alimbawa, kunsideraen paray palson istorya a nikayat nipaakar ed si Jesus pigaran siglo kayari impatey to. Say apokripal ya “Ebanghelyo nen Tomas” so mangisasalaysay: “Sanen sayan ugaw a Jesus so mantaon na limara . . . , sikatoy linma ed purok, tan sakey a kapara ton ugaw a laki so akabet tan akadapigas ed takeb to. Si Jesus so asanokan tan inkuanto ed sikato: ‘Agka la makatuloy ed laen mo’, tan say ugaw so abaktar a tampol.” Agmairap a tebeken so tuan klase na sayan istorya—sakey a literaturan andi-katuaan. Niarum ni, say makapritso, paweg ya ugaw a nipanengneng dia so agmipara ed si Jesus na Biblia.—Ipareng so Lucas 2:51, 52.
Natan kunsideraen paray autentikon salaysay ed Ebanghelyo. Andian ira na inka-alablabas tan palson kabaliksan. Ginawa nen Jesus iray milagro nisesengeg ed tuan pankaukolan, aliwan say basta pamenek ed kaprisyo. (Marcos 10:46-52) Agbalot inusar nen Jesus iray pakayari to pian gunggunaan so inkasikato. (Mateo 4:2-4) Tan agton balot inusar iratan pian manpasirayew. Diad tua, sanen labay na maupapet ya Arin Herodes a manggawa si Jesus na mamilagron “tanda” parad sikato, “angapo’y inyebat [nen Jesus] ed sikato.”—Lucas 23:8, 9.
Saray milagro met nen Jesus so duman tuloy manlapud kimey na saray propesyonal ya ilusyonista, mahiko, tan saray managtambal. Saray makapanyarin kimey to so lawas angigloria ed Dios. (Juan 9:3; 11:1-4) Saray milagro to so andian na maemosyonal iran ritual, mahikon kankanta, panangipangaya, panamalikdo, tan hipnotismo. Sanen nabet nen Jesus so mipapayabol a bulag a manngaray Bartimeo a mankelyaw, “Rabboni, naawat ko komon so pakanengneng ko,” imbaga lambengat nen Jesus ed sikato: “Onla ka la, say pananisiam pinaabig to ka. Et tampol inawat to so pakanengneng to.”—Marcos 10:46-52.
Ipapanengneng na saray rekord na Ebanghelyo a ginawa nen Jesus iray makapanyarin kimey to ya andian na saray suporta, nagkalautla ed implanon sarsuela ed entablado odino maka-trik a liwawa. Saratan so ginawa ed arap na publiko, mabetbet diad imaton na dakel a makatasi. (Marcos 5:24-29; Lucas 7:11-15) Aliwan singa say panasali na saray modernon managtambal, saray sagpot ton manambal so agbalot sinmaew lapud kulang na pananisiay mansasakit. Kuan na Mateo 8:16: “Pinaabig to ’ray mabeblay.”
Diad libro ton “Many Infallible Proofs:” The Evidences of Christianity, onia so kuan nen Iskolar Arthur Pierson nipaakar ed saray milagro nen Kristo: “Say bilang da, say tampol tan kumpleton kalareker na saray ginawa ton impanambal, tan say katuaan ya anggapoy anggan sakey a sinmaew anggan diad impanalin impamaoli’d inaatey, so angiduman tuloy ed sarayan milagro manlapud saray kunkunwarin pakelaw na satan odino ed antokaman a peryodo’d awaran na too.
Sekular a Panamekder
Iyoopresi ni nen Pierson so sananey ya argumento a manusuporta ed saray salaysay na Ebanghelyo sanen inkuanto: “Anggapo la so lalon makatantandan panamekder ed saray milagro ed kasulatan nen say ag-impangiburi na saray Judion sumusumpa ed ginawa toran milagro.” Awalaan iray Judion pangulo na mabisbiskeg a motibo ed panangibaliwala’d si Jesus, balet ontanlan kabkabat iray milagro to a saray sumusumpa so agmangetman mangiburi’d saratan. Say nagawaan da lambengat et say pangibagan nanlapu iratan a gawa ed demonikon pakayari. (Mateo 12:22-24) Pigaran siglo kayari impatey nen Jesus, saray managsulat na Judion Talmud so nantultuloy ya amidbir ed si Jesus a walaay mamilagron pakayari. Unong ed libron Jewish Expressions on Jesus, sikatoy impulisay da bilang “manutumbok ed mahikon agagamil.” Kasin say ontan a komento so ginawa no anggan samsamet a posiblin nipulisay iray milagro nen Jesus bilang mito lambengat?
Saray kaaruman a prueba so manlalapud komapat-a-siglon iglesian manag-awaran a si Eusebius. Diad libro ton The History of the Church From Christ to Constantine, aaonen to si Quadratus ya angipawit na sakey a sulat ed emperador diad pangidepensa’d Inkakristiano. Insulat nen Quadratus: “Saray kimey na Manangilaban tayo so lawas wadtan pian naimano, ta sikaray tua—saray totoon atambal tan saramay pinaoli manlapud inaatey, so aglambengat anengneng ed panaon sanen sikaray atambal odino apaoli, balet lawas wadtan pian naimatonan, aliwa lambengat a sanen walad limog tayo so Manangilaban, balet diad andukey a panaon kayari inyalis To; diad tua et pigara’d sikara so mabilay ni anggad panaon ko.” Inkuan nen iskolar a si William Barclay: “Ibabaga nen Quadratus ya anggad dilin agew to a saramay totoon akagawaan na saray milagro so talagan napawala bilang ebidensya. No satan so aliwan tua, anggapo lay magmainomay a nagawaan na Romanon gobierno nen say pangibaga’d satan ya ibabaga bilang sakey a tila.”
Say panisia ed saray milagro nen Jesus so makatunongan, makabaliksan, tan sigpot a mitunosan ed ebidensya. Anggaman kuan, saray milagro nen Jesus so aliwan awaran ya andiay kaimportantian ed panaon tayo. Ipapanonot na Hebreos 13:8 ed sikatayo: “Si Jesu-Cristo sikato met lanlamang karuman, tan natan, on tan ed ando lan ando.” On, sikato so mabilay diad katawenan natan, a sarag ton usarey mamilagron pakayari ed lalon engranden paraan nen say ginawa to sanen wadiad dalin bilang too. Niarum ni, saray salaysay na Ebanghelyo ed saray milagro to so (1) mangibangat na praktikal iran leksion ed Kristianos natan, (2) mangiparungtal ed makapakelaw iran pamaakaran na personalidad nen Jesus, tan (3) mangipaimano ed panaon diad asingger ya arapen sano saray nagkalalon makatantandan ebento so nagawa!
Say ontumbok ya artikulo so mangiyapasakey na imano ed taloran kabkabat a salaysay ed Biblia pian iyilustra irayan punto.